Гледиште на Библијата

Дали христијаните треба да ги мразат хомосексуалците?

ВО 1969 година, во англискиот јазик беше образуван еден збор кој го опишува неразумниот страв или аверзија кон хомосексуалците. Тој збор е „хомофобија“. Многу јазици немаат таков специфичен збор, но сепак, со илјадници години, луѓе од многу нации и јазици јавно изнесувале антипатија кон хомосексуалците.

Меѓутоа, во поново време хомосексуалноста нашироко се унапредува едноставно како еден алтернативен облик на сексуално изразување. Историчарот Џери З. Милер неодамна напишал за едно „сѐ поголемо барање за јавно признавање и почитување на хомосексуалноста како таква“. Тој објаснил дека хомосексуалците „сѐ повеќе се здружуваат за да ја прокламираат нивната практика како пофална и за да бараат и другите да го прават тоа“. Ова се гледа особено во земјите на Западот. Меѓутоа, во повеќето делови на светот, дури и во таканаречените либерални земји, многумина сѐ уште ја осудуваат и презирно ја одбиваат хомосексуалноста.

Хомосексуалците и оние што се осомничени за хомосексуалност честопати се издвоени како мета за презирни забелешки, шиканирање и насилство. Дури и религиозните водачи покажувале таква омраза. Некои започнале со она што може да изгледа како нивни сопствени приватни војни против хомосексуалците. Земете ги за пример коментарите што ги дал еден бискуп на Грчката православна црква, кои неодамна биле емитувани на грчкото национално радио. Тој изјавил: „Бог засекогаш ќе ги гори хомосексуалците во огнената бездна на пеколот. Писоците од нивните гнасни усни ќе одекнуваат во сета вечност. Нивните перверзни тела ќе доживуваат неподносливо мачење“. Дали ова навистина е точно? Што мисли Бог за хомосексуалците?

Божјето гледиште

Библијата не свртува посебно внимание на хомосексуалците како група која христијаните треба да ја изопштуваат или да ја мразат. Освен тоа, таа не поучува дека Бог ќе ги казни хомосексуалците — или некое од неговите созданија — засекогаш горејќи ги во огнен пекол. (Спореди Римјаните 6:23.)

Меѓутоа, Библијата ги изложува моралните мерила на нашиот Создател, кои честопати се спротивни со современите норми на однесување. Хомосексуалните дела, хетеросексуалните односи помеѓу невенчаните лица и бестијалноста се осудени во Библијата (2. Мојсеева 22:19; Ефесјаните 5:3—5). Бог ги уништил Содом и Гомор поради таквите сексуални практики (1. Мојсеева 13:13; 18:20; 19:4, 5, 24, 25).

Во врска со делата на хомосексуалност, Божјата Реч остро вели: „Тоа е омразена работа“ (3. Мојсеева 18:22, The New Jerusalem Bible). Божјиот закон до Израел пропишувал: „Ако некој легне со маж како со жена, и обајцата извршиле гнасно дело: да бидат убиени“ (3. Мојсеева 20:13). Истата казна била пропишана и за оние кои извршувале бестијалност, инцест и прељуба (3. Мојсеева 20:10—12, 14—17).

Апостол Павле бил инспириран да ги опише хомосексуалните постапки како израз на „срамни страсти“ и како „противприродни“. Тој пишува: „Затоа Бог ги предаде на срамни страсти: жените нивни природните потреби ги заменија со противприродни; и мажите исто така; оставајќи го природното зближување со женскиот пол, се распалија со желби еден кон друг, и вршеа срамни работи мажи со мажи, добивајќи отплата каква што одговараше на нивната заблуда. И бидејќи не се обидоа да Го имаат Бога во разумот свој, тоа Бог ги предаде на изопачен ум — да го прават она, што не прилега“ (Римјаните 1:26—28).

Писмото не дава никакво оправдување, отстапување или двосмисленост; хомосексуалните постапки, прељубата и блудот се одбивни во Божјите очи. Според тоа, вистинските христијани не го разводнуваат библискиот став за ‚срамните страсти‘ само за да стане попопуларен или поприфатлив за современата култура. Тие не се согласуваат дури ни со некакво движење кое е посветено на унапредувањето на хомосексуалноста како нормален животен стил.

„Мразете го злото“

Библијата опоменува: „Вие, кои Го сакате Господа, мразете го злото“ (Псалм 96:10). Значи, од христијаните се очекува да ја мразат секоја постапка која ги прекршува Јеховините закони. Некои луѓе можеби реагираат со посилни чувства на одбивност или гнасење кон хомосексуалноста отколку кон другите видови неморал, сметајќи ја хомосексуалноста за неприродна сексуална перверзија. Меѓутоа, дали христијаните треба да ги мразат поединците кои практикуваат такви работи?

Псалмистот фрла некаква светлина врз ова спорно прашање во Псалм 138:21, 22: „Зар не ги замразив оние, Господи, кои Тебе те мразат, и зар не се изедов поради непријателите Твои? Со полна омраза ги замразив; тие ми станаа непријатели“. Нашата лојалност кон Јехова и кон неговите начела треба да предизвика во нас силна антипатија кон оние кои намерно се бунат против Јехова и кои заземаат став како Божји непријатели. Сатана и демоните се меѓу таквите потврдени непријатели на Бог. Некои луѓе исто така веројатно спаѓаат во оваа категорија. Сепак, може да биде многу тешко еден христијанин да ги идентификува таквите луѓе според надворешниот изглед. Ние не можеме да ги читаме срцата (Јеремија 17:9, 10). Би било погрешно да сметаме дека некој е непоправлив непријател на Бог затоа што практикува зло. Во многу случаи злотворците едноставно не ги знаат Божјите мерила.

Значи, општо земено, христијаните се бавни во тоа да ги мразат другите луѓе. Дури и ако имаат силни чувства на одвратност кон извесни животни стилови, тие не настојуваат да ги повредат другите ниту, пак, негуваат пакост или злоба кон нив. Наместо тоа, Библијата ги советува христијаните ‚да бидат во мир со сите луѓе‘ (Римјаните 12:9, 17—19).

„Бог не е пристрасен“

Јехова ќе му прости на оној кој вистински се кае, без оглед каков неморал извршувало тоа лице. Не постои доказ дека Јехова смета еден облик на неморал за полош од друг. „Бог не е пристрасен“ (Дела 10:34, 35, NW). На пример, разгледајте го случајот на коринтското собрание од првиот век. Апостол Павле им напишал: „Ниту блудниците, ниту идолопоклонците, ниту прељубниците, ниту мажите кои се држат за неприродни цели, ниту мажите кои легнуваат со мажи, ниту крадци, ниту лакоми, ниту хулници, ниту уценувачи нема да го наследат Божјето Царство“. Потоа Павле признал дека некои поранешни блудници, прељубници, хомосексуалци и крадци биле прифатени во христијанското собрание во Коринт. Тој објаснил: „А сепак такви беа некои од вас. Но вие сте се измиле, но вие сте се посветиле, но вие сте се оправдале во името на нашиот Господ Исус Христос и со духот на нашиот Бог“ (1. Коринтјаните 6:9—11, NW).

Се разбира, Јехова не толерира никакво постојано и упорно прекршување на неговите совршени морални мерила. Тој дефинитивно го мрази тврдоглавото занемарување на неговите начела. Меѓутоа, тој ја држи отворена вратата за помирување (Псалм 85:5; Исаија 55:7). Во склад со ова, христијаните не ги прават хомосексуалците или, пак, некој друг, мета на пакост, исмејување или шиканирање. Вистинските христијани ги гледаат другите луѓе како потенцијални ученици на Христос, постапувајќи со нив на еден учтив и достоинствен начин. Библијата вели: „Тоа е добро и угодно пред нашиот Спасител Бога, Кој сака сите луѓе да се спасат и да ја познаат вистината“ (1. Тимотеј 2:3, 4).

Христијаните им изразуваат добредојде на покајниците

Секогаш одново Библијата изјавува дека Бог простува. Таа го опишува како „Бог, Кој сака да проштава, добар и милостив, долготрпелив и многумилостив“ (Неемија 9:17; Језекиил 33:11; 2. Петрово 3:9). Понатаму, Библијата го споредува со таткото од Исусовата парабола за расипничкиот син кој го потрошил своето наследство на разврат во некоја далечна земја. Таткото чекал со отворени раце за да го дочека назад својот син кога синот конечно се вразумил, се покајал и се вратил во својот семеен дом (Лука 15:11—24).

Да, можно е еден престапник да се промени. Писмото го признава ова охрабрувајќи ги луѓето да ја соблечат старата личност и да ја облечат новата и ‚да бидат обновени во силата која го покренува умот‘ (Ефесјаните 4:22—24, NW). Оние кои го практикуваат она што е лошо, вклучувајќи ги и хомосексуалците, можат да направат радикални промени во нивниот образец на размислување и однесување — многумина навистина биле успешни во правењето на оваа преобразба.a Самиот Исус им проповедал на таквите; а кога покажале каење, тие му станале прифатливи (Матеј 21:31, 32).

Христијаните им изразуваат добредојде на луѓето од различни општествени слоеви. Откако ќе ги остават зад себе неморалните постапки, какви и да биле тие, сите можат да се радуваат на Божјето простување затоа што „Јехова е добар спрема сите, и неговите милости се над сите негови дела“ (Псалм 145:9, NW).

Христијаните се спремни да ја дадат потребната духовна поддршка, па дури и на оние кои сѐ уште се борат со хомосексуалните склоности. Ова е во склад со самата Божја манифестација на љубов, бидејќи Библијата вели: „Бог ја докажа љубовта Своја кон нас со тоа, што Христос умре за нас, уште додека бевме грешни“ (Римјаните 5:8).

[Фуснота]

[Истакната мисла на страница 14]

Христијаните не го разводнуваат библиското гледиште за хомосексуалноста

[Извор на слика на страница 13]

Punch