Гледиште на Библијата

Дали сите религии се различни патишта што водат до Бог?

„НАВИСТИНА не ми се верува дека Богот на целиот универзум избрал да биде познат според една религиозна традиција“, изјавил авторот Маркус Борг. Нобеловецот Дезмонд Туту рекол: „Ниедна религија не може да тврди дека ја има целата вистина за мистеријата“ на верата. Едно популарно хиндуско гледиште е „Јото мот, тото пот“, што во слободен превод значи дека сите религии се само различни патишта што водат до иста цел. И будистите го имаат истото гледиште. Впрочем, милиони луѓе веруваат дека сите религии се различни патишта што водат до Бог.

Историчарот Џефри Париндер рекол: „Понекогаш се вели дека сите религии имаат иста цел или дека се исти патишта до вистината, па дури и дека сите учат за истите доктрини“. Науките, ритуалите и божествата на религиите навистина се слични. Повеќето религии зборуваат за љубовта и поучуваат дека не е исправно да се убива, да се краде и да се лаже. Во повеќето религиозни групи, некои вложуваат искрени напори да им помагаат на другите. Според тоа, ако некој е искрен во своите верувања и настојува да води добар живот, дали е важно на која религија ѝ припаѓа? Зарем сите религии не се само различни патишта што водат до Бог?

Само искреност — дали е доволна?

Да го разгледаме случајот на Савле, Евреин што живеел во првиот век, кој станал христијански апостол познат како Павле. Тој бил многу ревносен приврзаник на јудаизмот и тоа го натерало да се обиде да го задуши обожавањето на Христовите следбеници, за кое мислел дека е неисправно (Дела 8:1—3; 9:1, 2). Но, преку Божјата милост Савле сфатил дека многу религиозните луѓе како што бил и самиот тој може да имаат ревност за Бог, но сепак, заради тоа што не располагаат со сите факти, можеби грешат (Римјаните 10:2). Кога Савле научил нешто повеќе за Божјата волја и постапки, се променил и почнал да обожава заедно со оние што ги прогонувал — следбениците на Исус Христос (1. Тимотеј 1:12—16).

Дали Библијата вели дека има стотици вери од кои треба да се избере една и дека на Бог му е сеедно која ќе ја избереме? Апостол Павле добил упатства од воскреснатиот Исус Христос, кои го тврделе сосема спротивното. Исус го испратил кај луѓето од нациите ‚да им ги отвори очите, да ги обрати од темнината кон светлината и од власта на Сатана кон Бог‘ (Дела 26:17, 18). Јасно, важно е која религија ќе ја избереме. Многу луѓе кај кои бил испратен Павле веќе си имале своја религија. Но, тие биле во ‚темнина‘. Впрочем, ако сите религии се едноставно различни патишта што водат до вечен живот и Божја наклоност, не би имало потреба Исус да ги поучува своите следбеници за делото на правење ученици што им дал налог да го извршуваат (Матеј 28:19, 20).

Во својата прочуена Проповед на гората, Исус рекол: „Влезете низ тесната порта; бидејќи широк е и простран патот што води во уништување, и мнозина се оние кои одат по него; додека тесна е портата и тесен патот што води во живот, и малцина се оние кои го наоѓаат“ (Матеј 7:13, 14). Библијата јасно наведува дека има „една вера“ (Ефешаните 4:5). Јасно, многумина од оние што се на ‚пространиот‘ пат имаат своја религија. Но, тие ја немаат таа „една вера“. Бидејќи има само еден исправен облик на обожавање, оние што сакаат да ја пронајдат таа вистинска вера ќе мора да ја побараат.

Потрага по вистинскиот Бог

Од самиот почеток на човечката историја, Бог им кажал на луѓето што сака тие да прават (Битие 1:28; 2:15—17; 4:3—5). Денес, неговите барања се јасно објаснети во Библијата. Ова ни овозможува да правиме разлика помеѓу прифатливото и неприфатливото обожавање (Матеј 15:3—9). Некои луѓе ја наследиле својата религија, додека други едноставно го следат мноштвото. За многумина, религијата зависи единствено од тоа кога и каде се родени. Меѓутоа, дали треба изборот на религија да го препуштите на случајноста или, пак, да дозволите другите да ја донесат таа одлука наместо Вас?

Вашиот избор на религија треба да биде информиран избор што се темели на внимателно испитување на Писмото. Во првиот век, извесни образовани луѓе направиле повеќе отколку само да ги прифатат Павловите зборови кога првпат ги чуле. Тие ‚секојдневно внимателно го испитувале Писмото дали е тоа така‘ (Дела 17:11; 1. Јованово 4:1). Зошто и Вие не го направите истото?

Библијата вели дека Богот на универзумот бара луѓе што ќе го обожаваат во вистина. Како што е запишано во Јован 4:23, 24, Исус објаснил: „Сепак, доаѓа часот, и сега е тука, кога вистинските обожаватели ќе го обожаваат Таткото со дух и со вистина, зашто, навистина, Таткото бара такви да го обожаваат. Бог е Дух, и оние кои го обожаваат, мораат да го обожаваат со дух и со вистина“. За него е прифатливо само ‚обожавањето кое е чисто и неизвалкано од гледна точка на нашиот Бог и Татко‘ (Јаков 1:27). Бог ја благословил потрагата на милиони луѓе да го најдат тесниот пат што води во живот. Тој нема да им даде вечен живот на оние што се рамнодушни туку на оние што вложуваат вистински напори да го пронајдат тесниот пат што го покажал тој и потоа одат по него (Малахија 3:18).