Гледиште на Библијата

Дали пијанството навистина е толку лошо?

СИМПАТИЧНИОТ пијаница што ги засмејува луѓето со години бил главен лик во театарските претстави и во филмовите. Иако овие забавувачи можеби само глумат, ваквиот хумор дава јасна слика за двојното мерило што некои го имаат во однос на пијанството — од една страна го сметаат за слабост, но истовремено на него гледаат и како на нешто безопасно.

Се разбира, реалноста воопшто не е смешна. Светската здравствена организација ја наведува злоупотребата на алкохол како една од главните опасности за здравјето на луѓето во светот. Се наведува дека злоупотребата на алкохол е причина за повеќе смртни случаи и болести отколку злоупотребата на која и да е друга супстанција што создава зависност — со исклучок на зависноста од тутун. Освен тоа, само стопанството во САД годишно осиромашува за преку 184 милијарди долари.

Наспроти овие факти, мнозина и понатаму ја потценуваат сериозноста на прекумерното пиење. Иако ги признаваат штетните последици од долготрајната употреба на алкохол, не гледаат ништо лошо во тоа ако некој одвреме навреме добро се изнапие. Меѓу младите во некои делови од светот, пијанството се смета за показател на преодниот период од деца во возрасни. Исто така, и покрај сериозните предупредувања од страна на здравствените организации, драстично се зголемува бројот на луѓе од сите возрасти што ќе се изнапијат на некоја седенка, то ест, ќе испијат пет или повеќе пијачки на екс. Затоа, сосема е разбирливо што многу луѓе се прашуваат дали пијанството навистина е толку лошо. Што вели Библијата?

Виното и жестокиот пијалак — дарови од Бог

Во Библијата многупати се спомнуваат виното и жестокиот пијалак. Цар Соломон напишал: „Јади го својот леб со радост и пиј го своето вино со весело срце, зашто на Бога веќе порано Му се допадна твоето дело“ (Проповедник 9:7). Псалмистот потврдил дека Јехова Бог е оној што дава „вино, што го развеселува човечкото срце“ (Псалм 104:14, 15). Јасно е дека виното е еден од даровите што Јехова им ги дал на луѓето како благослов.

Очигледно е дека за Исус било сосема прифатливо да се пие вино. Всушност, неговото прво чудо било тоа што на една свадба ја претворил водата во квалитетно вино (Јован 2:3—10). Исто така, тој го користел виното како соодветен симбол за неговата крв кога ја воспоставил Господовата вечера (Матеј 26:27—29). Библијата ја спомнува дури и лековитата вредност на виното — апостол Павле го охрабрил Тимотеј ‚да зема по малку вино поради својот желудник‘ (1. Тимотеј 5:23; Лука 10:34).

Клучот е во умереноста

Забележете дека Павле препорачал да се пие само „по малку вино“. Библијата јасно ја осудува секоја неумерена употреба на алкохол. На еврејските свештеници им било дозволено да пијат умерено кога не биле на должност во храмот. Меѓутоа, им било забрането да пијат каков и да е алкохолен пијалак додека ја извршувале својата свештеничка служба (Левит 10:8—11). Многу години оттогаш, во првиот век, христијаните биле опоменати дека пијаниците „нема да го наследат Божјето царство“ (1. Коринќаните 6:9, 10).

Понатаму, во упатствата што Павле му ги дал на Тимотеј, се вели дека оние што предводат во собранието не смеат да бидат ‚пијани кавгаџии‘ или да „се оддаваат на многу вино“a (1. Тимотеј 3:3, 8). Всушност, Библијата заповеда непокајничките пијаници да се отстранат од христијанското собрание (1. Коринќаните 5:11—13). Писмото јасно вели: „Виното е потсмевнувач“ (Пословици 20:1). Оној што претерано ужива алкохол може да изгуби контрола над себеси и да постапува неразумно.

Зошто Божјата реч го осудува пијанството

Јехова, кој ‚нѐ учи за наше добро‘, знае дека кога злоупотребуваме нешто, на крајот си наштетуваме и себеси и на другите (Исаија 48:17, 18). Тоа важи и за пиењето алкохолни пијалаци. Божјата реч прашува: „Кому ах? Кому: леле? Кому: препирки? Кому: воздишки? Кому: рани за ништо? Кому: заматени очи?“ Одговорот е: „На оние што седат доцна покрај виното, што дошле да го испитуваат зачинетото вино“ (Пословици 23:29, 30).

Под дејство на премногу алкохол, луѓето прават многу непромислени и опасни работи: возат пијани и го загрозуваат својот и животот на другите, стануваат преблиски со туѓ брачен другар и сериозно ги нарушуваат меѓучовечките односи, зборуваат и постапуваат глупаво, па дури и перверзно (Пословици 23:33). Злоупотребата на алкохол со право е наречена едно од најголемите зла на општеството што го измачуваат човештвото денес. Не е ништо чудно што Бог опоменува: „Не дружи се со винопијачите“! (Пословици 23:20).

Во Галатите 5:19—21, Павле ги вбројува пијанките и лумпувањата во „делата на телото“, спротивно на плодовите на Божјиот дух. Претераното уживање алкохол ќе го наруши личниот однос со Бог. Затоа, јасно е дека христијаните треба да избегнуваат секаква неумерена употреба на алкохол.

[Фуснота]