Зошто да одам на христијанските состаноци?

УБАВО ЛИ ТИ Е НА СОСТАНОЦИ?

ДА → САМО ПРОДОЛЖИ ТАКА

НЕ → ШТО МОЖЕШ ДА СТОРИШ?

БИБЛИЈАТА им заповеда на христијаните да се собираат заедно за да му оддаваат почит на Бог (Евреите 10:25). Но, што ако едноставно не ти е убаво во тие прилики? Што ако ти се случува умот да почне да ти лета на нешто што би можел да го правиш кога би бил на друго место — на кое и да било друго место? Смени нешто така што ќе пробаш еден или повеќе од следниве предлози.

1. БИДИ РЕДОВЕН

Главен стих: „Да не ги пропуштаме нашите состаноци, како што некои имаат обичај“ (Евреите 10:25).

Зошто би сакал редовно да правиш нешто во што не уживаш? Едноставно кажано, затоа што така ќе научиш да уживаш во тоа! Колку ќе бидеш добар во некој спорт — и колку ќе го сакаш — ако одиш на тренинг само понекогаш? Истото важи и за христијанските состаноци. Колку почесто одиш во толку подобра духовна форма ќе бидеш. Тоа, пак, ќе те поттикне да сакаш да одиш на состаноци! (Матеј 5:3).

Предлози: По секој состанок, кажи му макар на еден од оние што имале точка, што ти се допаднало во неговото изнесување. Запиши си во дневник една позитивна работа од состанокот. А бидејќи поголемиот дел од материјалот што се разгледува на состаноците е во врска со проповедањето, постави си цел да се подобруваш кога разговараш со другите за твојата вера. Така, информациите што ќе се разгледуваат на состаноците ќе ти значат повеќе.

„Уште од мала ме учеа дека состаноците не се работа на избор. Ни како дете никогаш не помислив дека може и да не одам. Овој став го имам и ден-денес“ (Келси).

Заклучок: Оние што редовно одат на состаноци повеќе уживаат во нив — и повеќе добиваат од нив!

2. ВНИМАВАЈ

Главен стих: „Внимавајте како слушате“ (Лука 8:18).

Истражувачите велат дека на крајот од денот, во просек забораваме 60 отсто од она што сме го чуле. Да ти ги снемуваше парите толку брзо, зарем немаше да направиш нешто?

Предлози: Седи со родителите понапред во салата, каде што помалку работи ќе ти го одвлекуваат вниманието. Запишувај. Иако сите имаме различни методи на учење, со тоа што ќе запишуваш вниманието ќе ти остане насочено на говорникот — а и подоцна ќе можеш да се потсетиш на мислите.

„Многу ми беше тешко да се концентрирам на состаноците, ама успеав да се подобрам. Се потсетувам зошто сум таму. Состаноците не се само нешто што се прави од навика, како што за некои е одењето во црква. Одам на состаноци за да го славам Бог и да учам — да чујам нешто што можам да го применам во животот“ (Кетлин).

Заклучок: Да одиш на состанок и да не внимаваш е исто како да одиш на гозба и да не јадеш.

3. БИДИ АКТИВЕН

Главен стих: „Железо со железо се остри. Така човекот го остри лицето на друг човек“ (Изреки 27:17).

Како млад човек, ти имаш важна улога на собраниските состаноци. Никогаш не заборавај дека многу значи кога си присутен и активен — било со тоа што ќе коментираш или ќе се дружиш со соверниците.

Предлози: Постави си цел да коментираш барем еднаш кога има точка со прашања и одговори. Пријави се да помагаш кога треба да се чисти или да се заврши некоја друга работа пред, за време на и по состанокот. Поразговарај со некој со кого обично немаш можност да зборуваш.

„Кога имав 15-16 години, им кажав на одговорните дека би можел да носам микрофони и да го местам пултот на состаноците. Кога ги добив тие задолженија, се чувствував корисен, а тоа ми даде поттик редовно да одам на состаноци и да доаѓам навреме. Така повеќе се заинтересирав за духовните работи“ (Мајлс).

Заклучок: Немој само да седиш — прави нешто! Многу поинтересно е да бидеш учесник отколку само набљудувач.

Статии од рубриката „Младите прашуваат“ има и во други броеви од списанието Разбудете се! кое можеш да го симнеш од веб-страницата www.jw.org

[Рамка/слики на страница 21]

ДОЈДИ И ТИ!

Би сакал ли...

● да ја дознаеш вистината за Бог?

● да станеш подобра личност?

● да најдеш вистински пријатели?

Состаноците на Јеховините сведоци можат да ти помогнат во овие работи — но и во многу други! Двапати седмично, тие се собираат во својата Сала на Царството за да го слават Бог. На нивните состаноци е добредојден секој и прилози не се задолжителни.

Повели, дојди и ти! Салата на Царството не е како ниедна црква во која си бил. На состаноците на Јеховините сведоци главен акцент се става на библиските поуки и таму ќе дознаеш како може Божјата Реч да ти помогне да водиш добар живот! (5. Мојсеева 31:12; Исаија 48:17).

Сај — Кога првпат влегов во Салата на Царството, се изненадив што не видов никакви идоли, никој не беше облечен како свештеник и никој не ми побара пари. Сите срдечно ме пречекаа и се чувствував пријатно. Она што се зборуваше на состанокот можеше лесно да се разбере и беше многу логично. Тоа беше вистината што ја барав!

Дејнира — Имав 14 години кога првпат отидов на состанок на Јеховините сведоци. Сите се поздравија со мене. Изгледаше дека навистина им е мило што сум таму и дека вистински се интересираа за мене. Затоа што првиот пат си поминав толку убаво, воопшто не ми беше срам пак да отидам!

[Рамка на страница 22]

Провери што ќе се обработува на следниот собраниски состанок. Одбери една точка од програмата што најмногу те интересира и...

ИСЕЧИ И КОПИРАЈ

Пополни го овој дел пред да одиш на состанок.

Наслов на точката:

․․․․․

⇩

Што сакам да знам на оваа тема:

․․․․․

Пополни го овој дел по состанокот.

Што научив:

․․․․․

⇩

За што би можел да го пофалам говорникот:

․․․․