Библијата — книга со точни пророштва — дел 3

„Го најдовме Месијата“

Во оваа серија од осум статии е разгледано едно извонредно обележје на Библијата — пророштвата запишани во неа. Статиите ќе ти помогнат да дојдеш до одговорот на овие прашања: Дали библиските пророштва се едноставно производ на некои паметни луѓе? Или, пак, се дело на Бог? Испитај што велат доказите.

МНОГУ векови пред да се роди Исус, еврејските пророци пророкувале за доаѓањето на Месијата, што на хебрејски значи „Помазаник“. Тие навеле конкретни детали за животот на Месијата — вклучувајќи ја и неговата семејна лоза — каде и кога ќе дојде и што ќе му се случи.

Христијаните во првиот век верувале дека тие пророштва ги исполнил Исус. Тие имале исто мислење како ученикот Андреј, кој на својот брат Симон му рекол: „Го најдовме Месијата“ (Јован 1:40, 41). Дали тој заклучок бил точен? Да разгледаме само четири од многуте пророштва за Месијата, а за секое од нив ќе ги разгледаме и доказите.

Пророштво 1: „Неговата власт и мирот бескраен ќе растат врз престолот на Давид“ (Исаија 9:7, „Превод на МПЦ“).

Исполнување: Евангелието по Матеј почнува со следниве зборови: „Ова е книга за животот на Исус Христос, синот Давидов, син Авраамов“. Потоа Матеј ја наведува семејната лоза на Исус преку Давид, а истото го прави и писателот Лука (Матеј 1:1-16; Лука 3:23-38).

Што вели историјата:

● Она што го напишал еврејскиот историчар Јосиф покажува дека генеалошките записи за еврејските семејства биле достапни во јавни архиви. Тие записи биле уништени во 70 год. од н.е. кога Ерусалим бил разорен. Но, пред уништувањето на Ерусалим, тврдењето дека Исус е потомок на Давид било нашироко познато (Матеј 9:27; 20:30; 21:9). Да било неговото тврдење лага, секој ќе можел да го провери, па дури и да го побие. Но, нема ниеден запис дека некој се обидел да направи такво нешто.

Пророштво 2: „Ти, Витлееме Ефрато, кој си најмал од Јудините градови, од тебе ќе ми излезе оној што ќе биде владетел во Израел“ (Михеј 5:2).

Исполнување: Исус се родил во Витлеем. Кога цезарот Август наредил да се направи попис на населението, Јосиф, очувот на Исус, морал да оди од Назарет во ‚Јудеја [Јуда], во Давидовиот град, наречен Витлеем, бидејќи бил од домот и од семејството на Давид, за да се попише со Марија‘. Додека биле таму, Марија, ‚го родила својот син‘, Исус (Лука 2:1-7).

Што вели историјата:

● Археологијата потврдува дека Римјаните спроведувале пописи на Блискиот Исток за да имаат увид во бројот на даночни обврзници и лица со воена обврска. Докази за еден таков попис наоѓаме во една наредба што ја издал римскиот управител во Египет во 104 год. од н.е. Препис на таа наредба, кој сега се чува во Британската библиотека, гласи: „Бидејќи дојде време да се изврши попис во секоја куќа, неопходно е да се натераат сите што, од која и да е причина, не живеат во своето родно место да се вратат во своите домови за уредно да се попишат, и исто така совесно да го обработуваат земјиштето што им е доделено“.

● Во времето кога се родил Исус, во Израел имало два града по име Витлеем. Едниот бил на север, во близина на Назарет. Другиот, кој очигледно порано бил познат како Ефрата, се наоѓал близу Ерусалим во Јуда (1. Мојсеева 35:19). Исус се родил во вториот, токму како што прорекол Михеј околу осум века пред тоа.

Пророштво 3: „Од часот кога ќе излезе речта да се обнови и повторно да се изгради Ерусалим па до Месијанскиот Водач ќе поминат седум седмици, и уште шеесет и две седмици“ (Даниел 9:25).

Исполнување: Времето наведено во пророштвото на Даниел изнесува 69 периоди од по 7 години, или вкупно 483 години. Ерусалим почнал повторно да се гради во 455 год. пр.н.е. Како што било проречено, по 483 години (69 седмици што се состоеле од години), во 29 год. од н.е., Исус станал Помазаник, или Месија, кога се крстил и бил помазан со Божјиот свет духa (Лука 3:21, 22).

Што вели историјата:

● Во почетокот на првиот век од н.е., ‚народот бил во исчекување‘ на Месијата (Лука 3:15). Во својата книга Историја на теориите околу Месијата во Израел (A History of Messianic Speculation in Israel), еврејскиот автор Аба Хилел Силвер пишува дека во периодот пред уништувањето на Ерусалим „имало големи надежи и исчекувања околу доаѓањето на Месијата“. Исто така, пишува и дека „се очекувало Месијата да дојде некаде околу втората четвртина од првиот век“. Силвер наведува дека очекувањата на Евреите се темелеле на „тогашното мислење во врска со настаните што требало да се случат“.

Пророштво 4: „Гробот ќе му биде меѓу злосторниците и меѓу богатите“ (Исаија 53:9).

Исполнување: Исус бил погубен заедно со двајца разбојници, а сепак бил погребан во гроб издлабен во карпа, дар од еден богат верник — Јосиф од Ариматеја (Матеј 27:38, 57-60; Јован 19:38).

Што вели историјата:

● Голем број древни писатели кои не биле христијани — вклучувајќи ги и еврејскиот историчар Јосиф и римскиот историчар Тацит — потврдуваат дека Исус бил погубен како криминалец.

● Со археолошките ископувања во Палестина откриени се древни гробови кои, всушност, биле шуплини или вдлабнатини во карпа. За еден богат и влијателен човек како Јосиф од Ариматеја воопшто не било проблем да поседува една таква гробница.

Ова беа само неколку од многуте месијански пророштва што се исполниле на Исус. Очигледно, ниеден човек не можел да го фалсификува исполнувањето на овие детални пророштва. Нивното точно исполнување ни ја зајакнува верата дека тие потекнуваат од Бог и дека тој ќе направи послушните луѓе да ги доживеат сите проречени благослови поврзани со Месијата.

Во следната статија од оваа серија ќе биде разгледано едно интересно прашање: Ако Исус навистина бил ветениот Месија, зошто дозволил да страда и да умре?

[Фуснота]

[Табела/слики на страници 22 и 23]

(Види во публикацијата)

ВРЕМЕНСКИ ПРИКАЗ НА ЧЕТИРИТЕ МЕСИЈАНСКИ ПРОРОШТВА

1. Месијата ќе биде потомок на цар Давид

1070 пр.н.е.

Давид станува цар над целиот Израел

607 пр.н.е.

Ерусалим е уништен од Вавилонците

455 пр.н.е.

Издадена е наредба повторно да се изгради Ерусалим

2. Месијата треба да се роди во Витлеем во Јуда

2 пр.н.е.

Исус е роден во Витлеем во Јуда во семејната лоза на Давид

3. Месијата ќе се појави 483 години откако ќе биде дадена наредба повторно да се изгради Ерусалим

29 од н.е.

Исус е крстен и помазан како Месија

4. Месијата ќе умре меѓу грешници и ќе биде погребан кај богатите

33 од н.е.

Исус умира со разбојници и е погребан кај богатите