Ако си изграден како личност, ќе останеш стабилен во време на силни бури
ЗА МЛАДИ
9. Изгради се како личност
ШТО ЗНАЧИ ТОА
Во тоа каква личност си е вклучено многу повеќе отколку твоето име и твојот изглед. Вклучени се твоите вредности, верувања и особини. Твојата личност е сето она што те прави да бидеш „ти“ — однадвор и однатре. Да бидеш изградена личност значи да се познаваш себеси и да се држиш за своите ставови.
ЗОШТО Е ВАЖНО
Кога си изграден како личност, цврсто се држиш за своите верувања и не дозволуваш твоите врсници да имаат контрола врз тебе.
„Многу луѓе се како куклите во излог — други им ја избираат облеката што ја носат“ (Адријан).
„Научив како цврсто да се држам за она што е исправно дури и кога не е лесно. Знам кои ми се вистински пријатели. Тоа се оние со кои се чувствувам пријатно затоа што ги почитуваат моите мерила“ (Кортни).
БИБЛИСКО НАЧЕЛО: Не дозволувајте и понатаму да ве обликува овој свет, туку преобразете се така што ќе го обновите својот ум (Римјаните 12:2).
ШТО МОЖЕШ ДА НАПРАВИШ
Дознај каква личност си сега и каква личност сакаш да станеш така што ќе размислиш кои се твоите јаки страни, слаби страни и убедувања. Следниве прашања можат да ти помогнат во тоа.
Јаки страни: Какви таленти и вештини имам? Кои убави особини ги имам? (На пример: Дали сум точен? Дали имам самоконтрола? Дали сум трудољубив? Дали сум дарежлив?) Кои добри работи ги правам?
ПРЕДЛОГ: Дали ти е тешко да увидиш кои се твоите јаки страни? Прашај ги родителите или некој пријател во кој имаш доверба кои се твоите позитивни страни и на кои конкретни начини ги покажуваш.
БИБЛИСКО НАЧЕЛО: Секој нека го испита своето дело, па ќе има причина за задоволство во самиот себе, а не споредувајќи се со други (Галатите 6:4).
Слаби страни: На кои аспекти од мојата личност треба најмногу да работам? Кога најлесно можам да подлегнам на искушението да направам нешто погрешно? Во кои работи можам да покажувам поголема самоконтрола?
БИБЛИСКО НАЧЕЛО: Ако кажеме: „Немаме грев“, самите себе се залажуваме (1. Јованово 1:8).
Убедувања: Според кои морални мерила живеам, и зошто? Дали верувам во Бог? Кои докази ме уверуваат дека тој навистина постои? Кои работи ги сметам за неправда, и зошто? Како гледам на иднината?
БИБЛИСКО НАЧЕЛО: Способноста за расудување ќе внимава на тебе, проникливоста ќе те чува (Изреки 2:11).