Најдистрибуираната книга на светот
„Библијата е најчитана книга во историјата . . . Од Библијата биле дистрибуирани повеќе примероци отколку од која и да е друга книга. Библијата, исто така, била преведена повеќе пати и на повеќе јазици отколку која и да е друга книга“ („The World Book Encyclopedia“).1
ВО НЕКОЈ поглед, повеќето книги се како луѓето. Се појавуваат на сцената, може да им порасне популарноста и — освен малку класици — да остарат и да умрат. Библиотеките честопати служат како гробници за безброј книги кои се застарени, непрочитани и, всушност, мртви.
Меѓутоа, Библијата е исклучителна дури и меѓу класичните дела. Иако нејзините пишани почетоци датираат од пред 3.500 години, таа сѐ уште поседува голема живост. Таа е далеку најраспространетата книга на Земјата.a Секоја година се дистрибуираат околу 60 милиони примероци од целата Библија или делови од неа. Првото издание печатено со подвижни печатарски букви излегло околу 1455-тата година од печатарската преса на германскиот пронаоѓач Јоханес Гутенберг. Се проценува дека оттогаш се отпечатени четири милијарди Библии (во целост или делови). Ниту една друга книга, религиозна или некоја друга, ни оддалеку не може да ја достигне.
Библијата, исто така, е и најпреведуваната книга во историјата. Комплетната Библија или делови од неа се преведени на повеќе од 2.100 јазици и дијалекти.b На повеќе од 90 проценти од човечката фамилија им е достапен барем дел од Библијата на нивниот јазик.2 Со тоа, оваа книга ги преминала националните граници и ги надминала расните и етничките бариери.
Самите статистички податоци можеби не Ви даваат убедлива причина за да ја испитате Библијата. Меѓутоа, тиражот и бројот на преводи се импресивни и сведочат за сеопштата привлечност на Библијата. Сигурно дека најпродаваната и најпреведувана книга во сета човечка историја е достојна да ја разгледате.
[Фусноти]
a Се смета дека следна најдистрибуирана публикација е брошурата со црвени корици Quotations From the Works of Mao Tse-tung (Цитати од делата на Мао Це Тунг), за која се проценува дека се продадени или дистрибуирани 800 милиони примероци.
b Статистичките податоци во врска со бројот на јазици се темелат на бројките што ги објавија United Bible Societies.
[Слика на страница 6]
Гутенберговата Библија, на латински, била првата книга отпечатена со подвижни печатарски букви