Илустрациите — клуч за достигнување на срцата

ДАВИД бегал да си го спаси животот. Неговиот непријател е Саул, помазан крал на Израел. Меѓутоа, Саул е човек полн со омраза кон Давид, обземен од љубомора. Во својата убиствена потрага, кралот сега довел 3 000 војници. Далеку помалубројни, Давид и неговите луѓе се скриле длабоко во една пештера во дивината.

Додека Давид и неговите луѓе се собираат во темницата, ситуацијата одненадеж се променува. Крал Саул влегува во истата пештера да врши нужда. Давид тивко доаѓа до својот беспомошен непријател со оружје в рака. Но на изненадување на Давидовите луѓе, не го убива кралот, туку само отсекува едно парче од облеката на Саул. Давид се каел дури и за тоа, па рекол: ”Незамисливо е за мене, од Јеховина гледна точка, да му ја направам оваа работа на мојот господар, помазаникот Јеховин, со тоа што ја испружив раката против него, бидејќи тој е помазаникот Јеховин“ (1. Самоилова 24:1-6, NW).

Овој библиски извештај дава силна поука за авторитетот даден од Бог. Исто така го достигнува срцето, можеби дури и поделотворно отколку директен совет. Таква е моќта на извештаите забележани во Божјата Реч за наша поука (Римјаните 15:4).

Соодветно на тоа, Јеховините сведоци настојуваат да направат повеќе отколку само да изнесуваат факти кога ја проповедаат добрата вест, кога водат домашни библиски студии, кога држат библиски говори или неформално сведочат. Се обидуваат да ги достигнат срцата со раскажување на искуства и со употребување на илустрации. Нивната книга Водич за Теократску службу оспособљавања, објаснува: ”Илустрациите подбудуваат интерес и ги подвлекуваат важните мисли. Тие ги отвораат мисловните текови и олеснуваат да се создадат нови мисли. Со добро избраните илустрации се поврзува разумното делување со влијанието на чувствата. (...) Понекогаш некоја илустрација може да се употреби за да се избегнат предрасуди или пристрасности“a (стр. 164).

Во својата книга Essentials of Public Speaking, Ворен Дибуа забележува: ”Нека писателот или говорникот ги изрази своите идеи преку делата или зборовите на луѓето, така и најдосадната тема добива живот и боја.“ Затоа, ако ѝ додадат живот и боја на пораката која е веќе полна со живот и која е животодајна, тоа сигурно ќе им помогне на христијанските слуги да ги достигнат срцата.

Илустрации кои поучуваат

Каков вид на илустрација е најдобар? Обично, онаа која се темели на нешто што им е блиско на слушателите. Исус Христос дал добар пример во овој поглед. Во својата Проповед на гората, Исус зборувал за обични работи како сол, лампи и птици (Матеј 5:1–7:29). На пример, на сите им биле познати лампите кои гореле на маслиново масло и кои понекогаш се ставале на свеќник. Според тоа, Исусовите ученици сигурно сфатиле дека треба да бидат носители на духовна светлина кога им рекол: ”Ниту, пак, светило се пали и клава под поклоп, туку на свеќник и им свети на сите в куќи. Така треба да свети пред луѓето и вашата светлина, за да ги видат вашите добри дела и да Го прослават вашиот Отец небесни“ (Матеј 5:15, 16). Некомплицираните илустрации кои одговараат на темата, ќе им помогнат на христијанските слуги да ги разјаснат идеите и библиските учења.

Едни од најсилните Исусови илустрации зборувале за луѓе. Разгледај ги оние што се забележани во Лука 15. и 16. поглавје. Писарите и фарисеите го критизирале Исус затоа што примал грешници и даночници. Како одговор на тоа, тој им раскажал трогателни приказни за луѓе. Зборувал за овчар кој си ја пронашол загубената овца, за жена која ја нашла изгубената паричка, за изгубениот син кој се вратил дома и за неправедниот слуга.

Реалистичните илустрации и искуства од животот можат да бидат многу корисни за еден христијански слуга. На пример, обрни внимание како Александар Макмилан, кој 60 години многу патувал како јавен говорник, ја објаснил библиската вистина за мртвите. Кратко пред смртта на својот татко, кој верувал дека душата никогаш не умира, Макмилан разговарал со него на следниов начин:

”Татко ми директно ме праша: ’Сине, ќе бидам ли осамен во гробот додека чекам Царството да го започне делото на полнење на Земјата со совршенство?‘

Тоа беше прашање на кое млад човек не би можел да одговори спремно, и да му удоволи на постар човек кој никогаш не размислувал за тоа.

Јас му одговорив: ’Татко, спиеше ли добро синоќа?‘

Тој одговори: ’Спиев, сине, откако лекарот ми даде некои апчиња за спиење.‘

’Беше ли осамен додека спиеше?‘

’Не, не бев. Би сакал да спијам секогаш, зашто тогаш не чувствувам болка.‘“

А. Х. Макмилан потоа му го прочитал на татка си Јов 14:13-15 и 3:17-19 и му рекол: ”Гледаш, татко, мртвите се во смртен сон и не знаат ништо додека се наоѓаат во таква состојба, па како би можеле да бидат осамени?“

Какво делотворно поучување! Ако си Јеховин сведок, и ти можеш да употребиш библиски стихови и илустрации кои се привлечни за умот и срцето.

Како да пронајдеш илустрации

Но, каде можеме да најдеме делотворни илустрации или вистинити животни искуства? Многу можат да се извлечат од твоето богатство на лични искуства. На пример, дали треба да ги покажеш благословите на верата, моќта на молитвата или радоста на службата? Ако си предаден христијанин, веројатно би можел да раскажеш различни случки од твојот живот. Можеш да чуеш добри искуства на собраниските состаноци или кога разговараш со другите христијани. Или можеш да прочиташ некое охрабрувачко искуство во Yearbook of Jehovah’s Witnesses (Годишник на Јеховините сведоци). Всушност, Watch Tower Publications Index дава пристап кон печатени искуства од целиот свет.

Како можеш делотворно да раскажеш некое искуство? Како прво, создавањето на одредена мера на исчекување помага да го задржиш вниманието на слушателите. Како увод на искуството можеш да кажеш: ”Еден пионер научил од лично искуство како всушност Јехова ги благословува оние кои имаат доверба во него.“ Твоите слушатели веднаш ќе помислат какви благослови уживал полновремениот проповедник на Царството. Биди сигурен дека очекуваат да им ги кажеш.

Обиди се да раскажеш искуство со свои зборови. Подготви и детаљи, затоа што со тоа приказната остава поголем впечаток. Ако со зборови дадеш јасна слика на околностите кои биле вклучени, можеш полесно да ги мотивираш слушателите. Но немој премногу да се впуштиш во раскажување со што би пропуштиле да сфатат зошто го раскажуваш искуството. Исто така, избегнувај да преувеличуваш, бидејќи иако со тоа приказната станува поинтересна, може да ја намали веродостојноста. Од истата причина, воздржувај се да пренесуваш нешто како ”ти реков, ми рече“ или да раскажуваш искуства кои не можеш да ги потврдиш.

Внеси живот во Библијата

Најпоучните искуства се наоѓаат во самата Библија. На пример, претпостави си дека сакаш на некој кој ја проучува Библијата или на слушателите да им покажеш дека децата можат да заземат став за Јехова Бог. Можеш да го употребиш извештајот за безименото девојче кое разговарало со жената на Наман за Јеховиниот пророк Јелисеј. Прво, прочитај го извештајот во 4. Царства 5:1-5. Тогаш можеш да прашаш: ”Што мислиш? Колку му било тешко на тоа девојче да одржи беспрекорност спрема Бог во земја на лажно обожавање? Зарем не му требало храброст да зборува уверливо за Јехова и неговиот пророк?“

Претходното испитување можеби ти помогнало да го оживееш извештајот. Можеби си нашол корисна информација под насловите НАМАН, СИРИЈА и ЈЕЛИСЕЈ во индексите во одредени изданија на Стражарска кула. Паралелните стихови во некои преводи на Библијата можеби те довеле од извештајот во 4. Царства до Псалми 148:12, 13, кадешто читаме: ”Младичи и девојки, старци заедно со деца: нека сите го фалат името Јахвино, бидејќи единствено неговото име е возвишено! Неговото величество ги надвисува земјата и небото“ (Ст). Колкаво охрабрување за младите да ја зборуваат Божјата Реч со храброст! (Дјела апостолска 4:29-31, Ст).

Ако си христијански слуга, ’постојано внимавај на своето учење‘ во овој поглед (1. Тимотеј 4:16, NW). Не само да ја кажуваш вистината — и опишувај ја. Направи ги библиските извештаи живи и полни со значење. Употреби соодветни искуства и илустрации. На тие начини може да се достигне срцето.

[Фуснота]

[Слика на страница 29]

Како и Исус, денешните христијански слуги можат да употребат живи илустрации да ја пренесат својата порака и да ги достигнат срцата