Одгатнување на мистеријата за најголемото име

Интересно е што и муслиманскиот Коран и христијанската Библија се осврнуваат на најголемото име. Оваа статија го објаснува значењето и важноста на најголемото име и покажува како тоа име влијае на целото човештво и на нашата иднина овде на Земјава.

НА ЗЕМЈАВА живеат и умираат милиони мажи и жени. За повеќето од нив, заедно со нив умираат и нивните имиња и споменот им се заборава. Но, некои големи имиња — како што се Авицена, Едисон, Пастер, Бетовен, Ганди и Њутон — и понатаму живеат. Овие имиња се поврзани со достигнувањата, откритијата и пронајдоците на оние кои ги носеле тие имиња.

Меѓутоа, постои едно име поголемо од сите други имиња. Сите минати и сегашни чуда во целиот универзум поврзани се со тоа име. Всушност, со ова име е поврзана самата човекова надеж за еден долг и среќен живот!

Многумина сакале да го сознаат тоа име. Истражувале и се распрашувале за него, но не го откриле. За нив тоа останало мистерија. Всушност, ниту еден човек не може да го открие тоа име доколку Сопственикот на тоа име сам не му го открие. За среќа, мистеријата за ова неспоредливо име е одгатната. Бог самиот го сторил тоа така што оние кои имаат вера во него можат да го запознаат. Тој му го открил своето име на Адам, потоа на Авраам, на Мојсеј, а и на други Свои верни слуги од старо време.

Во потрага по најголемото име

Коранот раскажува за некој „кој е многу опеан во Библијата“ (27:40). Кога го објаснува овој цитат, еден коментатор, познат како Тафсир Јалалајн, се изјаснува: „Асаф, синот на Баркија, беше праведен човек. Тој го знаеше Божјето најголемо име, и секогаш кога ќе го повикаше тоа име, му беше одговарано“. Ова нѐ потсетува на библискиот писател Асаф, кој во Псалм 83:18 (НС) рекол: „За да спознаат луѓето дека ти, чие име е Јехова, ти самиот си Највишиот над целата земја“.

Во Коран 17:2 читаме: „На Мојсеј му го дадовме Писмото и го направивме водач на Израелците“. Во ова Писмо Мојсеј му се обраќа на Бог со зборовите: „Еве, ќе појдам кај синовите Израилеви и ќе им речам: ‚Бог на татковците ваши ме испраќа кај вас.‘ И ако тие ме прашаат: ‚како Му е името‘, што ќе им речам тогаш?“ Бог му одговорил на Мојсеј на следниот начин: „Вака кажи им на синовите Израилеви: ‚Господ [Јехова, НС] Бог на татковците наши, Бог Авраамов, Бог Исаков и Бог Јаковов ме испрати кај вас. Ете тоа е името Мое вечно, и тоа е споменот за Мене од колено на колено‘“ (2. Мојсеева 3:13, 15).

Во древно време, Израелците го знаеле големото Божје име. Дури го употребувале како компонента на своите лични имиња. Како што постои името Абдула, кое значи „Божји слуга“, така меѓу древниот израелски народ постоело името Обадија, кое значи „Јеховин слуга“. Мајката на пророкот Мојсеј се викала Јохаведа што веројатно значи „Јехова е слава“. Името Јован значи „Јехова беше дарежлив“, а името на пророкот Илија значи „Мојот Бог е Јехова“.

Пророците го знаеле ова големо име и го употребувале со длабоко почитување. Во Светото Писмо се наоѓа повеќе од 7.000 пати. Исус Христос, синот на Марија, го истакнал тоа кога во својата молитва до Бог рекол: „Го јавив името Твое на луѓето, што си Ми ги дал . . . и им го објавив името Твое, и ќе го известувам, та љубовта, со која Ме возљуби Ти, да биде во нив“ (Јован 17:6, 26). Во својот познат коментар за Коранот, Бајдави коментира за Коран 2:87 изјавувајќи дека Исус успеал „да ги оживее мртвите луѓе со помош на Божјето најголемо име“.

Но зошто тогаш станало тоа име мистерија? Како е поврзано името со иднината на секој од нас?

Како станало името мистерија?

Некои мислат дека „Јехова“ на хебрејски значи исто што и „Алах“ (Бог). Но „Алах“ одговара на хебрејското Ело-хим, плурал од зборот елох‘ах (бог), со кој се искажува величество. Меѓу Евреите се појавило суеверие кое ги спречило да го изговараат божественото име Јехова. Затоа, кога ги читале Светите списи и кога ќе дојделе до името Јехова, почнале по обичај да изговараат Адонај што значи „Господ“. На некои места дури и го замениле „Јехова“ во оригиналниот хебрејски текст со Адонај.

Религиозните водачи на т. н. христијанство го следеле истиот пример. Наместо името Јехова ставиле „Бог“ (на арапски „Алах“) и „Господ“. Тоа придонело за развој на лажната наука за Тројство, која нема основа во Светото Писмо. Поради тоа, милиони погрешно ги обожаваат Исус и светиот дух и ги сметаат за еднакви со Богa.

Затоа, водачите на јудаизмот и т. н. христијанство се одговорни за срамот што најголемото име не е нашироко познато. Но, Бог прорекол: „Ќе го осветам великото име Свое . . . па ќе познаат народите дека Јас сум Господ [Јехова, НС]“. Да, Јехова ќе направи неговото име да биде познато меѓу сите народи. Зошто? Затоа што тој не е само Бог на Евреите или на некоја друга поединечна нација или народ. Јехова е Бог на целото човештво (Језекиил 36:23; 1. Мојсеева 22:18; Псалми 144:21; Малахија 1:11).

Најголемото име и нашата иднина

Светото Писмо вели: „Секој, кој го призове името Господово, ќе се спаси“ (Римјаните 10:13). Нашето спасение во денот на судот ќе зависи од тоа дали го познаваме Божјето име. Да се познава неговото име вклучува да се познаваат неговите особини, дела и намери и да се живее во склад со неговите високи начела. На пример, Авраам го знаел Божјето име и го повикувал тоа име. Поради тоа тој имал добар однос со Бог, покажувајќи вера во него, потпирајќи се на него и слушајќи го. На тој начин Авраам станал Божји пријател. Исто така, што се однесува до нас, ако го познаваме Божјето име тоа може да нѐ приближи до него и да ни помогне да развиеме личен однос со него и цврсто да се држиме за неговата љубов (1. Мојсеева 12:8; Псалм 9:10; Соломонови изреки 18:11; Јаков 2:23).

Во Библијата читаме: „Господ гледа и го пази тоа, и пред лицето Негово се пишува споменкнига за оние што се бојат од Бога и го почитуваат името Негово“ (Малахија 3:16). Зошто е потребно ‚да го почитуваме‘ најголемото име? Името Јехова дословно значи „Тој предизвикува да настане“. Тоа открива дека Јехова е Оној кој причинува самиот да биде Исполнител на ветувањата. Тој секогаш ги остварува своите намери. Тој е семоќниот Бог, единствениот Создател, кој ги има сите прекрасни својства. Не е можно со само еден збор целосно да се опише Божјата божествена природа. Но Бог самиот го одбрал за себе најголемото име — Јехова — кое нѐ потсетува на сите негови својства, особини и намери.

Во Библијата Бог ни зборува за своите намери со човештвото. Јехова Бог го создал човекот за да се радува на вечен и среќен живот во Рај. Неговата волја за човештвото е сите луѓе да сочинуваат едно семејство обединето во љубов и мир. Богот на љубовта ќе ја исполни оваа намера во блиската иднина (Матеј 24:3-14, 32-42; 1. Јованово 4:14-21).

Бог ги објаснува причините зошто човештвото страда и ни покажува дека е можно спасение (Откровение 21:4). Во Псалм 36:10, 11 читаме: „Уште малку, и грешникот ќе го нема; ќе го побараш местото негово и нема да го најдеш. А кротките ќе ја наследат земјата и ќе се насладуваат во изобилен мир“. (Види и Коран 21:105.)

Да, Бог ќе стане познат преку великото свое име. Нациите ќе мораат да знаат дека тој е Јехова. Каква прекрасна предност е да се знае најголемото име, да се сведочи за него и да му се остане верен! На тој начин, Божјата радосна намера ќе се исполни врз секој од нас: „Бидејќи се надеваше на Мене, и ќе го избавам, и ќе го заштитам, зашто го позна името Мое. Ќе повика кон Мене, и ќе го чујам; . . . ќе му дадам многу денови и ќе му го јавам спасението од Мене“ (Псалм 90:14-16).

[Фуснота]

[Слика на страница 5]

Од грмушка која горела Бог му се идентификувал на Мојсеј како ‚Јехова, Богот на Авраам‘

[Извор на слика]

Мојсеј и грмушката која гори од В. Томас, Ср.