Твојата религија — брод кој никогаш не би требало да биде напуштен?

ЕДЕН брод се наоѓа среде бура. Екипажот, кој очајнички се бори да го спаси својот брод, е соочен со драматична одлука: да останат на бродот или да го напуштат и да се спасат самите себе. Дали си знаел дека ова стравотно сценарио се користи како теолошка илустрација?

Теолозите, особено католичките научници, честопати ја споредуваат својата црква со еден брод кој преживува бура. Тие велат дека овој брод, со Исус или Петар на кормилото, го претставува единственото средство за спасение. Ставот на свештенството е: ‚Никогаш не напуштај го бродот. Црквата и порано минувала низ сериозни кризи, но таа е брод кој ги издржал сите историски бури‘. Некои велат: ‚Зошто да се напушти црквата? Кои алтернативи постојат? Зошто да не останеш и да не помогнеш таа да се управува во помирни води?‘

Во склад со овој симболичен јазик, многумина кои припаѓаат на разни видови религии, резонираат: ‚Знам дека мојата религија греши во многу работи, но се надевам дека ќе се промени. Не сакам да ја напуштам. Би сакал да земам удел во помагањето да ги надмине своите тешкотии‘. Овој начин на резонирање може да биде диктиран од нечија искрена наклоност кон прадедовската религија, или од стравот да не ја „изневери“.

Еден истакнат пример за тоа е примерот на Ханс Кин, познат католички дисидентски теолог, кој резонирал на следниов начин: „Дали да го напуштам бродот за време на бурата, оставајќи ги оние со кои досега сум пловел да се соочат со ветрот, да ја исфрлаат водата, а можеби и да се борат за опстанок?“ Тој одговорил: „Нема да се откажам од мојата ефикасност во црквата“. Друга алтернатива би била „одвојување од оваа црква поради нејзиното дезертерство, во замена за љубовта кон повисоките вредности и, можеби, за да се биде поавтентичен христијанин“ — Die Hoffnung bewahren (Зачувување на надежта).

Но, дали едно лице може да остане на бродот од неговата црква, со надеж дека Бог, во својата милост, ќе им допушти на сите религии неограничено време за реформација? Тоа е едно сериозно прашање. Како што беше покажано во споредбата, брзото напуштање на бродот кога тој е во опасност и качувањето во несигурни чамци за спасување, би било исто толку опасно колку и да се остане на брод кој тоне. Дали е мудро да се остане во една црква по секоја цена, без разлика каква е нејзината состојба? Какви можности за реформација нудат религиите денес? Колку долго ќе им допушти Бог да работат против неговата волја?

[Извор на слика на страница 3]

Chesnot/Sipa Press