Семеен распоред за служба на подрачјето со семејството
1 Јехова се радува кога ќе види дека младите го фалат неговото име (Пс. 148:12, 13). Во деновите на Исус дури и ‚бебињата и доенчињата му давале фалба на‘ Бог (Мат. 21:15, 16). Истото се случува и денес. Родители, како можете да им помогнете на вашите деца да станат ревни фалители на Јехова во христијанската служба? Како што беше нагласено во претходната статија за собраниските состаноци, клучниот фактор повторно е вашиот пример. Еден татко го изразил мислењето на повеќето родители, кога рекол: „Децата не го прават она што ќе им го кажеш; тие го прават истото што го правиш ти“.
2 Една сестра што била воспитана од богобојазливи родители, се сеќава: „Никогаш не се будевме во сабота наутро прашувајќи сѐ дали ќе одиме во служба. Знаевме дека ќе одиме“. Слично на тоа, во вашите деца можете да ја всадите важноста на проповедничката активност, со тоа што секоја седмица како семејство ќе учествувате во службата на подрачјето. На тој начин, не само што ќе им овозможите на децата да учат од вас, туку во исто време ќе можете да го набљудувате нивниот став, однесување и развивањето на нивните вештини.
3 Постепено поучување: За да можат децата да уживаат во службата, треба да бидат подготвени делотворно да учествуваат. Сестрата што е цитирана претходно, исто така рекла: „Никогаш не бевме само пасивни придружници кои само ги придружуваа своите родители во нивното дело. Знаевме дека имавме удел, иако тоа беше само да заѕвониме на вратата и да оставиме некој леток. Со внимателна подготовка пред активностите за секој викенд, знаевме што ќе речеме“. Можете да ги поучите вашите деца на тој начин што секоја седмица за време на семејната студија, или во друго време, ќе одвоите неколку минути за да ги подготвите за службата.
4 Проповедањето заедно како семејство ви дава дополнителна можност да ја врежете вистината во вашите деца. Еден татко што е христијанин ја водел со себе ќерката, кога одел 10 километри во еден правец за да им дава трактати на селаните од соседната долина. „Додека пешачевме“, со радост се сеќава таа „татко ми ја всади вистината во моето срце“ (Втор. 6:7). И вие ќе бидете благословени ако службата на подрачјето стане дел од вашиот седмичен семеен распоред.