Ќе биде дадено големо сведоштво
1. Освен говорот, што друго може да им остави впечаток на гостите на Спомен-свеченоста? Објасни.
1 Кога? На Спомен-свеченоста. Сите заедно правиме големи напори за да ги поканиме луѓето да присуствуваат на овој настан. Говорот кој гостите ќе го чујат не е единственото нешто што може да им остави впечаток. Откако била на Спомен-свеченост, една жена го пофалила она што го видела — љубезноста на сите присутни и убавата чиста зграда која ја изградиле и ја одржуваат доброволци. Затоа, сите ние, а не само говорникот, придонесуваме да се даде големо сведоштво на овој најважен настан во годината (Еф. 4:16).
2. Како би можел секој од нас да им даде сведоштво на гостите?
2 Срдечно поздрави ги гостите: Нашата искрена насмевка и љубезен поздрав ќе им даде сведоштво на посетителите (Јован 13:35). Дури и ако не можеш да зборуваш со сите, сепак можеш да се запознаеш со оние што се околу тебе (Евр. 13:1, 2). Обрни им внимание на лицата кои стојат сами бидејќи не познаваат никого. Тие веројатно добиле покана за време на акцијата. Би можел да прашаш: „Дали за првпат доаѓате тука?“ Понуди им да седнат до тебе и кажи им дека си спремен да одговориш доколку имаат некое прашање. Ако вашето собрание мора брзо да ја ослободи салата заради следното собрание, би можел да речеш: „Би сакал да го слушнам Вашето мислење за програмата. Постои ли начин повторно да стапиме во контакт?“
3. Како би можеле да им изразиме добредојде на неактивните?
3 Изрази им добредојде на неактивните: На Спомен-свеченоста сигурно ќе дојдат неактивни објавители, меѓу кои ќе има и такви што доаѓаат на состанок само еднаш годишно на оваа свеченост. Поздрави ги и покажи им дека вистински се радуваш што ги гледаш (Рим. 15:7). Старешините можат набрзо да ги посетат дома и да ги поттикнат повторно да станат активни членови на собранието. Се молиме многумина што ќе присуствуваат на овој настан да добијат желба да го слават Бог не само поради тоа што го чуле туку и поради тоа што ‚ги виделе нашите добри дела‘ (1. Пет. 2:12).