Чувај се од замките на Ѓаволот!

‚Извлечете се од замката на Ѓаволот‘ (2. ТИМ. 2:26)

КАКО БИ ОДГОВОРИЛ?

Што треба да направиме ако имаме навика да ги критикуваме другите?

Како примерите на Пилат и Петар можат да ни помогнат да не подлегнеме на стравот и на притисокот од околината?

Како може да се ослободиме од претераното чувство на вина?

1, 2. Кои замки на Ѓаволот ќе ги разгледаме во оваа статија?

ЃАВОЛОТ постојано ги демне Јеховините слуги. Но, тој не лови секогаш со цел да го убие својот плен, како што го прави тоа еден ловџија. Напротив, главната цел на Ѓаволот е да го улови жив својот плен за да го користи како што сака. (Прочитај 2. Тимотеј 2:24-26.)

² За да го фати жив својот плен, еден ловџија би можел да користи разни стапици. Би можел да се обиде да го натера животното да излезе на отворено и потоа да го улови со јамка. Би можел да користи и скриена стапица, која има механизам за активирање и во која жртвата ненадејно се фаќа. И Ѓаволот користи слични замки за да ги фати живи Божјите слуги. За да не станеме негов плен, мора да бидеме претпазливи и да им обрнуваме внимание на предупредувањата кои ни откриваат каде ги поставил замките. Во оваа статија ќе разгледаме како да се чуваме од три замки во кои Ѓаволот успеал да фати некои Божји слуги. Тие се 1) неконтролираниот говор, 2) стравот и притисокот од околината и 3) претераното чувство на вина. Во следната статија ќе разгледаме уште две други стапици на Сатана.

ИЗГАСНИ ГО „ОГНОТ“ — НЕКОНТРОЛИРАНИОТ ГОВОР

3, 4. Што може да се случи ако не го контролираме својот јазик? Наведи пример.

³ За да ги присилат животните да излезат од своите скривалишта, некои ловџии палат дел од околните дрвја и грмушки, а потоа ги фаќаат животните кои се обидуваат да побегнат. Во симболична смисла, Сатана би сакал да запали оган во собранието. Ако успее, ќе може да ги истера неговите членови од тоа безбедно засолниште и така тие ќе завршат право во неговите канџи. Како би можеле несвесно да му помогнеме на Сатана и да му дозволиме да нѐ улови?

⁴ Ученикот Јаков го споредил јазикот со оган. (Прочитај Јаков 3:6-8.) Ако не го контролираме нашиот говор, би можеле да потпалиме оган во собранието. Како? Да ја разгледаме следнава ситуација: На еден собраниски состанок, се дава известување дека некоја сестра ќе служи како општ пионер. По состанокот, две сестри зборуваат за тоа. Едната вели дека многу се радува и дека ѝ посакува сѐ најдобро на новата пионерка. Но, другата ѝ припишува лоши мотиви на пионерката и вели дека таа само сака да биде во центарот на вниманието. Која од овие сестри би сакал да ти биде пријателка? Не е тешко да се види која од нив би можела со својот јазик да запали оган во собранието.

5. Што треба да правиме за да го изгаснеме „огнот“ кој може да го запалиме со нашиот јазик?

⁵ Како може да го изгаснеме огнот, односно да го скротиме својот јазик? Исус рекол: „Устата го зборува она со кое е полно срцето“ (Мт 12:34). Значи, првиот чекор е да си го преиспитаме срцето. Дали внимаваме кај нас да не се развијат чувства што го подгреваат штетниот говор? На пример, кога ќе слушнеме дека некој брат има цел да добие повеќе одговорности во собранието, дали веднаш помислуваме дека тоа го прави од чисти мотиви или, пак, се сомневаме дека можеби го прави од себични причини? Ако сме склони да се сомневаме во мотивите на нашите браќа, добро е да се сетиме дека и Ѓаволот ги довел во прашање мотивите на верниот Божји слуга Јов (Јов 1:9-11). Наместо да му припишеме лоши мотиви на нашиот брат, добро е да се преиспитаме што нѐ тера нас да мислиме или да зборуваме лошо за него. Дали навистина имаме причина да го правиме тоа? Или, пак, сме дозволиле врз нас да влијае бесчувствителниот став кој е толку раширен во овие последни денови? (2. Тим. 3:1-4).

6, 7. а) Од кои причини можеби ги критикуваме другите? б) Како треба да постапиме ако некој нѐ повреди или нѐ навреди?

⁶ Да видиме и од кои други причини би можеле да ги критикуваме другите. Една причина може да биде тоа што сакаме да привлечеме внимание кон себе. Всушност, кога критикуваме некого, на некој начин газиме врз него за самите да изгледаме повисоки. Или, можеби си бараме изговор зошто ние не правиме нешто кое треба да го правиме. Сеедно дали ги критикуваме другите од гордост, завист или недостиг на самодоверба, може да предизвикаме голема штета.

⁷ Понекогаш би можеле да мислиме дека со право критикуваме некого. Можеби и самите сме биле повредени од она што тој го кажал за нас. Дури и да е така, не е во ред да му вратиме со иста мера. Со тоа само би додале дрва на огнот и би постапиле во склад со волјата на Ѓаволот, а не со Божјата волја (2. Тим. 2:26). Добро е да се угледаме на Исус, кој ‚не враќал со навреди‘ кога го навредувале. Наместо тоа, ‚му се препуштил на оној што праведно суди‘ (1. Пет. 2:21-23). Тој бил уверен дека Јехова ќе се погрижи сѐ да се реши на Негов начин и во Негово време. И ние треба да имаме иста доверба во Бог. Кога го користиме својот јазик да лекуваме наместо да ги повредуваме другите, помагаме во собранието да се зачува мирот и единството. (Прочитај Ефешаните 4:1-3.)

ЧУВАЈ СЕ ОД ЗАМКАТА НА СТРАВОТ И ПРИТИСОКОТ ОД ОКОЛИНАТА

8, 9. Зошто Пилат го осудил Исус?

⁸ Едно животно кое е фатено во замка не може да се движи каде што сака. На сличен начин, оној што ќе се фати во замката на стравот и притисокот од околината, во одредена мера губи контрола над својот живот. (Прочитај Изреки 29:25.) Да го разгледаме примерот на двајца луѓе кои му подлегнале на стравот и на притисокот од околината, и да видиме што може да научиме од нив.

⁹ Римскиот управител Понтиј Пилат знаел дека Исус е невин и по сѐ изгледа не сакал да го осуди. Всушност, Пилат рекол дека Исус не направил „ништо со кое би заслужил смрт“. Сепак, му изрекол смртна пресуда. Зошто? Затоа што попуштил под притисокот на толпата (Лука 23:15, 21-25). Тие се обиделе да го натераат да го направи она што го сакале, викајќи: „Ако го пуштиш него, не си му пријател на цезарот!“ (Јован 19:12). Можеби Пилат се уплашил дека ќе ја изгуби својата положба, па дури и својот живот, доколку застанел во одбрана на Христос. Подлегнал на притисокот и постапил како што сакал Ѓаволот.

10. Зошто Петар се одрекол од Исус?

¹⁰ Апостол Петар бил еден од најблиските соработници на Исус. Тој не се плашел да каже пред другите дека Исус е Месијата (Мат. 16:16). Кога некои ученици не сфатиле нешто што кажал Исус и го оставиле, Петар му останал верен и не го напуштил (Јован 6:66-69). А кога непријателите дошле да го уапсат неговиот Господар, Петар извлекол меч за да го брани (Јован 18:10, 11). Но, подоцна му подлегнал на стравот и одрекол дека го познава Исус Христос. Стравот од луѓе е како стапица, и некое време Петар бил фатен во неа. Тој ја изгубил храброста, и поради тоа постапил неисправно (Мат. 26:74, 75).

11. Со какви притисоци можеби се бориме?

¹¹ Како христијани, ние треба да се спротивставиме кога другите нѐ ставаат под притисок да правиме работи што не му се допаѓаат на Бог. Можеби работодавачот или некои други ќе нѐ тераат да бидеме нечесни или да направиме неморал. Младите на училиште се изложени на притисокот од соучениците кои се обидуваат да ги наведат да препишуваат на тестови, да гледаат порнографија, да пушат, да земаат дрога, да се опиваат или да вршат неморал. Што може да ни помогне да не се фатиме во замката на стравот и да не попуштиме кога другите нѐ ставаат под притисок да правиме нешто кое не му е угодно на Јехова?

12. Што учиме од Пилат и од Петар?

¹² Да видиме што учиме од примерот на Пилат и на Петар. Пилат не знаел многу за Христос. Сепак, знаел дека Исус е невин и дека не е обичен човек. Но, Пилат не бил понизен и не го сакал вистинскиот Бог. Затоа Ѓаволот лесно го фатил жив и го употребил да ја изврши неговата волја. Од друга страна, Петар добро го познавал и го сакал Бог. Но, понекогаш не бил скромен, се плашел од луѓето и подлегнувал на притисокот од околината. Пред да биде уапсен Исус, Петар се фалел: „Дури и сите други да се поколебаат во верата, јас нема!“ (Мар. 14:29). Овој апостол ќе бил подготвен за испитите што го чекале ако имал сличен став како псалмистот кој, со доверба во Бог, рекол: „Јехова е на мојата страна; нема да се плашам. Што може да ми направи земен човек?“ (Пс. 118:6). Последната ноќ од својот живот на Земјата, Исус ги повел со себе Петар и уште двајца апостоли во градината Гетсиманија, и им рекол да бдеат. Но, наместо да останат будни, Петар и другите двајца заспале. Исус ги разбудил и им рекол: „Бдејте и молете се за да не паднете во искушение!“ (Мар. 14:38). Меѓутоа, Петар повторно заспал, и подоцна подлегнал на стравот и на притисокот од луѓето.

13. Како може да се спротивставиме кога другите ќе нѐ стават под притисок да постапиме погрешно?

¹³ Од примерот на Пилат и на Петар учиме уште нешто важно: За успешно да се спротивставиме на притисокот треба добро да го познаваме и да го сакаме Бог, да бидеме понизни и скромни, и да имаме страв од Јехова, а не од луѓето. Ако имаме цврста вера затоа што добро го познаваме Бог, храбро и со увереност ќе зборуваме за нашите убедувања. Тоа ќе ни помогне да одолееме на притисокот од околината и да не попуштиме пред стравот од човек. Се разбира, никогаш не смееме да се преценуваме. Напротив, треба понизно да признаеме дека ни е потребна сила од Бог и да го молиме да ни го даде својот дух. Љубовта кон Јехова треба да нѐ поттикне да се држиме за неговите мерила и да не правиме нешто со кое би му нанеле срам на неговото име. Освен тоа, треба однапред да се подготвиме за испитите на нашата вера. На пример, мора да се молиме со нашите деца и да ги подготвиме за да знаат како да реагираат кога нивните соученици ќе ги тераат да прават нешто лошо (2. Кор. 13:7).a

НЕ ДОЗВОЛУВАЈ ДА ТЕ СКРШИ ПРЕТЕРАНОТО ЧУВСТВО НА ВИНА

14. Што би сакал Ѓаволот да мислиме во врска со некои наши грешки од минатото?

¹⁴ Еден друг вид стапица се состои од големо парче дрво или голем камен што виси над некој пат каде што најчесто минува пленот. Кога невнимателното животно ќе ја повлече со ногата жицата што ја активира стапицата, каменот или дрвото паѓа одозгора врз него и силно го притиснува. Претераните чувства на вина се како тежок товар кој би можел да нѐ притиска и да нѐ скрши. Кога размислуваме за некоја грешка од минатото, можеби се чувствуваме ‚потполно скршени‘. (Прочитај Псалм 38:3-5, 8.) Сатана би сакал да мислиме дека не ја заслужуваме Јеховината милост или дека не можеме да живееме според Божјите барања.

15, 16. Како можеш да се ослободиш од претераното чувство на вина?

¹⁵ Како да се чуваш од оваа стапица што може да те скрши? Ако си направил тежок грев, веднаш преземи соодветни чекори за да си го поправиш нарушениот однос со Јехова. Зборувај со старешините и побарај помош од нив (Јак. 5:14-16). Направи сѐ што можеш за да ја исправиш грешката (2. Кор. 7:11). Ако си добил совет или укор, немој да се обесхрабруваш. Укорот е сигурен доказ дека Јехова те сака (Евр. 12:6) Биди решен да не ги повториш чекорите што воделе до гревот, и постапувај во склад со тоа. Откако си се покајал и си направил промени, имај доверба дека Бог ќе ти го прости гревот на темел на откупната жртва на Исус Христос (1. Јов. 4:9, 14).

¹⁶ Некои и понатаму се измачуваат со чувства на вина поради гревови кои, всушност, веќе им биле простени. Ако ова е случај и со тебе, сети се дека Јехова им простил на Петар и на другите апостоли иако го напуштиле Неговиот сакан Син кога најмногу му биле потребни. Јехова му простил и на човекот кој бил исклучен од собранието во Коринт поради тежок неморал бидејќи подоцна се покајал (1. Кор. 5:1-5; 2. Кор. 2:6-8). Во Библијата се спомнати големи грешници кои се покајале и на кои Бог им простил (2. Лет. 33:2, 10-13; 1. Кор. 6:9-11).

17. Како може да ни помогне откупнината?

¹⁷ Јехова ќе ги прости и ќе ги заборави твоите грешки од минатото ако навистина се каеш и ако ја прифатиш неговата милост. Никогаш немој да мислиш дека твоите грешки се преголеми за да бидат простени на темел на откупнината. Ако си поверувал во оваа лага на Сатана, тогаш тој успеал да те фати во една од своите замки. Откупнината може да ги покрие гревовите на сите што направиле грев и се покајале поради тоа (Изр. 24:16). Верата во откупнината може да те ослободи од товарот на претерана вина и да ти даде сила да му служиш на Бог со сето срце, ум и душа (Мат. 22:37).

НЕ НИ СЕ НЕПОЗНАТИ НАМЕРИТЕ НА САТАНА

18. Како може да ги избегнеме стапиците на Ѓаволот?

¹⁸ На Сатана му е најважно да нѐ улови, сеедно во која стапица ќе се фатиме. Но, бидејќи неговите намери не ни се непознати, можеме да ги избегнеме неговите замки (2. Кор. 2:10, 11). Нема да се фатиме во нив ако го молиме Јехова да ни помогне мудро да се справиме со испитите што ќе нѐ снајдат. Јаков напишал: „Ако некому од вас му недостига мудрост, нека бара од Бог, зашто тој им дава на сите великодушно и без прекорување, и ќе му ја даде“ (Јак. 1:5). Треба да постапуваме во склад со нашите молитви така што редовно ќе ја проучуваме Божјата Реч и ќе ги применуваме нејзините совети. Публикациите од верниот и разборит роб фрлаат светлина врз стапиците кои ни ги поставува Ѓаволот и ни помагаат да ги избегнеме.

19, 20. Зошто треба да го мразиме злото?

¹⁹ Молитвата и проучувањето на Библијата ни помагаат уште повеќе да го сакаме доброто. Но, исто толку е потребно и да го мразиме злото (Пс. 97:10). Нема да се препуштиме на себичните желби ако размислуваме какви би можеле да бидат последиците од нив (Јак. 1:14, 15). Треба да научиме да го мразиме злото и вистински да го сакаме доброто. Тогаш мамката што Сатана ја става во своите стапици ќе ни биде одвратна и нема да ни претставува искушение.

²⁰ Колку сме благодарни што Бог ни помага да не се фатиме во замките на Сатана! Преку својот дух и преку својата Реч и организација, Јехова нѐ избавува „од Злобниот“ (Мат. 6:13). Во следната статија, ќе видиме како може да избегнеме уште две стапици што Ѓаволот ги користи за живи да ги фати Божјите слуги.

Биди решен да ги избегнеш Сатановите стапици!

‚Спротивставете се на Ѓаволовите сплетки‘ (ЕФ. 6:11)

КАКО БИ ОДГОВОРИЛ?

Како еден слуга на Јехова би можел да ја избегне замката на материјализмот?

Што ќе им помогне на христијаните што се во брак да не паднат во јамата на прељубата?

Зошто си уверен дека треба да се спротивставиш на материјализмот и на неморалот?

1, 2. а) Зошто Сатана ги мрази помазаниците и ‚другите овци‘? б) Кои стапици на Сатана ќе ги разгледаме во оваа статија?

САТАНА ЃАВОЛОТ не ги сака луѓето, а особено ги мрази оние што му служат на Јехова. Всушност, тој води војна против остатокот од помазаници (Отк. 12:17). Овие христијани храбро предводат во проповедањето и им кажуваат на луѓето дека Сатана е владетелот на овој свет. Ѓаволот ги мрази и ‚другите овци‘, кои им помагаат на помазаниците и имаат надеж за вечен живот (Јован 10:16). За разлика од нив, Сатана ја изгубил можноста да живее вечно, и затоа е многу гневен. Тој ни е непријател на сите и единствена цел му е да станеме негов плен (1. Пет. 5:8).

² За да ја постигне таа цел, тој поставил различни замки, односно стапици. Бидејќи ‚ги заслепил умовите‘ на неверниците, тие не ја прифаќаат добрата вест и не можат да ги видат тие стапици. Но, Ѓаволот ги лови и оние што ја прифатиле пораката за Царството (2. Кор. 4:3, 4). Во претходната статија видовме како може да избегнеме три од неговите замки: 1) неконтролираниот говор, 2) стравот и притисокот од околината и 3) претераното чувство на вина. Да видиме сега како може да избегнеме уште две сатански стапици — материјализмот и искушението да направиме прељуба.

МАТЕРИЈАЛИЗАМ — ЈАМКА ШТО МОЖЕ ДА НЀ ЗАДУШИ

3, 4. Како грижите од овој свет би можеле да нѐ турнат во замката на материјализмот?

³ Во една своја споредба, Исус зборувал за семе што било посеано меѓу трње. Тој објаснил дека некој може да ја слуша пораката за Царството, „но грижите од овој свет и примамливото богатство ја задушуваат речта, па тој останува без плод“ (Мат. 13:22). Според тоа, една стапица што ја користи нашиот непријател Сатана е материјализмот.

⁴ Гледаме дека речта можат да ја задушат две работи. Едната работа се „грижите од овој свет“. Во овие „особено тешки времиња“, би можеле да бидеме загрижени за сѐ и сешто (2. Тим. 3:1). Поради големите животни трошоци и сѐ поголемата невработеност, можеби тешко врзуваме крај со крај. Можеби и ти си загрижен за иднината и се прашуваш: ‚Ќе можам ли да си ги покривам трошоците кога ќе отидам во пензија?‘ Поради ваквите грижи, некои работат напорно за да се збогатат, мислејќи дека, ако имаат пари, ќе имаат сѐ што им е потребно.

5. Колку опасно може да биде „примамливото богатство“?

⁵ Исус го спомнал и „примамливото богатство“ кое, заедно со грижите, може да ја задуши речта. Библијата признава дека „парите се заштита“ (Проп. 7:12). Но, не е мудро човек да трча по пари. Мнозина сфатиле дека, колку повеќе се трудат да се збогатат, толку повеќе јамката на материјализмот им се стега околу вратот. Некои дури станале и робови на богатството (Мат. 6:24).

6, 7. а) Како некој би можел да се фати во замката на материјализмот? б) За што треба да размисли еден христијанин кога му се нуди дополнителна работа?

⁶ Без да бидеш свесен, кај тебе би можела да се развие желба да се збогатиш. На пример, можеби веќе имаш постојана работа, но ти се укажува можност да работиш уште нешто после работното време и да спечалиш повеќе пари. Што ќе направиш? Се разбира, важно е да се грижиш за материјалните потреби на семејството, но тоа не е твојата единствена одговорност (1. Тим. 5:8). Треба да размислиш уште за некои работи. Колку често и колку долго ќе работиш дополнително? Дали тоа ќе влијае врз твоите духовни активности, како што се собраниските состаноци и вашата Семејна вечер?

⁷ Што ќе ти биде најважно кога донесуваш одлука дали да прифатиш некоја дополнителна работа — парите што ќе ги заработиш или твојот однос со Јехова? Дали ќе дозволиш желбата да спечалиш повеќе пари да те спречи да го ставиш Царството на прво место во животот? Можеш ли да видиш како материјализмот ќе влијае врз тебе ако ја занемариш својата духовност, како и духовните потреби на своето семејство? Ако вакво нешто ти се случува сега, како можеш да му се спротивставиш на материјализмот кој може да те задуши? (Прочитај 1. Тимотеј 6:9, 10.)

8. Кои библиски примери можат да ни помогнат да го преиспитаме својот живот?

⁸ За да не те задуши материјализмот, добро е одвреме-навреме да се преиспиташ како живееш. Никогаш да не бидеме како Исав, кој со своите постапки покажал презир кон духовните работи (1. Мој. 25:34; Евр. 12:16). И во никој случај не треба да бидеме како богатиот човек кому Исус му кажал да го продаде својот имот, да ги раздаде парите на сиромасите и да оди по него. Наместо да направи така, човекот ‚си отишол нажален, зашто имал голем имот‘ (Мат. 19:21, 22). Фатен во стапицата на материјализмот, тој изгубил една посебна чест — да биде следбеник на најголемиот човек што некогаш живеел! Внимавај и ти да не ја изгубиш честа да бидеш ученик на Исус Христос.

9, 10. Во склад со Библијата, како би требало да гледаме на материјалните работи?

⁹ За да не се преокупираш со материјалните работи, послушај го следниов совет на Исус: „Немојте да бидете загрижени и да велите: ‚Што ќе јадеме?‘ — или: ‚Што ќе пиеме?‘ — или: ‚Што ќе облечеме?‘ Зашто, со сето ова се преокупирани луѓето од светот. А вашиот небесен Татко знае дека ви е потребно сето тоа“ (Мат. 6:31, 32; Лука 21:34, 35).

¹⁰ За да не се фатиш во замката на примамливото богатство, труди се да гледаш на работите како библискиот писател Агур, кој рекол: „Не давај ми ниту сиромаштија ниту богатство. Храни ме со леб колку што ми треба“ (Изр. 30:8). Очигледно, Агур сфаќал дека парите можат да бидат заштита, но и дека богатството може да биде опасно. Мора да бидеме свесни дека грижите од овој свет и примамливото богатство можат да нѐ уништат во духовен поглед. Претераната грижа за материјалните работи може да ни го украде времето, да ни ја исцрпи силата и да ни ја уништи речиси секоја желба да го ставиме Царството на прво место. Затоа, биди решен да не се фатиш во Сатановата замка на материјализмот! (Прочитај Евреите 13:5.)

ПРЕЉУБА — ЛУКАВО ПРИКРИЕНА ЈАМА

11, 12. Како некој христијанин би можел да се најде во опасност да направи прељуба на работното место?

¹¹ За да уловат некое големо животно, ловџиите обично копаат јама на патот каде што честопати поминува пленот и ја прикриваат со тенок слој прачки и земја. Една од најуспешните стапици на Сатана личи на овој вид замка. Тоа е неморалот (Изр. 22:14; 23:27). Некои христијани паднале во таа јама со тоа што дозволиле да се најдат во ситуации кои многу лесно воделе до прељуба. Некои мажени или женети христијани извршиле неморал откако развиле романтични чувства кон некој друг и започнале врска со него.

¹² Вакво нешто би можело да се случи на работното место. Всушност, една анкета покажала дека над 50 отсто од жените и речиси 75 отсто од мажите кои извршиле прељуба го направиле тоа со колега или колешка од работа. Дали на работното место минуваш многу време со лица од спротивниот пол? Ако да, каков е твојот однос со нив? Дали си им поставил јасни граници за да знаат дека сте само колеги и дека не можете да бидете ништо повеќе од тоа? На пример, ако редовно разговара со некој колега, една христијанка би можела да почне да му се доверува, па дури и да му зборува за своите брачни проблеми. Или, пак, откако ќе се спријатели со некоја колешка, еден христијанин би можел да си мисли: „Таа го цени моето мислење и навистина слуша кога ѝ зборувам. Се гледа дека ме почитува. Камо и жена ми да е таква со мене!“ Дали сфаќаш во колку голема опасност се овие христијани да направат прељуба?

13. Како некој би можел да се најде во опасност да направи прељуба со соверник?

¹³ Дури и во собранието некој што е во брак би можел да се најде во ваква опасност. Да видиме што му се случило на еден брачен пар. Даниел и жена му, Сара,a биле општи пионери. Даниел бил старешина кој никогаш не знаел да каже ‚не‘ — ја прифаќал секоја задача што ќе ја добиел во собранието. Тој ја проучувал Библијата со пет млади луѓе, од кои тројца се крстиле. На овие новокрстени браќа им била потребна емоционална поддршка. Кога Даниел бил зафатен со разни теократски задачи, честопати Сара им била рамо за плачење. Но, и на Сара ѝ било потребно внимание кое, наместо од Даниел, го добивала од нив. Оваа ситуација била како смртоносна стапица. Даниел вели: „Жена ми со месеци со сета сила се трудеше да им помага на другите, и на крајот и самата се исцрпи — и духовно и емоционално. А во тој период и јас пропуштив да ѝ обрнам доволно внимание. Последиците беа катастрофални. Жена ми направи прељуба со еден од оние со кои претходно ја проучував Библијата. Толку бев зафатен со моите теократски обврски, што воопшто не забележав дека таа духовно тоне пред мои очи“. Како би можел да избегнеш ваква трагедија?

14, 15. Што може да им помогне на христијаните кои се во брак да не се фатат во стапицата на прељубата?

¹⁴ За да не се фатиш во стапица да направиш прељуба, размислувај за значењето на брачниот завет. Исус рекол: „Бог што составил, човек да не разделува!“ (Мат. 19:6). Никогаш немој да мислиш дека твоите теократски задачи се поважни од твојот брачен другар. Освен тоа, ако не минуваш доволно време со својот сопружник поради некои неважни причини, ова може да го поткопа вашиот брак и да води до искушение, па дури и до тежок грев.

¹⁵ Но, што ако си старешина и треба да се грижиш за стадото? Апостол Петар напишал: „Пасете го Божјето стадо кое ви е доверено — не со сила, туку доброволно; не поради нечесна добивка, туку горливо“ (1. Пет. 5:2). Сигурно не би било во ред да ги занемариш членовите на собранието кои ти се доверени. Сепак, не треба до таа мера да се посветиш на својата улога на пастир што ќе ја запоставиш својата улога на сопруг. Би немало никаква смисла, па дури и би било опасно, да се трудиш со сите сили да „го храниш“ собранието, додека твојата жена дома „гладува“. Даниел, кој беше спомнат погоре, вели: „Никогаш не треба да дозволиш твоето семејство да страда затоа што си презафатен со теократските одговорности“.

16, 17. а) Како можат христијаните кои се во брак јасно да им стават до знаење на своите колеги на работа дека се решени да му останат верни на својот сопружник? б) Кои статии од нашите списанија можат да им помогнат на христијаните да не направат прељуба?

¹⁶ Во списанијата Стражарска кула и Разбудете се! има многу добри совети кои можат да им помогнат на христијаните кои се во брак да ја избегнат стапицата на прељубата. На пример, во Стражарска кула од 15 септември 2006 год., излезе следниов совет: ‚На работното место или на кое и да е друго место, внимавај на ситуациите што би можеле да водат до блискост. На пример, кога прекувремено се останува на работа со некое лице од спротивниот пол, можат да се создадат услови за искушение. Ако си во брак, треба и со своите зборови и со своето однесување јасно да им дадеш до знаење на колегите дека си решен да му останеш верен на својот сопружник. Како личност што му е оддадена на Бог, сигурно не би сакал да привлекуваш непотребно внимание со тоа што ќе флертуваш или ќе се облекуваш нескромно. Ако на работното место ставиш фотографии од својот сопружник и од децата, тие постојано ќе те потсетуваат и тебе и другите колку ти е важно семејството. Биди решен ниту да флертуваш, ниту да дозволиш некој да флертува со тебе‘.

¹⁷ Во статијата со наслов „Што значи да се биде верен брачен другар?“, која излезе во Разбудете се! од април 2009 год., беше кажано дека е многу опасно да фантазираме за сексуални односи со некој што не ни е брачен другар, бидејќи така постои поголема веројатност да направиме прељуба (Јак. 1:14, 15). Ако си во брак, добро е заедно со својот сопружник одвреме-навреме да ги разгледате ваквите статии. Бракот е свет затоа што го основал самиот Јехова. Ако одвоиш време да разговараш со својот сопружник за вашиот брак, ќе покажеш дека ги цениш светите работи (1. Мој. 2:21-24).

18, 19. а) Кои се последиците од прељубата? б) Кои се користите ако му останеме верни на брачниот другар?

¹⁸ Ако си во брак и ако се најдеш на искушение да развиеш романтични чувства кон некој што не ти е сопружник, размислувај за страшните последици од блудот и прељубата (Изр. 7:22, 23; Гал. 6:7). Оние што вршат неморал го разочаруваат Јехова, и го повредуваат својот брачен другар, а и себеси. (Прочитај Малахија 2:13, 14.) Наместо тоа, размислувај за користа што ја имаат оние што остануваат чисти во морален поглед. Тие не само што имаат надеж за вечен живот, туку уште денес имаат чиста совест и живеат на најдобар можен начин. (Прочитај Изреки 3:1, 2.)

¹⁹ Псалмистот рекол: „Голем мир имаат оние што го сакаат [Божјиот] закон, за нив не постои камен за спрепнување“ (Пс. 119:165). Затоа, сакајте ја вистината и „внимавајте како живеете“ во овие тешки времиња — „не како немудри, туку како мудри“ (Еф. 5:15, 16). Денес, Сатана поставил многу стапици за да ги фати слугите на вистинскиот Бог. Но, ние сме добро опремени за да се заштитиме. Јехова ни го дал сето она што ни е потребно за да му се спротивставиме на Ѓаволот и ‚да ги изгаснеме сите огнени стрели на Злобниот‘ (Еф. 6:11, 16).