Лекција 8

Семеен живот кој му е допадлив на Бог

Кое е местото на сопругот во семејството? (1)

Како треба сопругот да се однесува спрема својата сопруга? (2)

Какви одговорности има таткото? (3)

Која е улогата на сопругата во семејството? (4)

Што бара Бог од родителите и од децата? (5)

Кое е библиското гледиште во врска со одвојувањето и разводот? (6, 7)

1. Библијата вели дека сопругот е поглавар на своето семејство (1. Коринтјаните 11:3). Сопругот мора да има само една сопруга. Тие треба да бидат регуларно венчани во очите на законот (1. Тимотеј 3:2; Тит 3:1).

2. Сопругот треба да ја сака својата сопруга како што се сака самиот себеси. Тој треба да постапува со неа како што постапува Исус со своите следбеници (Ефесјаните 5:25, 28, 29). Тој не треба никогаш да ја удира својата сопруга или на кој и да било начин да ја малтретира. Поправо, тој треба да ѝ покажува чест и почитување (Колосјаните 3:19; 1. Петрово 3:7).

3. Таткото треба напорно да работи за да се грижи за своето семејство. Тој мора да обезбеди храна, облека и стан за својата сопруга и за децата. Таткото исто така мора да ги задоволи духовните потреби на своето семејство (1. Тимотеј 5:8). Тој го презема водството помагајќи му на своето семејство да учи за Бог и за Неговите намери (5. Мојсеева 6:4—9; Ефесјаните 6:4).

4. Сопругата треба да му биде добра помошничка на својот сопруг (1. Мојсеева 2:18). Таа треба да му помага на својот сопруг во поучувањето и воспитувањето на нивните деца (Изреки 1:8). Јехова бара сопругата со љубов да се грижи за своето семејство (Изреки 31:10, 15, 26, 27; Тит 2:4, 5). Таа треба да има длабоко почитување спрема својот сопруг (Ефесјаните 5:22, 23, 33).

5. Бог бара децата да ги слушаат своите родители (Ефесјаните 6:1—3). Тој очекува родителите да ги поучуваат и да ги исправаат своите деца. Родителите треба да поминуваат време заедно со своите деца и со нив да ја проучуваат Библијата, грижејќи се за нивните духовни и емоционални потреби (5. Мојсеева 11:18, 19; Изреки 22:6, 16). Родителите никогаш не треба да им даваат стега на своите деца на еден строг или суров начин (Колосјаните 3:21).

6. Кога брачните парови имаат проблеми да се сложуваат, тие треба да се трудат да ги применуваат библиските совети. Библијата нѐ поттикнува да покажуваме љубов и да простуваме (Колосјаните 3:12—14). Божјата Реч не охрабрува на одвојување како начин да се решат незначителните проблеми. Но сопругата би можела да одлучи да го напушти својот сопруг ако 1) тој тврдоглаво одбива да ја издржува својата фамилија, 2) толку е насилен што се доведени во опасност нејзиното здравје и животот, или 3) неговото жестоко противење оневозможува таа да го обожава Јехова (1. Коринтјаните 7:12, 13).

7. Брачните другари мора да бидат верни еден на друг. Прељубата е грев против Бог и против брачниот другар (Евреите 13:4). Сексуалните односи надвор од бракот се единствената библиска основа за развод која допушта повторно стапување во брак (Матеј 19:6—9; Римјаните 7:2, 3). Јехова мрази кога луѓето се разведуваат без библиска основа и се венчаваат со некој друг (Малахија 2:14—16, НС).

[Слики на страници 16 и 17]

Еден татко полн со љубов се грижи за своето семејство во материјален и духовен поглед

[Слика на страница 17]

Бог очекува родителите да ги поучуваат своите деца и да ги исправаат