Долг што го имаме кон другите

¹ Апостол Павле чувствувал должност да им проповеда на луѓето. Тој знаел дека Јехова овозможил сите луѓе да се спасат преку скапоцената крв на Неговиот Син (1. Тим. 2:3-6). Затоа, Павле изјавил: „Должник сум им и на Грците и на варварите, и на мудрите и на безумните“. Тој горливо и неуморно работел за да го исполни својот долг кон другите луѓе, објавувајќи им ја добрата вест (Рим. 1:14, 15).

² Исто како Павле, христијаните денес се трудат да им ја пренесат добрата вест на своите ближни во секоја прилика. Поради тоа што „големата неволја“ брзо се приближува, мораме итно да ги најдеме искрените лица. Нашата искрена љубов кон луѓето нека нѐ поттикне да бидеме марливи во ова дело што спасува животи (Мат. 24:21; Езек. 33:8).

³ Исполнување на нашиот долг: Главен начин на кој ги достигнуваме луѓето е проповедањето од куќа до куќа. На подрачјата каде што луѓето честопати не се дома, треба да водиме точни белешки и да одиме во различно време, за да стапиме во контакт со повеќе луѓе (1. Кор. 10:33). Можеме да сведочиме и на деловни подрачја, на улици, во паркови, на паркиралишта и преку телефон. Би можеле да се запрашаме: ‚Дали давам сѐ од себе за да ги испробам сите начини на кои можам да ја пренесам пораката за живот‘ (Мат. 10:11).

⁴ Една пионерка чувствувала голема одговорност да ги достигне сите луѓе на нејзиното подрачје. Во една куќа ролетните биле постојано спуштени и постојано немало никој дома. Меѓутоа, еден ден кога пионерката не била во служба, пред таа куќа забележала паркиран автомобил. Затоа што не сакала да ја пропушти приликата, заѕвонила на ѕвончето. Отворил еден човек и по првиот разговор, оваа сестра заедно со својот сопруг направиле уште неколку повторни посети. Со текот на времето, човекот прифатил да ја проучува Библијата и сега е крстен брат. Тој е благодарен затоа што оваа сестра имала чувство на одговорност да им проповеда на другите.

⁵ Затоа што крајот брзо се приближува, сега е моментот да го исполниме нашиот долг кон другите луѓе, со тоа што силно ќе се напрегаме во проповедничкото дело (2. Кор. 6:1, 2).

Дел 11: Водење напредни библиски студии

Помагај им на учениците да прават повторни посети

¹ Кога лицето со кое проучуваш ќе почне да учествува во проповедничкото дело, ќе сретне луѓе кои се заинтересирани за добрата вест. Како да му помогнеме на новиот објавител да прави делотворни повторни посети кај тие лица и да им помага нивниот интерес да расте?

² Подготовката за повторна посета започнува уште на првата посета. Поттикни го ученикот да покаже искрен интерес кон оние со кои разговара (Фил. 2:4). Постепено поучувај го како да ги поттикне луѓето да си го кажат своето мислење, да ги слуша нивните коментари и да обрнува внимание за што се заинтересирани. Кога некој ќе покаже интерес, новиот објавител нека ги запише поважните информации од таа посета. Искористи ги тие информации за да му помогнеш да се подготви за понатамошни разговори.

³ Подготви ги за повторна посета: Разгледај ги белешките од првиот разговор и покажи му на ученикот како да избере еден аспект од пораката за Царството што ќе го интересира станарот (1. Кор. 9:19-23). Заедно подгответе кратка презентација во која ќе има еден стих од Библијата и еден пасус од некоја публикација за проучување. Освен тоа, подгответе и едно прашање кое на крајот од разговорот ќе помогне да се постави темел за следна посета. Покажи му на новиот објавител како при секоја посета да им помага на луѓето да научат по нешто ново за Божјата Реч.

⁴ Исто така корисно е да му помогнеме на ученикот да научи еден едноставен увод. Откако ќе го поздрави станарот, тој би можел да каже: „Минатиот пат уживав во разговорот и сега Ве посетувам повторно за да Ви покажам што вели Библијата за [спомни ја темата]“. Можеби ќе треба да му покажеш на објавителот како да постапи ако на вратата излезе друго лице.

⁵ Биди марлив во повторните посети: Поттикни го ученикот да биде примерен со тоа што брзо ќе ги посети оние што покажале интерес. За да ги најдеме луѓето дома треба да истраеме во повторните посети. Поучи го ученикот како да се договори за следната посета и помогни му да сфати дека треба повторно да дојде како што ветил (Мат. 5:37). Поучи го да биде љубезен, обѕирен и полн со почитување, додека ги бара оние што се слични на овци и додека го зголемува нивниот интерес (Тит 3:2).