Дел 7: Водење напредни библиски студии

Молитва на студијата

1. а) Зошто е прикладно да се започне и да се заврши библиската студија со молитва? б) Како можеме да ја воведеме молитвата во библиската студија?

¹ За да може ученикот духовно да напредува, неопходен е Јеховиниот благослов (1. Кор. 3:6). Затоа, прикладно е библиската студија да се започне и да се заврши со молитва. Кај религиозни луѓе честопати ова можеме да го направиме уште на првата студија. Кај други, пак, можеби ќе треба да процениме кога е вистинското време за да ја воведеме молитвата. За да му помогнеш на ученикот да разбере зошто е потребна молитвата, би можел да ги користиш Псалм 25:4, 5 и 1. Јованово 5:14. Исто така употреби го Јован 15:16 за да објасниш зошто е важно да му се молиме на Јехова преку Исус Христос.

2. Кој треба да се моли, ако на библиската студија сестрата ја придружува крстен брат или некрстен објавител?

² Кој треба да се моли? Ако крстен брат придружува сестра на студијата, тој треба да се моли иако сестрата ја води студијата со покриена глава (1. Кор. 11:5, 10). Од друга страна, пак, ако некрстен објавител придружува сестра на студијата, тогаш таа треба да се моли. Во таква ситуација, таа треба да носи покривало на главата додека се моли, но и за време на студијата.

3. Кои работи е прикладно да ги вклучиме во молитвите на библиската студија?

³ Што може да се вклучи во молитвата: Молитвите на една библиска студија не мора да бидат долги, но треба да бидат конкретни. Освен тоа што ќе побараме благослов од Јехова за студијата и ќе му се заблагодариме за вистините што сме ги научиле, прикладно е да го фалиме како Извор на поуката (Иса. 54:13). Исто така, со избрани зборови можеме да го покажеме нашиот искрен интерес за ученикот, а и нашето ценење за организацијата којашто Јехова ја користи (1. Сол. 1:2, 3; 2:7, 8). Тоа што ќе го молиме Јехова да го благослови трудот што го вложува ученикот за да го применува наученото, може да му помогне да сфати колку е важно да биде ‚извршител на речта‘ (Јак. 1:22).

4. Кои користи се добиваат ако библиската студија ја започнеш и ја завршиш со молитва?

⁴ Од молитвата има многу користи. Таа носи Божји благослов (Лука 11:13). Ја нагласува важноста од проучувањето на Божјата Реч. Додека ученикот ги слуша нашите молитви, тој учи како да се моли (Лука 6:40). Освен тоа, молитвите коишто доаѓаат од срце исполнето со љубов кон Бог и ценење за неговите ненадминливи особини, можат да му помогнат на ученикот да развие личен однос со Јехова.

Што да речеш за списанијата

Стражарска кула 15 мар.

„Луѓето низ целиот свет ги фалат учењата на Исус. [Прочитај еден од цитатите на страница 3, пасус 1.] Но, што мислите, дали денес се практични овие учења, како што е примерот во овој стих?“ [Прочитај Матеј 5:21, 22а. Потоа почекај да одговори.] Ова списание дискутира за тоа што поучувал Исус и како може тоа да ни користи.

Стражарска кула 1 апр.

„Дали сте слушнале како некои велат дека науката и Библијата си противречат? [Почекај да одговори.] Ова списание ја разгледува историјата на судирот меѓу науката и религијата. Но исто така дава докази за да покаже дека вистинската наука е во склад со Библијата.“ Покажи ги страниците 6-7. Потоа прочитај Проповедник 1:7.

Разбудете се! 8 апр.

„Дали сте забележале дека општеството сѐ повеќе го нагласува надворешниот изглед на луѓето? [Почекај да одговори.] Ова списание дискутира за некои опасности што би се појавиле ако станеме опседнати од убавината. Исто така ја истакнува вредноста на најважната убавина.“ Прочитај 1. Петрово 3:3, 4.