СВЕТ ВО ХАОС

3 | Остани близок со оние што ги сакаш

ЗОШТО Е ВАЖНО

Поради хаосот во светот, многу луѓе се сѐ позагрижени и несвесно се оддалечуваат од оние што ги сакаат.

Луѓето се изолираат од своите пријатели.
Брачните другари сѐ почесто се караат.
Родителите не обрнуваат речиси никакво внимание на она што ги загрижува нивните деца.

Што треба да знаеш

Пријателите се од клучно значење за нашето физичко и емоционално здравје, особено во тешки времиња.
Стресот што го носи хаосот во светот може да доведе до неочекувани проблеми во семејството.
Вознемирувачките вести може многу да ги уплашат децата.

Што можеш да преземеш уште сега

Во Библијата пишува: „Вистинскиот пријател сака во секое време, и брат станува во неволја“ (Изреки 17:17).

Помисли на некој што те поддржува и што може да ти даде добри совети. Самото тоа што знаеш дека некој се грижи за тебе може да ти даде сила да се носиш со секојдневните предизвици.

КАКО ДА ОПСТАНЕМЕ — Корисни совети

Следниве совети можат да ти помогнат да останеш близок со оние што ги сакаш

ЗАЦВРСТИ СИ ГО БРАКОТ

Зацврсти си го бракот

Во Библијата пишува: „Подобро им е на двајца отколку на еден... Зашто, ако падне едниот, другиот ќе го подигне другарот свој“ (Проповедник 4:9, 10). Брачните другари треба да бидат како пилот и копилот со ист план на летање, а не како пилоти на борбени авиони на две спротивставени страни.

Бидете решени да не си ја истурате нервозата еден на друг. Бидете стрпливи и толерантни еден со друг.
Како брачни другари, барем еднаш седмично разговарајте за некој проблем што можеби го имате. И не заборавајте, целта не треба да ви биде да се напаѓате еден со друг, туку да го нападнете проблемот.
Одвојте си време да правите нешто во кое и двајцата уживате.
Потсетувајте се на убавите моменти што сте ги поминале, можеби така што ќе гледате слики од својата венчавка или од други мили настани.

„Сопружниците можеби нема да се согласуваат за сѐ, но тоа не значи дека не може да соработуваат како тим. Може да донесат заедничка одлука и потоа да работат на тоа да ја остварат“ (Дејвид).

ОДРЖУВАЈ ГИ ПРИЈАТЕЛСТВАТА

Одржувај ги пријателствата

Убаво е кога добиваш поддршка од пријателите, но размислувај како и ти да им дадеш поддршка ним. Кога ги храбриш другите, се охрабруваш и себеси.
Јави им се или пиши им на неколку пријатели секој ден за да видиш како се.
Прашај ги пријателите како тие се справуваат со слични предизвици како твоите.

„Кога минуваш низ некој бурен период, пријателите се како светилник. Тие може да те насочат во исправниот правец, макар само така што ќе те потсетат на работите што веќе ги знаеш. Пријателите те сакаат, а знаат дека и ти ги сакаш нив“ (Никол).

ПОМАГАЈ ИМ НА СВОИТЕ ДЕЦА

Помагај им на своите деца

Во Библијата пишува: „Секој човек треба да биде брз на слушање, а бавен на зборување“ (Јаков 1:19). Отпрвин, на твоите деца може ќе им биде тешко да си ги кажат своите стравови и грижи, но ако стрпливо ги слушаш, ќе им помогнеш да ти се отворат.

Помогни им на децата да се чувствуваат слободно да зборуваат со тебе за сѐ. На некои деца им е полесно да зборуваат во опуштени ситуации, отколку формално да разговараат со родителите. Можеби твоите деца полесно ќе ти се отворат додека се возите или додека се шетате.
Погрижи се твоите деца да не бидат премногу изложени на вознемирувачки вести.
Кажи им на децата што имаш преземено за семејството да биде безбедно.
Испланирајте како да постапите во итни ситуации и вежбајте со децата.

„Разговарајте со децата и дозволете им и тие да се искажат. Можеби потискаат во себе страв, грижи или гнев. Кажи им дека и ти се бориш со слични чувства и што ти помага да се справиш со нив“ (Бетани).