Името во долината
ДАЛИ името Сент Мориц ти звучи познато? Можеби да, бидејќи тоа е прочуено светско одморалиште во Енгадинската долина во Швајцарија. Но, Сент Мориц е само едно од местата што со децении ги привлекуваат луѓето во оваа живописна долина вгнездена во снежните Алпи, во југоисточниот дел на Швајцарија, близу до границата со Италија. Во неа се наоѓа и Швајцарскиот национален парк, чија природна убавина и богата разноликост на флора и фауна му оддава чест на нашиот Величествен Творец, Јехова (Пс. 148:7-10). Но, чест му оддаваат и многуте неми сведоци на една стара традиција од средината на 17 век.
Веројатно ќе ти падне во очи еден необичен детаљ кој се среќава на повеќе места во оваа долина — Божјето име, врежано на предниот ѕид од куќите како, на пример, над влезната врата. Во минатите векови било вообичаено фасадата на куќите да се украсува со натписи, кои биле испишани на неа, издлабени во малтерот или врежани во камен. На оваа слика се гледа куќа во селото Бевер. Преводот на овој стар натпис гласи: „Година 1715. Јехова е почетокот и Јехова е крајот. Сѐ е возможно со Бог, и ништо не е можно без него“. Овде двапати е спомнато Божјето лично име.
Во селото Мадулајн има еден уште постар натпис. Во него стои: „Псалм 127. Ако Јехова не ја гради куќата, залудно се трудат нејзините градители. Лукиус Румедиус. Година 1654“.
Зошто Божјето име било толку јавно истакнувано во оваа долина? За време на реформацијата, Библијата била отпечатена на романш, еден јазик со латинско потекло кој се зборувал во Енгадин. Всушност, тоа била првата книга преведена на тој јазик. Трогнати од она што го читале во Божјата Реч, мнозина од мештаните ги напишале на фасадите од куќите не само своите имиња туку и цитати од Библијата во кои стоело Божјето лично име.
Да, овие натписи го објавуваат и го слават името Јехова до ден-денес, со векови откако биле испишани на куќите. И посетителите и жителите на оваа долина можат да дознаат повеќе за прекрасниот Бог, Јехова, со тоа што ќе дојдат во една друга градба која исто така го носи Јеховиното име — во Салата на Царството на Јеховините сведоци во Бевер.
[Извор на слика на страница 7]
© Stähli Rolf A/age fotostock