Што ни откриле пророците за Бог

АВРААМ

Бог е непристрасен и сака да ги благослови сите луѓе.

Бог му ветил на пророкот Авраам дека преку него „ќе се благословат сите народи на земјата“ (1. Мојсеева 12:3).

Што учиме од ова? Бог многу нѐ сака и сака да ги благослови сите оние што му се послушни — и мажи и жени и деца.

МОЈСЕЈ

Бог е милостив и ги благословува оние што се трудат да го запознаат.

Семоќниот Бог му дал на пророкот Мојсеј моќ да прави големи чуда. Сепак, Мојсеј го молел: „Објави ми ги своите патишта за да те запознаам и да најдам милост во твои очи“ (2. Мојсеева 33:13). На Бог му било мило што Мојсеј го побарал тоа и затоа го благословил така што му помогнал уште подобро да ги разбере неговите особини и начинот на кој постапува. На пример, Мојсеј дознал дека Творецот е милосрден и сочувствителен (2. Мојсеева 34:6, 7).

Што учиме од ова? Бог сака да ги благослови сите оние што се трудат подобро да го запознаат — и мажи и жени и деца. Преку Светото писмо тој ни кажува како да му служиме. Освен тоа, ни кажува дека сака да ни покаже милост и да нѐ благослови.

ИСУС

Можеме да ги добиеме вечните благослови од Бог ако учиме за Исус и ако дознаеме што правел тој и за што поучувал.

Во Божјата Реч се запишани многу детали за животот на Исус и за неговите учења. Бог му дал на Исус моќ да прави голем број извонредни чуда како, на пример, да ги лекува слепите, глувите и сакатите. Тој дури и воскреснувал мртви. Чудата на Исус покажале што ќе направи Бог во иднина за целото човештво. Исус објаснил како секој од нас може да ги добие тие благослови. Во Јован 17:3 тој кажал: „За да добијат вечен живот, треба добро да те запознаат тебе, единствениот вистински Бог, и оној кого го испрати, Исус Христос“.

Исус бил сочувствителен, благ и љубезен. Многу луѓе, меѓу кои имало мажи и жени, млади и стари, доаѓале кај него бидејќи се оѕвале на неговата срдечна покана: „Учете од мене, зашто јас сум благ и со понизно срце, и ќе најдете поткрепа за своите души!“ (Матеј 11:29). За разлика од другите во негово време кои постапувале лошо со жените, Исус бил љубезен и се однесувал со нив достоинствено и со почит.

Што учиме од ова? Исус покажал дека многу ги сака луѓето и ни оставил извонреден пример за тоа како треба да постапуваме еден со друг.

ИСУС НЕ Е БОГ

Од Светото писмо дознаваме дека „постои еден Бог“ и дека Исус Христос бил пророк кој понизно му служел на Бог (1. Коринќаните 8:6). Исус јасно кажал дека Бог е поголем од него и дека го испратил на Земјата (Јован 11:41, 42; 14:28).a