Энх амгалан шинэ ертөнц дэх амьдрал
Энэ танилцуулга дээр дүрсэлсэн зургийг харахад танд ямар сэтгэгдэл төрж байна вэ? Үүн дээр дүрсэлсэн энх тайван, аз жаргал, аятай сайхан нөхцөлийг та хүсэхгүй гэж үү? Мэдээж, хүсэж байгаа. Гэхдээ, хэзээ нэгэн цагт дэлхий дээр ийм нөхцөл байдал бий болох болно гэдэгт итгэх нь ердөө л мөрөөдөл эсвэл уран зөгнөл гэж үү?
Ихэнх хүмүүс тэгж боддог байх. Өнөөгийн бодит байдлыг илэрхийлэхэд дайн, гэмт хэрэг, өлсгөлөн, өвчин, хөгшрөлт зэрэг цөөн хэдийг дурдахад хангалттай. Гэвч найдах үндэслэл бий. Ирээдүйг зөгнөн «Харин бид Түүний [Бурханы] амлалтын дагуух шинэ тэнгэр хийгээд шинэ газрыг хүлээн байна. Тэнд зөв нь нутагладаг болой» гэж Библид бичсэн байна (2 Пэтр 3:13; Исаиа 65:17).
Библийн дагуу энэ «шинэ тэнгэр» ба «шинэ газар» гэдэг нь бодит шинэ тэнгэр эсвэл шууд утгаараа шинэ газар дэлхий биш юм. Бодит газар ба тэнгэр нь төгс бүтээгдсэн бөгөөд тэдгээр нь мөнх үлдэнэ гэж Библид заажээ (Дуулал 89:37, 38; 104:5). «Шинэ газар» гэдэг нь дэлхий дээр амьдрах зөв хүмүүсийн нийгэм, харин «шинэ тэнгэр» нь бол тэнгэрийн төгс Хаанчлал буюу энэ дэлхийн хүний нийгмийг удирдах засгийн газар юм. Гэхдээ «шинэ газар» буюу гайхамшигтай шинэ ертөнц бий болох боломжтой гэж бодох нь бодит байдалд нийцэх үү?
Тийм үвтэгш нөхцөл байдал нь манай дэлхийд хамааралтай Бурханы анхны зорилгын хэсэг байсан гэдгийг анхаар. Бурхан хүн төрөлхтний анхны хосыг дэлхийн Еденийн диваажинд нутаглуулаад «Та нар үржин олон болж, дэлхийг дүүргэн түүнийг эзэмшицгээ» гэсэн гайхамшигтай даалгавар өгсөн (Эхлэл 1:28). Тиймээ, Бурханы зорилго бол тэд үр хүүхэдтэй болж, диваажингаа аажмаар өргөжүүлэн бүх дэлхийг диваажин болгох явдал байжээ. Хожим нь тэд Бурханы үгэнд орохгүй байхаар шийдсэн ба ингэснээрээ тэд мөнх амьдрах эрхгүй болсон ч Бурхан анхны зорилгоо өөрчлөөгүй юм. Энэ нь шинэ ертөнцөд заавал биелэх ёстой! (Исаиа 55:11).
«Эцэг минь» хэмээн дуудан Бурханы Хаанчлал ирэхийг гуйн залбирч байгаа хүмүүсийн ихэнх нь үнэн хэрэг дээрээ Бурханы тэнгэрийн засгийн газар дэлхийгээс муу муухайг арилган зайлуулж, шинэ ертөнцийг захираасай гэж хүсэж байдаг (Матай 6:9). «Зөв хүмүүс дэлхийг өвлөн авч, түүн дээр мөнх амьдарцгаах болно» гэж түүний Үг нэгэнт амладаг учраас Бурхан энэ залбиралд хариулна гэдэгт бид итгэлтэй байж болно (Дуулал 37:29).
Бурханы шинэ ертөнц дэх амьдрал
Бурханы Хаанчлал, хүнийг аз жаргалтай амьдруулахаар төлөвлөж байсан Бурханы анхны санаа зорилгыг бүгдийг нь хэрэгжүүлж, дэлхийд юутай ч зүйрлэмгүй ивээл авчирна. Үзэн ядалт, атгаг санаа байхгүй болж дэлхий дээрх хүн бүр жинхэнэ анд болох цаг ирнэ. Библид Бурхан «дайн тулааныг дэлхийн хязгаар хүртэл зогсооно» гэж амласан байдаг. «Үндэстэн үндэстнийхээ эсрэг сэлэм далайхгүй ба хэн ч дайнд дахин суралцахгүй» (Дуулал 46:9; Исаиа 2:4).
Эцсийн эцэст бүх дэлхий цэцэрлэг мэт гайхамшигтай диваажин болон өөрчлөгдөнө. Библид «Говь болон усгүй газар хөөрөн баярлаж, зэлүүд тал хээр баяслаар дүүрч, замар цэцэг мэт цэцэглэнэ... яагаад гэвэл говьд ус ундрах ба зэлүүд тал хээрт гол горхи урсах болно. Мөн халуунд гандсан газарт зэгстэй цөөрөм тогтох ба хатсан газар усны эх булаг болно» гэж бичсэн байдаг (Исаиа 35:1, 6, 7).
Диваажин дэлхийд аз жаргалтай байх бүх үндэслэл байх болно. Хүмүүс хоол хүнсний дутагдлаас болж дахин хэзээ ч өлсөхгүй. «Газар дэлхий үр шимээ заавал өгөх болно» гэж Библид бичжээ (Дуулал 67:6; 72:16). «Тэд усан үзмийн тариалан тарьж үр жимсийг нь идэх болно... Тэд өөр бусдад идүүлэх гэж тарихгүй» гэж Бүтээгч маань амласан болохоор бид бүгдээрээ хөдөлмөрийнхөө үр шимийг хүртэх болно (Исаиа 65:21, 22).
Бурханы шинэ ертөнцөд хүмүүс орон сууцны нүсэр байшинд эсвэл ядуучуудын ноорхой хороололд бөөгнөрөн суухгүй. Учир нь, Бурханы зорилго «Тэд гэр байшин барьж, түүндээ эзэн болно... Тэд өөр хүнийг суулгах гэж барихгүй» гэж байдаг юм. Түүнчлэн Библи «Тэд хий дэмий хөдөлмөрлөхгүй» гэж амладаг (Исаиа 65:21—23). Тийнхүү хүмүүс үр бүтээлтэй, сэтгэлд нийцсэн ажилтай болно. Амьдрал уйтгартай болохгүй.
Бурханы Хаанчлал нь Еден цэцэрлэгийн амьтад хийгээд амьтан ба хүний хооронд оршин байсан энх амгалан харьцааг хүртэл аажмаар сэргээх болно. «Үнэндээ, чоно нэг хэсэгтээ эр хургатай хамт байж, ирвэс ишигтэй зэрэгцэн хэвтэх ба тугал хийгээд зогдорт залуу арслан, өнгө сайтай амьтад бүгд хамтдаа бэлчиж, тэднийг бяцхан хүү хариулах болно» гэж Библид бичсэн байдаг (Исаиа 11:6—9; Хөшээ 2:18).
Диваажин дэлхий дээр бүх өвчин эмгэг, бие эрхтний гажгууд анагаагдах болно гээд төсөөлөөд үз дээ! «Оршин суугчдаас хэн ч „би өвчтэй“ гэж хэлэхгүй болно» гэдгийг Бурханы Үг бидэнд батлан хэлдэг (Исаиа 33:24). «Тэгээд Тэр тэдний нүднээс бүх нулимсыг арчина. Тэнд цаашид үхэл үгүй болно. Тэнд гашуудах, уйлах, өвдөх гэж үгүй болно. Анхны юмс үгүй боллоо» (Илчлэлт 21:4).
Түүнд хүрэх таны боломж
Бурханы шударга шинэ ертөнцийн амьдралд хамаатай Түүний амлалтууд нь таны сэтгэлийг хөдөлгөх нь маргаангүй. Үнэндээ, зарим хүн эдгээр ивээлүүд нь итгэхийн аргагүй сайхан юм гэж үздэг ч, эдгээрийг бидэнд хайртай Бүтээгч амласан болохоор биелэх болно (Дуулал 145:16; Микаиа 4:4).
Бид дэлхий дээр ирээдүйн диваажинд амьдрахыг хүсэж байгаа бол, мэдээж, тодорхой шаардлагуудыг хангах ёстой. Есүс Бурханд хандан залбирахдаа «Цорын ганц үнэн Бурхан Таныг болон Таны илгээсэн Есүс Христийг мэдэх нь мөнх амь мөн» гэж нэг гол шаардлагыг онцолж хэлсэн (Иохан 17:3).
Тиймээс, хэрвээ бид Бурханы шинэ ертөнцөд амьдрахыг үнэхээр хүсэж байвал эхлээд Бурханы тааллыг танин мэдэж, дараа нь түүнийг биелүүлэх ёстой. «Энэхүү дэлхий хийгээд түүний хүсэл нь өнгөрнө. Харин Бурханы тааллыг гүйцэлдүүлэгч нь мөнхөд оршино» гэдэг нь бидний хайрт Бүтээгчээс өгөх ивээлүүдээр мөнх жаргахын баталгаа болно (1 Иохан 2:17).
Хэрвээ өөр заалт байхгүй бол Грек Бичээсийн бүх ишлэлийг Шинэ Гэрээ (МБОХ 1996 он) орчуулгаас авсан ба Еврей Бичээсийн ишлэлүүдийг «Ариун Бичээсийн Шинэ Ертөнцийн Орчуулгаас» (англи хэл дээр) авсан болно.