Гэр бүлээрээ Бурхны үгийг байнга судлагтун
«Хүн зөвхөн талхаар бус, харин Бурханы амнаас гарах үг бүрээр амьдардаг» (МАТАЙ 4:4).
1. Үр хүүхдээ Еховагийн замаар сургах гэр бүлийн тэргүүн нарын хариуцлагын талаар Библид юу өгүүлдэг вэ?
ЕХОВА БУРХАН гэр бүлийн тэргүүн нарт үр хүүхдээ сурган хүмүүжүүлэх хариуцлагынх нь талаар байнга сануулдаг байсан. Тийнхүү сургахад хүүхдүүд шаардлагатай мэдлэгтэй болохоос гадна тэднийг бие даасан амьдралд бэлтгэхэд тустай байлаа. Бурхны илгээсэн тэнгэрэлч Абрахамд гэр бүлийнхнийгээ сургах буюу «Эзэний замаар дагуулах» үүргийг сануулсан (Эхлэл 18:19). Бурхан хэрхэн израилчуудыг Египетээс гаргаж, Синай буюу Хореб ууланд тэдэнд Хууль өгсөн тухай хүүхдүүддээ ярьж өгөхийг израилийн эцэг эхчүүдэд тушаасан юм (Египетээс гарсан нь 13:8, 9; Дээд хууль 4:9, 10; 11:18–21). Христос шашинтны гэр бүлийн тэргүүн нарыг үр хүүхдээ «Эзэний сануулга ба дэг журам дотор хүмүүжүүлэхийг» уриалдаг (Эфэс 6:4). Эцэг эх хоёрын нэг нь л Еховаг шүтдэг байлаа гэвэл тэрбээр хүүхдүүдээ Еховагийн замаар явуулж сургахын төлөө чармайх хэрэгтэй (2 Тимот 1:5; 3:14, 15).
2. Хүүхэдгүй байлаа ч гэсэн гэр бүлээрээ судлах хэрэгтэй юу? Тайлбарлана уу
2 Энэ нь Бурхны Үгийг гэр бүлээрээ судлахдаа зөвхөн хүүхдүүдтэйгээ судална гэсэн үг биш. Нөхөр эхнэр хоёр хүүхэдгүй байлаа ч гэсэн гэр бүлээрээ судалдаг бол сүнслэг асуудлыг өндрөөр үнэлдгийн илрэл мөн билээ (Эфэс 5:25, 26).
3. Гэр бүлээрээ байнга судлах нь ямар учраас чухал вэ?
3 Илүү ашигтай байлгахын тулд сургаалыг байнга өгөх нь Ехова израилчуудыг цөлд сургахдаа: «Хүн зөвхөн талхаар бус, харин Еховагийн амнаас гарах үг бүрээр амьдардаг» гэсэнтэй тохирдог (Дэд хууль 8:3, ШЕ). Нөхцөл байдлаасаа шалтгаалан зарим гэр бүл долоо хоногт нэг удаа судалдаг байхад зарим нь өдөр бүр богино хэмжээгээр судалдаг байх жишээтэй. Та ямар ч зарчим баримталдаг байлаа гэсэн судлахаа бүү мартаарай. Судлах цаг зав гарган, «цагийг авар». Үүнд зарцуулсан хүч чармайлт тань үр ашгаа өгнө. Таны гэр бүлийн гишүүдийн амь нас үүнээс шалтгаалах болно (Эфэс 5:15–17; Филиппой 3:16).
Санаж явбал зохих зорилгууд
4, 5. а) Хүүхдүүдийг сургахтай холбоотой Мосегийн ярьсан ямар чухал зорилгыг Ехова эцэг эхчүүдийн өмнө тавьсан бэ? б) Өнөөдөр энэ нь ямар утгатай вэ?
4 Хэрэв та бүхэн өмнөө тодорхой зорилго тавих аваас гэр бүлээрээ судлах нь илүү ашиг тустай болно. Боломжтой заримаас нь авч үзье
5 Судлах болгондоо Ехова Бурхныг хайрлах хайраа хөгжүүлэхийг хичээгтүн. Израилчууд Амласан газар нутагт орохын өмнө Моабын хөндийд цугларахад Мосе тэдний анхаарлыг «хуулин дахь агуу тушаал» гэж Есүсийн хожим хэлсэн зүйлд хандуулсан. Энэ нь ямар тушаал байв аа? «Бүх зүрх, бүх сэтгэл ба бүх оюун ухаанаараа Эзэн Бурханаа хайрла» (Матай 22:36, 37; Дэд хууль 6:5). Мосе энэхүү тушаалыг зүрх сэтгэлдээ хоногшуулан үлдээж, үр хүүхдэдээ зааж сургахыг израилчуудад уриалсан. Үүний тулд эцэг эхчүүд зааснаа дахин давтах, Еховаг хайрлахыг өдөөж буй учир шалтгаануудад анхаарал хандуулах, мөн тийм хайрыг бий болгоход саад болох үзэл бодол хийгээд зан байдлын тухайд анхааруулах болон хувийн амьдралдаа Еховаг хайрлах хэрэгтэй байсан. Тэгвэл бидний үр хүүхдэд тийм сургаал хэрэгтэй юу? Хэрэгтэй! Тэрчлэн, тэдэнд «зүрх сэтгэлээ огтлоход» нь туслах буюу Бурхныг хайрлах хайрыг бий болгоход саад болох бүх зүйлийг арилгах гэсэн үг юм (Дэд хууль 10:12, 16, ШЕ; Иеремиа 4:4). Эдгээр саад тотгорын дотор энэ дэлхийн үнэт зүйлийг эрхэмлэн тэмүүлэх, энэ дэлхийн үйл хэрэгт хутгалдан оролцох хүсэл байж болох юм (1 Иохан 2:15–16). Бурхныг хайрлах хайр нь амьд байх ёстой бөгөөд тэнгэрийн Эцэгт маань тааламжтай аливаа үйлийг хийхийг урамшуулснаар илрэх ёстой (1 Иохан 5:3). Гэр бүлээрээ судлахын ашиг тусыг урт удаан хугацаатай байлгахын тулд хичээл бүрээ энэхүү хайрыг батжуулахаар хийх ёстой.
6. а) Үнэн зөв мэдлэг олгохын тулд юу шаардлагатай вэ? б) Бичээст үнэн зөв мэдлэгийн чухлыг хэрхэн онцолсон бэ?
6 Бурхны шаардлагын талаар үнэн зөв мэдлэгийг олгоорой. Энэ нь дотроо юу багтаадаг вэ? Энэ нь аль нэг ном, сэтгүүлээс хариулт олж уншихаас илүү ихийг багтаадаг. Гол зүйлүүд болон үндсэн санааг бүрэн гүйцэд ойлгосон эсэхдээ итгэлтэй байхын тулд хэлэлцэн ярилцах шаардлагатай байдаг. Үнэн зөв мэдлэг гэдэг бол шинэ хүнийг өмсөхөд маань, амьдралдаа бэрхшээлтэй тулгарахад үнэхээр чухал зүйлийг баримтлахад хийгээд ингэснээр Бурханд тааламжтай зүйлийг хийхэд маань тус болох амин чухал хүчин зүйл мөн билээ (Филиппой 1:9–11; Колоссай 1:9, 10; 3:10).
7. а) Ямар асуултуудыг хэлэлцэн ярилцах нь судалсан зүйлийг бодит амьдралд хэрэгжүүлэхэд туслах вэ? б) Ийм зорилготой байхын чухлыг Бичээст хэрхэн онцолсон бэ?
7 Мэдлэгээ амьдралд хэрэгжүүлэхэд нь туслаарай. Энэ зорилгын дагуу гэр бүлээрээ судлах болгондоо судалж буй сэдэв амьдралд маань яаж нөлөөлөх ёстой вэ? бид ямар нэг талаараа өөрчлөгдөх хэрэгтэй юу? бид яах гэж өөрчлөгдөх хэрэгтэй вэ? зэрэг асуултуудыг асуугаарай (Сургаалт үгс 2:10–15; Исаиа 48:17, 18). Судалсан зүйл бодит амьдрал дээр хэрэгжих ёстой гэдгийг анхаарах нь гэр бүлийн гишүүд сүнслэгээр өсөхөд нөлөөлөх чухал хүчин зүйл болдог.
Сургалтын хэрэгслийг ухаалгаар ашиглагтун
8. Боолын анги Библи судлах ямар хэрэгслүүдээр хангадаг вэ?
8 «Итгэлтэй мэргэн боол» сургалтад зориулсан хэрэгслийг арвин ихээр өгдөг билээ. Библийг ашиглан судалдаг «Харуулын цамхаг» сэтгүүл 131 хэлээр гардаг. Библи судлахад зориулагдсан номууд 153 хэлээр, товхимлууд 284 хэлээр, аудио хуурцаг 61 хэлээр, видео хуурцаг 41 хэлээр, тэрчлэн Библи судлахад зориулагдсан компьютерийн программ 9 хэлээр тус тус гардаг байна! (Матай 24:45–47).
9. Гэр бүлээрээ «Харуулын цамхаг»-ыг судлахдаа энэ догол мөрт өгөгдсөн Бичээсийн зүйлүүдийн зөвлөгөөг хэрхэн хэрэгжүүлж болох вэ?
9 Олон гэр бүлийн хувьд цуглаан дээр судалдаг «Харуулын цамхаг» сэтгүүлийн нийтлэлийг гэр бүлээрээ судлах нь бий. Энэ нь хичнээн тустай гээч! «Харуулын цамхаг» сэтгүүлд Еховагийн дэлхий даяарх ард түмнийг байгуулахад зориулагдсан үндсэн сүнслэг хоол тэжээл байдаг. Та «Харуулын цамхаг»-ыг судлахдаа ердөө л догол мөрүүдийг уншаад тавьсан асуултад хариулахыг биш харин ойлгож авахыг чин сэтгэлээсээ хичээгээрэй. Иш татагдаагүй хэрнээ тухайн догол мөрд заагдсан библийг зүйлүүдийг Библиэс уншихдаа цаг заваа бүү харамлаарай. Бичээсийн зүйлүүд хэлэлцэж буй догол мөрийн агуулгатай хэрхэн холбогдож байгааг тайлбарлахыг гэр бүлийнхээ гишүүдээс хүсээрэй. Зүрх сэтгэлийнхээ угаас хандаарай (Сургаалт үгс 4:7, 23; Үйлс 17:11).
10. Гэр бүлээрээ судлахдаа хүүхдүүдийг оролцуулахын тулд тэдэнд таатай болгохын тулд юу хийж болох вэ?
10 Хэрэв танайх хүүхэдтэй бол гэр бүлээрээ судлах гэдэг нь ердийн нэг дэглэм биш харин сургамжтай, сонирхолтой, баяр хөөртэй байлгахын тулд яах вэ? Судалж буй сэдвээсээ анхаарлаа сарниулахгүйн тулд бүх хүнийг хэлэлцүүлэгт зохих байдлаар татан оролцуулахыг хичээгээрэй. Хэрэв боломжтой бол хүүхэд болгон өөрийн гэсэн Библитэй, судалж буй сэтгүүлийн дугаартай байхаар санаа тавиарай. Есүс хайр халамжтай байсныг дууриан хүүхдийнхээ хажууд сууж, тэвэрч болно. (Марк 10:13–16 харьцуул.) Гэр бүлийн тэргүүн нар судалж буй сэдвийн дагуу зургийг тайлбарлахыг бага насны хүүхдээсээ хүсэж болно. Мөн бага насны хүүхдэдээ Библийн аль нэг зүйл унших даалгаврыг урьдчилан өгч болно. Илүү ахимаг насны хүүхдээс судалж буй материалыг бодит амьдралд хэрхэн хэрэгжүүлэх вэ гэдгийг асууж болно.
11. Бидэнд өөр ямар сургалтын хэрэгслүүд байдаг ба эдгээрийг гэр бүлээрээ судлахдаа хэрхэн ашиглаж болох вэ?
11 Хэдийгээр «Харуулын цамхаг» сэтгүүлийг хэлэлцүүлгийнхээ үндсэн сэдэв болгож болох ч өөр олон хэл дээр гардаг бусад сургалтын хэрэгслүүдийг бүү мартаарай. Хэрэв нэмэлт мэдээлэл, библийн үг хэллэгийн талаар тайлбар шаардлагатай бол «Бичээсийг Ойлгох нь» нэвтэрхий толиос (англи) олох боломжтой. Өөр бусад асуултын хариуг «Харуулын цамхагын хэвлэлийн индекс»-ийн тусламжтайгаар эсвэл Нийгэмлэгийн компьютерны номын сангаас олж болно. Хэрэв энэ нь таны хувьд боломжтой байгаад судлах аваас гэр бүлээрээ судлахад үнэтэй хувь нэмэр оруулна. Хүүхдүүдийнхээ сонирхолыг татахын тулд Нийгэмлэгийнхээ видео киноны хэсгээс үзэх, жүжигчилсэн тоглолтыг бичсэн аудио хуурцагыг хэсэглэн сонсоод хэлэлцэх зэргээр гэр бүлээрээ судлахдаа цаг гаргаж болно. Эдгээр хэрэгслийг зөв зохистой ашиглах нь гэр бүлээрээ судлахад сонирхолтой төдийгүй гэр бүлийн бүх гишүүдэд ашигтай байх болно.
Гэр бүлийнхээ хэрэгцээ шаардлагад тохируулах нь
12. Хойшлуулшгүй асуудлын талаар гэр бүлээрээ хэлэлцэх нь ямар үүрэгтэй вэ?
12 Долоо хоног бүр судалдаг «Харуулын цамхаг» сэтгүүлийн нийтлэлийг та бүхэн гэр бүлээрээ судалж хэвшсэн байх. Гэвч гэр бүлийнхээ хэрэгцээ шаардлагыг хянаж байгаарай. Хэрэв ээж нь ажил эрхлэдэггүй бол хүүхдүүд нь сургуулиа тараад гэртээ ирэхээр нь өдөр бүр тэдэнд зориулан цаг зав гаргах боломжтой. Ийм тохиолдолд зарим асуудлыг тэр дор нь шийдвэрлэх боломжтой ч зарим асуудлыг цаашид анхааран үзэх шаардлагатай байдаг. Гэр бүлд хойшлуулшгүй асуудал тулгарвал үл ойшоож болохгүй (Сургаалт үгс 27:12). Энэ нь зөвхөн сургууль соёлтой холбоотой бус бусад асуудал байж болно. Үүнд тохирох сэдвийг сонгоод, гэр бүлээрээ юуны талаар судлах вэ гэдгийг урьдчилан мэдүүлээрэй.
13. Ядуу тарчиг байдлыг хэрхэн даван туулах талаарх хэлэлцүүлэг ямар учраас ашигтай байж болох вэ?
13 Жишээлбэл: дэлхийн хүн амын дийлэнх хэсэг нь ядуурлын түвшинд амьдардаг болохоор олон гэр бүлийн хувьд ядуу тарчиг байдлыг хэрхэн даван туулах тухайд ярилцах шаардлагатай. Бодит нөхцөл байдал болон библийн зарчмуудын тайлбар дээр үндэслэн гэр бүлээрээ судлах нь таны гэр бүлд ашигтай болох уу? (Сургаалт үгс 21:5; Номлогчийн үгс 9:11; Еврей 13:5, 6, 18).
14. Ямар нөхцөлд Ехова хүчирхийлэлд, дайн самуунд, христос шашинтны төвийг сахисан байдалд хэрхэн ханддагийг хэлэлцэн ярилцах нь цагаа олсон хэрэг болох вэ?
14 Хэлэлцэн ярилцаж болох өөр нэгэн сэдэв бол хүчирхийллийн тухай юм. Бид бүгдээрээ оюун санаа болон зүрх сэтгэлдээ Ехова хүчирхийлэлд хэрхэн ханддагийг сайтар хоногшуулан тогтоох хэрэгтэй (Эхлэл 6:13; Дуулал 11:5). Энэ сэдвийг хөндөн гэр бүлээрээ судлах үедээ сургууль дээрээ дэггүй хүүхдүүдтэй хэрхэн харьцах, бие хамгаалах урлагаар хичээллэх хэрэгтэй эсэх мөн зугаа цэнгэлийн тохируйц хэлбэрийг хэрхэн сонгох талаар ярилцаж болно. Хүчирхийллээс бий болох мөргөлдөөн хаа сайгүй түгээмэл болсон бөгөөд бараг улс орон болгон иргэний дайн самуун, улс төрийн болон үндэстэн хоорондын тэмцэл цаашлаад бүлэг гэмт этгээдүүдийн дайсагналцалд өртөх болжээ. Учир иймээс хэдийгээр эргэн тойронд маань хэсэг бүлгээрээ хуваагдаад бие биедээ дайсагнан ханддаг хүмүүс байгаа ч бид христос шашинтны ёсоор үйл хэргээ үргэлжлүүлэх талаар гэр бүлээрээ ярилцах нь илүүдэхгүй байх (Исаиа 2:2–4; Иохан 17:16).
15. Хүүхдүүдээ секс болон гэр бүлийн талаар яаж сургах нь зохистой вэ?
15 Хүүхдүүд өсөж томрохын хирээр тэдний насанд тохируулан секс болон гэр бүлийн талаарх асуудлыг тайлбарлах шаардлагатай болдог. Зарим үндэстний соёлын дагуу эцэг эхчүүд хүүхдүүдтэйгээ сексийн асуудлаар хэзээ ч ярьдаггүй. Энэ талаар тодорхой мэдлэггүй хүүхдүүд үе тэнгийнхнээсээ буруу гажууд төсөөлөлтэй болдог бөгөөд энэ нь голдуу хөнөөлтөй үр дагаварт хүргэдэг. Энэ асуудлаар шууд боловч үнэн зөв зөвлөгөөг Библиэр дамжуулан өгдөг Еховаг дууриах нь дээргүй гэж үү? Эсрэг хүйсний хүмүүстэй харьцахдаа биеэ хүндтэйгээр, зөв зохистойгоор авч явахад нь Бурхны зөвлөгөө хүүхдүүдэд маань тусална (Сургаалт үгс 5:18–20; Колоссай 3:5; 1 Тэсалоник 4:3–8). Хэрэв та урьд нь энэ асуудлаар ярилцсан бол ахин хэлэлцэхээсээ бүү зовоорой. Нөхцөл байдлууд шинээр бий болдог болохоор давтах нь чухал юм.
16. а) Зарим гэр бүлүүд хэзээ судалдаг вэ? б) Гэр бүлээрээ судлахад тань ямар нэг саад тохиолдвол яах вэ?
16 Гэр бүлээрээ хэзээ судлах вэ? Олон гэр бүлүүд дэлхий даяарх Бетелийн гэр бүлүүдийн адилаар даваа гариг болгоны орой гэр бүлээрээ судалдаг. Гэвч хэн нэгэн нь өөр цагт судалдаг. Аргентины нэгэн гэр бүл 11 ам бүлтэйгээс 9 нь хүүхэд байсан бөгөөд өглөө болгон таван цагт босож гэр бүлээрээ судалдаг байлаа. Учир нь тэд нарын хувьд цагийн хуваарь нь өөр өөр байсан тул өөр үед хийх боломжгүй байжээ. Хэдийгээр амаргүй байсан ч хүүхдүүдийнх нь зүрх сэтгэл болоод оюун ухаанд гэр бүлээрээ судлах нь хичнээн чухал болох нь хоногшин үлджээ. Филиппинд амьдардаг нэгэн ахлагч эхнэр болон гурван хүүхдийнхээ хамт байнга гэр бүлээрээ судалдаг байжээ. Үүнээс гадна үнэнийг хайрлах хайрыг нь хөгжүүлэх гэсэндээ долоо хоногийн явцад хүүхэд бүртэйгээ ганцаарчлан хичээллэдэг байжээ. Америкийн нэгдсэн улсад амьдардаг нэг эгчийн нөхөр нь итгэгч биш байжээ. Тэр эгч өглөө бүр хүүхдүүдээ автобусанд суулгаж өгөхөөр буудал дээр хүлээн арван минут зогсохдоо Библи дээр үндэслэсэн сэдвийг уншиж, хэлэлцдэг бөгөөд хүүхдүүдээ автобусанд суухын өмнөхөн товчхон залбирдаг байна. Ардчилсан Конго Улсын нэгэн эмэгтэйн итгэгч бус нөхөр нь гэр бүлээ орхин явсан бөгөөд түүний боловсрол муу болохоор гэр бүлээрээ судлахын тулд маш их бэлтгэх хэрэгтэй болдог байна. Том болсон хүү нь долоо хоног бүр ирж, ээж болон дүү нартаа тусалдаг байна. Сайн бэлтгэдгээрээ энэ эгч сайхан жишээ үзүүлдэг юм. Магадгүй та бүхний хувьд ч гэсэн гэр бүлээрээ судлахад саад бэрхшээл тулгардаг юм билүү ? Гэвч бүү бууж өгөөрөй. Гэр бүлээрээ Библи судлах гэсэн оролдлогыг тань Ехова ивээгээсэй түүнээс чин сэтгэлээсээ гуйгаарай (Марк 11:23, 24).
Цөхрөлтгүй байдал тань шагнагдана
17. а) Гэр бүлээрээ байнга судлахын тулд юу шаардлагатай вэ? б) Ямар жишээ гэр бүлээрээ Еховагийн замаар сурахын чухлыг харуулж байна вэ?
17 Төлөвлөх хэрэгтэй. Үүнд цөхрөлтгүй байх шаардлагатай. Ингэж бид гэр бүлээрээ судлах нь их үр дүнтэй юм (Сургаалт үгс 22:6; 3 Иохан 4) Германы нэгэн гэр бүл болох Франц Хилда хоёр 11 хүүхэд өсгөж хүмүүжүүлжээ. Олон жилийн дараа тэдний охин Магдалена хэлэхдээ: «Би одоо эргэн санахад бид сүнслэг хоол тэжээлгүй байсан нэг ч өдөр үгүй байсан нь хамгийн чухал байжээ» гэжээ. Адольф Гитлерийн үед үндсэрхэх үзэл улам нэмэгдэж байсан тэр цагт Магдаленагийн эцэг тулгарах сорилтыг урьдчилан харж, гэр бүлийнхнийгээ Библийн тусламжтайгаар үүнд бэлтгэжээ. Хожим нь гэр бүлийн залуу гишүүдийг засан хүмүүжүүлэх сургуульд хүчээр илгээж, бусдыг нь баривчлан, шоронд болон бөөнөөр хорин лагерт хорьсон байна. Мөн заримыг нь цаазласан байна. Гэр бүлийн бүх гишүүдийнх нь итгэл харгис сорилтын үед төдийгүй хатуу бэрх дараах он жилүүдэд ч бат үлдсэн ажээ.
18. Ганц бие эцэг эхчүүдийн чармайлт хэрхэн шагнагддаг вэ?
18 Ганц бие эцэг эхчүүд болон хань нь итгэлийг нь хуваалцдаггүй хүмүүс дээрхийн адилаар хүүхдүүддээ Библийг байнга зааж сургадаг. Хоёр хүүхдээ хүмүүжүүлдэг Энэтхэгийн нэг бэлэвсэн эмэгтэй хүүхдүүдээ Еховаг хайрладаг болгох гэж их хичээжээ. Гэтэл хүү нь Еховагийн ард түмэнтэй харьцахаа больсон тэр үед түүний зүрх сэтгэл ихэд шаналжээ. Энэ эгч хүүгээ хүмүүжүүлэхдээ ямар нэгэн алдаа гаргаж байсан уучилж өршөөнө үү хэмээн Еховагаас гуйжээ. Гэсэн ч хүү нь юу сурч мэдснээ мартсангүй. Арван жилийн дараа хүү нь эргэн ирж, сүнслэгээр сэргэж тэнхрээд хурлын ахлагч болжээ. Одоо тэрбээр эхнэрийнхээ хамтаар бүрэн цагийн эхлэгч болон үйлчилж байна. Гэр бүлээрээ Библийг судлах тал дээр Ехова болон түүний байгууллагын зөвлөгөөг зүрх сэтгэлдээ хүлээн авсандаа эцэг эхчүүд одоо хичнээн жаргалтай гээч! Энэхүү зөвлөгөөг та гэр бүлдээ хэрэгжүүлдэг үү?
Та санаж байна уу?
◻ Гэр бүлээрээ тогтмол судлах нь ямар учраас чухал вэ?
◻ Судлах болгондоо смар зорилго тавих хэрэгтэй вэ?
◻ Сургалтын ямар хэрэгслүүд бидэнд байдаг вэ?
◻ Судлахдаа гэр бүлийнхээ хэрэгцээ шаардлагыг хэрхэн харгалзан үзэх вэ?