«Библийн сургаал» номоор хичээл хийхэд эртдэх хүмүүст туслах нь
1. Анх уулзсан бүх хүн «Библийн сургаал» номыг дуртайяа хүлээн авах уу? Тайлбарлана уу.
1 Хүн Библи судалж байж Еховаг шүтдэг болно. Гэхдээ христийн бус шашинтай хүн Библийг Бурхны Үг гэж үздэггүй. Бурханд итгэдэггүй учраас Библийг эрхэмлэж үздэггүй хүмүүс бас бий. «Библийн сургаал» номоор хичээл хийхэд эртдэх хүнтэй ямар хэвлэлээс ярилцаж болох вэ? Дараах саналыг 20 орчим орны дэлгэрүүлэгчдийн ярианд үндэслэн дэвшүүлж байна.
2. Хэрэв хүн Бурханд итгэдэггүйгээ хэлбэл бид юуг мэдэх хэрэгтэй вэ? Яагаад?
2 Бурханд итгэдэггүй хүмүүст: Хэрэв айлын хүн Бурханд итгэдэггүйгээ хэлбэл итгэдэггүйнх нь учрыг асуух нь сайн. Хувьслын онолд итгэдэг учраас тэр үү? Шашинтай хүмүүсийг хоёр нүүр гаргадгийг эсвэл шударга бус явдал их байдгийг хараад Бурханд итгэхээ больсон юм болов уу? Олон хүн Бурханд итгэдэггүй нутаг орноос ирсэн юм болов уу? Тийм хүн Бурхан байдгийг эрс үгүйсгэдэггүй ч Бурханд итгэж найдах шаардлага байхгүй гэж үздэг байж магадгүй. Олон дэлгэрүүлэгч «Та дандаа ингэж бодож байсан уу?» гэж асуугаад айлын хүнд санал бодлоо илэрхийлэх боломж олгодог аж. Тэр хүнийг сонсож, яриаг нь битгий таслаарай. Бурханд итгэдэггүйнх нь учрыг ойлговол бид яаж хариулахаа, ямар хэвлэл өгөхөө мэднэ (Сур. 18:13).
3. Тухайн хүнийг болон үзэл бодлыг нь хүндэтгэж байгаагаа хэрхэн харуулах вэ?
3 Та ярихдаа тухайн хүний үзэл бодолд халдахгүй байхыг анхаараарай. АНУ-аас ирүүлсэн саналыг үзвэл «Хүн юунд итгэхээ өөрөө шийдэх эрхтэйг хүлээн зөвшөөрөх нь маш чухал. Маргаанд ялах гэж зүтгэхийн оронд тухайн хүнийг бодуулж өөрөөр нь дүгнэлт хийлгэх асуулт тавих нь дээр байдаг» гэсэн байжээ. Айлын хүний үзэл бодлыг сонссоны дараа нэг явуулын харгалзагч: «Та ингэж бас бодож үзсэн үү?» гэж асуугаад яриагаа үргэлжлүүлдэг аж.
4. Хятад хүн юм уу, буддын шашинтай хүнд хэрхэн туслах вэ?
4 Хятад хүн юм уу, буддын шашин шүтдэг хүн цорын ганц Бурхан байдаг гэж боддоггүй. Дэлгэрүүлэгч «Библийн сургаал» номоос ярилцаж болох бөгөөд айлын хүнд «Та Бурханд итгэдэггүй байлаа ч Библид найдвартай удирдлага заавар олон байдаг учраас Библийг судлах нь танд ач тустай» гэж хэлж болно. Хятад хүмүүс их амьдардаг хотод дэлгэрүүлдэг АНУ-ын нэг эхлэгч: «Манай хэсгийн хүмүүс юм унших дуртай. Биднийг давтан уулзахаар очиход тэд ихэвчлэн өгсөн хэвлэлийг бүгдийг нь уншаад дуусгачихсан байдаг. Гэхдээ Библийн хичээл хийдгийг маань мэддэггүй байж магадгүй. Тийм болохоор би анх уулзахдаа „Сайн мэдээ“ товхимол өгөх дуртай байдаг. Яагаад гэвэл энэ товхимлоор яриа өрнүүлэхэд амар байдаг» гэж ярьсан юм. Хятад хэлний дүүрэгт үйлчилдэг нэгэн дүүргийн харгалзагчийн хэлснээр «Библийн сургаал» номоос эхний уулзалтаар ярилцаж болох ажээ. Гэхдээ Бурхны тухай гардаг 1-р бүлгээс биш, Библийн тухай өгүүлдэг 2-р бүлгээс ярилцаж эхлэх нь сайн байж болох юм.
5. Тэвчээртэй байх нь яагаад чухал бэ?
5 Хүн Бурханд итгэдэг болоход цаг хугацаа шаардагддаг учир тэвчээртэй байх нь чухал. Ганц хоёр удаа уулзаад л тэр хүн Бүтээгч байдагт итгэх амаргүй. Гэвч хэсэг хугацаа өнгөрсний дараа Бүтээгч байдаг байж магадгүй гэх юм уу зарим хүн яагаад ийм дүгнэлтэд хүрдгийг ойлгож байгаагаа хэлж болох юм.
6. Хүмүүс яагаад Библийг сонирхохгүй байж болох вэ?
6 Библийг сонирхдоггүй гэх юм уу Библид итгэдэггүй гэдэг хүмүүст: Бурхан байж магадгүй гэж боддог хүн Библийг Бурхны Үг гэж боддоггүй учир Библийг сонирхохгүй байж болох юм. Тийм хүн христийн бус шашинтай оронд амьдардаг юм уу Библийг христ шашны л судар гэж мэддэг байж болох юм. Христийн гэгдэх шашинтай боловч шашнаа чухалд үздэггүй оронд амьдардаг хүн Библийг ач тустай гэж үздэггүй байж мэднэ. Библийг сонирхдог болоход ийм хүмүүст хэрхэн тусалж, цаашлаад «Библийн сургаал» номоор хичээл хийдэг болох вэ?
7. Хүмүүсийн Библийг сонирхох сонирхлыг төрүүлэхийн тулд яах нь сайн байдаг вэ?
7 «Библийг сонирхдоггүй хүнтэй шууд Библиэ нээгээд юун тухай өгүүлдгийг нь ярилцах нь сайн байдаг. Өөрийнх нь үгнээс илүү Библийн мэдээ тэдний зүрх сэтгэлд их хүчтэй нөлөөлдөг болохыг олон дэлгэрүүлэгч анзаарчээ (Евр. 4:12). Библиэс Бурхны нэрийг үзүүлэхэд олон хүн Библи унших хүсэлтэй болдог» гэж грек салбараас ирсэн захидалд бичсэн байжээ. «Амьдрал үхлийн тухай үнэнийг хинди шашинтнууд их сонирхдог. Кастийн гэх мэтийн ямар ч ялгаварлалгүй амьдрах цаг ирэх тухай Библийн амлалт бас хүмүүсийн сонирхлыг их татдаг» гэсэн захидал Энэтхэг дэх салбараас ирсэн юм. Орон нутгийн хүмүүсийн санаа зовж байгаа зүйлийн тухай яривал Бурхны Хаанчлал ийм юмыг арилгахын тулд юу хийхийг Библиэс тайлбарлах боломж олддог.
8. Христ шашнаас болоод Библийн тухай таагүй бодолтой явдаг хүнд юу гэж хэлж болох вэ?
8 Зарим хүн христ шашнаас болж Библийн тухай таагүй бодолтой явдаг бол христ шашин Библийг болон Библийн сургаалыг буруу таниулсныг ойлгуулаарай. Энэтхэг дэх салбараас ирүүлсэн захидалд «Заримдаа бид хүмүүст Библи бол христийн сүмийн мэдлийн ном биш гэдгийг ойлгуулах хэрэгтэй байдаг» гэжээ. Христ шашин хэрхэн Бурхны Үгийг мушгин гуйвуулж, устгахыг оролдсон тухай өгүүлдэг «Амьдралын утга учир юу вэ? Түүнийг хэрхэн мэдэж болох вэ?» товхимлын 4-р хэсгийг хинди шашинтай хүмүүс уншаад гайхдаг аж. Бразилд амьдардаг нэгэн эхлэгч: «Библийн тухай илүү ихийг мэдэхэд илүүдэхгүй. Та заавал манай шашинд элсэнэ гэсэн үг биш. Олон хүн Библид юу гэж бичсэн байдгийг үзээд сэтгэл нь хөдөлдөг» гэж хүмүүст хэлдэг аж.
9. Зарим хүн Библийг эхэндээ сонирхохгүй байлаа ч шантрахгүй байх ёстойн учир юу вэ?
9 Ехова хүн бүрийн зүрхийг хардаг (1 Сам. 16:7; Сур. 21:2). Жинхэнэ шүтлэгийн төлөө зөв хандлагатай хүмүүсийг татдаг (Иох. 6:44). Ийм хүмүүсээс олон хүн Бурхны тухай сонсоогүй, Библи уншиж үзээгүй байдаг. Биднийг дэлгэрүүлэхэд аврагдаж «үнэний мэдлэг рүү ирэх» боломж тэдэнд олддог (1 Тим. 2:4). Тиймээс зарим хүн эхэндээ Библийг сонирхохгүй байвал битгий шантраарай! Танай хэлээр байдаг зарим хэвлэлийг ашиглан сонирхлыг нь татаарай. Тэгээд аажимдаа та Библи судлах гол хэрэгсэл болох «Библийн сургаалыг зөв ойлгох нь» номоос ярилцаж болох юм.
[4-р хуудасны хавсралт]
Айлын хүн Бурханд итгэдэггүй гэж хэлбэл дараах аргыг туршаад үз:
• Итгэдэггүйнх нь учрыг мэдэхийн тулд «Та дандаа ингэж боддог байсан уу?» гэж асуугаарай.
• Хувьслын онолд итгэдэг бол «Сэтгэл хангалуун амьдралд хүргэх зам» товхимлын 4-р хэсгээс ярилцах нь тустай байж болох юм.
• Зовлон зүдүүр, шударга бус явдлаас болж Бурханд итгэдэггүй болсон бол дараах материал тустай байж болох юм:
«Бурхан хүнд санаа тавьдаг уу?» товхимлын 6-р хэсэг, «Амьдралын утга учир юу вэ?» товхимлын 6-р хэсэг
• Бурхан байдаг гэдэгтэй санал нийлдэг болбол «Библийн сургаал» номыг үзэж эхлээрэй. Хоёрдугаар бүлгээс юм уу гэрийн эзэнд тохиромжтой өөр сэдвээс эхэлбэл сайн байж болох юм.
[5-р хуудасны хавсралт]
Библид итгэдэггүй хүнтэй ярихдаа дараах аргыг туршаад үз:
• Библийн зарчмыг хэрэгжүүлэхийн ач тусыг ярилцаарай. Дараах хэвлэл Библи ямар ач тустайг ойлгуулдаг:
«Бурхнаас ирсэн сайн мэдээ» 9, 11-р хичээл; «Бүх хүнд зориулсан ном» 22–26-р хуудас; «Сэтгэл хангалуун амьдралд хүргэх зам» 2-р хэсэг
Буддын шашинтай хүнтэй «Жинхэнэ амар тайван, аз жаргалд хүргэх зам» товхимлын 3–7-р хуудаснаас ярилцаарай.
Библийн тухай буруу ойлголттой байдаг газар дэлгэрүүлдэг бол хэд хэдэн удаа уулзах хүртлээ Библи гэдэг үгийг битгий дурдаарай.
• Библийн зөгнөл хэрхэн биелснийг тайлбарлаарай. «Бүх хүнд зориулсан ном» товхимлын 27–29-р хуудаснаас ярилцаж болох юм.
• Тухайн хүнийг янз бүрийн сэдвээр Библид юу гэж байдгийг асуудаг болохоор нь «Библийн сургаал» номыг үзэж эхлээрэй.
[6-р хуудасны хавсралт]
Айлын хүн: «Би Бурханд итгэдэггүй» гэж хэлбэл ингэж хэлж болно:
• «Хэрэв Бурхан байдаг гэвэл та түүнийг ямар зан чанартай байгаасай гэж хүсэх вэ?» Ихэнх айлын хүн Бурхныг хайрлах сэтгэлтэй, шударга, өршөөнгүй, алагчилдаггүй байгаасай гэж хүсдэг. Тэгвэл Бурхан тийм зан чанартайг Библиэс үзүүлээрэй. («Библийн сургаал» номын 1-р бүлгийн 6-р догол мөрөөс эхлэн ярилцаж болох юм.)
Айлын хүн: «Би Библид итгэдэггүй» гэж хэлбэл ингэж хэлж болно:
• «Ийм бодолтой явдаг хүн олон байдаг. Зарим хүн Библийг шинжлэх ухаантай зөрчилддөг, хэм хэмжээ нь амьдралаас тасархай гэж боддог. Та Библи уншиж байсан уу? [Хариулахыг нь хүлээнэ. «Бүх хүнд зориулсан ном» товхимлын 3-р хуудсанд байгаа оршил үгийг үзүүлж товхимлоо өгнө.] Христ шашин Библийн сургаалыг буруу таниулсан учраас олон хүн Библийг үнэ хүндтэйд тооцдоггүй. Дараагийн удаа 4, 5-р хуудсанд байгаа жишээнээс ярилцъя».
• «Олон хүн тантай санал нийлдэг. Библийн юу нь надад гүн сэтгэгдэл төрүүлдгийг танд үзүүлье. [Библи шинжлэх ухааны баримттай тохирдгийг харуулсан зүйл болох Иов 26:7 эсвэл Исаиа 40:22-ыг уншина уу.] Библид бас гэр бүлд хамаатай цэцэн үгс байдаг. Дараа уулзахдаа би танд үзүүлье».
• «Санал бодлоо чөлөөтэй хуваалцсанд баярлалаа. Хэрэв Бурхан хүн төрөлхтөнд зориулж ном бичсэн бол юун тухай байх бол?». Хэлсэн үгтэй нь тохирох Библийн зүйл үзүүлнэ.