Согтууруулах ундааны хэрэглээгээ хэрхэн хянах вэ?

Зарим хүн стресстэх, ганцаардах эсвэл ердөө л уйдахаараа архи дарс илүү их уудаг. Та өмнөхөөсөө их уудаг болсон уу? Хэрэв тийм бол хэтрүүлэн уухгүй эсвэл хамааралтай болохгүйн тулд яах вэ? Өөрийгөө хянахад тань тус болох дараах зөвлөгөөг бодоорой.

• Согтууруулах ундааны зохистой хэрэглээ гэж юу вэ?

• Хэтрүүлж уудаг болсны шинж

• Согтууруулах ундааны хэрэглээгээ хянахад тус болох таван зөвлөгөө

Согтууруулах ундааны зохистой хэрэглээ гэж юу вэ?

Библид ингэж байдаг. «Дарсыг бүү хэтрүүлж уу» (Сургаалт үгс 23:20).

Бодож үзээрэй. Согтууруулах ундаа зохистой хэрэглэхийг Библид буруушаадаггүй (Номлогчийн үгс 9:7). Гэхдээ хэтрүүлэн хэрэглэх болон архидан согтуурахыг буруу гэдэг (Лук 21:34; Эфэс 5:18; Тит 2:3). Согтоогүй байлаа ч хэтрүүлж уувал зөв шийдвэр гаргаж чадахгүйд хүрч, эрүүл мэнд болон бусадтай харьцах харьцаанд муугаар нөлөөлнө (Сургаалт үгс 23:29, 30).

Олон мэргэжилтэн согтууруулах ундаа их хэмжээгээр уухын аюулыг сануулж хоногт хэр зэрэг, долоо хоногт хэдэн өдөр уух стандарт хэмжээг тооцоолсон ажээ.a Архи нь хүн бүрд янз янзаар нөлөөлдөг бөгөөд зарим тохиолдолд огт уухгүй байх нь хамгийн зөв сонголт болдог. Дэлхийн эрүүл мэндийн байгууллага ийнхүү мэдээлсэн.

«Жишээ нь дараах нөхцөлд согтууруулах ундааг бага зэрэг уухад ч аюултай.

• Жолоо барих юм уу машин техник ажиллуулах.

• Жирэмсэн юм уу хөхүүл эх бол.

• Тодорхой эм бэлдмэл хэрэглэх.

• Өвчин туссан юм уу харшил хөдлөх.

• Архиныхаа хэрэглээг хянах чадваргүй болсон».

Хэтрүүлж уудаг болсны шинж

Библид ингэж байдаг. «Өөрсдийн замуудыг нягтлан ажиглацгаая» (Иеремиагийн гашуудал 3:40).

Бодож үзээрэй. Та хэрэглээгээ тогтмол хянаж, дорвитой алхам хийдэг бол гарах муу үр дагавраас өөрийгөө хамгаалж чадна. Өөрийгөө хянаж чадахаа больсныг харуулах зарим шинж тэмдэг:

• Сэтгэлээ сэргээж, баясгах гэж уудаг. Тайвширч тайтгарах, найз нөхөдтэйгөө ярьж суух, хөгжилдөх юм уу эсвэл асуудал бэрхшээлээ мартахад архи дарс хэрэгтэй гэж боддог.

• Өмнөхөөсөө илүү их уудаг. Ойр ойрхон, бас илүү хатууг нь сонгож, өмнө нь уудгаасаа илүүг ууж байж сэтгэл ханадаг болсон.

• Уудгаас болж гэрт юм уу ажил дээр асуудал үүсдэг. Жишээлбэл боломжоосоо хэтэрсэн мөнгө төгрөг зарцуулдаг болсон.

• Уучихлаараа амь насанд эрсдэлтэй юм хийдэг. Жолоо барих, усанд сэлэх, машин техник ажиллуулах зэрэг.

• Бусад нь санаа зовж байгаагаа илэрхийлэхэд өөрийгөө зөвтгөдөг. Уудгаа нуухыг оролдох юм уу өөрийгөө өмөөрч худлаа ярьдаг.

• Больж чаддаггүй. Багасгах юм уу бүр болихыг хичээдэг ч чаддаггүй.

Согтууруулах ундааны хэрэглээгээ хянахад тус болох таван зөвлөгөө

1. Төлөвлөөрэй.

Библид ингэж байдаг. «Махруу хүний төлөвлөгөө амжилт авчирна» (Сургаалт үгс 21:5).

Оролдоод үзээрэй. Долоо хоногийн аль өдөр уухаа сонгоод уух хэмжээгээ тогтоорой. Мөн дор хаяж хоёр өдөр огт уухгүй байхаар шийдээрэй.

«Долоо хоногийн тогтсон өдрүүдэд архи дарс уухгүй байх нь хамааралтай болох эрсдэлээс сэргийлэх хамгийн сайн арга юм» гэж архи дарсны хэрэглээний талаар сургалт явуулдаг Английн нэг байгууллага зөвлөжээ.

2. Төлөвлөгөөгөө биелүүлээрэй.

Библид ингэж байдаг. «Эхэлсэн ажлаа ... дуусгаарай» (2 Коринт 8:11).

Оролдоод үзээрэй. Согтууруулах ундааны стандарт хэмжээг мэдэж аваад өөрийн хэрэглээгээ зохицуулаарай. Мөн спиртийн агууламжгүй, өөрийнхөө дуртай, эрүүл мэндэд тустай ундааг худалдаж аваад тавихад илүүдэхгүй.

«Хэрэглээндээ багахан өөрчлөлт гаргахад л архитай холбоотой том асуудал үүсэх эрсдэлийг буруулдаг» гэж АНУ дахь Архидан согтуурах, архидалт судлалын үндэсний хүрээлэнгээс мэдээлжээ.

3. Шийдэмгий байгаарай.

Библид ингэж байдаг. «“За” бол “за”, “үгүй” бол “үгүй” бай» (Яаков 5:12).

Оролдоод үзээрэй. Зарим хүний саналыг хүлээж авах гэхэд шийдвэрээ зөрчих болбол хүндэтгэлтэй, бат итгэлтэйгээр «Үгүй» гэж хэлээрэй.

«Иймэрхүү саналаас хэдийчинээ хурдан татгалзана, төдийчинээ шийдвэрээсээ няцахгүй» гэж АНУ дахь Архидан согтуурах, архидалт судлалын үндэсний хүрээлэнгээс мэдээлжээ.

4. Зөв шийдвэр гаргахын ач тусыг анхаараарай.

Библид ингэж байдаг. «Аливаа хэргийн эхлэлээс төгсгөл нь дээр» (Номлогчийн үгс 7:8).

Оролдоод үзээрэй. Архи дарсны хэрэглээгээ яагаад хянахад хүрсэн шалтгаануудаа бичээрэй. Үүнд сайн унтаж амрах, эрүүл саруул байх, мөнгө төгрөгөө хэмнэх, бусадтай сайн харьцаатай байх зэргийг оруулаарай. Гаргасан шийдвэрийнхээ тухай бусдад ярихдаа бэрхшээлийг нь бус, ач тусыг нь анхаараарай.

5. Бурхнаас тусламж аваарай.

Библид ингэж байдаг. «Намайг хүчирхэгжүүлдэг нэгний ачаар би бүхнийг давна» (Филиппой 4:13).

Оролдоод үзээрэй. Хэрэв та архи дарсны хэрэглээндээ санаа зовж байгаа бол Бурхнаас тусламж гуйн залбираарай. Хүчтэй байхад, биеэ захирахад туслаач гэж гуйгаарай.b Бас цаг гарган түүний Үг буюу Библиэс мэргэн зөвлөгөө хайгаарай. Бурхны тусламж дэмжлэгээр та архи дарсны хэрэглээгээ хянаж чадна.