Есүс илжиг унан, Иерусалимд сүр жавхлантай орж ирж байна

Мессиагийн талаарх зөгнөлүүд Есүс дээр биелсэн үү?

Библид юу гэж байдаг вэ?

Биелсэн. «Ертөнцийг авруулахаар илгээсэн Хүү», «Жонон Мессиагийн» талаарх олон зөгнөл Есүс дээр, дэлхийд байхад нь биелсэн (Даниел 9:25; 1 Ёохан 4:14). Нас барсан хойно нь ч, Мессиагийн талаарх зөгнөлүүд Есүс дээр биелсээр байв (Дуулал 110:1; Үйлс 2:34–36).

«Мессиа» гэдэг нь ямар утгатай вэ?

Машиах гэдэг еврей үг Христос (Христ) гэдэг грек үгтэй утга дүйдэг. Энэ хоёр үг хоёулаа «Тослогдсон Нэгэн» гэсэн утгатай. Тиймээс «Есүс Христ» гэдэг нь «Тослогдсон Есүс» гэсэн утгатай.

Библи бичигдэж байх үед хүнийг тусгай эрх мэдэлтэй болгож томилохдоо толгой дээр нь тос асгадаг байжээ (Левит 8:12; 1 Самуел 16:13). Есүсийг Бурхан Мессиа буюу эрх мэдэлтэй Нэгэн болгосон (Үйлс 2:36). Ингэхдээ толгой дээр нь тос асгаагүй, агуу хүчээрээ томилсон (Матай 3:16).

Мессиагийн зөгнөл олон хүн дээр биелэх байсан уу?

Үгүй. Библийн зөгнөлүүд ганц л Мессиа буюу Христ дээр биелсэн. Энэ нь хурууны хээ дахин давтагддаггүйтэй адилхан юм. Гэхдээ Библид ийм сануулга байдаг. «Хуурамч Христүүд, хуурамч зөнчид гарч ирэн хүмүүсийг, боломж гарвал, Бурхны сонгосон хүмүүсийг ч төөрөлдүүлэх гэж янз бүрийн агуу гайхамшиг үйлдэнэ» (Матай 24:24).

Мессиа ирээдүйд тодрох уу?

Үгүй. Мессиа Израйлын хаан Давидын удмаас гарна гэж Библид зөгнөсөн байсан (Дуулал 89:3, 4). Ромчууд МЭ 70 онд Иерусалимыг устгахад Давидын угийн бичиг устгагдсан бололтой.a Тэр цагаас хойш хэн ч өөрийгөө Давидын удмын хүн гэж батлах боломжгүй болсон. Харин Есүсийн үед Давидын угийн бичиг бүрэн бүтнээрээ байсан. Дайснууд нь ч Есүсийг Давидын удмын хүн гэдэгтэй маргаж байгаагүй (Матай 22:41–46).

Библид Мессиагийн талаар хэдэн зөгнөл байдаг вэ?

Яг хэд байдаг нь тодорхойгүй. Жишээлбэл, Мессиагийн талаарх зөгнөл гэдэг нь баттай хэсэгт хүртэл хэдэн зөгнөл байгааг тоолох арга янз янз байдаг. Исаиа 53:2–7-д л гэхэд Мессиагийн талаар хэд хэдэн зөгнөлийг дурджээ. Зарим нь энэ зүйлийг ганцхан зөгнөл гэж үздэг байхад, зарим нь олон гэж үздэг.

Есүс дээр биелсэн Мессиагийн зөгнөлүүд

Зөгнөл	Библийн зүйл	Биелэл
Абрахамын удам	Эхлэл 22:17, 18	Матай 1:1
Абрахамын хүү Исаакийн удам	Эхлэл 17:19	Матай 1:2
Израйлын Иуда овгоос гарна	Эхлэл 49:10	Матай 1:1, 3
Давид хааны удам	Исаиа 9:7	Матай 1:1
Онгон эмэгтэйгээс төрнө	Исаиа 7:14	Матай 1:18, 22, 23
Бетлехемд төрнө	Мика 5:2	Матай 2:1, 5, 6
Иммануел гэж нэрлэнэb	Исаиа 7:14	Матай 1:21–23
Эгэл жирийн айлд төрж өснө	Исаиа 53:2	Лук 2:7
Төрснийх нь дараа олон нялх хүүхэд алагдана	Иеремиа 31:15	Матай 2:16–18
Египетээс дуудан гаргана	Хосеа 11:1	Матай 2:13–15
Назарынх гэж нэрлэгдэнэc	Исаиа 11:1	Матай 2:23
Нэгэн элч замыг нь бэлдэнэ	Малахи 3:1	Матай 11:7–10
МЭ 29 онд Мессиа болноd	Даниел 9:25	Матай 3:13–17
Бурхан түүнийг Хүүгээ хэмээн тунхаглана	Дуулал 2:7	Үйлс 13:33, 34
Бурхны өргөөний төлөө хичээл зүтгэлтэй байна	Дуулал 69:9	Ёохан 2:13–17
Сайн мэдээг тунхаглана	Исаиа 61:1	Лук 4:16–21
Галилд үйлчилж, агуу гэрэл цацруулна	Исаиа 9:1, 2	Матай 4:13–16
Мосегийн нэгэн адил гайхамшиг үйлдэнэ	Дэд хууль 18:15	Үйлс 2:22
Мосегийн нэгэн адил Бурхнаас ирсэн мэдээг дамжуулна	Дэд хууль 18:18, 19	Ёохан 12:49
Өвчтэй олон хүнийг эдгээнэ	Исаиа 53:4	Матай 8:16, 17
Бусдын анхаарлыг өөртөө татахгүй	Исаиа 42:2	Матай 12:17, 19
Зовж байгаа хүмүүсийг өрөвдөнө	Исаиа 42:3	Матай 12:9–20; Марк 6:34
Бурхны шударга ёсыг тусган харуулна	Исаиа 42:1, 4	Матай 12:17–20
Гайхамшигт зөвлөгч	Исаиа 9:6, 7	Ёохан 6:68
Еховагийн нэрийг тунхаглана	Дуулал 22:22	Ёохан 17:6
Жишээ татан ярина	Дуулал 78:2	Матай 13:34, 35
Удирдагч	Даниел 9:25	Матай 23:10
Олон хүн түүнд итгэхгүй	Исаиа 53:1	Ёохан 12:37, 38
Бүдрүүлэх чулуу болно	Исаиа 8:14, 15	Матай 21:42–44
Хүмүүс түүнийг үл тоомсорлоно	Дуулал 118:22, 23	Үйлс 4:10, 11
Шалтгаангүйгээр үзэн ядна	Дуулал 69:4	Ёохан 15:24, 25
Илжиг унан, Иерусалимд сүр жавхлантай орж ирнэ	Зехариа 9:9	Матай 21:4–9
Хүүхдүүд түүнийг магтана	Дуулал 8:2	Матай 21:15, 16
Еховагийн нэрийн өмнөөс ирнэ	Дуулал 118:26	Ёохан 12:12, 13
Итгэлийг нь хүлээсэн анд нөхөр нь урвана	Дуулал 41:9	Ёохан 13:18
30 мөнгөн зоосоор худалданаe	Зехариа 11:12, 13	Матай 26:14–16; 27:3–10
Нөхөд нь хаяж явна	Зехариа 13:7	Матай 26:31, 56
Хүмүүс худал мэдүүлэг өгнө	Дуулал 35:11	Матай 26:59–61
Хүмүүс буруутгасан ч дуугүй байна	Исаиа 53:7	Матай 27:12–14
Түүн рүү нулимна	Исаиа 50:6	Матай 26:67; 27:27, 30
Толгой руу нь цохино	Мика 5:1	Марк 15:19
Ташуурдана	Исаиа 50:6	Ёохан 19:1
Цохиж зодсон ч эсэргүүцэл үзүүлэхгүй	Исаиа 50:6	Ёохан 18:22, 23
Захирагчид үгсэн нийлж, эсэргүүцнэ	Дуулал 2:2	Лук 23:10–12
Гар хөлийг нь цоо хатгаж, шонд хадна	Дуулал 22:16	Матай 27:35; Ёохан 20:25
Хувцасных нь төлөө шодно	Дуулал 22:18	Ёохан 19:23, 24
Гэмт хэрэгтэн адил үзнэ	Исаиа 53:12	Матай 27:38
Хүмүүс шоолж доромжилно	Дуулал 22:7, 8	Матай 27:39–43
Нүгэлтнүүдийн төлөө зовлон эдэлнэ	Исаиа 53:5, 6	1 Петр 2:23–25
Бурханд хаягдсан юм шиг болно	Дуулал 22:1	Марк 15:34
Уулгахаар гашуун өвстэй дарс, цуу өгнө	Дуулал 69:21	Матай 27:34
Нас барахынх нь өмнө ам нь цангана	Дуулал 22:15	Ёохан 19:28, 29
Амь насаа Бурханд даатгана	Дуулал 31:5	Лук 23:46
Амиа золиослон нас барна	Исаиа 53:12	Марк 15:37
Хүн төрөлхтний нүглийг уучлуулах гэж амиа золиосолно	Исаиа 53:12	Матай 20:28
Яс нь хугарахгүй	Дуулал 34:20	Ёохан 19:31–33, 36
Цоо хатгуулна	Зехариа 12:10	Ёохан 19:33–35, 37
Баян хүний булшинд нутаглуулна	Исаиа 53:9	Матай 27:57–60
Амилна	Дуулал 16:10	Үйлс 2:29–31
Искариот Юудасын оронд өөр хүнийг томилно	Дуулал 109:8	Үйлс 1:15–20
Бурхны баруун талд заларна	Дуулал 110:1	Үйлс 2:34–36

a «Маклинток Стронг нарын нэвтэрхий толь»-д «Иудейн овгууд, гэр бүлүүдийн бүртгэл Иерусалимыг сүйрэхээс өмнө биш, сүйрэхэд устсан нь эргэлзээгүй» гэж бичжээ.

b Иммануел гэдэг еврей нэр «Бурхан бидэнтэй хамт байна» гэсэн утгатай бөгөөд Мессиа болох Есүсийн үүргийг онцолдог. Дэлхий дээр ирээд хийсэн түүний үйл хэрэг Бурхан үйлчлэгчидтэйгээ хамт байгааг харуулсан (Лук 2:27–32; 7:12–16).

c «Назарынх» гэдэг үг «нахиа» гэсэн утгатай нецер гэдэг еврей үгнээс үүссэн бололтой.

d Мессиа МЭ 29 онд ирнэ гэсэн Библийн зөгнөлийн талаарх нарийн ширийнийг мэдье гэвэл «Даниел Мессиагийн ирэхийг зөгнөсөн нь» гэсэн өгүүллийг үзнэ үү.

e Энэ зөгнөл «Зехариа» номд гардаг ч Библийг бичигч Матай үүнийг «зөнч Иеремиагийн» зөгнөл гэсэн байдаг (Матай 27:9). «Иеремиа» ном Судар дахь «зөнчдийн» номын эхэнд байсан бололтой (Лук 24:44). Матай «Иеремиа» гэдгээр «Зехариа» номыг оруулаад зөнчдийн бүх номыг хамааруулан хэлсэн байж болох юм.