Библи судлахад зориулсан цоо шинэ гарын авлага

2021 оны 1 дүгээр сард Удирдах Зөвлөл «Үүрд жаргалтай амьдраарай!»a гэдэг Библи судлах гарын авлага шинээр гарсныг зарласан. Уг зарлал танд ямар санагдсан бэ? Канадад амьдардаг Матью: «Миний сэтгэл маш их догдолсон. Энэ номыг яагаад гаргах болсныг, туршилтын явц ямар байсныг илтгэл, видеонуудаас үзээд сэтгэл бүр ч их хөдөлсөн. Тэгээд хурдхан л гар дээрээ авах юм сан гэж бодож билээ» гэжээ.

«Үүрд жаргалтай амьдраарай!» ном нь Библийн хичээлийг шинэ аргаар заах боломж олгож байна. Мөн өмнөх гарын авлагуудаас ялгарах онцлогтой. Та хэвлэсэн номыг барьж үзээд л ялгааг нь шууд мэдэрнэ. Тэгвэл хэрхэн хэвлэгдсэн талаар дэлгэрэнгүй авч үзье.

Шинэ ном, шинэ мэдрэмж

Зузаан цаас. Яагаад зузаан цаас хэрэглэх шаардлагатай болсон бэ? «Үүрд жаргалтай амьдраарай!» ном нь 600 гаруй өнгөт зурагтай бөгөөд энэ нь «Библийн мэдлэг» номынхоос бараг 10 дахин олон гэсэн үг. Бас бичиг, зураггүй хоосон зай ихтэй. Энэ хоёр онцлогоос үүдэн асуудал тулгарсан юм. Нимгэн цаасан дээр хэвлэхлээр зургууд нь нөгөө талдаа гэрэлтэж харагдаад байв. Үүнийг шийдвэрлэхийн тулд АНУ-ын Нью-Йоркийн Уолкилл дахь Олон улсын хэвлэх хэлтэст (ОУХХ) ажилладаг Гэрчүүд манай хэвлэлд ашиглагдаж байгаа дөрвөн төрлийн цаасыг туршиж үзсэн. Үр дүнг нь Удирдах Зөвлөлийн Зохиогчийн хорооныхон шалгаж үзээд хамгийн бага гэрэлтдэг цаасыг сонгосон юм. Энэ цаас нь манай ихэнх хэвлэлд хэрэглэдэг цааснаас 16 хувиар илүү үнэтэй ч, Библийн суралцагчид маань «Үүрд жаргалтай амьдраарай!» номыг уншихад зургууд нь гэрэлтэж анхаарлыг нь сарниулахгүй сайн талтай.

Хавтас. Шинэ номын хавтас манай бусад номуудынхаас өөр гэдэг нь шууд мэдрэгддэг. Энэ нь өөр хамгаалалтын наалт буюу хальсаар бүрсэнтэй холбоотой. Жирийн гялгар наалтыг бодвол бүрсгэр наалт нь хавтасны зургийг сайн харагдуулдаг бөгөөд номыг амархан элэгдэхээс хамгаалдаг. Гэхдээ бүрсгэр наалт нь гялгар наалтаас 5 дахин илүү үнэтэй учраас зардлаа хэмнэхийн тулд олон салбар нийлж арай хямд үнээр худалдаж авсан.

Яагаад ийм үнэтэй материал сонгосон бэ? ОУХХ-т ажилладаг нэг Гэрч эрэгтэй: «Хүмүүс энэ номыг байнга хэрэглэнэ. Тийм болохоор хэчнээн удаан хэрэглэсэн ч өнгө үзэмжтэй хэвээрээ байгаасай гэж хүссэн юм» хэмээн тайлбарлажээ. Бразил салбарын хэвлэх тасагт ажилладаг Эдуардо: «Еховагийн байгууллага энэ номыг өнгө үзэмжтэй, эдэлгээ сайтай, хэрэглэхэд эвтэйхэн байлгахын тулд чанартай материал ашиглахын зэрэгцээ хандивын мөнгийг ухаалаг зарцуулж байгаад бид их баяртай байна» гэжээ.

КОВИД-19 цар тахлын үед хэвлэсэн нь

«Үүрд жаргалтай амьдраарай!» номыг 2021 оны 3 дугаар сараас хэвлэж эхэлсэн. Энэ нь КОВИД-19 цар тахлын үе байсан болохоор янз бүрийн саад тулгарч байлаа. Бетелд хөл хорио тогтоосноос үүдэн манай хэвлэх үйлдвэрүүдэд гаднаас цагийн бетелчин ирж ажиллах боломжгүй болсон. Мөн шинээр бетелчин авч ажиллуулах аргагүйд хүрсэн. Үүний улмаас зарим хэвлэх үйлдвэр хүний нөөцийн хомсдолд орж, зарим нь засгийн газрын удирдамж зааврын дагуу түр хугацаагаар хаагдсан юм.

Эдгээр саад бэрхшээлийг хэрхэн давсан бэ? Хэвлэх үйлдвэрүүд үйл ажиллагаагаа үргэлжлүүлэх боломж бүрдмэгц Бетелийн бусад хэлтсийн ах дүүс хэвлэх ажилд түр томилогдсон. ОУХХ-т ажилладаг Жоел: «Шинэ ном хэвлэх ажлыг хийж гүйцэтгэхэд бусдыг гэсэн сэтгэлтэй, авсан даалгавраа дуртайяа биелүүлдэг, шинийг сурах ирмүүн хүсэлтэй тэд маань үнэлж баршгүй хувь нэмэр оруулсан» гэжээ.

Янз бүрийн бэрхшээл тулгарсан ч бид «Үүрд жаргалтай амьдраарай!» номыг хэдэн сая хувь хэвлэчихээд байна. Ийнхүү хэвлэхэд хамгаалалтын наалт, хэвлэх хавтан, цаас, бэх, цавуу гэх мэтийн олон төрлийн материал хэрэгтэй. Ном хэвлэсэн эхний таван сард зөвхөн материалд л гэхэд 2,3 сая доллар зарцуулсан. Бид зардлаа хэмнэхийн тулд хурлуудад яг хэрэгтэй тоогоор нь хэвлэж байна.

«Жинхэнэ урлагийн бүтээл»

Библийн багш, суралцагчид шинэ гарын авлагынхаа талаар ямар сэтгэгдэлтэй байгаа бол? Австралид амьдардаг Пол гэдэг Гэрч эрэгтэй: «“Үүрд жаргалтай амьдраарай!” гэдэг энэ гоё номоор Библийн хичээл заана гэж бодохоор сэтгэл маш их хөдөлсөн. Зохиомж нь сэтгэл татам, суралцагчийг идэвхтэй оролцуулдаг. Ойлгомжтой мэдээлэл, нэгийг бодуулсан асуулт, сэтгэл хөдөлгөм видео, зураг, хүснэгт болон суралцагчийн тавьж болох зорилт зэрэг нь гайхалтай уялдан зохицсон. Мөн заах чадвараа сайжруулах хүсэл төрүүлсэн жинхэнэ урлагийн бүтээл» гэж ярьсан юм.

АНУ-д амьдардаг нэгэн Библийн суралцагч: «Шинэ ном надад маш их таалагдаж байгаа. Зургийг нь хараад би гол санааг нь ойлгодог. Видеог нь үзээд сэтгэл хөдөлж, сурснаа хэрэгжүүлмээр санагддаг» гэжээ. Энэ суралцагч 7 хоногт хоёр удаа хичээл хийж, цуглаанд тогтмол явдаг.

«Үүрд жаргалтай амьдраарай!» номыг одоо ч олон хэлээр хэдэн сая хувь хэвлэх шаардлагатай байна. Удирдах Зөвлөл одоогийн байдлаар 710 хэлээр хэвлэхийг зөвшөөрсөн. Энэ нь «Библийн мэдлэг» номоос 340-өөр илүү гэсэн үг юм!

Хэвлэх ажил хэрхэн санхүүждэг вэ? Дэлхий дахины үйл хэрэгт зориулсан хандивын мөнгөөр. Олон хүн donate.jw.org-оор хандив өгдөг. Өгөөмөр сэтгэлтэй та бүхэндээ талархъя. Еховатай танилцаж, мөнхөд жаргалтай амьдрах хүсэлтэй хүмүүст зориулсан Библи судлах гарын авлагыг гаргахад та бүхний хандив их хувь нэмэр болж байна (Дуулал 22:26).