ХИЧЭЭЛ 29

Хүн үхээд яадаг вэ?

Хэвлэмэл

Үхэл хагацал үзээгүй хүн гэж бараг байхгүй. Ойр дотнын хүнээ алдахлаараа «Хүн үхээд яадаг вэ? Талийгаачтайгаа эргээд уулзах юм сан» гэж өөрийн эрхгүй бодогддог. Энэ талаар Библид юу гэж байдгийг энэ болон дараагийн хичээлээр үзээд таны сэтгэл уужрах биз ээ.

1. Хүн үхээд яадаг вэ?

Есүс үхлийг гүн нойртой зүйрлэсэн. Яагаад? Бөх гэгч нь унтаж байгаа хүн хажууд нь юу ч болсон мэддэггүй. Үүн шиг «үхэгсэд юу ч мэддэггүй» (Номлогчийн үгс 9:5-ыг уншина уу). Тэгэхлээр нас барсан хүн зовж тарчилдаггүй гэсэн үг.

2. Үхлийн тухай үнэнийг мэдэх нь бидэнд ямар ач тустай вэ?

Зарим шашинд хүнийг үхсэний дараа сүнс нь үргэлжлэн амьдардаг гэж сургадаг. Ийм учраас олон хүн үхэгсдээс айж, өргөл барьц өргөдөг. Гэхдээ Библид байдаг үнэнийг мэдсэн хүмүүс ийм айдсаас чөлөөлөгддөг. Есүс: «Үнэн та нарыг чөлөөлнө» гэсэн (Ёохан 8:32). Библид «үхэгсэд юу ч мэддэггүй» гэж байдаг. Хүн нас барахлаараа зовж тарчилдаггүй, бусдад хор хүргэдэггүй. Тийм учраас тэдэнд залбирч, өргөл барьц өргөх шаардлагагүй.

Зарим хүн талийгаачтайгаа харьцаж болно гэж боддог. Гэхдээ энэ нь боломжгүй. Яагаад гэвэл Библид «үхэгсэд юу ч мэддэггүй» гэж байдаг шүү дээ. Тэгвэл үнэндээ хэнтэй харьцдаг гэсэн үг вэ? Чөтгөрүүд талийгаачийнх нь дүрд хувиран хуурч мэхэлж хор хүргэхийг оролддог. Энэ үнэнийг мэддэг хүн чөтгөрүүдээс хамгаалагддаг. Ехова биднийг хамгаалах гэсэндээ чөтгөрүүдтэй холбоо тогтоохоос сэрэмжлүүлдэг (Дэд хууль 18:10–12-ыг уншина уу).

УХАЖ ОЙЛГОЁ

Библид үхлийн талаар юу гэж байдгийг дэлгэрэнгүй мэдэж аваарай. Хүнийг тарчлаан зовоодоггүй, хайр халамжтай Бурханд бат итгэдэг болоорой.

Талийгаачийн нөхөр, хоёр хүүхэд нь сандал дээр сууж байна. Гэр бүл, найз нөхөд нь тайтгаруулах гээд эргэн тойронд нь зогсож байна.

3. Үхлийн тухай үнэн

Хүн үхээд яадаг талаар хүмүүс өөр өөр ойлголттой байдаг. Гэхдээ тэр болгоныг үнэн гэх аргагүй шүү дээ.

Хүн үхээд яадаг талаар танай нутгийн хүмүүс юу гэж боддог вэ?

Библид юу гэж байдгийг ВИДЕОНООС хамт үзээрэй.

ВИДЕО: «Хүн үхээд яадаг вэ?»—Видеоны хэсгээс (1:19)

Зургууд: «Хүн үхээд яадаг вэ?» видеоны хэсгээс авсан зургууд. 1. Эмнэлгийн орон дээр буй нас барсан хүний цогцос. 2. Галт тэргэнд хоёр хүний дунд унтаж буй хүн.

Номлогчийн үгс 3:20-ийг уншина уу. Дараах асуултад үндэслэн ярилцаарай.

Энэ зүйлийг бодож үзвэл, хүн үхээд яадаг вэ?
Хүнийг үхсэний дараа сүнс нь үлдэж хоцордог уу?

Есүсийн дотнын найз Лазар нас барсан тухай Библид гардаг. Есүс Лазарын тухай юу гэснийг Ёохан 11:11–14-ийг уншаад мэдэж аваарай. Дараах асуултад үндэслэн ярилцаарай.

Есүс үхлийг юутай зүйрлэсэн бэ?
Үүнийг бодож үзвэл, нас барсан хүн яадаг вэ?
Библийн энэ сургаал танд ямар санагдаж байна вэ?

4. Үхлийн тухай үнэнийг мэдэх нь ямар ач тустай вэ?

Үхлийн тухай үнэнийг мэддэг хүн үхсэн хүнээс айхаа больдог. Номлогчийн үгс 9:10-ыг уншина уу. Дараах асуултад үндэслэн ярилцаарай.

Үхсэн хүн бидэнд хор хүргэж чадах уу?

Зарим хүн нас барсан хүнд өргөл барьц өргөж, залбирдаг. Харин Библид байдаг үнэнийг мэдсэн хүн иймэрхүү зан үйлээс чөлөөлөгддөг. Исаиа 8:19; Илчлэл 4:11-ийг уншина уу. Дараах асуултад үндэслэн ярилцаарай.

Нас барсан хүнээс тусламж эрж, өргөл барьц өргөдөг хүн Еховад ямар санагддаг гэж та бодож байна вэ?

Зургууд: Үхсэн хүнд хүндэтгэл үзүүлэх зан үйл. 1. Булшны чулууны дэргэд өвдөглөж суугаад өргөл барьц өргөн залбирч буй хүн. 2. Нэг омгийн гурван хүн тусгай өмсгөл өмсөөд бүжиглэж байна. 3. Нас барагсдыг дурсах өдөр хүмүүс гавлын ясны дүрстэй баг зүүж, бариад явж байна. — Үхлийн тухай үнэн биднийг Еховагийн жигшдэг зан үйлээс чөлөөлдөг

5. Үхлийн тухай үнэнийг мэдэхлээр тайвширдаг

Хүн үхсэнийхээ дараа нүглийнхээ шийтгэлийг хүртэн зовж тарчилдаг гэж олон хүн боддог. Гэхдээ Библид бичсэнээр ямар ч хүн, тэр байтугай муу юм хийсэн хүн ч үхсэнийхээ дараа зовж тарчилдаггүй. Үүнийг мэдэхлээр сэтгэл уужирдаг. Ром 6:7-г уншина уу. Дараах асуултад үндэслэн ярилцаарай.

Энэ зүйлд бичсэнээр, хүн үхэхээрээ нүглээс чөлөөлөгддөг. Тэгвэл хүн үхсэнийхээ дараа нүглийнхээ шийтгэлийг хүртэж зовж тарчилдаг болов уу?

Та Еховаг таньж мэдэхийн хэрээр, үхсэн хүнийг тарчлаан зовоодоггүйг нь ойлгоно. Дэд хууль 32:4; 1 Ёохан 4:8-ыг уншина уу. Дараах асуултад үндэслэн ярилцаарай.