Хитоши дараагийн сараас ямар ажил олж хийх тухайгаа бодов. Ажилд орох ярилцлагын үеэр шударга бус юм хийхгүй гэдгээ хэлжээ. Ярилцлага авч байсан хүн: «Та чинь ямар хачин хүн бэ!» гэжээ. Гэр бүлийнхэн найз нөхөд нь түүнийг дэмжиж, үнэнч шударга байна гэсэн шийдвэрээсээ няцахгүй байхыг зөвлөсөн ч Хитоши тээнэгэлзэж «Үнэнч шударга явлаа гээд надад ямар ашиг байгаа юм бэ» гэж хэлжээ.

Хүмүүс үнэнч шударга занг эрхэмлэдэггүйг Хитошид тохиолдсон явдал харуулж байна. Зарим нь, ялангуяа бизнесийн байгууллагынхан үнэнч шударга байхыг дарамт гэж боддог. Өмнөд Африкт ажилладаг нэгэн эмэгтэй: «Манай ажлын газрынхан худал ярьдаг. Би заримдаа тэднийг дуурайчих гээд байдаг» гэж хэлжээ.

Худал ярих нь түгээмэл болсон. Хэдэн жилийн өмнө Массачусеттс Амхерст их сургуулийн сэтгэл судлаач Робэрт Фэлдмэн насанд хүрэгчдийн 60 хувь нь 10 минут тутам худал ярьдаг гэсэн тооцоо гаргажээ. Тэрбээр: «Судалгааны дүнг хараад үнэхээр гайхсан. Худал ярих нь ийм жирийн үзэгдэл болно гэж огт санаагүй» гэж хэлсэн байна. Хүмүүс хууртах дургүй мөртлөө ихэнх нь хүнийг хуурдаг нь хачирхалтай.

Худал хэлэх, хулгай хийх, хууран мэхлэх явдал өнөө үед яагаад олширсон бэ? Хуурч мэхлэхийн хор уршиг юу вэ? Худал хуурмаг үйл хэргээс хэрхэн хол явах вэ?

Дээрх үгтэй та санал нийлэх үү? Самантагийн адил, хэцүү асуудал тулгарах үе бид бүгдэд бий. Худал ярихаас өөр аргагүй байдалд орсон үед яахаас ямар хүн бэ гэдэг маань тодорхой болно. Жишээ нь нэр нүүрээ бодохыг чухалд үздэг бол амархан худал ярих байх. Үнэн нь илчлэгдэхлээр худал хуурмаг зан гай дагуулдаг. Ямар гай тарьдаг вэ?

ХУДАЛЧ ХҮНД ИТГЭХ ХЭЦҮҮ

Аливаа харилцаа итгэлцэл дээр тогтдог. Бие биедээ итгэдэг хоёр хүнд эргэлзэх юм байдаггүй. Хүний итгэлийг олно гэдэг амаргүй. Чин сэтгэлээсээ санал бодлоо хуваалцаж, хэн хэндээ хувиа хичээсэн зан гаргалгүй, удаан хамт байх тусам хүмүүс бие биедээ итгэдэг. Харин жаахан ч гэсэн хуурч мэхэлснээс болж хүний итгэлийг алддаг. Итгэлийг нь дахин олох амаргүй.

Сайн найз тань таныг хуурч байсан уу? Танд ямар байсан бэ? Та их гомдсон байх. Ингэх нь ч аргагүй. Худал хуурмаг зан нөхөрлөлийн үндсийг үгүй хийдэг нь гайхах зүйл биш ээ.

ХУДЛААС ХУДАЛ БИЙ БОЛДОГ

Калифорнийн их сургуулийн профессор Робэрт Иннэсийн хийсэн судалгаанаас харахад «худал хуурмаг зан халдварладаг» болох нь тогтоогджээ. Худалч хүнтэй байнга харьцдаг бол танд бас ийм «нян» халдварлана.

Худалч болохгүйн тулд яах хэрэгтэй вэ? Библи танд тусална. Библийн хэд хэдэн зарчмыг авч үзье.

Библид «үнэнч шударга» гэж орчуулсан грек үгийг үгчилбэл «үндсэндээ сайн» гэсэн утгатай. Мөн ёс суртахууны хувьд гоё сайхан гэсэн утгыг илэрхийлдэг.

Элч Паулын «Бүх юманд үнэнч шударга байхыг хүсэн, сайн мөс чанартай гэдэгтээ бат итгэдэг» гэсэн үгийг Христийн дагалдагчид нухацтай авч үздэг. Тэгвэл үнэнч шударга байх гэж юу гэсэн үг вэ?

ДОТООД ТЭМЦЭЛ

Хүн өглөө гэрээсээ гарахаасаа өмнө толинд хардаг. Яагаад? Бусдад сайхан харагдахыг хүсдэг учраас тэр юм. Гэхдээ үсээ сайхан янзлан гоё ганган хувцаслахаас илүү чухал зүйл бий. Хүний гадаад байдал дотроо ямар байхаас шалтгаалах нь бий.

Хүн муу юм хийх хандлагатайг Бурхны Үгэнд илэн далангүй бичжээ. Эхлэл 8:21-д «Хүний зүрхний хандлага бүр багаас нь бузар муу байдаг» гэжээ. Тэгэхлээр бид нүгэлт хандлагатайгаа тэмцэх шаардлагатай байх нь. Элч Паул: «Би доторх хүнийхээ хувьд Бурханы хуульд баярладаг. Гэвч миний эрхтнүүдэд өөр хууль байдаг бөгөөд тэр нь миний оюун ухааны хуультай дайтаж, намайг өөрийн минь эрхтнүүдэд байдаг нүглийн хуулийн хоригдол болгодог» хэмээн нүгэлт хандлагатайгаа тэмцдэгээ тод томруун дүрсэлжээ (Ром 7:22, 23).

Жишээлбэл, болохгүй юм хийхийг зүрхэндээ хүсвэл, тэр хүслээ хорьж дийлэхгүйд хүрдэг. Гэвч тэр хүсэлдээ боолчлогдох албагүй. Тэгвэл яах хэрэгтэй вэ? Муу муухай юм бодохоо болих хэрэгтэй. Ингэвэл хууран мэхэлдэг хүмүүсийн нөлөөнд авталгүй үнэнч шударга байж чадна.

ТЭМЦЭЛД ЯЛАХ НЬ

Үнэнч шударга байя гэвэл хүн ёс суртахууны хэм хэмжээг баримтлах хэрэгтэй. Хүмүүс хувцас хунартаа анхаардаг шигээ ёс суртахууны хэм хэмжээг баримтлах талаар анхаардаггүй нь тун тоогүй. Ийнхүү тэдний хэр зэрэг шударга бус байгааг нь харагддаг. Энэ тухай нэгэн номд «Бид өөрсдийгөө үнэнч шударга хүн гэж итгэх хүртлээ хуурамч зан гаргадаг» гэж бичжээ («The (Honest) Truth About Dishonesty») Хэр зэрэг хуурамч зан гаргаж байгаагаа шалгах хэм хэмжээ гэж байдаг болов уу? Байдаг.

Дэлхий дахинд сая сая хүн Библид харьцуулахын аргагүй ёс суртахууны хэмжээ байдаг гэдгийг ойлгох болжээ (Дуулал 19:7). Гэр бүлийн амьдрал, ажил хөдөлмөр, ёс суртахуун, Бурханд итгэж үнэмших талаар найдвартай удирдлага заавар Библид бий. Үе үеийн хүмүүс энэ номоос ач тус хүртдэг. Библийг анхааралтай уншиж эргэцүүлэн бодон зөвлөгөөг нь хэрэгжүүлбэл бид үнэнч шударга хүн болно.

Хуурамч зантай тэмцэхийн тулд Библийн зөв мэдлэг эзэмшээд болчихгүй. Ёс суртахууны хувьд завхарсан нийгэмд амьдарч байгаа учраас бид нөлөөнд нь автаж мэднэ. Бурхнаас тусламж дэмжлэг гуйн залбирах хэрэгтэй (Филиппой 4:6, 7, 13). Ингэвэл бид ямар ч үед үнэнч шударга байх зоригтой болно.

ҮНЭНЧ ШУДАРГА БАЙХЫН ҮНЭ ЦЭН

Эхний өгүүлэлд гарсан Хитоши үнэнч шударга байсныхаа үр шимийг хүртжээ. Тэрбээр ажилтай болоод зогсохгүй, дарга нь үнэнч шударга занг нь үнэлдэг ажээ. Хитоши: «Би худал хуурмаг юм хийхээргүй ажил олсондоо баяртай байна» гэжээ.

Өөр олон хүн үнэнч шударга байхын ач тусыг хүртдэг. Тэдний зарим нь «Бүх юманд үнэнч шударга бай» гэсэн Библийн зарчмыг хэрэгжүүлээд ямар сайхан байгаагаа ярьж байна.

• Мөс чанар сайтай байна

  

  «Би 13 настайдаа сургуулиа хаяж, хулгай хийдэг болсон. Орлогынхоо 95 хувийг нь шударга бус замаар олж байсан. Дараа нь би гэрлэж нөхөртэйгөө хамт Еховагийн Гэрчүүдээр Библи заалгадаг болов. Еховаa Бурхан шударга бус үйл хэргийг үзэн яддаг гэж мэдээд амьдралаа өөрчлөхөөр шийдлээ. 1990 онд бид хоёр Еховад өөрийгөө зориулж баптисм хүртэж, Еховагийн Гэрч болцгоосон» (Сургаалт үгс 6:16–19).

  «Урьд нь манай гэр хулгайн юмаар дүүрэн байсан. Харин одоо тэр бүхнээсээ ангижраад сайн мөс чанартай байна. Буруу юм хийж явсныг минь Ехова уучилсанд би талархдаг. Еховагийн таалалд нийцдгээ бодохлоор нойр ч сайхан хүрдэг»—Шерил, Ирланд.

  

  «Намайг үйлчлүүлэгчээс хахууль аваагүйг дарга мэдээд “Бурхан чинь чамайг ийм найдвартай хүн болгожээ. Ийм хүнийг компанидаа ажиллуулна гэдэг аз шүү” гэж хэлсэн. Бүх юманд шударга байсныхаа ачаар би Ехова Бурхны өмнө сайн мөс чанартай байдаг. Ингэснээр би гэрийнхэндээ, бусдад өөр шигээ байхыг уриалж чаддаг»—Сони, Хонконг.

• Сэтгэл санаа амар тайван байна

  

  «Би олон улсын банкинд ажилладаг. Ер нь эд хөрөнгөтэй болъё гэвэл үнэнч шударга байх хэрэггүй л дээ. “Зардлаа хэмнээд, хөрөнгө цуглуулж чадаж байвал бага зэрэг хуурч мэхлэхэд юу нь болохгүй билээ” гэсэн хандлагатай хүмүүс их бий. Гэхдээ үнэнч шударга байвал сэтгэл санаа амар байдаг. Би ямар ч үр дагавар амсах бай, үнэнч шударга байхаар шийдсэн. Хэзээ ч хэнийг ч хуурахгүй гэдгийг маань дарга нар мэддэг»—Том, АНУ.

• Өөрийгөө хүндэлнэ

  

  «Манай дарга намайг алга болсон эд материалын талаар худал хэлэхийг ятгасан ч би тэгээгүй. Дараа нь хэн хулгайлсныг мэдээд үнэнч байсанд минь талархсан. Шударга бус хүмүүсийн дунд үнэнч шударга байхад зориг хэрэгтэй. Гэхдээ эцэстээ хүмүүс намайг найдвартай хүн гэж үздэг, бас хүндэтгэдэг»—Каори, Япон.

Мөс чанар сайтай, сэтгэл санаа амар тайван, өөрийгөө хүндэтгэдэг байх нь үнэнч шударга байхын ач тус юм. Та үүнтэй санал нийлэхгүй гэж үү?