ЕСҮС явсан газар болгондоо өвчтэй хүмүүсийг эдгээж байлаа. Энэ гайхамшгийн тухай мэдээ тэр хавийн бүх хот, тосгоноор таржээ. Хүмүүс тахир дутуу, сохор, дүлий, өвчтэй олон хүнийг түүн дээр авчирж байв. Есүс бүгдийг нь эдгээжээ.

Есүс Иоханаас баптисм хүртээд, гурван жил гаруй болжээ. Тэрбээр удахгүй Иерусалим явж, тэндээ алуулаад, дараа нь дахин амилах тухайгаа элч нартаа хэлж байлаа. Энэ хооронд өвчтэй хүмүүсийг эдгээсээр байв.

Нэгэн удаа Есүс Амралтын өдөр сургаал зааж байв. Амралтын өдрөөр иудейчүүд бүгдээрээ амрах ёстой байжээ. Чиний харж байгаа энэ эмэгтэйд хүнд өвчин туссан аж. 18 жилийн өмнө бөгтөр болсон учир цэх зогсож чаддаггүй байв. Есүс түүн дээр гараа тавьтал тэр цэх зогсдог болов. Эмэгтэй эдгэсэн байлаа!

Үүнээс болоод шашны удирдагчдын уур хүрчээ. Тэдний нэг нь: «Ажиллах ёстой зургаан өдөр байдаг. Амралтын өдөр биш, тэр өдрүүдэд л эдгээлгэхээр ир!» гэж олон түмэн уруу хашгичив.

Гэтэл Есүс үүнд нь: «Муу хүмүүс ээ. Та нар бүгд л Амралтын өдөр илжгээ уяанаас нь тайлж, услахаар авч явдаг биз дээ. Тийм байхад 18 жилийн турш өвдсөн энэ хөөрхий эмэгтэй Амралтын өдөр эдгэрэх ёсгүй болж байна уу?» гэж хариулав. Есүсийн хариулт энэ муу хүмүүсийг ичгэвтэр байдалд оруулжээ.

Дараа нь Есүс элч нарынхаа хамт Иерусалим уруу явлаа. Тэднийг Иерихо хотоос дөнгөж гартал гуйлга гуйдаг хоёр сохор хүн Есүсийг дэргэдүүрээ явж өнгөрөхийг сонсжээ. Тэгээд: «Есүс ээ, бидэнд туслаач!» гэж хашгиралдав.

Есүс тэднийг дуудаад: «Надаар юу хийлгэмээр байна?» гэж асуулаа. Тэд: «Эзэн минь, бидэнд хараа оруулж өгөөч» гэв. Есүс тэдний нүдэнд хүрмэгц тэр дороо хараа оров! Есүс яагаад ийм ер бусын гайхамшиг үйлдэж байсныг чи мэдэх үү? Яагаад гэвэл, хүмүүст хайртай, бас тэднийг өөртөө итгүүлэхийг хүсэж байсан. Тийм болохоор, түүнийг хаанчлах үед нэг ч хүн дахин өвдөхгүй гэдэгт итгэлтэй байж болно.

ЕСҮС гуйлга гуйдаг хоёр сохор хүнийг эдгээснийхээ дараахан Иерусалимын ойролцоох жижиг тосгонд хүрч иржээ. Тэр, хоёр шавьдаа: «Тосгон уруу оч. Тэнд нэг дудран байгаа. Уяаг нь тайлаад, надад аваад ир» гэж хэлэв.

Дудранг авчирж өгөхөд Есүс мордлоо. Тэгээд дудрангаа унаад, холгүйхэн байх Иерусалим уруу явав. Түүнийг хотод дөхөж ирэхэд асар олон хүн угтахаар гарч ирлээ. Олонх нь гадуур хувцсаа тайлаад, зам дээр дэвсжээ. Зарим нь модны мөчир огтлон авч, зам дээр тавиад: «Еховагийн нэрээр ирж байгаа хааныг Бурхан ивээх болтугай!» гэж хашгиралдаж байлаа.

Эрт дээр үед Израилийн шинэ хаад ард түмэнд өөрсдийгөө харуулахын тулд дудран унаад, Иерусалим уруу орж ирдэг байжээ. Одоо ч бас ингэж байна. Энэ хүмүүс ч гэсэн Есүсийг хаанаа болгохыг хүссэнээ харуулж байна. Гэвч хүн бүр ийм хүсэлтэй байсангүй. Есүсийг сүмд очиход болсон явдлаас бид үүнийг мэдэж болно.

Есүс сүмд сохор, тахир дутуу хүмүүсийг эдгээв. Хүүхдүүд үүнийг үзээд, Есүсийг магтан хашгиралдлаа. Гэтэл үүнд нь тахилчид ихэд дургүйцэн: «Энэ хүүхдүүдийн юу хэлж байгааг сонсож байна уу?» гэж Есүсээс асуув.

Есүс: «Тийм ээ, сонсож байна. Библид: „Бурхан бяцхан хүүхдүүдийн амнаас магтаал гаргана“ гэж байдгийг та нар уншаагүй хэрэг үү?» гэлээ. Хүүхдүүд Бурхны томилсон хааныг магтсаар байлаа.

Бид ч бас тэр хүүхдүүд шиг байхыг хүсдэг, тийм биз дээ? Зарим хүн Бурхны Хаанчлалын тухай ярихыг маань болиулахыг оролдож магадгүй. Гэвч бид ирээдүйд хүмүүсийн төлөө Есүсийн хийх тэр сайхан зүйлийн тухай бусдад ярьсаар байх нь зүйтэй.

Есүсийг дэлхийд байхад хаанчлах цаг нь болоогүй байсан. Энэ цаг хэзээ ирэх вэ? Есүсийн шавь нар ч үүнийг мэдэхийг хүсэж байсан. Энэ тухай үзье.