ХОЁР өдөр өнгөрч, пүрэв гаригийн үдэш болжээ. Есүс 12 элчийнхээ хамт Дээгүүр өнгөрөх баярын зоог барихаар нэгэн байшингийн дээд давхрын энэ том өрөөнд орж ирсэн байлаа. Үүдээр гарч яваа хүн бол Искариотын Иудас. Есүсийг яаж олж болохыг тахилчдад хэлэхээр явж байна.

Ганцхан өдрийн өмнө Иудас тэдэн дээр очоод: «Есүсийг барихад тань тусалбал юу өгөх юм бэ?» гэж асуухад, тэд: «Гучин мөнгөн зоос» гэж хариулсан ажээ. Тийм болохоор одоо Иудас тэдэнтэй уулзахаар явж байна. Тэгээд тэднийг дагуулан, Есүс дээр авч ирэх аж. Муухай байгаа биз?

Дээгүүр өнгөрөх баярын зоог дуусав. Гэтэл Есүс өөр нэгэн онцгой зоог барих боллоо. Тэр элч нартаа талх өгөөд: «Май, идэцгээ. Энэ бол та нарын төлөө өгөх биеийг минь төлөөлнө» гэв. Дараа нь аягатай дарс өгч: «Үүнээс ууцгаа. Энэ бол та нарын төлөө урсах цусыг минь төлөөлнө» гэлээ. Библид энэ өвөрмөц үйл явдлыг «Эзний оройн зоог» гэдэг.

Бурхны тэнгэр элч израильчуудыг Египетэд байхад тэдний гэрийн «дээгүүр өнгөрч», египетчүүдийн гэрт байсан ууган болгоныг алсан билээ. Үүнийг санахын тулд израильчууд Дээгүүр өнгөрөх баяр тэмдэглэдэг байв. Харин одоо бол Есүс дагалдагчдынхаа төлөө амиа өгснийг нь дурсан тэмдэглэж байгаасай гэж хүсэж байлаа. Ийм учраас жил бүр ийм онцгой зоог барьж байхыг дагалдагчдадаа тушаажээ.

Эзний оройн зоогийн дараа Есүс элч нартаа бат итгэлтэй, зоригтой байхыг захилаа. Ингээд тэд Бурханд магтуу дуулсныхаа дараа гарч явав. Их орой болсон байлаа. Бүр шөнө дунд өнгөрчихсөн ч байж магадгүй. Тэднийг хаашаа явсныг мэдэцгээе.

БАЙШИНГААС гараад Есүс элч нарынхаа хамт Гетсемани гэдэг цэцэрлэгийн зүг явав. Тэд энд олон удаа ирж байжээ. Энэ удаа Есүс тэдэнд сэргэг байж, залбир гэж хэлэв. Дараа нь тэндээс жаахан цааш яваад, сөхрөн сууж, толгой гудайлган залбирлаа.

Дараа нь элч нар дээрээ ирэв. Чиний бодлоор, тэд юу хийж байсан бэ? Унтаж байлаа! Есүс тэдэнд сэргэг бай гэж гурван удаа хэлсэн боловч ирэх бүрд нь унтаж байлаа. Есүс сүүлийн удаа ирэхдээ: «Та нар ийм үед яаж унтаж чадаж байна аа? Дайснуудынхаа гарт орох цаг минь ирлээ» гэж хэлэв.

Яг энэ үед олон хүний шуугилдах сонсдов. Хараач! Илд, шийдэм агссан хүмүүс ирчихэж! Бас тэд гэрэл гаргахаар бамбар барьсан байна. Бөөн хүн ойртож ирэхэд тэдний дундаас нэг нь гарч ирээд, шууд Есүс уруу очив. Тэгснээ, Есүсийг үнсэж байгааг чи харж байна. Тэр хүн бол Искариотын Иудас! Тэр юунд Есүсийг үнссэн бэ?

Есүс: «Иудас аа, чи намайг үнсэлтээр барьж өгч байна уу?» гэж асуув. Тийм ээ, энэ нь цаанаа учиртай байжээ Хамт ирсэн хүмүүс нь, Иудаст үнсүүлсэн хүнийг өөрсдийнх нь барихыг хүсээд байгаа Есүс мөн гэж таних байв. Ингээд дайснууд нь Есүсийг барихаар урагш алхав. Гэтэл Петр тэдэнтэй тэмцэхгүйгээр Есүсийг зүгээр өгөөд явуулахыг хүссэнгүй. Тэр илдээ сугалаад, ойрхон зогсож байсан хүн уруу далайв. Илд тэр хүний толгойг шүргэн алдаад, баруун чихийг нь тас цавчлаа. Гэвч Есүс тэр хүний чихэнд хүрээд эдгээв.

Есүс Петрт: «Илдээ хуйнд нь хий. Би өөрийгөө хамгаалуулахаар олон мянган тэнгэр элч илгээхийг Эцгээсээ гуйж чадахгүй гэж бодоо юу?» гэлээ. Тийм ээ, тэр чадна! Гэвч Есүс дайснууддаа баригдах цагаа болсныг мэдэж байсан тул тэнгэр элч илгээгээч гэж Эцгээсээ гуйгаагүй юм. Тийм учраас тэдэнд өөрийг нь авч явахыг зөвшөөрчээ. Одоо түүнд юу тохиолдохыг мэдэцгээе.