Dhowera Dhaarumiwi
9 Sawulo, aadidele waharahara ni waapa anamahara a Nabwiya, odhowa ogumana nnamakutha munlubale 2 omuloba makarta wihina adhowena sinagoga yoDamasku, wihina aathukule owamagene aatene yaale yahara dhohudhiha dheekiristawu, alobwana nahiyana adhowena oJeruzale.
3 Agaali mudila aaddamelaga oDamasku, morurumusa woneya waara mburo yoole wadhela odhulu, 4 oliye omorela vati nuwindo wiwa ndhu nawoga negihina: “Sawulo, Sawulo, mwahaya bwaddi ogagiharahara?” 5 Oliye omukoha egihina: “Nabwiya nyuwa muli aani?” Oliye wakula: “Miyo gili Yesu, yoyo onamuharahariwe. 6 Vano kavenya, odhowe musidadi, wafiya enere wuwaddela ethu onafuniwe wera.” 7 Alobwana yaali vamodha nuliye mulenddoni, aliwa wimela ni kuhukanna yowoga, mwaha yahiwa ndhu nne, mbwenye kiyamonile muthuya. 8 Sawulo ovenya, teto, naarive mento aye egalive oofuguwene, kaanda woona ethu. Vano aliwa omwihiddela moono omuthukulela oDamasku. 9 Oliye omala malabo mararu ahoonaga, ahijhaga newene ahing’waga.
10 Odamasku ahikalawo namahara ithaniwa Ananiya, Nabwiya omwithana murohani egihina: “Ananiya!” Oliye wakula egi: “Gili vala Nabwiya.” 11 Nabwiya omwaddela egihina: “Kiwegeredhe odhowe dila enithaniwa moono woojha; vaade va Judasi, omusayele mulobwana dhaala anithaniwa Sawulo oTarsu. Dhendha vala anna olobela 12 vano, murohani omoona mulobwana dhaala ithaniwa Ananiya, avolowaga ni amutapulelaga nlada wihina avulumuwe ahogolowele woona.” 13 Mbwenye Ananiya wakula egihina: “Nabwiya, gihawiwa athu owinjhiva ewogaga wodhela mulobwana yoyo, wodhela dhithu dhabure awereliye athu enyu oweela ooJeruzale. 14 Wuno oliye ohukanna owedha avahiwiye ni anddimuwa aanamakutha wowamaga* aatene yaale enavuwiha ndina neenyu.” 15 Mbwenye Nabwiya omwaddela egihina: “Kadhowa, mwaha mulobwana oyo amusakule dimiyo wihina alaleye ndina naaga vaari va malogo, mamwene ni amwaana Ezarayeli. 16 Mwaha miyo ginere omoniha dhithu anafuniye wonela goyi wodhela ndina naaga.”
17 Nuwindo Ananiya odhowa, nuuvolowa mba, omutapulela nlada ni owoga egihina: “Ddibilaga, Sawulo, Nabwiya Yesu, agumane niwe murampani mudhidhi odhaga, ohugiruma wihina guukavihere ohogolowela woona ni odhaaleliwe muzimu wotxena.” 18 Vohilegela mwintoni mwaaye omoramo dhithu dhakala ninga magurumba ni ohogolowela woona. Nuwindo oliye ovenya, odhowa obaddiziwa, 19 vano oliye ojha ni okanna kopolo.
Nuwindo omala mwana malabo mangasi-mangasi agaali ni anamahara oDamasku 20 vohilegela, odhowa musinagoga, wambela ohudhiha wodhela Yesu, wihina oliye di Mwaana Mulugu. 21 Mbwenye aatene yanvuruwana yotikina ni yowikoha yegihina: “Mulobwana ola kahi yoola oopiha oJeruzale aaharaharaga athu yavuwiha ndina nno? Oliyeya kaadhele onimaga wihina anithukulele* wanddimuwa aanamakutha?” 22 Mowindala, Sawulo kadda labo oodhowa unnuwelagavove ni owatikiniha Majudewu yakala oDamasku, awonelihagamo pamadhene wihina Yesu di Kiristu.
23 Mbwenye, nuuvira malabo owinjhivene, maJudewu opangana wihina empe. 24 Nuwindo Sawulo, onona ethu yampanganeliwa. Ohiya eyo, yosugwera pamadhene musiwo dhaatedhene mutana ni mahiyu wihina empe. 25 Vano anamaharaye omuthukula, vati nuuriba, ompweha mmuddangani ni omukitihedha vaponyongoni ya txinga.
26 Nufiya oJeruzale, oliye oxixa witaganyihedha ni anamahara, mbwenye aatene yera omoova, mwaha kayarumedha wi namahara. 27 Nuwindo Barnabe odhowa omukavihera ni omudhana vaali arumiwi; vano oliye wawaddela dhaatedhene dhereye mudila ni makalelo Sawulo amoniliye Nabwiya ni makalelo Nabwiya aawogiliye nuliye, teto nuufiya oDamasku makalelo Sawulo aawogiliye nuuliba murima ndina na Yesu. 28 Vano Sawulo okalave naaliwa, eeddaga ootapuwene oJeruzale ni awogaga nuuliba murima ndina na Nabwiya. 29 Oliye oowoga ni owavanyiha maJudewu yawoga Egerego, mbwenye aliwa yoxixa wihina empe. 30 Addibila nuunona muselu oyo, aliwa omuthukulela oSezareya, ni omuruma oTarsu.
31 Vano mulogo dhaatedhene dhooJudeya, dhoGalileya ni dhooSamariya okanna murenddele, ni dhoolibihiwa. Teto woona wi yoomoova Yehova* ni yolibihiwa ni muzimu wotxena, othabwaga winjhivana.
32 Woona wi Peduru era weedda murudda waatene, oliye ohabuwa wihina awoone addibila ooweela yakala murudda woLida. 33 Nuufiya wule, oliye onfwanya mulobwana dhaala ithaniwa Eneya agakinantile vakamani, oliye aamanle yaka 8 agaali ooragalene. 34 Peduru omwaddela egihina: “Eneya, Yesu Kiristu ohuvulumusa. Kavenya, kakuna kamaawo.” Mohilegela oliye ovenya. 35 Vano athu aatene yakala oLida ni musalasala dhoSarom nuumona, aliwa orugunusa murima dhewa omuroromela Nabwiya.
36 Ojope ahikalawo namahara ithaniwa Tabita, ndina nna nnatapulela Dorka.* Oliye owapara mabasa owinjhiva apama ni owakavihera aliba ohaawa. 37 Mbwenye malabo yaale oliye okala muredda ni okwa. Nuwindo aliwa omuhabiha ompweha sala yodhulu. 38 Woona wi Jope akala waddamela ni oLida, anamahara nuwiwa wi Peduru aali sidadi yeele, waruma alobwana abiili wihina yamulobe yegihina: “Kamwerena nnaloba mudhe mowaguva.” 39 Mwaha wa yeyo, Peduru wiwegeredha omaruwa odhowa naaliwa. Nuufiya aliwa omuthukulela sala yodhulu, vano amamukwele aatene omurijha ni wambela wunla, emonihaga malaya ohiyana-iyana ni guwo dhimodha Dorka asoneliye agaali vamodha naliwa. 40 Peduru waaruma wihina aatene ekume, nuumala oliye okokora, ni olobela. Nuwindo, orugunuwa osugwa muruthu ole ni owoga egihina: “Tabita, kavenya!” Oliye wafugula mento, nuumona Peduru oliye okarati. 41 Vano omwihiddela nlada, onvenyiha; oliye wawithana addibila ale ooweela ni amamukwele ni wawoniha agaali mugumi. 42 Athu aatene nuunona muselu ole, owinjhiva orugunusa murima dhewa omuroromela Nabwiya. 43 Oliye omala malabo owinjhivene agaali oJope, vaade va mulobwana dhaala ithaniwa Simawu atuwesa thebe naanenyama.