Dhowera Dhaarumiwi
27 Woona wihina yahithomiwa wi naabuwele wItaliya, Pawulo ni anyakambura amodhaya odhowa opelekiwa mmadani mwa namasogolela aanyakoddo ithaniwa Juliyu a nikuru na Agustu. 2 Iyo ogwela mwanddeya wadhowa oDaramitiyu, wahanle vang’ono numaruwa wihina ovire sere-sere ya sidadi* yoAziya, vano iyo obajha olenddo; Aristarku Mmasedoniyu ooTesalonika naali vamodha. 3 Labo noharela iyo ofiya oSidoni; vano Juliyu omwaakela pama Pawulo ni omweenya wawaredhela akwaye wihina yamukavihere.
4 Nukuma wewule, iyo ovira sere-sere ya moono woojha ya eliga yoXipere mwaha nipevo ninlubale nadhela osogolo wehu. 5 Nuwindo, iyo ovira niya yorambalala yoSilisiya ni oPanfiliya, iyo ofiya oMira elabo yoLisiya. 6 Wewule, namasogolela aanyakoddo ofwanya mwanddeya wakuma wAlexandriya odhowaga wItaliya, oliye onigweliha mwemmo. 7 Iyo numaruwa omala malabo owinjhivene neddaga vang’ono-vang’ono, vano iyo ofiya oKinidu ni makathamihoya. Woona wihina nipevo kananenya odhowa osogolo, iyo weddaga nibareliwaga ni eliga yo Kereta, niviraga oSalimoni mburo winimela mwanddeya, nthawaga nipevo. 8 Naarive neddaga sere-sere ya niya ni makathamiho, iyo oddemulela mburo dhaala withaniwa Mburo Dhapama Vowimela Mwanddeya, dhaali waddamela sidadi yoLaseya.
9 Wahivira mudhidhi wowinjhivene teto weedda muniya ni mwanddeya weraga othabwa orusa, mwaha mudhidhi woothuga* wahimala ovira. Pawulo wawaddela egihina: 10 “Alobwana, ginoona wi olenddo ola onere onirusa teto dhithu dhowinjhiva ninnihuna nnere oyelela, ohiya dhithuve ndha baahi dhili mmwanddeyani muna, mbwenye iyo podi ofiyedha okwa.” 11 Mbwenye ohiya namasogolela aanyakoddo onvuruwana Pawulo, onvuruwana muliba weeddiha mwanddeya ni mwinnya amwanddeyaya. 12 Woona wihina mburo ole viimela mwanddeya kuwaali wofwanelela okalavo mudhidhi wooriidha, athu owinjhiva othoma wihina nimaruwe noone akala neere wanda ofiya oFeenikisi mburo mmodhaya woKereta viimela mwanddeya, waali epaddi yomayelo nduwa, iyo okala wengo mudhidhi ole wooriidha.
13 Nipevo nne nakuma omadhelo nduwa nuvuguwa, aliwa wubuwela wihina olenddo wewa were waweddela pama; nuwindo aliwa onvenyiha nangura* omaruwa olenddo wewa odhowaga oKereta eharaga sere-sere ya niya. 14 Nuuvira mwana mudhidhi vang’ono, okumelela nipevo ninlubale niithaniwa Ewurakilawu,* 15 othunya mwanddeya ole ni kopolo, woona wi kanandile ogonjhiha nipevo nne, iyo wihiya othukuliwa nnipevo nne. 16 Iyo ovira mwana eliga dhaala yithaniwa Kawuda; mwaha wa yeyo, mwanddeya mung’ono nathukunlihu mundduli opadheya teto kayali yokweya ohisa dila biili. 17 Mbwenye nuugweliha mwanddeya ole mung’ono mmwanddeyani mune munlubale, aliwa omaga ni kabala* wihina olibe, yovaga wihina onadha othukuliwe nnipevo odhowiwena oSirti,* nuwindo aliwa otapula vela dha mwanddeyaya ohiya wihina odhowege nnipevo. 18 Woona wi nipevo nne noothabwa onivada ni kopolo dhaatedhene, labo noharela iyo obajha orahilela muniya dhithu ndhe nathukunlihu. 19 Labo nanatharu, aliwa ovokedha muniya dhithu dhaatedhene dhalabihedhiwa mmwanddeyani.
20 Yahivira malabo owinjhivene nihonaga nduwa newene thendderi teto nipevo nakopolo othabwaga onivada. Vano iyo wambela oyelela ejhehedhelo yokalawo. 21 Nuuvira malabo owinjhivene yahijhile ethu, Pawulo ovenya ni owoga egihina: “Alobwana, mwahere murumedha yolaga yaaga, nahimaruwa oKereta kamoone goyi ni kamwayelele dhithu dhinyu ni makalelo yaala. 22 Naarive dhigaali ndo, miyo ginowukongomedhani wihina mulibe murima, mwaha kaavo muthu* anaakwe, mbwenye mwanddeya nnere oyelela. 23 Ndilo mahiyu, ahidha mungero a Mulugu aaga ginamulabelimi ni ginamparelimi mabasa ootaleleya; 24 oliye ogaddela egihina: ‘Pawulo kuwoove. Mwaha we onere ofiya vamentoni va Sezare; ohiya yeyove Mulugu ohupweha egumi yaathu aatene onniwena mmwanddeyani mmadani mwawo.’ 25 Bumwahaya alobwana, mulibe murima mwaha miyo ginomuroromela Mulugu wihina ethu gaaddeliwimi enere opadduwa. 26 Mowindala, naaje makalelo wihina niimele eliga bure-bure.”
27 Nahimala malabo 14 mutana ni mahiyu nigaali muniya, vano nuufiya niya yoAdiriya nipevo wambela ontukumela wula ni wula, vaari va mahiyu aliba weddiha mwanddeya wanganyedhaga wihina nihanle vang’ono ofiya vathayani. 28 Opima oddiihawa woona wihina wahakwana 36 meturu,* nuwindo aliwa weedda vang’ono ni opima dila biili woona wihina oddiihawa waali wa 27 meturu.* 29 Yovaga mwanddeya ole wihina onadha waavade mabwe, aliwa odhowa mundduli mwa mwanddeya wavokedha manangura* mannayi muniya. Nuwindo aliwa wunlelaga wihina vise mowaguva. 30 Vano, aliba weeddiha mwanddeya exixaga wihina ethawe mmwanddeyani mune, aliwa okitihedha mwanddeya ole mung’ono muniya okalaga ninga enaavoka anangura 31 Pawulo omwaddela namasogolela aanyakoddo ni anyakoddoya egihina: “Mwaahiya alobwana ayo okitamo mmwanddeyani muna, kaavo anavuluwe.” 32 Nuwindo, anyakoddo ale ogwadda kabala dhamagiwena mwanddeya ole mung’ono, omorela muniya.
33 Vati vaajaga osa, Pawulo wakongomedha aatene wihina ejhe ethu-sithu egihina: “Nihimala malabo 14 mweraga ojheeha mbwenye newene kamunajhe ethu. 34 Mowindala, ginulobani wihina mujhe ethu-sithu, ginerela mwaha opama weenyu teto mukanne ebaribari wi newene nthithi nimodha neenyu kannarimele.” 35 Nuumala wawoga madhu yaala, oliye othukula pawu olobela vamentoni vaathu aatene, ogwaddanya ni wambela otakuna. 36 Vano athu aatene oliba murima ni obajha ojha. 37 Athu aatene yaali mmwanddeyani mune nahakwana 276. 38 Athu aatene nuumala ojha ni nurubala, onvokedha muniya tirigu ahanle wihina mwanddeyaya ovevuwe.
39 Vati nuusa, kayanonne elabo yaddemuleliwa, mbwenye woona mwihinjhe dhaala wanna musenga, aliwa othoma akala dhere wenyeya wimesa mwanddeyaya wewule. 40 Nuwindo, aliwa ogwadda kabala ndhe dha anangura wavokedha muniya, mudhidhi mmodhave otapula kabala dhamagiwena mpoddo* aliwa ovenyiha vela dha mwanddeya ole orugunusedha wadhela nipevo oharaga mwihinjhe yoole. 41 Vano, aliwa odhowa oddora vamutxesani wugeleye sere-sere ya niya, nuwindo osogolo wa mwanddeya ole kuhandaga weedda, mbwenye otekuma wa niya wambela okarakasula munddulimwa. 42 Mwaha wa yeyo, anyakoddo othoma wihina yaape anyakambura aatene wi ahikalevo muthu anathawe arabaga. 43 Mbwenye namasogolela aanyakoddo ahithoma onvulusa Pawulo ni wakoddiha ethu yafuniwa werana. Oliye oruma wi ale yanonne oraba erajhihe olupela muniya, erabe wihina yafiye ode 44 yindo athu owinjhiva yahanle yaharege: amodha ogwela vatabwani, amodhaya ogwela tabwa dhaparuwile omwanddeyani. Mowindala aatene ovuluwa.