Dholuba dhinaligana ni porojetu ya nyumba muthu ilibiheraga podi wakwanihedha
Anamwani
12 Okanna Dholuba
ENATAPULELA DDI?
Dholuba kahi ethu nnarohihu obe ethu nnafunihu baahi. Yoluba yeebaribari enohowela wiwegeredha wirugunusedha ni kopolo. Dholuba dhehu podi okala dhing’ono, (ndhe nnakwanelihihu yavira mwana malabo obe sumana). Dhihikalawo dhimodha, dhinakwanihiwa (dhavira mweridhene). Dhihikalawo dhimodhadha dhinamala (yaka modha obe yaka dhowinjhivadhene) wihina nakwanihedhe.
Dholuba ndha dhinakwanihedhiwa muwari mwa yaka dhowinjhivadhene dhinandeya mwaha dholuba dhing’ono.
EKALELE DDI YOFUNEYA?
Wakwanihedha dholuba dhawo podi olibiha wandana onniwena naathu amodha, wukavihera wiroromelaga ni okala ohagalalene.
Wiroromela: Wakwanihedha dholuba dhawo dhing’ono, onokanna ebaribari wihina onere wanda wakwaniha dholuba dhinlubale. Teto onakala oolibeene wihina wande owanana dhoweha dha kadda labo, ninga owaddihedhiwa nakwawo oskola werana dhithu dhabure.
Wandana: Athu aatene enodhiveliwa muthu anna dholuba, obe muthu anonne dhithu anafuniye mwigumini ni anilibihera wihina akwanihedhe. Motajhiha, akala we ohukanna mukwawo anna dholuba dhimodhave munolaba vamodha, wi mwakwanihedhe dholuba dhenyu, ndo wandana weenyu winere othabwa oliba.
Ohagalala: Wakwanihedha dholuba dhawo, onothabwa ohagalala.
“Miyo ginodhiveliwa okanna dholuba. Ginokanna yowera ni egumaaga enokanna osogolo. Teto wakwanihedha dholuba dhawo onosugwa mundduli, vano wera: ‘Eya! Gihakwanihedha ethu gafunimi!’” — Christopher.
BIBLIYA ANAWOGA EGI: ‘Ole anasugwera nipevo kanaadhale, ole anasugwa murabo kanaahadde.’ — Eclesiastes 11:4.
KI ONERE DDI?
Woone dhithu dhinukavihere okanna ni wakwanihedha dholuba dhawo.
Dhothoma. Olebele dholuba dhawo. Wamala osakule yoluba yobajha onafuniwe wakwanihedha, windo yanabili, wamala yanatharu ofiyedha yogomihedha.
Wiwegeredhe. Kadda yoluba were ayi:
Othome mudhidhiya onafuniwe wakwanihedha.
Osayele makalelo enuukavihere wakwanihedha.
Wawubuwele makathamiho enufwanye ni makaleloya owagonjhiha.
Ohele mada. Kinahoweleya wubuwela dhithu dhatedhene wahinambele wakwanihera yoluba yawo. Wikohe: ‘Ethu yobajha wihina gakwanihedhe yoluba yaga sivi?’ Windo, obajhe ni woonege makalelo oneddiwe mudhidhi weragana dhithu dhimodha wihina waakwanihedhe yoluba yawo.
BIBLIYA ANAWOGA EGI: ‘Muthu anaviheyana ni dhowera dhaye dhinomweddela pama.’ — Provérbios 21:5.