Ohudhera wemudhi ddi?

Okuma kale Yehova anafuna wi murala dhatedhene dhitugumanege wi dhilibihanege epaddi yomuzimuni ni okala owiwanana. (Deuteronómio 6:6, 7) Bumwahaya Anamona a Yehova enasayeliwa mudhidhi wi emwebedhe Mulugu, aliwa enosakula muselu wa dhithu enahoweliwa othapanyedha. Naari okalagavo wekawo podi opatha mudhidhi wi werena ohudhera wa Bibliya. Muthu podi asakula muselu anahoweliye ononelamo.

Mudhidhi womwaddamela Yehova. ‘Mmwaddamele Mulugu, oliye anere wuwaddamelani.’ (Tiago 4:8) Iyo nnomunona pamadhene Yehova nahudheraga emuthu yaye ni dhowera dhaye wodhela mmalivuruni a Bibliya eli madhu aye. Makalelo okweya okanna ohudhera wemudhi fulabihedha mudhidhi nimwilerigi Bibliya ni ndhu nootaama, podi osakula ohara wileriwa wa Bibliya wa sumana wa mwana livuru namutugumano. Kadda muthu podi wileri epaddi yaye amala othapanyedha atene ahudheriye.

Mudhidhi wotugumana va muralani. Mulobwana ni mwariye, ababi ni aniwa, yamuhudheraga Bibliya vamodha enothabwa wandana. Okalege mudhidhi womaleya ni wohagalasa — nikale labo nddimuwa na sumana. Ababi enofwanelela osakulaga muselu dhofuneya dhiniwanana ni yaka dha anamwani enniwana, podi osakula dha A Sentinela ni Despertai! obe muselu dha site jw.org. Museluya podi okala makathamiho enafwanya anamwani oskola ni makaleloya ogonjhiha. Ethu emodha fumona porogarama a JW Broadcasting (site tv.jw.org) mwamala othapanyedha kadda muthu ahudheriye. Makalelo mamodha fuwiba jhibo dhinibiwe omutugumanoni, omagomihedho wa ohudhera wemudhi ojha ethu-sithu.

Mudhidhi oyo wavayekiwa anakokoreliwa Yehova sumana dhatedhene onowakavihera atene okala ohagalala yahudheraga madhu a Mulugu, oliye annareliha wilibihera wa kadda murala. — Salmos 1:1-3.

• Ekalele ddi yapama okanna ohudhera wemudhi?

• Wihina mudhidhi ola ohagalase murala watene, ababi yerege ddi?