Bibliyoteka a Nyumba Yomwene ananikavihera addi?

Onoofuna oveda muselu wi wenjhedhedhe enonelo yawo ya mBibliyani? Onoofuna ononelamo yolebela ya mBibliyani naari mburo, muthu obe dhithu dhinawogiwa mBibliyani? Onowikohaga akala Madhu a Mulugu podi wukavihera ni dhithu dhinuthuwathuwiha? Omulabihedhe, bibliyoteka a Nyumba Yomwene.

Anokanna malivuru osayelana muselu dhohiyana-iyana. Podi wera we kunna malivuru owinjhiva Anamona a Yehova ni ewogelo yawo. Mbwenye bibliyoteka a Nyumba Yomwene ohukanna malivuru owinjhivene ekumihiwe ovanene. Podi wera ehikalawo a Bibliya owinjhiva etapuleliwe ni ewogelo dhimodha, disiyonariyo apama ni malivuru amodha openddana. Okale otapuwene wihina omulabihedhe bibliyoteka dhihinabajhe mutugumano ni dhamala. Podi wi ohukalawo komputadori onna Watchtower Library (Bibliyoteka a sanjhala yosugwera). Anagiwana porogarama anna malivuru ehu owinjhiva ni faramento yoovedana muselu, madhu obe yolebela mokweya.

Enowakavihera anamahudhera a Egumi ni Mabasa ehu Eekiristawu. Bibliyoteka ya Nyumba Yomwene anere wukavihera vanlubale wi wegeredhe epaddi yawo. Namasogolela a mutugumano a Egumi ni Mabasa ehu Eekiristawu dinamusugwera bibliyoteka. Oliye onothuwathuwela wi malivuru maxa eheliwemo ni ekale owegeredheyene. We podi omuloba oliye obe namahudhihawo wi uwonihe makalelo ofwanya museluya onafuniwe. Mbwenye kinarumedhiwa othukula livuru na Nyumba Yomwene. Wafugulaga malivuruya kukweretemo newene kulebegemo.

Bibliya onowoga wi negi nifwanye ‘enonelo ya Mulugu’ nnohowela osayela ninga ‘dhorela dhoviteya’. (Provérbios 2:1-5) Bibliyoteka a Nyumba Yomwene podi wukavihera osayelawula.

• Malivuru baani openddana eli mu Nyumba yawo Yomwene?

• Anawukavihere omulabihedha pama bibliyoteka baani?