Enaapadduwe ddi ni webedha?

1. Webedha watewene fwapama?

Muwebedhani mwatemwene ehikalamo athu oowoma murima. Sohagalaliha onona wi Mulugu onowawona ni onowapwatha athu yala. Mbwenye, yowukulihaya sowi webedha wula winolabihedhiwa ni makalelo a bure. (2 Coríntios 4:3, 4; 11:13-15) Ninga munoonelihu, nniwelihu mmanotisiyani aliba webedha amodha enovolowela otimbwini, wapa athu gwe, koddo ni wagoniha ahima. Ndha dhinowawukula athu oowoma murima enamurumedha Mulugu!​—Omwileri Mateus 24:3-5, 11, 12.

Webedha weebaribari winomuthithimiha Mulugu, mbwenye webedha wowoota winomutakalela Mulugu. Webedha wowoota winohudhiha dhubuwelo dhihinafwanyeya mBibliyani. Motajhiha, aliwa enohudhiha dhowoota wodhela Mulugu ni anookwa. Mbwenye Jeova anafuna wi athu enone ebaribari yaye.​—Omwileri Ezequiel 18:4; 1 Timóteo 2:3-5.

2. Enaapadduwe ddi ni webedha?

Mulugu kananyengethiwa ni webedha winawoga wi nnomudhivela Mulugu, mbwenye mweebaribarene edhiveliwaga ni elabo ya Sathana. (Tiago 4:4) Webedha wula wowoota Bibliya anithana “Babiloniya Munddimuwa”. Babiloniya yali luwani yakale wambelilewo webedha wowoota wigavirile mutokora wa malabo a Nowe. Vohilegela Mulugu anere omariha morurumusa webedha watewene wowoota winaanyengetha ni winaahoosa athu.​—Omwileri Apocalipse 17:1, 2, 5, 16, 17; 18:8.

Muthenga dhapama ndha kadhinagomela vevala bahi. Jeova kanaadduwala athu oowoma murima eli muwebedhani mowoota wapela elabo yatene ya vati. Oliye anna wahudhiha athu ni aakaviheraga wihina evenyemo muwebedhani mowoota.​—Omwileri Miqueias 4:2, 5.

3. Athu oowoma murima enere ddi?

Jeova onowapwatha athu enafuna onona ebaribari ni werana eli yapama. Oliye onowakongomeza wihina ekumemo muwebedhani mowoota. Athu enamudhivela Mulugu enna orumedha osaddula egumiwa wihina emuhagalalihe Mulugu.​—Omwileri Apocalipse 18:4.

Malabo aarumiwi yahikalawo athu oowoma murima yavuruwane muthenga dhapama dhadhela wa Mulugu dhavuwihiwa ni arumiwi. Athu yala yorumeedha nuhagalala. Jeova ohahudhiha mweddelo muxa wohagalala wanna efunelo ni njhehedho. Iyo naatajhihe aliwa mwahaya wi ehirumedha muselu dha Mulugu ni yahimweka Mulugu vamburoni vooroma mwigumini mwewa.​—Omwileri 1 Tessalonicenses 1:8, 9; 2:13.

Ale enahiya webedha wowoota Jeova onowarumedha wihina emwebedhege. Akala onorumedha withaniwa wula ni Jeova, onere okanna wandana nuliye, ni emudhi exa yodhivela enamwebedha Jeova. Vogomihedhava, onere okanna egumi yamukalakala.​—Omwileri Marcos 10:29, 30; 2 Coríntios 6:17, 18.

4. Mulugu anadhena addi ohagalala wapela elabo yatene ya vati?

Ogujhuliwa wa webedha wowoota muthenga wapama. Mulugu erana ndo athu enere woboliwa muhosiwani. Athu kinadha enyengethiwaga newene kinadha egawanyeyaga. Vano athu atene enaakale owiwanana emwebedhaga Mulugu mmodha bahi.​—Omwileri Apocalipse 18:20, 21; 21:3, 4.