Gihiipeleka Wa Mulugu Wihina Gibaddiziwe?

1. Athu amodha yamala omuhudhera Bibliya enikohesa ddi?

WAMBELAGAWENE omuhudhera Bibliya ni livuru nna, ohusuza wi Mulugu ohupaganya onivaha egumi yohimala, ebaribari yanookwa ni ovenyihiwa wanookwa. (Eclesiastes 9:5; Lucas 23:43; João 5:28, 29; Apocalipse 21:3, 4) Podi wera mwaha wotugumana ni Anamona a Yehova, onowonelamo wi aliwa enowerana efunelo ya Mulugu. (João 13:35) Vano onowoona wi wandana wawo ni Yehova winna wunnuwa, mowindo murimawo onafuniwa fumulabela oliye bahi. Podi wera onowikoha: ‘Ginohowela werana ethu-sithu wihina gimulabele Mulugu?’

2. Mwahaya bwaddi mukudda Etiyope adhe amukohege Filipi akala oofwanelela obaddiziwa?

² Mudhidhi wa Yesu ahikalawo mulobwana dhala a elabo yo Etiyopiya afunesa onona ebaribari. Thalako ela yereyile mudhidhi vang’no Yesu agavenyihiwe muukwani, namahara a Yesu hithaniwa Filipi damukavihenre. Nuwindo Filipi omonelihamo wi Yesu di Mesiya. Vohilegela, mukudda Etiyope ole nunona ebaribari oliye wera: “Kasugwa! Vala ehikalavo manjhe; enagihalela ddi wihina gibaddiziwe?”​—Atos 8:26-36.

3. (a) Yesu aawogile ddi ni anamahara aye? (b) Makiristawu a peeno enabaddiziwa aavi?

³ Bibliya kanakuwa, onowoga ekokonko wihina ole onafuna omulabela Yehova enohoweleya abaddiziwe. Yesu ohuwoga ni arumiwi aye egihina: “Dhowani mwaahudhihe athu a malogo amatene wihina ekale anamahudhera aaga mwabaddizaga.” (Mateus 28:19) Mwinnyene Yesu ohuvaha nifwanafwaniho wodhela obaddiziwa waye. Oliye enre obwinihiwa mwiili watene, kakuthuleliwe manjhe vamuru. (Mateus 3:16) Makiristawu apeeno, yabaddiziwaga enobwinihiwa mwiili watene.

4. Obaddiziwa wawo winatonyihedha ddi?

⁴ We wabaddiziwa onere watonyihedha akwawo wi ohumusakula Yehova nga mukwawo onafuniwe omulabelaga egumawo yatene. (Salmos 40:7, 8) Podi wera onowikoha: ‘Enahala ddi wi gibaddiziwe?’

ENONELO NI NROROMELO

5. (a) Ohunathi obaddiziwa orajhihe omunona aani? (b) Ekalele ddi yofuneya oya omutugumanoni?

⁵ Ethu yobajha enahoweleya ohunathi obaddiziwa, fumunona Yehova vamodha ni Yesu. We wambele werana ndo oromiliwe omuhudhera Bibliya. (Omwileri João 17:3.) Kahiyo ohudherave bahi. Bibliya onihina “enofuneya okanna enonelo yeebaribari.” (Colossenses 1:9) Mutugumano dha Anamona a Yehova dhinere wukavihera okanna enonelo ni wenjhedha odhivela wawo onniwena ni Yehova. Ola bumwahaya mmodhaya onuthukulele weeka mutugumano mburo wobajha.​—Hebreus 10:24, 25.

6. Dhego baani dhili mBibliyani dhinafwanelela wi onone ohunathi obaddiziwa?

⁶ Yehova kanajhehedha wi onone dhatedhene ohunabaddiziwe. Mulobwana amulaleyile Filipi karomile onona dhatedhene nuwindo anobaddiziwa. (Atos 8:30, 31) Ebaribari sowi nnerege odhowanave ohudhera wodhela Mulugu. (Eclesiastes 3:11) Mbwenye wihina obaddiziwe, enofwanelela onone ni orumedhe thalo dhobajha dhili mBibliyani.​—Hebreus 5:12.

7. Omuhudhera Bibliya wukavihere addi?

⁷ Bibliya onihina: “Wahikanna nroromelo kinawedheya omuhagalasa Mulugu.” (Hebreus 11:6) Mowindala we onofwanelela okanna nroromelo wihina obaddiziwe. Bibliya onanihudhiha wi athu owinjhiva yiwale madhu a Yesu elabo yo Korintiyu, ‘obajha wawiwelela ni obaddiziwa.’ (Atos 18:8) Emodhave yereyile niwe, viromiliwe omuhudhera Bibliya, ohukavihera okanna nroromelo ni mpaganyo dha Mulugu, ni mukutho erilena Yesu wihina anoobole mutheegani ni muukwani.​—Josué 23:14; Atos 4:12; 2 Timóteo 3:16, 17.

WAWADDELE ATHU AMODHA EBARIBARI YA MBIBLIYANI

8. Enuukavihere ddi okanna munigwa wowoga nakwawo ndhe onahudheriwe?

⁸ Wadidela omuhudhera Bibliya ni woona makalelo anukaviheriye mwigumini mwawo, nroromelo nawo nnere oliba ni onerege ofuna wawaddela akwawo ndhe onahudheriwe. (Jeremias 20:9; 2 Coríntios 4:13) Ki onafuna obajhe omwaddela aani?

9, 10. (a) Wambela olaleya, onafuna obajhe omulaleya aani? (b) Wafuna olaleya ni mulogo wabihe owoga nnaani?

⁹ We podi wambela owoga dha mBibliyani ni amudhawo, akwawo, amwanddamanawo ni akwawo oomabasani. Eyo sapama, mbwenye kudduwale owoga ni nriho ni odhivela. Woonelamo wi ginowedha olaleya ni mulogo, odhowe wamwaddele ole anuhudhiha Bibliya wi onofuna olaleya vamodha ni mulogo. Akala muliba anuhudhiha onorumedha wi makalelo awo enowiwanana ni yeyo Bibliya onawogiye, enofwanelela mwawaddele anamaholela abili ammulogoni.

¹⁰ Mwakiratela muselu ola enereye ddi? Anamaholela ammulogoni enere wukoha akala onowonelamo ni onorumedha thalo dhobajha dhili mBibliyani, enere wukoha akala onolabihedha mabasa thalo nda kadda labo, ni akala mwebaribarene onofuna okala Namona a Yehova. Wubuwele wi anamaholela ammulogoni enowasamalela addibila atene ammulogoni ni weya, mowindala kukanne manyazo owoga naliwa. (Atos 20:28; 1 Pedro 5:2, 3) Yamala othapanya ni we, enere wuwaddela akala enowenyeya wi olaleyege ni mulogo obe naari.

11. Mwahaya bwaddi ekala yofwanelela osaddula egumi yawo ohunambele olaleya ni mulogo?

¹¹ Anamaholela amulogo podi osoriha wi dhihala dhego dhimodha dhinafwanelela wi osaddule mwigumini mwawo ohunambele olaleya ni mulogo. Mwahaya bwaddi ekala yofwanelela osaddula egumawo? Mwaha wi nnavaha onamona wa Yehova, bumwahaya makalelo ehu egumi emuthithimihege Yehova.​—1 Coríntios 6:9, 10; Gálatas 5:19-21.

OTHWARUWA NI OMUHOGOLOWELA MULUGU

12. Mwahaya bwaddi athu atene egahowela othwaruwa?

¹² Ehikalawo ethu emodha enahoweleya werana ohunathi obaddiziwa. Murumiwi Pedro ohuwoga egi: ‘Muthwaruwe, vano muhogolowele wa Mulugu, wihina dhothega dhenyu dhithimihiwe.’ (Atos 3:19) Othwaruwa winatapulela ddi? Winatapulela wikubanyedha vanlubale ni oselela dhothega dhatedhene weriliwena. Motajhiha, akala we woraruwa, enohoweleya othwaruwe ni oselele. Akala onowilibihedha werana dhego dhapama, othwaruwa wawo kunagomela venvo odhowegeve wilibihedhaga. Woona wi kanilogomane, enofwanelela nlobege nikurumuwelo wa Mulugu.​—Romanos 3:23; 5:1.

13. ‘Ohogolowela wa Mulugu’ winatapulela ddi?

¹³ Wikubanyedhave baahi winowakwana? Naari. Pedro erile enohoweleya “ohogolowela wa Mulugu.” Eyo enatapulela oselela dhego dhatedhene dhabure weresiwena ni weregena dhego dhapama. Wihina wonelemo pamadhene muselu ola, kubuwela ogaali mulenddoni oyaga wego ohunoniliwewo. Ogavinre mudhidhi vang’ono, we orurumuwa ogaholowile. Onere ddi? Onowabiha wimela, ohogolowela mundduli, vano osayela dila enuthukulele winayiwe. Enapadduwa siyeyo wamuhudheraga Bibliya. Wubuwelamo pama, podi wera onowoona dhego mwigumini mwawo dhinafwanelela wi oselele, dhereya ndo enohoweleya “oleve dhatedhene” ni osaddule egumi yawo vano weregena dhego dhapama.

OPELEKE EGUMAWO WA YEHOVA

14. Onaawedhe addi opeleka egumawo wa Yehova?

¹⁴ Thalo emodha yofunesesa ohunabaddiziwe fupeleka egumawo wa Yehova. Wapelekaga egumawo wa Yehova, onowerana nlobelo navayekiwa olibelaga wi omulabela Yehova enaakale ethu yathima mwigumini mwawo.​—Deuteronómio 6:15.

15, 16. Enuthukulele ddi opeleka egumawo wa Yehova?

¹⁵ Olibela omulabela baahi Yehova eri ninga ompaganya muthu onamudhiveliwe wi ginafuna nikwe vamodha. Kubuwela mulobwana ni mwihiyana epanganile otelana. Mudhidhi onavirigiwa oliye onomunona pamadhene namwaliya, wambela omudhivela ni murimaye watene, vano efunelo yaye okala yomutela. Oliye ohunona wi otela kahiyo ethu ya masika, podive dhigari ndo, onowileva wi athukule mutholo ola, mwaha odhivela onniyena nnamwali.

¹⁶ Mudhidhi onahudherigiwe wodhela Yehova, odhivela onniwena nuliye winerege othabwa, vano ofunege omulabela oliye bahi. Odhivela wula winere wuthukulela opeleka egumawo wa Yehova. Wi omulabele Yehova ninga Yesu, enofwanelela werana yeyo Bibliya onawogiye egi: ‘Onafuna okala namahara aaga iikodde yeka.’ (Marcos 8:34) Eyo enatapulela ddi? Enatapulela wi omwiwelela Yehova, ethu yathima mwigumini mwawo, ohiya dhego dhimodha dhinafuna mwiili wawo.​—Omwileri 1 Pedro 4:2.

KAHIYO WOOVA OTHEEGA

17. Mwahaya bwaddi athu amodha kinafuna opeleka egumiwa wa Yehova?

¹⁷ Athu amodha kinafuna opeleka egumiwa wa Yehova, yovaga wi enaadhe ehande wakwaneliha dhinafuna Yehova. Aliwa kinafuna omuukula Yehova obe enubuwela wi Yehova kadha aakukusa mwaha ohumpelekela egumiwa.

18. Enuukavihere ddi ogonjhiha woova omuukula Yehova?

¹⁸ Odhivela wawo ni Yehova winere wukavihera ogonjhiha woova omuukula oliye. Mwaha womudhivela, onere wilibihedha werana ele olibenliwe. (Eclesiastes 5:4; Colossenses 1:10) Werana efunelo ya Yehova kawinarusa. Murumiwi Juwawu ohuleba egi: “Omudhivela Mulugu winatapulela ohara malamulo aye, woona wi malamulo aye kinanyemela.”​—1 João 5:3.

19. Mwahaya bwaddi kinahoweleya woova opeleka egumawo wa Yehova?

¹⁹ Kinahoweleya okala oologomana wihina opeleke egumawo wa Yehova. Oliye kanadha uloba werana ethu ohunakwanihiwe. (Salmos 103:14) Yehova onere wukavihera werana ele eri yapama. (Isaías 41:10) Omuroromele Yehova ni murimawo wateene, “oliye onere wuweddiha dila yapama.”​—Provérbios 3:5, 6.

OLIBELA WAWO VANAMWINJHI

20. Wamala opeleka egumawo wa Yehova thalo emodha enahala sivi?

²⁰ We onubuwela wi ohikoma ni onafuna opeleke egumawo wa Yehova? Wamala opeleka egumawo wa Yehova, enohala thalo emodha. Enohoweleya obaddiziwa.

21, 22. Onatonyihedhe addi wi ohulibela vaanamwinjhi?

²¹ Akala wohipeleka wa Yehova ni onafuna obaddiziwa, owoge nnamaholela onaholela nikuru nanamaholela mulogo. Oliye onere waloba anamaholela amodha ammulogoni wihina evirisedhe niwe thalo dhobajha dhili mBibliyani. Wafiya mwaha wobaddiziwa, atene yale yipelekile enere wawakula makoho menli ookweya enaathukulele obaddiziwa. Wawakula makoho ala menli vari vaathu onatonyihedha “olibela vaanamwinjhi” wodhela nroromelo nawo.​—Romanos 10:10.

²² Wamala wawakula makoho ala onere obaddiziwa, obwinihiwaga mwiili waatene mmanjheni. Obaddiziwa wawo winere woniha wi ohupeleka egumawo wa Yehova, wamala obaddiziwa okuma labo nenno odhowa osogolo oli Namona a Yehova.

OBADDIZIWA WINATAPULELA DDI?

23. Enatapulela ddi obaddiziwa ni “ndina na babi, na mwana ni muzimu wotxena?”

²³ Yesu ohuwoga wi anamahara aye yere obaddiziwa “ni ndina na babi, na mwaana ni muzimu wotxena.” (Omwileri Mateus 28:19.) Ki ela enatapulela ddi? Enatapulela wi onothithimiha othonga wa Yehova ni mabasa enaapara Yesu ni efunelo ya Mulugu, ni orumedha wihina Yehova onolabihedha muzimu wotxena wi erena efunelo yaye.​—Salmos 83:18; Mateus 28:18; Gálatas 5:22, 23; 2 Pedro 1:21.

24, 25. (a) Obaddiziwa winatapulela ddi? (b) Musolo wogomihedha wa livuru nna onakule nikoho baani?

²⁴ Obaddiziwa wikanna yotapulela yathima. Mwiili wawo wabwinihiwa mmanjheni, enakala ninga egumi yawo yakale ehisuweya. Wakuma mmanjheni, onakala ninga othukunle egumi exa oowikomene wi werena efunelo ya Mulugu. Wabaddiziwa onowawoniha athu atene wi obajha labo nenne onafuna omulabelege Yehova baahi. Wubuwelege wi kupelekile egumi yawo wi walabelege athu, nikuru, obe werana efunelo yawo. Mbwenye opelekile egumi yawo wi omulabelege Yehova.

²⁵ Opeleka egumawo wa Yehova ni obaddiziwa winere wukavihera olibiha wandana wawo ni Yehova. (Salmos 25:14) Wabaddiziwa kawinatapulela wi ohumala ovulusiwa. Murumiwi Pawulo ohusoriha egi: ‘Mudidele wunnuwiha ovuluwa wenyu nuwoova, nugurumela.’ (Filipenses 2:12) Obaddiziwa fumanbelelo. Ki onande addi odhowana vasogoro wandana wawo ni Yehova? Musolo wogomihedha wa livuru nna onere waakula nikoho nna.