Azombwe — Mudhowegeve Munnuwelagavo Epaddi Yomuzimuni Mwamala Obaddiziwa

1. Ethu baani yapama Azombwe owinjhiva enasakuliwa werana mwigumini mwewa?

YAKA dhatedhene, matxikwi ni matxikwi aazombwe eli Makiristawu enna obaddiziwa. Oli mmodha wa aliwa? Akala wenre hee, onone wihina addibila ni arogola ehihagalala vanlubale mwaha we obaddiziwa, teto ohuhagalasa murima wa Yehova! (Pro. 27:11) Kubuwela mudhidhi vang’ono wodhela dhithu weriliwena, ofiyedha peeno. We omuhudhera Bibiliya mohihiyedhedha obe muwari mwa yakadhene. Ohudhera wawo wa Bibiliya ohuuthukulela orumedha wi Bibiliya madhu a Mulugu. Ohiya eyo, ohufiyedha omunona ni omudhivela mwinya a Bibiliya Yehova. Odhivela wawo ni Yehova ohuuthukulela ovelela egumawo ofiyedha obaddiziwa. Ethu yohagalasa weriliwena kahiyo!

2. Ohudhera wula nnaasuze ddi?

² Ebaribari wihina ohufwanyiwa makathamiho owinjhiva yehile nroromelo nawo mudhidhi wathomeliwe wi obaddiziwe. Mbwenye we onojheha wasogolela makathamiho mamodha enehe nroromelo nawo osogolo. Saddana anere werana ethu-sithu wihina akwerebeyihe wandana wawo onniwena ni Yehova teto oliye anafuna wi we ohiye omulabela Yehova. (Efé. 4:14) Mbwenye kuhiye wihina eyo yupadduwele. Enukavihere ddi okalave oororomeleya wa Yehova ni wakwaneliha mpaganyo wawo? Enohoweleya okala mukiristawu ooviheya ni owithwelavo epaddi yomuzimuni. (Heb. 6:1) Onande addi werana eyo?

ONANDE ADDI WUNUWELAGAVOVE EPADDI YOMUZIMUNI?

3. Dhithu baani makiristawu emanle obaddiziwa enahoweliwa werana?

³ Iyo aatene namala obaddiziwa, nnohowela ohara thalo avanhe Pawulo makiristawu o Efezu. Oliye owoga egi aliwa yohowela okala Makiristawu ‘owithwelavo epaddi yomuzimuni.’ (Efé. 4:13) Ni madhu mamodha iyo nnohowela wunuwelagavove epaddi yomuzimuni, teto enokweya wonelamo ele awoge murumiwi Pawulo nubuwela makalelo anunnuwa mwana. Ebaribari wihina mwana onowahagalasa ababe mbwenye eyo kinatapulela wihina oliye onerege odhowave ndo agari mwana. Wavira mudhidhi oliye anere ohiya ‘ekalelo yehima.’ (1 Cor. 13:11) Emodhave enapadduwa ni makiristawu. Naari nigabaddiziwe nnohowela wunuwelagavove epaddi yomuzimuni. Vano nnere woona dhithu dhimodha dhinanikavihere wanda werana eyo.

4. Dhikalelo baani dhinukavihere wunnuwelagavove epaddi yomuzimuni? Owogemo. (Filipenses 1:9)

⁴ Omudhivelegeve Yehova. Mwebaribarene we onomudhivela vanlubale Yehova. Mbwenye odhivela wawo ni Yehova podi othabwagave wunnuwa. nimakalelo baani? Murumiwi Pawulo ohuwoga makalelo owerana eyo va livuru na Filipenses 1:9. (Omwileri.) Murumiwi Pawulo ahilobela alobaga wihina odhivela wa makiristawu ale odhowegeve wenjhedhedheyaga. Bumwahaya enowandeya wenjhedhedhave odhivela wehu ninnihuna ni Yehova. Nnande addi werana eyo? Nnohowela okanna enonelo yeebaribari ni mubuwelo wapama, namunona pamadhene Yehova nnerege omudhivela ni otikina dhithu aneriyena, teto nnerege ofuna werana dhithu dhinamuhagalasa Yehova ni kannaafunege omuukula Yehova. Bumwahaya nnowilibihedha onona efunelo ya Yehova ni weddelaga.

5-6. Nnande addi wenjhedhedha odhivela wehu ni Yehova? Owogemo.

⁵ Odhivela wehu ni Yehova podi wenjhedhedheya nilibihera omunona mwanaye Yesu, woona wi oliye owilibihera omutajhiha Yehova. (Heb. 1:3) Makalelo apama omunona Yesu fuudhela wahudhera malivuru mannayi a envajelyu. Akala we kunna elemelelo yomuhudhera Bibiliya ononamo aavi obajha omwileri peeno? Wilerigi wodhela egumi ya Yesu ovede onona dhikalelo dhaye dha pama. Athu yodhiveliwa okala vamodha ni Yesu teto ahima yothabwa odhiveliwa othapanya ni Yesu. (Mar. 10:13-16) Yesu ali odhivela ni apama teto anamahara aye kiyoova othapanya nuliye. (Mat. 16:22) woona wihina Yesu anatajhiha ababe, kannanganyedha wi Yehova ohukanna dhikalelo ndha. Iyo podi olobela wa Yehova ninfugulelaga murima wehu, nihinona wihina Yehova kanadha antorihaga wodhela ele nnalobihu. Iyo podi olobela wa Yehova mwaha nihinona wihina oliye ononidhivela ni ononisamalela. — 1 Ped. 5:7.

⁶ Yesu owathuwathuwela athu mwaha goyi yooniwa. Murumiwi Mateus owoga egi: ‘Aasugwaga muthithi waathu, oowaweddela thagaraga, mwaha yaali owukuwene ni yeedda bure-bure ninga mambila ehinna namakukula.’ (Mat. 9:36) Yehova anonamo aavi? Yesu ohuwoga egi: ‘Nimakalelo mamodhave Ababa eri odhulu, kinafuna newene mmodha a nikuru nenna ning’ono orimela.’ (Mat. 18:14) Sapama onona makalelo Yehova anakaliiye awonaga athu yonaga goyi! Namunonaga pamadhene Yesu, odhivela wehu ni Yehova onerege othabwa wunnuwa.

7. Ojha mudhidhi ni addibila owithwelavo epaddi yomuzimuni enukavihere ni makalelo baani?

⁷ Ethu emodha enukavihere wenjhedhedha odhivela wawo ni Yehova ni wunuwelagave epaddi Yomuzimuni, fuukala vamodha ni addibila ni arogola owithwelavo epaddi yomuzimuni. Osugwe makalelo addibilaala eriwa ohagalalene mwaha ohuselela omulabela Yehova. Walobe addibila wihina yuwaddelemo dhotajhiha ehudheriwa mwigumini mwewa emulabelaga Yehova. Wafunaga werana yothoma yathima mwigumini mwawo walobe nikavihero addibila owithwelavo epaddi yomuzimuni. Teto ‘yakalavo anamalaga owinjhiva winokala murenddele.’ — Pro. 11:14.

8. Onere ddi wanganyedhaga ndhe Bibiliya anahudhihiye?

⁸ Kuwanganyedhege. Ninga nonilihu ddima 2, saddana anere werana dhithu dhatedhene wihina uhihe wunnuwelavo epaddi yomuzimuni. Makalelo oliye werana ndo fuudhela uwaganyedhiha nde Bibiliya anahudhihiye. Motajhiha mudhidhi bu mudhidhi we podi orumedhaga wihina dhithu dhili mwilaboni dhere oruthuwa. Podi wera ogari mwana we kuwonelamo wodhela muselela, mbwenye wunuwiliwe onowanana mubuwelo wodhela oruthuwa winahudhihiwa ooskola. Athu podi wutujelaga wihina okavihere yubuwelelo enawogiwa ooskola wodhela oruthuwa. Malabo mamodha podi okalaga ninga ebaribari. Podi wera aliwa kinabihege wubuwela wihina ohukalawo mpaddusi. Bumwahaya sapama ohidduwala ele enawoga Provérbios 18:17 enihina: ‘Oobajha owoga muladdu waye anakala ninga anawoga ebaribari; vano mukwaye ambela owoga ebaribariya oliye kanakanna yowoga.’ We podi wonaga ninga akwawo ooskola enawogiwa ebaribari, bumwahaya osayelege mudhidhi wihina opendde anawoga Bibiliya, osanyihege pamadhene dhithu dhinafwanyeya mmalivuruni mwehu, teto othapanye naaddibila vamodha ni arogola kale yarumedha wodhela oruthuwa. We podi wakoha aliwa ethu baani yathukulele orumedha wi ohukalawo mpaddusi ananipwatha.

9. Ohudhere ddi ni Melissa?

⁹ Murogola anithaniwa Melissa oliye osanyiha pamadhene muselu onawoga wodhela dhopaddusa. Dhithu asanyihiliye dhahimukavihera oororomela Bibiliya anahudhihuye.b Oliye onowoga egi: “Oskola apurusori enowoga wodhela oruthuwa mwamakalelo enuuthukuleliwa orumedha wihina ebaribari. Mwaha wa eyo, yogirusa ofwanya dhowakula dha makoho aaga. Wogirusa osanyiha muselu ndha mwaha goova wi ndhe enawoga mapurusoraga ebaribari. Miyo wubuwela wihina Yehova kanafuna iyo naarumedhege aliwa woona wi aliwa enorumedha, bumwahaya miyo gohowela ofwanya dhowakula dha makoho aaga. Vano miyo wileri livuru Existe Um Criador Que Se Importa com voçê? Ni buruxura nnawoga A vida Teve Um Criador? Ni Origem da Vida — Cinco Peruntas Que Merecem Uma RespostaYaali yeyo gahowelimi. Nuwindo miyo werana ethu-sithu.”

10-11. Enaanikavihere ddi odhowagave okala ooweela vamentoni va Yehova? (1 Tessalonicenses 4:3, 4)

¹⁰ Wathawe mararuwo. Wakala muzombwe, nthakwithakwi yowawerana mararuwo enothabwa wenjhedhedheya. We podi otujeliwaga naakwawo wihina wawerena mararuwo. Siyeyo saddana anafuniye wihina weregena. Enukavihere ddi wihina wahimothele mmurakoni muna? (Omwileri 1 Tessalonicenses 4:3, 4.) Walobelaga wa Yehova oofugulelege murima wawo ni omwaddelege dhatedhene dhinupadduwela. Owogege ebaribari ni omulobe wihina uvahe kopolo. (Mat. 6:13) Ni kuddiwale wi Yehova kanafuna wutoriha, mbwenye anafuna ukavihere. (Sal. 103:13, 14) Omwileri Bibiliya podi wukavihera. Melissa, asorihiwe, ohuwoga wihina omwileri Bibiliya ohumukavihera ogonjhiha mubuwelo wodhela mararuwo. Oliye onowoga egi: “Omuhudhera Bibiliya malabo amatene ohugikavihera ogonjhiha mubuwelo wa mararuwo. Ni onona wi egumaaga eli mmadani mwa Yehova ginofuna wi oliye akale epaddi yaga.” — Sal. 119:9.

¹¹ Wafwanyiwa makathamiho kukalege oomaleyene. Wawaddele makolo awo dhithu dhinupadduwela. Ebaribari wi enorusa othapanya ni makolwihu dhithu dhinanipadduwela mwigumini mwehu, mbwenye sofuneya. Melissa onowoga egi: “Miyo olobela gilobaga kopolo, nuwindo miyo othapanya ni makolo aaga wodhela dhithu dhagipadduwela. Nuwawaddela dhithu dhagipaduwela miyo okurumuwa. Ele gerilimina yahimuhagalasa vanlubale Yehova.”

12. Onande addi werana dhothoma dhapama?

¹² Oharege dholaga dha mbibiliyani. Mudhidhi waviraga onere okanna ofuru wihina weregena dhothoma dhawo. Mbwenye ebaribari wi onohowela ohudhera dhithu dhowinjhiva. Onere ddi wihina wahitakalihe wandana wawo ni Yehova? (Pro. 22:3) Murogola dhaala anithaniwa Kari onowoga ethu yamukavihere werana yothoma yapama. Oliye wonelamo wihina mukiristawu owithwelavo omuzimuni kanahowela waddeliwa dhatedhene afunaga werana yothoma. “Oliye onowoga egi miyo wonelamo wihina gohowela wonelamo monelo wa Yehova wodhela dhothoma ohiya waddeliwaga.” Bumwahaya wamwilerigi Bibiliya wikohege: ‘Yolebela ela ginilerimi enagihudhiha ddi wodhela mubuwelo wa Yehova wodhela muselu yola? yolebela ela ginere wanda ofwanya nlagano nnagikavihere werana yothoma yapama? Obe, mwahaya bwaddi ohara ele Bibiliya anahudhiye enere okala yapama mwigumini mwaga?’ (Sal. 19:7; Isa. 48:17, 18) Wamwilerigi Bibiliya ni wapenddaga malagano onafwanyiwe, enere okweye werana yothoma enaamuhagalase Yehova. Mudhidhi onithwelegiwevo epaddi yomuzimuni, onere woonelamo wihina kunahowela waddeliwa wafunaga werana yothoma mwigumini mwawo. Mwaha onerege wonelamo makalelo Yehova anubuweliye wodhela muselu yoyo.

13. Okanna wandana ni addibila owithwelavo epaddi yomuzimuni, enukavihere ni makalelo baani? (Provérbios 13:20)

¹³ Wasakule akwawo enamudhivela Yehova. Ninga niwogilihu akwawo podi ovolowela makalelo awo owunnuwelavo epaddi yomuzimuni. (Omwileri Provérbios 13:20.) Murogola dhaala anithaniwa Sara ahibajha wukuuwa. Mbwenye akala ethu yamukavihere osaddula mubuwelo waye. Oliye anihina: “Miyo werana wandana wapama mudhidhi gahowelimi. Miyo wambela omwegeredha Namasugwera sumana dhatedhene ni murogola dhaala ammulogoni. Mukwaaga mmodhaya ogikavihera miyo wanda ovaha dhowakula mmutugumanoni. Mwaha wa nikavihero wodhela okanna wandana wapama, miyo obajha ovaha thima ohudhera waga wa vayeka ni malobelo aaga. Wandana gannimina ni Yehova, obajha oliba. Vohilegela miyo ohogolowela ohagalala.”

14. Julien andile addi werana wandana wapama?

¹⁴ Onande addi werana wandana wapama ni addibila owithwelavo omuzimuni? Ddibila dhaala anithaniwa Julien, ali namaholela mulogo, onowoga egi: “Ngali muzombwe miyo gaherana wandana wapama, naaddibila nadhowihuna vamodha mmalaleyelo. Aliwa yoviheyana ni mabasa, bumwahaya aliwa yahigikavihera wadhivela mabasa ammalaleyelo. Aliwa ogikavihera okanna yoluba yolaba ninga piyonero a mudhidhi wamutene. Miyo ofiyedha wonelamo wihina gere oyelela ofuru gannimina wokanna akwaga apama, mwaha kale gandanesa ni athu yaligana ni miyo. Vano obeteli wuno ginodhowave gikannaga akwaga apama. Dhotajhiha dhewa dha pama dhinogikavihera werana dhothoma dha pama, ninga motajhiha nafunaga dhowaredhana teto enogikavihera olibiha wandana waga ni Yehova.”

15. Ethu baani murumiwi Pawulo amulobiliye Timotiyu? (2 Timóteo 2:20-22)

¹⁵ Ki wonelamo wi mmulogoni ohukalamo muthu ahinna ekalelo yapama? Murumiwi Pawulo ahinona wihina makiristawu amudhidhi waye kiyaali athu yanna efunelo ni dhithu dhomuzimuni. Bumwahaya adhe amwaddelege Timotiyu wihina ahawaddamele. (Omwileri 2 Timóteo 2:20-22.) Wandana ninnihuna ni Yehova bwathima vanlubale. Bumwahaya kanihiye muthu wihina anonge wandana wehu ninnihuna ni Yehova nilibiherihu vanlubale wihina nikanne. — Sal. 26:4.

OKANNA DHOLUBA WINERE WUKAVIHERA WUNNUWELAGAVOVE EPADDI YOMUZIMUNI?

16. Dholuba baani onahoweliwe okanna?

¹⁶ Osakule dholuba dha pama. We podi osakula dholuba dhinalibihe nroromelo nawo ni dhinukavihere okala mukiristawu apama. (Efé. 3:16) Motajhiha, we podi othoma wihina yoluba yawo ekale owomihedha ohudhera wawo wa vayeka ni omwileri Bibiliya. (Sal. 1:2, 3) Obe we podi othoma osaddula ni owomihedha makalelo awo oolobela. Ni wonelamo wi onohowela okanna mubuwelo wapama wafunaga werana yothoma, wihina wande werana dhothoma dhapama wodhela dhowaredhana ni makalelo onalabihedhiwe mudhidhi wawo. (Efé. 5:15, 16) Yehova oona wi onna wilibihera wihina wenjhedhedhe mabasa awo omulabela, oliye onohagalala.

17. Wakaviheraga athu amodha mareeliho baani onawakeliwe?

¹⁷ Wakavihera athu amodha podi wukavihera okala mukiristawu apama. Yesu ohuwoga egi: ‘Ovaha winothabwa ohagalasa opitha ovahiwa.’ (Atos 20:35) Mwebaribarene enere okala yapama olabihedha mudhidhi wawo ni kopolo onniwena wihina wakavihere athu amodha. Motajhiha, we podi okanna yoluba yowakavihera addibila eli anakalaba obe ale eli aredda mmulogoni mwawo. We podi wakavihera wodhela wagulela ethu-sithu enahoweliwa obe wakavihera ni dhithu dhimodha. Akala we oli ddibila we podi wakavihera wodhela okala mudhaari ookavihera wihina wakavihere addibila ammulogoni mwawo. (Fil. 2:4) We podi wawoniha odhivela athu amodha wodhela walaleyela muthenga womwene. (Mat. 9:36, 37) Dhandeya ononamo aavi olaba ninga piyonero amudhidhi wamutene.

18. Ni makalelo baani olaba ninga piyonero amudhidhi wamutene enukaviheriwa?

¹⁸ Olaba ninga piyonero amudhidhi wamutene podi wukavihera ni makalelo ohiya iyana wunnuwelavo epaddi yomuzimuni. Olaba ninga piyonero podi wufugulela musiwo wokursari eskola yanamalaleya oOmwene, olaba oBeteli obe omaga nyumba dhomwene. Piyonera dhaala ali namwali Kaitlyn onowoga egi: “Ethu egikavihere wunnuwelavo epaddi yomuzimuni ni obaddiziwa waali ojha mudhidhi na addibila ni arogola yakovelele mabasa owinjhiva nakala mmalaleyelo. Dhotajhiha dhewa dhogikavihera wenjhedhedha enonelo yaaga ya mBibiliyani ni owomihedha makalelo aaga ohudhiha.”

19. Mareeliho baani onawakeliwe, mwaha wilibihera wunnuwelagavo epaddi yomuzimuni?

¹⁹ Onere wawakela mareeliho owinjhiva wilibihera wunnuwelagavove epaddi yomuzimuni. Motajhiha, we kunadha ohiya ojha mudhidhi wawo ovedaga dhithu dhahinna thima. (1 João 2:17) Teto we kunadha ofwanyiwaga makathamiho wodhela othoma ethu yabure. We onere ohagalala ni onere okanna murenddele webaribari. (Pro. 16:3) Yotajhiha yawo yapama enere walibiha addibila amodha, azombwe ni anakalaba. (1 Tim. 4:12) Yapamaya onere okanna ohagalala ni murenddele wodhela, onona wihina onna omuhagalasa Yehova ni ohukanna wandana wapama nuliye. — Pro. 23:15, 16.