Yehova onobarela ni onosamalela nlogo naaye

1. Mwahaya bwaddi Yesu adhe alobege wihina Yehova aasugwerege anamahara aye?

HEMAHIYU Yesu ahinathi okwa, oliye olobela wa Yehova alobaga wihina Yehova ‘aasugwerege anamaharaaye.’ (João 17:15, 20) Ebaribari wihina Yehova onnosugwedha nlogo naaye— obe onowasamalela ni onowabarela. Mbwenye Yesu ahinona wihina anamahara aye yerege oharahariwa ni saddana. Yesu ahinona wihina egi anamahara aye yande ogonjhiha oharahariwa yere ohowela nikavihero na Yehova.

2. Mowiwanana ni Salmos 33:18-20, mwahaya bwaddi kannahowela woova naafwanyiwaga makathamiho?

² Elabo ela enasugweriwa ni saddana enowatotela makathamiho owinjhiva enawoniha goyi adhaari a Mulugu. Nnofwanyiwa makathamiho enanukuula ni enanikwerebeyiha ofiyedha weha nroromelo nehu. Mbwenye ohudhera wula nnere woona wihina kannahowela woova mwaha Yehova ononisamalela. Oliye ohunona dhinanipadduwela ni onoofuna onikavihera. Teto nnere woona dhotajhiha biili dhinafwanyeya mBibiliyani dhinanikavihere wonelamo makalelo Yehova ‘anasamaleliye ale enamoova.’ — Omwileri Salmos 33:18-20.

YEHOVA ONONIKAVIHERA NIWONAGA NINGA NILI YEKIHU

3. Mudhidhi baani nniwonihu ninga nili yekihu?

³ Ebaribari wihina nnokosa epaddi ya emudhi enlubale yomuzimuni, naarive dhigari ndo iyo podi wiwoonaga ninga nili yekihu. Motajhiha, azombwe podi wiwoonaga ninga eli yekiwa yaafunaga owoga dhithu dhinarumedhiwa mudhidhi yakala oskola obe yatamela mulogo mmodha. Amodha enowawanana makathamiho ookala owukuwene obe ookwerebeyene yubuwelaga wihina enohowela wawanana yekiwa makathamiho ayo. Malabo mamodha aliwa podi wubuwelaga wihina kaavo anaapwatha obe iyo podi okala oothuwathuwene nihonaga yoweraya. Niwonaga ninga nili yekihu iyo podi wubuwelaga wihina neere onyanyaliwa — ni nnakala oothuwathuwene, mbwenye Yehova kanafuna wi iyo nubuwelege ndo. Nnande addi okanna ebaribari?

4. Mwahaya bwaddi namavuhulela Eliyaji adhe awogege: ‘Miyo meeka divuluwile’?

⁴ Osugwe yotajhiha ya mudhaari a Yehova Eliyaji. Musano Jezabel ahilibela oompe, Eliyaji ahimuthawa musano ola muwari mwa malabo 40. (1 Reis 19:1-9) Nuuthawela okunguni wa nibwe, oliye owoga ni Yehova egi: ‘Namavuhulela ahanle dimiyo meeka.’ (1 Reis 19:10) Yahikalawo anamavuhulela amodha mwilaboni owakwana 100 yavulusiwe ni Abadiya mmadani mwa Jezabel mwihiyana ole owoopiha. (1 Reis 18:7, 13) Vano mwahaya bwaddi Eliyaji iwooniye ninga ali yeka? Nerege oliye ubuwela wihina anamavuhulela yavulusiwe ni Abadiyaji yahikwa? Ethu emodha, podi wera mwaha kaaliwo muthu mmodha afuna omulabela Yehova nuliye mudhidhi Yehova oonihiliye wihina Mulugu eebaribari omwangoni karimeli! Obe malabo mamodha oliye ubuwela wihina kaavo oonelamo nde dhampadduwela ni kaavo ampwatha? Kinandeya woneleyamo pama makalelo Eliyaji aaliye, mbwenye nihikanna ebaribari wihina Yehova owonelamo mwahaya bwaddi Eliyaji iwooniye wihina ali yeka ni Yehova ahinona makalelo oomukavihera.

5. Ni makalelo baani Yehova amukaviheriye Eliyaji ohiwona ninga kali yeka?

⁵ Yehova aherana dhithu dhowinjhiva wihina amukavihere Eliyaji. Yehova omuhiya Eliyaji owogamo dhatedhene dhampadduwela. Oliye ahimukoha dila biili egi: ‘Oneravo ddi vala?’ (1 Reis 19:9, 13) Olenddo dhabilidhene Yehova ahimpwasedha onvuruwana Eliyaji mudhidhi amfuguleliye murima waye. Yehova ahimwakula Eliyaji wodhela omooniha wihina ali epaddi yaye ni di Mulugu akopolo. Yehova ahiwoga wihina yahikalawo mayizarayeli owinjhiva yamulabela nuuroromeleya. (1 Reis 19:11, 12, 18) Mwebaribarene Eliyaji aali ookurumuwene wodhela onfugulela Yehova murima waye ni onvuruwana nde Yehova anniyena wihina amwaddele. Nuuvira mudhidhi Yehova onvaha Eliyaji mutholo dhinlubale ni dha thima. Yehova omuloba Eliyaji wihina amuthikithele Izayeli ninga mwene oWasiriya, Teto Jewu ninga mwene oWizarayeli ni Elizewu ninga namavuhulela. (1 Reis 19:15, 16) Mudhidhi Yehova aavahiye Eliyaji mutholo ndha ahimukavihera oliye osugwera dhithu dhapama eriyena, Yehova omulabihedha namavuhulela Elizewu wihina amukaviherege Eliyaji. Ki we onande addi wakela nikavihero na Yehova wiwoonaga ninga oli weka?

6. Wiwoonaga ninga oli wekawo ethu baani onaalobiwe? (Salmos 62:8)

⁶ Yehova onowithana wihina othapanye nuliye wodhela nlobelo. Yehova uhanona makathamiho enuufwanya ni onopaganya wavuruwana malobelo awo mudhidhi-bu-mudhidhi. (1 Tes. 5:17) Yehova onodhiveliwa avuruwanaga malobelo adhaaraye. (Pro. 15:8) Ethu baani waamulobiwe Yehova wiwoonaga ninga oli weka? Ninga Eliyaji onfugulele Yehova murima wawo. (Omwileri Salmos 62:8.) Omwaaddele dhithu dhinupadduwela ni, omulobe Yehova wihina ukavihere wawanana makathamiho awo. Motajhiha, akala onowoova ni onotakaleliwa akwawo ooskola yukohaga wodhela muselu dha mBibliyani, omulobe Yehova wihina uvahe oliba murima. We podi omuloba Yehova uvahe enonelo wihina wande wawaddelamo pama dhithu onarumedhiwe mwamakalelo owoneleyamo. (Luc. 21:14, 15) Akala onowanana mubuwelo wabure omulobe Yehova wihina wande othapanya ni Ddibila owithwelavo epaddi yomuzimuni. Teto we podi omuloba Yehova wihina muthuya anuvuruwana oonelemo dhithudha dhinupadduwela, onfugulele Yehova murima wawo ni woone makalelo Yehova anawakuliye malobelo awo ni orumedhe nikavihero naathu amodha. Werana ndo kuniwonege wi oli weka.

7. Nnahudhera ddi ni yotajhiha ya Mauricio?

⁷ Yehova ohunivaha mabasa athima wihina naaparege. Okanne ebaribari wihina Yehova onowoona ni onovaha thima mabasa onaapariwe mmalaleyelo ni mmulogoni. (Sal. 110:3) Okala oopinyaminyeyene ni mabasa a Yehova enuukavihere addi wiwoona ninga kuli weka? Kasugwa yotajhiha ya ddibila dhaala anithaniwa Mauricio.b Nubaddiziwa mudhidhi vang’ono mukwaye owandanana obajha osukuma ebaribari. Oliye onowoga egi: “Omoona mukwaaga amusukumaga Yehova yahigukula vanlubale,” ni gowiwanganyedha akala geere wanda omulabela Yehova ni okala epaddi yemudhi yaye. Miyo giwoona ninga gili meeka ni goona wi kaavo anonelamo dhinanipadduwela.” Ethu baani yamukavihere Mauricio? Oliye onowoga egi “Miyo obajha olaleya eyo yahigikavihera ohuthabwa wubuwela dhithu dhaagipadduwele ni yahigikavihera ohagalala ni addibila mmabasani oolaleya ni kagiwoona ninga gili meeka.” Naarive yahandeyaga odhowa ni addibila mmalaleyelo iyo podi olaleya naaliwa nlabihedhaga telefoni obe waleba makarta, eyo enonlibiha vanlubale. Ethu emodha yamukavihere Mauricio yaali ddi? Oliye onowoga egi: “Miyo othabwaga ojha mudhidhi ni addibila ammulogoni. Miyo obajha wegeredha pamadhene dhipaddi dha mmutugumanoni gaavahiwimi. Mutholo ndha dhihigikavihera onona wihina gihikanna thima vamentoni va Yehova ni vaari va addibila.”

YEHOVA ONOONIKAVIHERA NAFWANYIWAGA MAKATAMIHO

8. Naafwanyiwaga makathamiho nnakala aavi?

⁸ Iyo nnakalawo malabo ookuthula, bumwahaya iyo aatene nnofwanyiwa makathamiho owinjhiva. (2 Tim. 3:1) Naarive nnonaga wihina ndo dhinopadduwa makathamiho ehu podi onifwanya morurumusa. Motajhiha iyo podi ofwanyiwa makathamiho wodhela ohukanna korowa obe ofwanyiwa oredda wowopiha ni omuyelela mmudhihu muukwani. Makathamiho ninga yala podi onihiya owukuwene, thabwa-thabwa makathamihoya yaharanaga obe yadha mudhidhi mmodhave. Mbwenye kanidduwale wihina Yehova ohunona dhinanipadduwela, oliye podi onikavihera wagonjhiha makathamiho ni oliba murima.

9. Makathamiho baani yanfwanye Jo?

⁹ Kubuwela makalelo Yehova amukaviheriye mulobwana oororomeleya Jo. Oliye ahifwanyiwa makathamiho oorusa mudhidhi mmodhave, labo nimodhave Jo ahifwanyiwa makathamiho owinjhiva, vobajha oliye wayelela anenyama aye aatene, vasogolova adhaari aye opiwa teto eharelaga anaaye aatene okwa. (Jó 1:13-19) Mudhidhi epadduwaga makathamiho yala oliye ofwanyiwa oredda wowopiha, wamutakalinhe maningo. (Jó 2:7) Jo ahisegedheya ofiyedha owoga: “Ginowidda egumi yaga ni kaginafuna okalawo.” — Jó 7:16.

10. Nikavihero baani Yehova anvahiliye Jo wihina aagonjhihena makathamiho? (Osugwe fotu ya vakapani.)

¹⁰ Yehova woona dhampadduwela Jo. Oliye omudhivela Jo bumwahaya adhe anvahege dhatedhene ahoweliye wihina ande wagonjhiha makathamiho ale. Motajhiha, Yehova othapanya ni Jo ni omubusedha wihina oliye ohukanna enonelo yohipimelelaya ni Yehova omwaddela wihina onowasamalela anaaye aatene a veelaboni ya vati. Teto wawoga anenyama owinjhiva akopolo. (Jó 38:1, 2; 39:9, 13, 19, 27; 40:15; 41:1, 2) Yehova ahimulabihedha mulobwana dhaala anithaniwa Eliyu wihina amulibihe Jo ni amutodole. Eliyu ompaganya Jo wihina Yehova onoreliha ovilela wa adhaari aye. Teto Yehova ahimulabihedha Eliyu wihina anvahe dhoolaga Jo. Eliyu amukavihera Jo ohiwubuwelaga meekaye ni wonelamo wihina iyo niiliganiha ni Yehova newene kanili ethu, mpaddusi eelabo. (Jó 37:14) Ohiya eyo Yehova ahinvaha mutholo Jo wihina aakwanihe, ohowela walobelela akwaye ale araru owoota yanna yothega. (Jó 42:8-10) Mbwenye Yehova ananikavihera ni makalelo baani peeno naafwanyiwaga makathamiho?

11. Bibiliya anantodola aavi naafwanyiwaga makathamiho?

¹¹ Peeno Yehova kanawoga nihiyo ninga awogiliye ni Jo, mbwenye anawoga ni kadda muthu wa iyo aalabihedhaga madhu aye Bibiliya. (Rom. 15:4) Ejhehedhelo Yehova ananivahiye yosogolo enonlibiha vanlubale. Kabeni noone dholebela dhinafwanyeya mBibiliyani dhinanitodola naafwanyiwaga makathamiho. Motajhiha mBibiliyani Yehova ononipaganya wihina kawo ethu newene makathamiho enanimwalanihe — “ni odhivela ninnihuna nuliye.” (Rom. 8:38, 39) Yehova ononroromeliha wihina, “uhawaddamela ale enanvuwiha”. (Sal. 145:18) Teto Yehova onowoga egi: Namuroromela naarive nifwanyiwaga makathamiho iyo nnere ohagalala. (1 Cor. 10:13; Tia. 1:2, 12) Teto Bibiliya ononubusedha wihina makathamiho nnafwanyiwihu peeno ba mudhidhi vang’ono naliganiha naladdaniha ni mpaganyo wegumi yohimala. (2 Cor. 4:16-18) Yehova onoopaganya wihina aneere omariha dhatedhene dhinantatamulela goyi — Saddana vamodha ni ale enamutajhiha. (Sal. 37:10) Ononamo aavi okoya dholebela mmuruni mwawo dhinukavihere wawanana makathamiho osogolo?

12. Yehova anafuna wihina neere ddi negi nipurelemo nikavihero ananivahiye wodhela Bibiliya?

¹² Yehova anafuna wihina iyo nikannege mudhidhi wamwilerigi Bibiliya ni opendda nde nnilerihu. Naparihedhaga mabasa mwigumini mwehu nde nnahudherihu nnowenjhedhedha nroromelo nehu. Teto wandana wehu ni Yehova winoliba ni nnokanna kopolo dhowagonjhihana makathamiho ehu teto Yehova onowavaha muzimu waye wotxena ale enooniha wihina enomuroromela ni kopolo enahoweliwa wihina yande wagonjhiha makathamiho.  — 2 Cor. 4:7-10.

13. Yojha yomuzimuni ananivaha “mudhaari ororomeleya ni athotho” enanikavihera addi wawanana makathamiho?

¹³ Nnikavihero na Yehova “Mudhaari ororomeleya ni athotho” ononivaha dhoojha dhomuzimuni ninga malivuru, vidiyu, jhibo, dhinanikavihera okanna nroromelo nooliba ni okala mento epaddi yomuzimuni. (Mat. 24:45) Nnohowela olabihedha pama dhoojha nda dhomuzimuni Yehova ananivahiye. Murogola dhaala oWistadu Unidu ovaneneve onowoga egi onotamalela wodhela dhojha dhatedhene dhomuzimuni Yehova ananivahiye. “Dhivira yaka 40 gimulabelaga Yehova mudhidhi yoyo nroromelo naaga nihehiwa ni makalelo oohiyana-iyana.” Oliye ohufwanyiwa makathamiho ohiyana iyana — Avwaye yahitukumiwa ni karo ofiyedha okwa ni nameeddiha dhaala aalezele, teto makolo aye yakwile nuuredda wowopiha wafwanye, oliye ohuwanana dila biili oredda wa kanser. Ethu baani yamukavihere ovilela naarive afwanyiwaga makathamiho ayo? Oliye anihina: “Dhoojha dhomuzimuni Yehova anagivahiye wodhela mudhaari ororomeleya ni athotho dhinogikavihera ovilela bumwahaya ginowoga ninga Jo enre: ‘Ofiyedha okwa waga, ginere okalave ororomeleya!’” — Jó 27:5.

14. Ni makalelo baani Yehova analabihedhiye addibila wihina enikavihere naafwanyiwaga makathamiho? (1 Tessalonicenses 4:9)

¹⁴ Yehova onowaxagiha adhaari aye wihina yonihege odhivela mmodha ni mukwaye ni ekaviheranege mudhidhi worusa. (2 Cor. 1:3, 4; omwileri 1 Tessalonicenses 4:9.) Emutajhihaga Eliyu, addibila ehu ni arogola enonikavihera wanda wagonjhiha makathamiho. (Atos 14:22) Kasugwa empadduwele murogola Dayani, mamune ahifwanyiwa oredda wowopiha vano addibila ammulogoni yahimukavihera oliye oliba epaddi yomuzimuni. Oliye onowoga egi: “Kayali yokweya mbwenye muwari mwa mweri dhendha gihoona makalelo Yehova anikaviheriye addibila ammulogoni wivelela wihina enikavihere. Addibila owinjhiva odha onaredhela amodha yoniligarela teto yonikubarela. Eyo yahinivaha kopolo nahowelihu. Woona wihina kaginanda weddiha karo addibila amodha yahiivahedha wihina egithukulelege omutugumanoni obe mmalaleyelo.” Ala mareeliho manlubale ookala epaddi yemudhi yela yomuzimuni!

NNOTAMAALELA MAKALELO YEHOVA ANANSAMAALELIYE NI ODHIVELA

15. Mwahaya bwaddi nigakanna ebaribari wi nnere wanda wagonjhiha makathamiho ehu?

¹⁵ Iyo aatene nnodha nifwanyiwe makathamiho. Mbwenye ninga nnasuzihu va yohudhera ela kannadha nawanana makathamiho yekihu. Yehova baabi oodhivela onowasugwera makathamiho enanifwanya. Oliye ali epaddi yehu ni onowavuruwana malobelo ehu teto onofuna onikavihera. (Isa. 43:2) Iyo nihikanna ebaribari wi nnowanda wagonjhiha makathamiho mwaha Yehova dinanikavihera wi nivilele. Ni nlobelo, madhu amBibliyani, dhoojha dhomuzimuni ni addibilihu enanikavihera mudhidhi woorusa.

16. Nnere ddi wihina nsamaaleliwe ni Yehova?

¹⁶ Iyo nnotamalela mwaha okanna Mulugu oodhivela ananthuwathuwela ni ananisamalela kadda muthu wa iyo! Ninga enawogela yolebela ya Salmos 33:21 Enihina: ‘Murima wehu onohagalala nuliye.’ Iyo podi omutamalela Yehova wodhela opurelamo pamadhene nikavihero ananiva hiye. Ni iyowa, nnohowela werana epaddi yehu obe wilibihera omwiwelela Yehova. Ni werana ele eli yapama vamentoni vaye ni makalelo yayo nnere okanna ebaribari wi Yehova anere onisamalela kadda muthu wa iyo nimukalakala! — 1 Ped. 3:12.