Mudhowegeve ‘Mulibihanaga mmodha ni mukwaye’

1. Mowiwanana ni 1 Tessalonicenses 5:11, mabasa baani iyo aatene nnahowelihu wapara?

WE onowabihaga woona mutugumano munyumbani yomwene emagiwe dhiino vala? Murimawo wahihagalala vamlubale mwebaribarene kunadha odduwalaga mudhidhi yoyo wahihagalala vamlubale wodhela omutamalela Yehova, podi wera mutugumano nuwambela yamurusa wiba jhibo yobajha mwaha ohagalala. Mabasa amatene omaga nyumba dhomwene enomuthithimiha Yehova. Mbwenye ehikalawo mabasa mamodha enathabwa omuthithimiha Yehova. Dhithu ndho enovolowelavo wapara mabasa enakwaranya omaga nyumba dhomwene enovolowelavo athuya ni wilibihedha odhowa onyumbani yomwene wihina emwebedhe Yehova. Yaari mabasa yala murumiwi Pawulo awogiye enafwanyeya va 1 Tessalonicenses 5:11, eli musolo wa yohudhera yela. — Omwileri.

2. Ohudhera wula nnasunze ddi?

² Murumiwi Pawulo yotajhiha yapama ya muthu anonile walibiha addibila amodha oliye owoniha thagaraga wodhela wipweha mburo wa athu amodha. Ohudhera wula nnere woona makalelo owakavihera addibila amodha vobajha (1) Ovilela naafwanyiwaga makathamiho, (2) Olevelelana, mmodha ni mukwaye (3) Olibiha nroromelo nehu ni Yehova. Teto nnere woona makalelo omutajhiha murumiwi Pawulo olibiha wandana wehu na. Addibila. — 1 Cor. 11:1.

NIMAKALELO BANI MURUMIWI PAWULO AKAVIHERIYE ADDIBILA WANDA WAGONJHIHA MAKATHAMIHO

3. Murumiwi Pawulo aanda addi olabihera mudhidhi wihina isapele ni omulabela Yehova?

³ Murumiwi Pawulo owadhivela vamlubale addibila, Teto oliye ahifwanyiwa makathamiho manlubale; bumwahaya oliye owedha wipweha vamburoni va addibila yafwanyiwa makathamiho. Labo, nimodha Pawulo kanna korowa. Bumwahaya oliye ohowela olaba wihina isapele ni asamarelena addibila amodha yaliwa vamodha mulenddoni. (Atos 20:34) Oliye ahanona pamadhene mabasa ooluwa tenda. Nudhowa oKorintiyu alaba vamodha ni Aquila ni Priscilla teto yapara mabasa mamodhave ooluwa tenda. mbwenye naarive dhigari ndo “Asabadu ateene” oliye owalaleyela Ajudewu ni Agerego. Bumwahaya nunfwanya Silas ni Timotiyu, “Pawulo oviheyana ni mabasa.” (Atos 18:2-5) Bumwahaya murumiwi Pawulo kanahiyege woona dhithu dhili dhathima mwigumini mwaaye, waali omulabela Yehova. Naarive agaviheyana ni mabasa ammalaleyelo ni owisapelana oliye Kanaa iyege walibiha addibila ni arogola. Pawulo ahawubusedha wihina kihiye mabasa obe ‘dhithu dha mwigumini ya yelelihe dhithu dhathima’ — dhatedhene dhavolowele omwebedha Yehova. — Fil. 1:10.

4. Nimakalelo baani Pawulo ni Timóteo yakaviheriiwa addibila wanda ogonjhiha oharahariwa?

⁴ Nuuvira mudhidhi vag’ono mulogo wa Tessalónica numagiwa, addibila obajha oharahariwa. Mudhidhi mmodha amwiddani omusayela Pawulo ni silas, mbwenye woona wihina kiyanfwanya, aliwa wahidda ‘addibila amodha waadhowana wanamathonga’, aliwa obajha okuwa yegi: ‘Alobwana ela kinawiwelela Sezare.’ (Atos 17:6, 7) Onowedha wubuwela woova yanna addibilale yaali axa mwibaribarini nunona wihina yanna oharahariwa na amwiddani? Nroromelo newa nahibajha oridha, mbwenye Pawulo kaafuna wihina eyo yapadduwele. Naarive Pawulo ni silas ehowelaga otamela mburo mmodha, aliwa yathuwathuwela mulogo ole muxa. Pawulo ahiwoga ni akudda Tessalónica egi: ‘Nnowinviyarelani Timóteo, ddibilihu . . . , wihina ootodoleni ni ulibiheni wodhela nroromelo naaye, wihina mwahisegedheye wodhela oharahariwa wula.’ (1 Tes. 3:2, 3) Podi weera Timóteo ahiharahariwa luwani akaliye Olistara. Ni oliye ahimoona makalelo Pawulo alibihiye addibila. Mohaganyedha Timóteo nuwoona makalelo Yehova asamaleliye addibila, oliye ahikanna kopolo yowalibiha addibila amodha ni waroromeliha wihina dhatedhene dhere waweddela pama. — Atos 14:8, 19-22; Heb. 12:2.

5. Ddibila anithaniwa Brayn aakaviheriwe addi ni namaholela mulogo?

⁵ Ethu emodha murumiwi Pawulo andiliye werana wihina ande walibiha addibila ddi? Pawulo ni Bernabe Nahogolowela wihina yawaredhele addibila Olistara, wikoniyo ni witiyokiya, ‘aliwa wathoma addibila wihina ekale anamaholela mulogo.’ (Atos 14:21-23) Mohaganyedha anamaholela mulogo ale yahikavihera vanlubale mulogo ndha, ninga dhinapadduwa peeno. Kasugwa awogile ddibila Bryan, oliye onowoga egi: “Giganna yaka 15”, “apapa ovenyavo vaade onihiyavo yekihu, teto amama othosiwa mmulogoni ni giwoona ninga gili meeka.” Ethu baani emukavihere ddibila brayanti wanda wagonjhiha makathamiho ala orusa? Oliye onowogave egi: “Namaholela dhaala anithaniwa tony, malabo owinjhivene othapanya ni miyo nakala mmulogoni ni mudhidhi dhimodha. Oliye owawoga athu yaafwanyiwe makathamiho mbwenye naarive egafwanyiwe makathamiho yala aliwa yohagalala. Yolebela agilereliye di Salmo 27:10 malabo owinjhivene oliye owoga yotajhiha ya Ezekiyas, amuloba orolomeleya Yehova naarive ababe yahili yotajhiha yapama.” Dhatedhene dhimukavihere addi Brayn? Oliye onowoga egi: Nnikavihero na ddibila Brayn nigithukulela miyo okala piyonero a mudhidhi wa mutene. Anamaholela mulogo mwasugwerege addibila enohowela olibihiwa ni ‘madhu apama,’ ninga ddibila Brayn. — Pro. 12:25.

6. Ethu baani murumiwi Pawulo alabihedhiye wihina aalibihena addibila ni arogola?

⁶ Murumiwi Pawulo ahawubusedha addibila wihina yohowela wubuwela wi ni nikavihero na Yehova, ‘Murabo munlubale wa anamoona’ obe wadhaari orolomeleya akale ehiwedha wagonjhiha makathamiho. (Heb. 12:1) Murumiwi Pawulo ahinona wihina yotajhiha yewa yere wakavihera addibila ni arogola okala oliba murima ni okala txithi ni dhithu dhathima ‘sidadi ya Mulugu ebaribari.’ (Heb. 12:22) Teto siyeyo enapadduwa ni iyo peeno. Dhotajhiha dhadhaari a Yehova akale dhinolibiha peeno ninga Jideyawu, Baraki, Davi, Samuweli ni amodhaya? (Heb. 11:32-35) Dhotajhiha dhanrolomelo dha malabo yela podi onlibiha vanlubale. Osede Mundiyale enowakeliwa makarta addibila vamodha ni arogola enawoga wihina ehilibihiwa nroromelo newa nuwileri dhotajhiha dhadhaari a Yehova a malabo yala.

MURUMIWI PAWULO OHAWONIHA ADDIBILA NI AROGOLA MAKALELO OVILELANA MMUDHA NI MUKWAYE

7. Ohudhere ddi va yolaga ya murumiwi Pawulo enafwanyeya va Romanos 14:19-21?

⁷ Iyo nnowalibiha addibilihu ni arogolihu neragana dhithu dhinadhana murenddele mmulogoni. Kanihiye wihina mubuwelo wehu winiddanihe ni aliwa. Iyo kannafuna wihina monelo dhehu dhohiyana-iyana dhinigawe. Teto kannafuna odidela werana dhofuna dhehu dhihiniwanana ni madhu ambibliyani. Kubuwela yotajhiha ela. Mudhidhi wa murumiwi Pawulo, mulogo woRoma yahikalawo makiristawu ohiyana iyana. Addibila amodha yahinathi ohudhera ebaribari yahara nlamulo na Moyizes, vano nlamulo nne nawoga wodhela dhoojha dhonyakavala nuumala, kanalabela. (Mar. 7:19) Bumwahaya makiristawu amodha yahara nlamulo nenne yubuwela wihina kaavo muladdu ojha yojha bure-bure. Mbwenye makiristawu amodha kiyaafuna watajhiha, mwaha wa yeyo mulogoya ogaweya. Mbwenye madhu a Pawulo yahoniha thima enna woniha murenddele. Oliye owoga egi: ‘Sapama ohijha nyama, nee ohimug’wa vinyu, newene werana ethu enamuthukule omukwakwathusa ddibilo.’ (Omwileri Romanos 14:19-21.) Ni madhu yala Pawulo woniha wihina okangana wule vaari vaaddibila, woodhana muladdu ni wothota makathamiho mmulogoni. Oliye ahihiya werana dhithu dhimodha oovaga wakwakwathusa makiristawu amodha. (1 Cor. 9:19-22) Ni makalelo mamodhave iyo nnoveda okanna murenddele nahikanganelaga wodhela muselu kadda muthu anathomiya werana mwigumini mwaaye.

8. Pawulo enre ddi ohiwanana wathusiliwa murenddele mmulogoni?

⁸ Murumiwi Pawulo ohuvaha yotajhiha yapama yodhana murenddele nahiwananaga wodhela muselu dhathima. Motajhiha mudhidhi wa arumiwi makiristawu amodha oloba wihina makiristawu yahali maJudewu yineliwe, podi wera aliwa yerana ndo yovaga wihina enasegedhiwe okohiwa ni maJudewu. (Gál. 6:12) Pawulo kaarumedhe muselu yoyo, mbwenye ohiya wawaddela wihina dhithudha dhereye ni monelo waye oliye ali owiyeviha. Mbwenye oliye oloba narumiwi ni anamaholela mulogo amodha oJeruzale wihina ethome ethu emodha. — Atos 15:30, 31.

9. Nnaamutajhihe murumiwi Pawulo nimakalelo baani?

⁹ Yanifwanya makathamiho ohiwanana, iyo podi oveda okanna murenddele wodhela ohara dholagihera ananivaha Yehova munikuruni. Dhokalawo dholagihera dhohiyana-iyana nnafwanyihu mmalivuruni mwehu ni dholagihera dha nikuru. Iyo nnowilibihera ohara dholaga ndho nahapaddaga malagano ehu ni nahifunaga wihina dhithudha dheddege ninga nnafunelihu. Nerana eyo nnere okavihera wihina mmulogoni mukale murenddele.

10. Murumiwi Pawulo enre ddi wihina adhena murenddele mmulogoni?

¹⁰ Pawulo odhana murenddele mwaha asugwa dhikalelo dhapama dha addibila, ohiya nde dhaviriganihiwa. Motajhiha, omagomihedho wa karta alebeliiye akudda Roma, Pawulo ahawoga mandina addibila owinjhiva. Dila dhowinjhivadhene oliye owatamalela ni owawoga opama yanniwana. Iyo podi otajhiha ekalelo ela yapama ya murumiwi Pawulo wodhela watamalela addibila ni arogola. Wera ndo onere wakavihera addibila ammulogoni, okanna wandana woliba ni odhivelana mmodha ni mukwaye.

11. Nahiwananaga nnere ddi wihina ndhena murenddele mmulogoni?

¹¹ Malabo mmodha iyo podi ohiwananaga ni addibilihu ammulogo naarive egaali owithwelavo epaddi yomuzimuni. Siyeyo yapadduwile ni Pawulo ni mukwaye Bernabe. Athwaala abiili yahikangana vanlubale akala yere omwihisa Marku obe naari mulenddoni wemisiyonariyu yanniwana, aliwa ‘yahikangana vanlubale’ nuwindo aliwa widdana kadda muthu odhowaga winoniye. (Atos 15:37-39) Nuwindo Pawulo ni Bernabe, yahiveda makalelo owandana,mwaha mwa aliwa okanna murenddele ni wiwanana yaali ethu yathima mmulogoni. Murumiwi Pawulo ahiwoga opama wa Bernabe va karta na Marku. (1 Cor. 9:6; Col. 4:10) Ni iyowa nnohowela otxokotxela muladdu ninnihuna ni addibila ammulogoni ni wilibihera osugwa dhikalelo dhapama enniwana nerana ndo nnere odhana murenddele mmulogoni ni wiwanana.— Efé. 4:3.

MURUMIWI PAWULO AHILIBIHA NNROROMELO NADDIBILA

12. Makathamiho baani addibilihu enafwanyiwiwa?

¹² Iyo podi walibiha addibilihu ammulogoni wodhela wakavihera okanna nroromelo nooliba ni Yehova. Addibila amodha enoteyiwa ni amudhiwa ni akwiwa omabasani obe oskola. Amodhaya enofwanyiwa makathamiho oredda mwigumini mwewa, teto amodhaya enowarusa vanlubale walevelela ale yathegele. Addibila amodha ebanjhe omulabela Yehova kale mbwenye ejheheraga omakuthulo ofiya. Dhatedhene dhendha podi weha nroromelo nehu malabo yala nnakalihu. Mbwenye sapama onona wihina makiristawu akale yahifwanyiwa makathamiho mamodhave. Murumiwi Pawulo erile ddi wihina alibihe nroromelo naaddibila ala yaafwanyiwe makathamiho.

13. Nimakalelo baani murumiwi Pawulo andiliye wakavihera addibila yaharahariwa wodhela nroromelo newa?

¹³ Murumiwi Pawulo olabihedha dholebela wihina aalibihena nroromelo naaddibila. Motajhiha, podi wera maJudewu yaali makiristawu yowarusa vanlubale wawakula makoho owinjhiva yawerana amudhiwa yarumedha wihina okala muJudewu yaali ethu yathima okwaranya okala mukiristawu. Mbwenye karta murumiwi Pawulo alebeliiye akudda eberewu podi wera nahalibiha vanlubale addibila. (Heb. 1:5, 6; 2:2, 3; 9:24, 25) Aliwa yolabihera dhowakula dha murumiwi Pawulo wihina yawakulena amwiddani. Ni iyowa podi wera emodhave addibilihu amodha enoteyiwa mwaha wa nroromelo newa, mbwenye iyo podi wakavihera addibila ala wihina enone makalelo oowakula wodhela nroromelo newa. Akala mmulogoni mwawo ohukalamo muzombwe anaharahariwa wodhela orumedha wi dhithu dhere opaddusiwa, iyo podi omukavihera wodhela waja mmalivuruni mwehu dhowakula dhinawoga wodhela muselu yoyo. Ninga malivuru A vida Teve Um Criador? Obe A Origem Da Vida — Cinco Perguntas que Merecem Respostas.

14. Naarive murumiwi Pawulo agari oopinyaminyeyene ni mabasa olaleya ni osuziha, ethu baani eresiye?

¹⁴ Pawulo ahalibiha addibila ni arogola wodhela wawoniha odhivela anniyena ni ‘dhithu dhapama eriyena.’ (Heb. 10:24) Pawulo owakavihera addibila ni arogola ohiya ni madhuve mbwenye ni dhithu eriyena. Motajhiha addibila oJudeya nufwanyiwa dala, Pawulo ahakavihera addibila ale wodhela wagawela dhoojha ni dhithu dhimodha. (Atos 11:27-30) Naarive agali oopinyaminyeyene mwaha olaleya ni osuziha, murumiwi Pawulo oowaja makalelo owakavihera addibilale yathabwa ohowela nikavihero. (Gál. 2:10) Makalelo odhivela onihile murumiwi Pawulo, yahakavihera addibilale ororomela wihina Yehova erege wasamalela. Ni makalelo mamodhave, iyo nalabeheraga mudhidhi wehu kopolo dhehu ni enonelo yehu wihina nikavihere ni iyowa nnere olibiha nroromelo naaddibila ni naarogola. Iyo podi ovaha dhovelela dhehu wihina ekaviheriwena mabasa enapariwa elabo yatene. Nerana ndo, nnere wakavihera addibila ni arogola ororomela wihina Yehova anerege wasamalela alabwene.

15-16. Nnande addi wakavihera addibilihu ekwerebeyile epaddi yomuzimuni?

¹⁵ Murumiwi Pawulo kahiye wakavihera ale yakwerebeye epaddi yomuzimuni. Oliye owaweddela thagaraga ni owoga ni makalelo odhivela ni apama naliwa. (Heb. 6:9; 10:39) Motajhiha karta alebeliiye meberewu mburo dhiwinjhivva oliye avahaga dholaga owihelavo onihaga wihina ni oliyeya ohowela oparihedha mabasa nde awogiye. (Heb. 2:1, 3) Ninga murumiwi Pawulo iyo kannaselela wakavihera addibila ekwerebeyile epaddi yomuzimuni. Iyo nnowilibihera walibiha addibila ala nonihaga wihina onowapwatha ni makalelo yala nnowoniha wihina oomudhivela kadda ddibila. Sapama ohidduwala wihina owoga ni makalelo oopwaseya vamodha ni odhivela podi omulibiha ddibila mwamakalelo nahubuwelihu.

¹⁶ Murumiwi Pawulo aharoromeliha addibila wihina Yehova onosugwera dhithu dhapama nnerihuna. (Heb. 10:32-34) iyo podi omutajhiha oliye wodhela walibiha addibila ale ekwerebeyile epaddi yomuzimuni. Iyo podi omuloba wihina anaddelemo makalelo ahudheriye ebaribari ni owoga yopadduwa ya mwigumini mwaaye enoniha wihina Yehova omukavihera. Namala iyo podi omuroromeliha ddibilihu wihina Yehova kanddiwale odhivela amutonyihedhiye kale ni kanadha amusukuma. (Heb. 6:10; 13:6) Othapanya ni makalelo yayo enere wakavihera addibilihu omulabelagave Yehova nuroromeleya.

‘KAMOSELELE OLIBIHANA MMODHA NI MUKWAYE’

17. Dhithu baani nnahowelihu werana wihina nalibihe addibilihu?

¹⁷ Ninga muthu anamaga Nyumba mudhidhi waviraga oliye onolemelela pamadhene, ni iyowa podi osaddula makalelo ehu nnalibihihu addibila. Teto iyo podi wakavihera addibilihu okanna kopolo yaafwanyiwaga makathamiho wodhela wawaddela dhopadduwa dha mwigumini dhaathu amodha yandile wagonjhiha makathamiho. Iyo podi ohanyedha odhana murenddele nawogaga pama athu amodhaya ni nnowilibihera vanlubale odhana murenddele yakumelela makathamiho enathukulela omariha murenddele wa mmulogoni ni osayela makalelo okanna murenddele ni addibilihu nahiwananaga. Nathapanyaga ni addibilihu wodhela dholaga dha mBibiliyani dha thima nnowavaha nikavihero ni nnowalibiha addibilihu ekwerebeyile epaddi yomuzimuni teto nnowakavihera okanna nroromelo nooliba.

18. Kuselele wera ddi?

¹⁸ Addibilihu enamaga nyumba dhomwene boohagalala ni enodhiveliwana mabasa enapariwa. Iyowa nnodhiveliwa ni nnokala ohagalalene nalibihaga addibilihu ammulogoni, nyumba enamaga addibila kadhinadha dhikalawo ni mukalakala. Mbwenye iyo nalibihaga addibilihu nnere wafwanya mareeliho amukalakala. Bumwahaya ‘kaniselele olibihana mmodha ni mukwaye’. — 1 Tes. 5:11.