Gihawona athu ororomeleya ahagalalaga

Miyo obajha oteya — mwaha gubuwela wi mukwaaga ole kaanonne ethu wodhela muselu dha gereja. Vano miyo omukoha. “Muselu baani ononiwe wodhela Bibiliya?” Oliye osayela makalelo ohiya muselule nathapanyedhihu. Mbwenye, vasogolova oliye ogaddela wi amaye anamoona a Yehova; oliye ahihudhera dhithu dhowinjhiva ni amaye. Ohagalalene, miyo obajha wawerana makoho owinjhiva.

Emahiyu yele nahithapanya vanlubale. Mukwaaga ole ogaddela wi elabo ela, enasugweriwa ni Saddana. (João 14:30) Podi weera we, ohunona wodhela muselu yola. Mbwenye wa miyo, naali nlabo noobajha wiwa ni gahidhiveliwa ele giwalimi. Mwaha miyo gahudhere wi Mulugu oodhivela dinasugwera elabo ela. Mbwenye, miyo gowoona dhithu dhowinjhiva dhabure dhapadduwa. Bumwahaya, kagonelamo dhithudha. Nganna yaka 26 baahi, gahoona dhithu dhowinjhiva dhowopiha.

Apapa yaali apilotu yamweddiha aviyawu anyakoddo a Estadu Unidu. Bumwahaya, gahinona wi nlabo thi nlabo yeere okalawo koddo enlubale. Koddo yoviyatinami, ebanjhe ngali oskola gimweraga universidade elabo yoKaliforniya. Miyo vamodha ni akwaga oskola obajha omwera poropaganda, nuwindo asupayi yanna xamboko obajha onithamagiha. Vano iyo othawa nahonagawo mwaha wa mwiisi wa gás lakrimojeniyo yanivokedhiwa. Waali mudhidhi worusa ni wohikweya wiwelela. Mapolitiku owinjhiva yahipiwa, mbwenye naarive dhigaali ndo, athu kiyaselele omwera poropaganda. Teto, kadda muthu akanna monelo waye, bumwahaya kaviwananeya.

Yaka ya 1970, miyo wafwanya mabasa okosta yonorti murudda wo Alaska, mabasa ale yogivaha korowa dhowinjhivadhene. Vano miyo odhowa oLondres wihina gagule motaaga, ngagunle, miyo ohogolowa gahinonne gafunimi oyelawo. Nuuvira mweri miyo ofiya waFrika. Giviyajarigi miyo wanona athu owinjhiva yathawa mwaha wa makathamiho yafwanya.

Dhatedhene gonilimi ni gahudherimi mBibiliyani wi ohukalawo muzimu wabure onasugwera elabo, vano gowonelamo wi eyo yaali ebaribari. Mbwenye, gowikoha gegi: “Akala kahi Mulugu anasugwera elabo ki ali wuuvi?” Vano siyeyo gafunimi onona.

Nuuvira mweri dhowinjhivadhene miyo ofwanya yowakulaya. Egumi yaaga yaatene, gahaanona athu yonihile okala ororomeleya wa Mulugu ebaribari, naarive efwanyiwaga makathamiho ohiyana-iyana.

ILANDA OONORTI — “ELABO YA BOMBA NI BALA”

Gihogolowelaga oLondres, miyo wagumanana amaye mukwaaga ole, aliwa ogivaha Bibiliya. Vasogolova ngafile omistarda, ddibila dhaala ogoona gimwilerigi Bibiliya murampani. Vano oliye wivahedhela wihina agikavihere miyo omoonelamo Bibiliya. Nuwindo miyo odhowa oDublin, miyo ofwanya Beteli ya elabo yeele, miyo ovada musiwo wosogolo, Vano ddibila Arturi Matewuji okuma, waali mudhidhi yole gamononnimi Arturi. Oliye aali ddibila a thotho ni oxaga. Nuwindo, miyo omuloba wihina oliye agihudhihege, vano oliye obajha ogihudhiha.

Miyo obajha odhiveliwa nde gahudherimi, ofiyedha wawilerigi malivuru owinjhiva amunikuruni, teto ni Bibiliyaya goomwileri, dhatedhene dhogidhivela. Gakala mmutugumanoni gowawona ahima yawakulaga makoho aathu athotho yaweresiwana muwari mwa yakadhene. Ninga, ‘wikalele ddi goyi ni obure? Mulugu baani? ki enapadduwa ddi muthu akwa?’ Akwaga aatene, yaali anamoona a Yehova, mwaha kagamunonne muthu elabo yele. Aliwa yogikavihera omwaddamela Yehova ni okanna odhivela nuliye.

Miyo gibaddiziwe yaka ya 1972. Nuuvira yaka modha, miyo obajha olaba ninga piyonero ni gikaviheraga mulogo dhaala oNiyori, wo Irlanda oNorti. Miyo walugari nyumba dhaala murudda yole yaddamele va mwangoni. Dhahikalawo ng’ombe murudda yole gadhiveliwimi osugwa gahudhihaga athu amodha. Yakala ninga yopwasedha pamadhene yatakunaga, naarive yahigivaga dholaga, yogikavihera owomihedha makalelo aaga owoga naathu. Yaka ya 1974, Miyo othomiwa wihina gikale piyonero a vayeka vamodha ni ddibila Nigel Pitt, nahithabwa wandana vanlubale.

“Mwaha wohiwanana” woLanda oNorti, dhithudha kuheddaga pama. Bumudhidhi yoyo athu amodha ebanjhiwa withana elabo ya oLada oNorti, “elabo ya bomba ni baala.” Mwaha yali yokweya wawoona athu ewanaga, amodha yobeliwaga ni karo dhirumaga mwaha wa bomba. Muladduya wali wapolitiko, mbwenye anamasogolela gereja yovolowelavo. Anyakatolika ni apurustante yahinona wi anamoona a Yehova, kinivolosiha mpulitikani. Mwaha wa yeyo, nolaleya ni obareleya. Athu nalaleyihu yahinona mudhidhi ni murudda yapadduwe ethu-sithu. Bumwahaya, yahinathi opadduwa ethu-sithu aliwa yanaddela.

Mbwenye murudda dhimodha dhithudha dhorusa. Nlabo dhaala, miyo ni piyonero mmodha ithaniwa Denis Carrigan, nlaleyaga luwani dhaala wahile anamoona a Yehova, mbwenye nadhowilihu olaleyawo dila emodha. Muhiyana dhaala oninkedha wihina naali anyakoddo obritaniku. Podi weera mwaha kaavo wa iyo aanda owoga ni ekalelo ya Irladeji. Eyo yahinithukulela woova mwaha athu a murudda yole kiyafuna newene wandana ni anyakoddo, yovaga opiwa obe wobeliwa vanikutani. Niriidhiwaga wula nimujhehaga maxibombo yekihu, iyo woona karo yimelaga mburo muhiyana ole aaninkedhiye. Vano muhiyana ole, okumela ode obajha othapanya ni alobwana abiili yaali mukaroni mune antonyaga. Vano alobwana ale onaddamela ni karo yewa ni onikoha mudhidhi aafiye maxibombo. Vano maxibomboya nuufiya, aliwa odhowa owoga ni muliba amweddiha maxibombo, mbwenye iyo kaniwa dhithu dhawogiwa newene mmaxibombonimwa kamwali athu. Bumwahaya iyo nuubuwela wihina aliwa yeere wiwanana wi enipe. Mbwenye, yapadduwe kahi eyeno. Nuukita mmaxibomboni, miyo omukoha motoristaya gegi: “Alobwana ale yukohani ddi wodhela iyo?” Oliye wakula egi: “Miyo gihinona wi nyu muli anamoona a Yehova. Nuwindo miyo owoga gegi, kamuthuwathuwe muli obareleyene.”

Yaka ya 1976 vamusonkanonia oDublin, miyo omunona Pawulini lomaxi, piyonera dhaala adhela elabo ya Ingalatera. Oliye ali murogola owithwelavo epaddi yomuzimuni owiyeviha ni oodhivela. Oliye ni ddibile Ray, ebaliwe mwibaribarini. Nuuvira yaka modha miyo ni pawulini otelana, vano iyo odidelave wapara mabasa ehu opiyonero elobo ya Balimina, wo Irlanda oNorti.

Iyo olaba mudhidhi vang’no ninga anameeddela murudda naakaviheraga addibila ooBelifasti, oLondonderi ni murudda dhimodha dhowopiha. Iyo noolibihiwa ni addibila mwaha wawoona esukumaga dhilamalelo dha gereja. Ninga, wiliganiha ni wawidda amodha. Aliwa yahihiya dhatedhene dhendha wihina emulabele Yehova. Teto Yehova ahaabarela ni ahareeliha vanlubale!

Nihikala yaka kumi nikalaga woIrlanda. Vano yaka ya 1981, iyo withaniwa wihina namukursari Giliyadi turma 72. Nuumala okursari, iyo othomeliwa wihina nalabege oSerra Leyone elabo yo Afrika Osidentali.

SERRA LEYONE — NROROMELO NAARIVE NIGAHAWILE

Iyo nakala olari misiyonariyu naathu owakwana 11 yanna odhivela. Nalabihedhesa kuzinya emodha, kastibanyu tharu, torinera biili dhohabana, telefoni emodha, makina nimodha nofulana ni nimodha nowumihana. Ohikanna enerejiya yali ethu yokweya, teto eyo yopadduwa muhijhehedheya. Masilo yotorola nyumba teto nowa dhovolowa odispensa.

Naarive dhithudha dhaagali dhorusa, mabasa olaleya yanihagalasa. Athuya yomuriha Bibiliya ni yonivuruwana nupwaseya. Owinjhiva obajha omuhudhera Bibiliya ni orumedha ebaribari. Athu amurudda yole yagithanesa “Nabwiyaaga Robertu” Pawulini yamwithanesa “Musano Robertu”. Mbwenye vasogolova gohowela okala oBeteli mudhidhi wowinjhiva, mwaha wa yeyo, kagalaleyesa dila dhowinjhivadhene. Vano athu obajha omwithana Pawulini “Musano Pawulini”. Mbwenye miyo withaniwagana “Nabwiyaaga Pawulini” Pawulini ohagalala iwaga ndo!

Addibila owinjhiva yahihawa, mbwenye Yehova owavaha nde yahoweliwa. Malabo mamodha yapadduwa mwamakalelo nahajhehedhihu. (Mat. 6:33) Ginowubuwela nlabo nimodha, murogola dhaala anniyena korowa vang’ono wihina agulena yoojha yalabo nenne baahi. Vano oliye othukula korowa nde anniyena onvaha ddibila dhaala ali muredda wihina agulena murombwe dhamalariya. Labo nenne odha muhiyana dhaala nahamunonnihu onvaha korowa murogola ole wihina asasanyedhena nthithinaye. Iyo nowoona dhithu ninga dhendha dhipadduwaga dila dhowinjhivadhene.

NIGERIYA — NIHUDHERAGA MWEDDELO MUXA

Nahikala oSerra Leyone muwari mwa yaka 9, vano iyo otamiheliwa Beteli yoNigeriya. Vano, nakala Beteli enlubale, mabasaaga kiyahiyane ni ale gaaparimi oSerra Leyone. Mbwenye, mabasa a Pawulini yahisadduwa. Kale oliye ohowela wawakwaniha mawora 130 kadda mweri alabaga mmalaleyelo. Ahikanna anamahudhera owinjhiva yonnuwelavo epaddi yomuzimuni. Mbwenye vano, oliye aathomeliwe osona guwo. Wahivira mudhidhi wowinjhivene wihina alemelele mabasa ala. Yamukavihere fuunona wihina addibila yowavaha thima mabasa aapariye ni ahikanna gari yowalibiha aBetelita amodha. Wa iyo mweddelo woNigeriya waali muxa, bumwahaya, nohowela wilibihedha wihina nihudhere dhithu dhixa. Labo dhaala ddibila dhaala omudhana murogola okabilinyaniwaga ali muxa oBeteli wihina gimunone. Mudhidhi gimulojhelaga oliye okokora, miyo otikina vanlubale! Ni mmubuwelonimwaga odhamo dholebela biili: Atos 10:25, 26 ni Apocalipse 19:10. Vano miyo wubuwela ‘enohoweleya omwaddela wihina aherena ethu ninga yela?’ Teto, mudhidhi mmodhave miyo wubuwela, akala oliye ohurumedhiwa oBeteli, oliye ohunona ndhe Bibiliya anahudhihiye.

Miyo osegedheya ni kaganonne ethu gafunimi wera. Vano miyo odhowa osayela dholebela, nuumala, miyo wonelamo wihina murogola ole, agilojhenle ni makalelo yaale, mwaha waali mweddelo wa elabo yele. Teto, ni alobwanaya yahikanna elemelelo yokokorelana. Ale yaali makalelo ewa owoniha wihina yeera orihana. Dhilemelelo nde kadhavolowela muselu dha mBibiliyani. Teto dhihikalawo dhootajhiha dhinafwanyeya mBibiliyani. (1 Sam. 24:8) Gahihagalala wodhela ohiwoga ethu yamuthukulele murogola ole otakaleliwa. Nahaanona addibila owinjhiva oNigeriya, yonihile nroromelo neewa nooliba wa Yehova. Mmodha wa aliwa ali ddibila Izayiya Adagbona.b Oliye ahudhenre ebaribari agaali muzombwe, mbwenye vasogolova oliye okanna maranya. Mwaha wa yeyo oliye orumiwa wihina adhowe murudda wasamaleliwa aliba maranya. Ononiwe ninga mburo wa aliba maranya. Murudda yole namoona a Yehova ali oliye baahi, naarive eharahariwaga, oliye ahakavihera aliba maranya owakwana 30 ohudhera ebaribari ofiyedha ofugula mulogo oKoloniya.

KENIYA — ADDIBILA YOGITONYIHEDHA ODHIVELA

Yaka ya 1996, iyo otamihedhiwa Beteli yoKeniya. Ela yaali dila yoobajha miyo ohogolowela elabwaga, obajha mudhidhi gavenyilimiyo gahinakale namoona a Yehova. Iyo nakalesa oBeteli, ohiya athuve yadhelesa onaredhela yahikalawo amakako. Aliwa yodhiveliwesa walupela arogola yathukulesa maralanja ni mafwigi. Labo nimodha murogola dhaala ohiya janela naaye nokwartu nufuguwanene. Vano mudhidhi ahogolowaga, aafwanye amakako owinjhiva egaali okwartu waye, ejhaga dhithu dhaali wewule. Oliye okuwa ni okumela omusiwoni, teto ni amakakoya okuwa ni okumela vajanelani othawa.

Pawulini ni miyo nahidhowa okavihera mulogo dhaala wawoga eSuwayili. Nuuvira mudhidhi vag’ono, miyo othomiwa wihina geregena ohudhera wa Bibiliya wa mulogo. Miyo gawogesa eSuwayili ni mwanamwihima dhaala. Gowegeredha dhipaddidha nlabona nihinafiye wihina gande wawerana makohove. Mbwenye, ddibila enjhedhedha yowakulaya, miyo kagonelamo awogiye. Eyo yogithuwathuwiha ni gowaweddela thagaraga addibila ni arogola. Mbwenye, mudhidhi mmodhave gootikina mwaha ovilela ni odhivela yanniwana ni miyo.

ESTADU UNIDU — NROROMELO NAARIVE NIGARENLE

Iyo nihikala oKeniya muwari mwa yaka modha. Yaka ya 1997 iyo withaniwa wihina nakavihere Beteli ya Brooklin elabo ya oNova Yorki. Vano naali elabo athu owinjhiva yanniwana dhithu dhowinjhiva dhomwilini, eyo, yeere onitotela makathamiho. (Pro. 30:8, 9) Naarive dhigaali ndo, addibila a murudda yole bowithwelavo epaddi yomuzimuni. Addibila enolabihedha mudhidhi ni dhithu enniwana wihina yaakavihere mabasa enegeredhiwa ni nikuru na Yehova.

Muwari mwa yakadhene, nnowona makalelo addibila eliwa ororomeleya wa Yehova, naarive efwanyiwaga makathamiho ohiyana-iyana. O Irlanda nihoona nroromelo nooliba enna addibila naarive wahiwananeyaga, wAfrika nihoona nroromelo naaddibila naarive egaali ohawa ni wihandaneyaga, wEstadus Unidu nihoona nroromelo naaddibila naarive athuya ethuwathuwelaga dhithu dhomwilini. Mwebaribarene Yehova onoohagalala oonaga nlogo naaye, nonihaga okala ororomeleya naarive efwanyiwaga makathamiho!

Yaakadha — “dhivinre mowaguva ninga nthere nivokiwe.” (Jó 7:6) Vano nnalaba sedi enlubale ya Warwick elabo ya oNova Yorki. Teto nihikanna gari enlubale yolaba ni athu, enadhivelana mmodha ni mukwaye. Iyo nnohagalala vanlubale, wodhela werana nde nnandihu wihina nimukavihere mwenihu Yesu Kiristu. Mohilegela anaarelihe aatene alene enoniha okala ororomeleya wa Yehova. — Mat. 25:34.