Omutajhihe Yesu wodhela oviheyana mabasa oolaleya

1. Ddiniyani enahiyaniha nlogo na Yehova ni ale anawoga wihina makiristawu?

ETHU enahiyaniha nlogo na Yehova ni ale enawoga wihina makiristawu, sowihina nlogo na Yehova enoviheyana mabasa oolaleya.a (Tit. 2:14) Mbwenye malabo mamodha podi okala ethu yorusa okanna efunelo yodhowa mmalaleyelo. Podi wera onofwanyiwesa makathamiho mamodhave ninga a namaholela mulogo dhaala, anaviheyana mabasa oolaleya awogile eegi: “Nnofiya labo gihinakannimina efunelo yowapara mabasa oolaleya.”

2. Mwahaya bwaddi malabo mamodha iyo podi ohukanna efunelo yolaleya?

² Ohiya waparave mabasa oolaleya baahi, we podi okanna efunelo yowapara mabasa mamodha a munikuruni na Yehova. Mwahaya bwaddi malabo mamodha nigakanna efunelo ela? Kubuwela yotajhiha ela, namagaga ni nawomihedhaga Nyumba Yomwene, nnowakavihera addibilihu obe nnowalibiha. Naaparaga mabasa yaala, iyo nnowanda woona yokumelelavoya mowaguva, teto nnowonelamo wihina kanilabele ebewene. Ohiya eyo, naaparaga mabasa ala naaddibila nnohagalala vanlubale. Mwaha nnowoona murenddele ni odhivela enna addibila, teto nnowanda wonelamo wi mabasa nnaparihu enovahiwa thima. Mbwenye wodhela mabasa oolaleya, podi wera nihimala yakadhene nlaleyaga mburo mmodhave, mbwenye athu vang’ono baahi binanivuruwana. Teto malabo mamodha, athu amodha newene kinafuna onivuruwana. Iyo nihinona wihina kadda labo nnaddameligihu omakuthulo wa elabo ela, athu erege othabwa widda muthenga dhapama. (Mat. 10:22) Ki vano, enaanikavihere ddi wapara mabasa oolaleya nuuviheya obe wenjhedhedha oviheya wehu ni mabasa oolaleya?

3. Yolebela ya Lukaji 13:6-9 ananihudhiha di wodhela oviheya anna Yesu ni mabasa oolaleya?

³ Iyo podi okanna efunelo yowapara mabasa oolaleya nuuviheya wodhela ohudhera yotajhiha ya Yesu. Oliye oowaviheyana mabasa aye oolaleya, teto ahudhere oviheyana wula nuuvira mudhidhi. (Mmwileri Lukaji 13:6-9.) Va yoladdaniha dhaala awogiliye, Yesu ahaladdaniha mabasa oolaleya ni mulobwana dhaala anasamalela mundda wa nfigera. Mulobwana oyo amusorihile Yesu ahimala yaka 3 alimaga mundda wa nfigera, mbwenye kayakumile newene yowima modha. Ni makalelo mamodhave Yesu ahimala yaka tharu aalaleyaga maJudewu, mbwenye owinjhiva wa aliwa kiyarumedhile muthenga aalaleya Yesu. Teto ndala ninga mulobwana ole ahaselele mundda ole wa nfigera, Yesu kaselele wapara mabasa oolaleya. Ohiya eyo, oliye othoma wapara mabasa oolaleya nuviheya wihina aakavihere athu owinjhiva orumedha muthenga dhapama.

4. Dhithu baani 4 nnafunihu ohudhera ni yotajhiha ya Yesu?

⁴ Ohudhera wula, nnere woona nimakalelo baani Yesu andiliye wapara mabasa oolaleya nuviheya, thabwa-thabwa dhihalaga mweri 6 wihina ahogolowele odhulu. (Osugwe nota na estudu “Depois disso” va Lukaji 10:1.) Ohudhera ni otajhiha dhithu Yesu ahudhihiliye, winere onikavihera odidela wapara mabasa oolaleya nuuviheya. Bumwahaya kabeni noone dhithu nayi nnahudherihu ni yotajhiha ya Yesu: (1) Yesu aapwasendhe werana efunelo ya Yehova, (2) oliye ahinona dhovuhulela dha mBibiliyani, (3) oliye oororomela nikavihero na Yehova ni (4) oliye ahithoma ovilela, mwaha ahinona wihina athu amodha yeere onvuruwana.

YESU AAPWASEDHE WERANA EFUNELO YA YEHOVA

5. Ddiniyani enoniha wi Yesu ooviheyana mabasa oolaleya?

⁵ Yesu oolaleya nuviheya “muthenga Womwene,” mwaha ahinona wihina ele yaali efunelo ya Yehova. (Luk. 4:43) Mabasa oolaleya yaali athima mwigumi mwa Yesu. Bumwahaya naarive ahalaga neena nuupiwa, Yesu ahididela weedda “sidadi ni sidadi, murudda ni murudda” aalaleyaga athu muthenga dhapama. (Luk. 13:22) Yesu ahaxagiha anamahara aye wihina yaparege mabasa oolaleya nuviheya ndala ninga oliye. — Luk. 10:1.

6. Naarive naaparaga mabasa bi mabasa munikuruni mwa Yehova mutomaya buuvi? (Osugwe fotu.)

⁶ Peeno, mabasa oolaleya muthenga dhapama enodhowave ekalaga mabasa athima, teto Yehova ni Yesu enafuna wihina nididele wapara nuviheya. (Mat. 24:14; 28:19, 20) Ebaribariya sowihina mabasa bi mabasa nnaparihu munikuruni mwa Yehova mutomaya mmodhave, eli ovuwiha muthenga dhapama. Motajhiha, nnoomaga Nyumba Dhomwene wihina ale enna efunelo etugumanegemo wi emwebedhegemo Yehova. Ohiya eyo mabasa aatene enapariwa oBeteli, enapariwa wihina ekaviherena ovuwihiwa mabasa oolaleya. Teto mabasa ookavihera yapadduwa ngovi, kinapariwa wihina yakaviherana addibila epaddi yomwilini baahi, mbwenye wihina yakavihere addibila ohogolowela omwebedha Yehova, enovolowelavo wapara mabasa oolaleya. Vano nahidduwala wihina mabasa oolaleya bathima ni Yehova anafuna wi naaparege, nnere okanna efunelo yowapara mabasa oolaleya nuuviheya ni murima wehu waatene. Ddibila Yanos ali anamaholela mulogo dhaala anakala oHungriya anawoga eegi: “Miyo ginowilibihedha ohidduwala wi kaawo mabasa nnamparelihu Yehova wapitha mabasa oolaleya. Mwaha kaawo mabasa nihiyedhiwihu wihina napare okwaranya mabasa oolaleya muthenga dhapama.”

7. Mwahaya bwaddi Yehova agafuna wi nididele oolaleya? (1 Timotiyu 2:3, 4)

⁷ Iyo podi oviheyana mabasa oolaleya wodhela okanna moonelo mmodhave anna Yehova wodhela ohasakula athu. Mwaha Yehova anafuna wi athu owinjhiva evuruwane muthenga dhapama wi evuluwe. (Mmwileri 1 Timotiyu 2:3, 4.) Bumwahaya oliye anonikavihera owomihedha makalelo ehu oolaleya. Motajhiha, buruxura Wadhivela Athu — Onere wukavihera wahudhiha athu wi ekale anamahara, nnonikavihera woona makalelo owomihedha ekalelo yehu yolaleya wihina nifugule ohudhera. Naarive athuya yahimulabelaga Yehova, aliwa podi okanna ofuru yowiwa muthenga dhapama mahoso manlubale yahinathi wambela. Bumwahaya nalaleye ovanene, osogolo aliwa podi othoma omulabela Yehova. Mbwenye aliwa enande wawerana masadduwo ayo, nadidela olaleya nuuviheya.

YESU AHINONA DHOVUHULELA DHA MBIBILIYANI

8. Mwaha Yesu onona dhovuhulela, dhamukavihere aavi olabihedha pama mudhidhi waye?

⁸ Yesu ahinona makalelo dhovuhulela dhimodha dhafuniwa wakwanela. Motajhiha, oliye ahinona wihina eere wapara mabasa oolaleya muwari mwa yaka tharu ni meya. (Dan. 9:26, 27) Teto oliye ahinona makalelo ni mudhidhi afuniye opiwa. (Luk. 18:31-34) Bumwahaya oliye oolabihedha pama mudhidhi wihina aviheyena mabasa oolaleya waye, waali mutholo ahoweliye wakwanihedha.

9. Mwahaya bwaddi onona dhovuhulela winonithukulela olaleya muthenga dhapama nuviheya?

⁹ Onona ni wonelamo dhovuhulela dha mBibiliyani, winonthukulela olaleya nuviheya mwaha nihinona wi omakuthulo winere ofiya mohilegela. Malabo yaala nnakalihu, nnowoona dhovuhulela dha mBibiliya dhinawoga wodhela malabo okuthula dhakwanelaga, mwaha wa dhithu dhinapadduwa wapela elabo yaatene ni ekalelo enna athuya. Teto nnowoona ohiwanana olivo ni Potensiya Angulu Amerikana ni Rusiya ni anamakavihera aye. Aliwa enna wakwanihedha yovuhulela ya mBibiliyani enawoga wi mwene o suli ni mwene o norti yerege owana mmodha ni mukwaye “malabo ookuthula”. (Dan. 11:40) Ohiya eyo, nihonelamo wihina manyalo a ekwamuthu enasorihiwa va Daniel 2:43-45 enagiwana Potensiya Mundiyale Angulu Amerikana. Mwaha wa yeyo, nihikanna ebaribari wihina mohilegela, obe neere, ovanene, omwene wa Mulugu onere ogujhula onamathonga waatene wa athu. Mwebaribarene yovuhulela ela enonikavihera wonelamo mudhidhi nilihu ni wihina nnohowela olaleya muthenga dhapama nuviheya ni mowaguva.

10. Dhovuhulela dha mBibiliyani dhinakavihera aavi addibila odidela olaleya?

¹⁰ MBibiliya mwihikala muthenga wejhehedhelo nnahowelihu wawaddela athu amodha. Murogola dhaala anithaniwa Kariye anakala oRepublika Dominikana, onowoga eegi: “Gubuwela dhithu dhotikiniha Yehova anafuniye werana osogolo, ginakala ethakwithakwive wihina gawaddele athu amodha. Mwaha athu owinjhiva enofwanyiwa makathamiho oohiyana-iyana, bumwahaya aliwa enohowela onona dhithu Yehova anapaganyiye. Ohiya eyo, dhovuhulela dhinowoniha wi Yehova anna wakavihera mabasa oolaleya. Murogola anakala elabo yoHungriya, onowoga eegi: “Yolebela ya Isaías 11:6-9 enogubusedha wi muthu di muthu podi osaddula egumi yaye ni nnikavihero na Yehova, bumwahaya ginofuna waalaleya athu aatene ni aleya enakala ninga kinafuna onivuruwana. Teto ddibila Christoper anakala oZambiya anowoga eegi: “Yolebela ya Marku 13:10 enawoga wi muthenga dhapama dhere olaleyiwa wapela elabo yaatene. Wa miyo oneti munlubale okavihera wakwanihedha yovuhulela ela.” Ki we, yovuhulela baani enuthukulela odidela olaleya muthenga dhapama?

YESU OOROROMELA NIKAVIHERO NA YEHOVA

11. Mwahaya bwaddi Yesu ohowela omuroromela Yehova wihina adidele olaleye nuviheya? (Lukaji 12:49, 53)

¹¹ Yesu oororomela wi Yehova eere omukavihera odidela olaleya nuviheya. Naarive Yesu awogaga ni nriho muthenga dhapama ni asakulaga pamadhene madhu afuniye wawoga, oliye ahinona wihina athu amodha kiyafunege onvuruwana ni yerege ofuna omuharahara. (Mmwileri Lukaji 12:49, 53.) Mwaha Yesu odidela wapara mabasa oolaleya nuviheye, anamasogolela gereja, yahixixa dila dhowinjhivadhene ompa Yesu. (Juwa. 8:59; 10:31, 39) Naarive dhigaali ndo, Yesu ahididela oolaleya, mwaha ahinona wihina Yehova aali epaddi yaye. Bumwahaya Yesu adhe awogege eegi: “Kagili meeka, mbwenye Ababa egirumile eli ni miyo . . . Mwaha malabo amatene ginowerana ele enaahagalasa.” — Juwa. 8:16, 29.

12. Yesu axagihe aavi anamahara aye odidela olaleya naarive eharahariwaga?

¹² Yesu ahawubusedha anamahara aye wi yere ohowela ororomela nikavihero na Yehova. Teto Yesu ahapaganya dila dhowinjhiva dhene wihina Yehova eere wakavihera, naarive eharahariwaga. (Mat. 10:18-20; Luk. 12:11, 12) Voharela Yesu waloba wihina ekale oxaga. (Mat. 10:16; Luk. 10:3) Nuwindo oliye wakongomedha ohimuwaddihedha muthu orumedha muthenga dhapama. (Luk. 10:10, 11) Teto wawaddela wi yahoweleyaga aliwa podi othawa yaharahariwaga. (Mat. 10:23) Naarive Yesu amuroromelaga Yehova ni aaparaga mabasa oolaleya nuviheya, oliye osukuma dhithu dhahele egumi yaye vangovini. — Juwa. 11:53, 54.

13. Ddiniyani enuuvaha ebaribari wihina Yehova anere wusamalela walaleyaga?

¹³ Nihiyoya peeno nnohowela nikavihero na Yehova wihina nande wapara mabasa olaleya nuviheya naarive niharahariwaga. (Ovuhu. 12:17) Mwahaya bwaddi kunahowela wanganyedha wihina Yehova anere wukavihera? Mwaha wa nlobelo, Yesu eriliyena enafwanyeya va Juwawu kapitulu 17. Va yolebela ela, Yesu ahimuloba Yehova wihina asamalelege anamahara aye teto Yehova ahaakula nlobelo nna. Yolebela dha dhowera dhaarumiwi enowoniha makalelo Yehova aakaviheriye anamahara a Yesu olaleya nuviheya, naarive eharahariwaga. Teto nlobelo neena Yesu eriliyena, oliye ahimuloba Yehova wihina aasamalele aale yarumedhe muthenga dhapama dhalaleya anamahara a Yesu. Eyo enatapulela nlobelo na Yesu nnowupwatha ni weya! Bumwahaya Yehova anoodidela wakula nlobelo nne ofiyedha peeno. Okanne ebaribari wihina walaleyaga Yehova anere wukavihera, ndala ninga aakaviheriye anamahara aye.— Juwa. 17:11, 15, 20.

14. Naarive nikalaga mudhidhi worusa ddiniyani enaanikavihere olaleya nuviheya? (Osugwe fotu.)

¹⁴ Woona wihina omakuthulo onowaddamela, podi wera enere okala ethu yorusa olaleya muthenga dhapama nuviheya, mbwenye Yesu ohupaganya wihina anere onikavihera nahowelaga nikavihero. (Luk. 21:12-15) Ndala ninga erilena Yesu ni anamahara aye, nihiyoya nihiye wihina kadda muthu athome akala anere onivuruwana obe naari, mbwenye kanisayele okangana ni athuya. Naarive addibilihu enakala dhilabo dhinakoddihiwa mabasihu olaleya, aliwa enowanda olaleya muthenga dhapama mwaha enomuroromela Yehova ohiya kopolo dhewa. Ndala ninga Yehova aakaviheriye adharaaye akale, malabo yala a Peeno Yehova anonivaha kopolo wihina ‘napare mabasa olaleya,’ mowiwanana ni efunelo yaye. (2 Tim. 4:17) Bumwahaya, omuroromele Yehova wihina oliye anere wukavihera wi odidele olaleya muthenga dhapama nuviheya!

YESU AHIVILELA MWAHA AHINONA WI ATHU OWINJHIVA YEERE ONVURUWANA

15. Nnonne aavi wihina Yesu ahikanna monelo wapama wodhela mabasa oolaleya?

¹⁵ Yesu ahithoma ovilela wodhela odidela wapara mabasa olaleya. Teto eyo yahimukavihera oliye wilibihedha wihina erena ele andiye. Motajhiha, egavinre yaka modha Yesu alaleyaga muthenga dhapama, Oliye wonelamo wihina athu owinjhiva yahithoma orumedha muthenga dhapama. Mwaha wa yeyo Yesu ahifiyedha waliganiha athu ale ninga mundda oona dhoojha dhinahoweliwa ohaddiwa. (Juwa. 4:35) Bumwahaya vasogolova, oliye owoga ni anamaharaye eegi: “Mwebaribarene mabasa ala ohadda ehinjhiva, mbwenye anamalabaya kahiyo anene.” (Mat. 9:37, 38) Podi wera oliye asorihile madhu ala egavinre yaka modha, teto nuuvira mudhidhi oliye owoga ni anamaharaye eegi: “Bumwahaya mmulobe mwinnya amunddaya wihina aarume anamalaba amodha edhe ehaddege.” (Luk. 10:2) Yesu ahikanna ebaribari wihina athu yere orumedha muthenga dhapama. Teto oliye ohagalala vanlubale awonaga athu erumedhaga muthenga dhapama. — Luk. 10:21.

16. Dholaddaniha Yesu awogiliye, dhakavihere aavi anamaharaye okana monelo wapama wodhela mabasa olaleya? (Lukaji 13:18-21) (Osugwe fotu.)

¹⁶ Wihina Yesu akavihere anamahara aye oviheyana mabasa olaleya, Yesu wawonelihamo wi muthenga aliwa yalaleyiwa yere wadhana mareeliho owinjhiva. Motajhiha, kasugwa dholaddaniha biili oliye awogiliye. (Mmwileri Lukaji 13:18-21.) Va yoladdaniha modha, Yesu olabihedha thanga ya mostarida wihina ahudhihe anamahara aye makalelo muthenga dhapama dhafuniwa wenjhedhedha mwamakalelo ootikiniha teto kavo ahihe wenjhedhedheya wula. Teto va yoladdaniha emodha, Yesu olabihedha emela wihina oonihe makalelo muthenga dhapama dhafuniwa ovuwa ni osaddula egumi yaale yarumedhe muthenga ndha, naarive athuya elegelaga orumedha. Nimakalelo yala, Yesu wawonelihamo anamaharaye wihina muthenga dhapama dhere wakavihera athu owinjhiva.

17. Mwahaya bwaddi sapama odidela wapara mabasa olaleya?

¹⁷ Iyo nnokanna efunelo yodidela wapara mabasa olaleya nubuwelaga makalelo muthenga dhapama onakaviheriwa athu wapela elabo yatene. Yaka dhatedhene, athu enna efunelo enowoona muthupo wowubuwela okwa wa Yesu ni enothoma omuhudhera Bibiliya ni iyo. Ohiya eyo, matxikwi ni matxikwi athu enna obaddiziwa ni enothoma wariganela nihiyo mabasa olaleya. Ethu nnonihu sowihina Yehova anotugumana muthithi waathu, wihina yande ovuluwa mudhidhi wa mahoso manlubale. (Ovuhu. 7:9, 14) Yehova, ddimwinya a mundda, bumwahaya oliye ohunona wihina athu owinjhiva enere orumedha muthenga dhapama. Nimakalelo yala, nihikanna ethu enanithukulela odidela wapara mabasa olaleya!

18. Peeno athu yaanonaga naaparaga mabasa olaleya nnafuna aliwa enone ddi?

¹⁸ Ethu enathabwa wawoneyiha anamahara a Yesu fuuviheya aliwa enakanniwana mmabasani olaleya. Motajhiha, anamahara a Yesu yahilaleya nuuliba murima vamodha nuviheya ofiyedha athu owinjhiva “wonelamo wi Peduru ni Juwawu yaheedda ni Yesu”. (Dho. 4:13) Peeno, athu yaanonaga naaparaga mabasa olaleya, nnafuna wihina aliwa enone wi nnatajhiha oviheya anna Yesu wodhela wapara mabasa olaleya.