Wandane ni addibila vamodha ni arogola!

1-2. Ethu baani Yehova anathabwiye ovaha thima, ki ddiniyani oliye ananikongomedhiye werana?

WAHINONA wi ethu Yehova anathabwiye ovaha thima bi makalelo iyo nnaweddihihu athu amodha. Yesu ohunihudhiha wihina nnohowela wadhivela amwanddamani ehu, ndala ninga iyo nnidhivelihu. (Mat. 22:37-39) Eyo enovolowelavo waweddiha nuupama ale ehinamwebedha Yehova. Naweddihiga nuupama athu aatene, nnomutajhiha Mulugu ehu “mwaha oliye anowavaha nduwa athu apama ni athu abure ni anowavaha muzongwe athu owogowa naathu ohogowa.” — Mat. 5:45.

² Yehova anowadhivela athu aatene, mbwenye anathabwa waweddiha mwamakalelo avayekiwa ale enerana dhithu dhapama. (Juwa. 14:21) Oliye anafuna wi nimutajhihege. Bumwahaya oliye anonikongomedha eegi: ‘mudhivelanege pamadhene’ ni mukanne odhivela mmodha ni mukwaye, naaddibilihu vamodha naarogola mmulogoni. (1 Ped. 4:8; Rom. 12:10) Madhu ala enagiwana odhivela nnakanihuna ni muthu aveemudhini vehu obe mukwihu nnathabwihu omudhivela.

3. Odhivela oli ninga ddi?

³ Odhivela, oli ninga muthanko onahowela osamaleliwa wihina omele pama. Murumiwi Pawulo ahavaha yolaga makiristawu eegi: ‘Odhivela munninyuna ni addibila aatene odidele wenjhedhedheya.’ (Ebe. 13:1) Yehova anafuna wihina odhivela ninnihuna ni addibila odhowegeve othabwaga wenjhedhedheya. Ohudhera wula, nnere woona makalelo oolibiha wandana ninnihuna naaddibilihu, nimakalelo odidela oolibiha wandana ninnihuna naliwa.

MWAHAYA BWADDI NIGAHOWELA WAWADDAMELA ADDIBILIHU

4. Wihina nenjhedhedhe odhivela ninnihuna naaddibila, nnahowela nere ddi? (Salmo 133:1) (Osugwe fotu.)

⁴ Mmwileri Salmo 133:1. Iyo nnowarumedha madhu asorihile salmista dhaala enihina: ‘Sapama ni sohagalasa’ wandana ni ale enamulabela Yehova. Mbwenye nnohowela okala pasope, kamubuwele muthu anavira mudhidhi wamutene mburo wili muthanko munlubale ni wothabwa oriya, mbwenye mudhidhi waviraga oliye podi ohivahaga thima muthanko yole. Nimakalelo mamodhave, iyo nnojha mudhidhi wowinjhiva naaddibilihu kadda sumana. Mwaha wa yeyo, iyo podi wambela ohivaha thima wiwanana ninnihuna. Ddiniyani nnahowelihu werana wihina eyo yahipadduwe? Nnohowela wenjhedhedha odhivela ninnihuna naaddibila wodhela opatha mudhidhi wihina nubuwele makalelo aliwa eliwa athima mmulogoni ni mwigumini mwehu.

5. Ddiniyani enapadduwa athu yonaga odhivela ninnihuna mmodha ni mukwaye?

⁵ Athu owinjhiva enona mutugumano dhehu dila yobajha, enotikina yanonaga neddihagana nuudhivela mmodha ni mukwaye. Malabo mamodha ethu enathukulela orumedha wi nili makiristawu ebaribari, buudhivela nnonihihu mmodha ni mukwaye. Teto mwinnyene Yesu owoga eegi: “Mowindo, athu aatene enere onona wi muli anamahara aaga: mwadhivelanaga mmodha ni mukwaye.” (Juwa. 13:35) Kasugwa yopadduwa ya Chaithra, anamukosa fakuldadi, wula ahudheraga ni Anamoona a Yehova. Oliye omurumedha konviti Anamoona a Yehova wihina oone musonkano wamalabo mararu. Nlabo noobajha oliye ooniliye musonkano, oliye owoga ni namahudhiha aye eegi: “Makolo aaga kinagikubarelege. Mbwenye vamusonkanoni vala, gahikubareliwa dila 52 nlabo nimodha baahi! Miyo gihoona odhivela wa Yehova wodhela addibila, teto gihithoma okala epaddi ya emudhi ela.” Murogola Chaithra odidela wunnuwelavo epaddi yomuzimuni, vano yaka ya 2024 oliye obaddiziwa. Eyo enowoniha wi dila dhowinjhivadhene athu enna efunelo, yawonaga mabasa ehu ni makalelo nneddihihuna nuudhivela, eyo enowathukulela aliwa othoma omulabela Yehova. — Mat. 5:16.

6. Mwahaya bwaddi okanna wandana wooliba ni addibila winonibarela?

⁶ Okanna wandana woliba naaddibila vamodha naarogola podi onibarela. Murumiwi Pawulo ahavaha yolaga makiristawu eegi: ‘Mudidele olibihana mmodha ni mukwaye kadda labo, ofiyedha mudhidhi onithaniwa ‘peeno’ wihina newene mmodha wa nyu anaakanne murima wovanya wodhela olekethiwa ni kopolo ya yothega.’ (Ebe. 3:13) Malabo mamodha nnowukuwa ofiyedha wambela omusukuma Yehova vang’ono vang’ono. Mbwenye ddibila di ddibila podi woona eyo, teto Yehova podi omulabihedha ddibila oyo wihina anikavihere. (Sal. 73:2, 17, 23) Mwebaribarene makalelo ala ookavihera enoonilibiha.

7. Odhivela winanikavihera aavi okanna wiwanana? (Kolosense 3:13, 14)

⁷ Iyo nnokosa epaddi ya nlogo nnilibihedha woniha odhivela mmodha ni mukwaye, teto werana eyo enodhana mareeliho owinjhiva. (1 Juwa. 4:11) Motajhiha, odhivela winonikavihera “odhowagave nvilelanaga mmodha ni mukwaye,” teto eyo enodhana wiwanana ninnihuna naaddibilihu vamodha naarogola ammulogoni. (Mmwileri Kolosense 3:13, 14; Efe. 4:2-6) Odhivela ni murenddele ninnihuna nakala mmulogoni ethu yavayekiwa, mwaha kawo gereja obe nikuru nnafwanyeya velaboni yavati enna ekalelo ela.

MURIHEGENA MMODHA NI MUKWAYE

8. Wihina nikanne wiwanana naaddibila, Yehova ananikavihera aavi?

⁸ Wiwanana ninnihuna naaddibila wapela elabo yaatene, matikiniho a Yehova. Mwaha aatene kanilogomane. (1 Kor. 12:25) Bibiliya anawoga wihina iyo nnohudhera ‘ni mwinnyene Mulugu makalelo oodhivelana mmodha ni mukwaye.’ (1 Tes. 4:9) Obe nere mBibiliyani, Yehova anowoga ethu nnahowelihu werana wihina nlibihe wandana ninnihuna mmodha ni mukwaye. Mbwenye wihina ‘nihudhere ni mwinnyene Mulugu,’ nnohowela opwasedha ohudhera ndhe Yehova anawogiye ni wilibihedha oparihedha mabasa mwigumini mwehu. (Ebe. 4:12; Tiya. 1:25) Teto siyeyo Anamoona a Yehova enilibihedhiwa werana.

9. Ddiniyani enavolowelavo okala oobajha othithimihana mmodha ni mukwaye? (Romanu 12:9-13)

⁹ Bibiliya ananihudhiha aavi olibiha wandana ninnihuna mmodha ni mukwaye? Kasugwa yopadduwa ya murumiwi Pawulo enafwanyeya va Romanu 12:9-13. (Mmwileri.) Ethu yathima murumiwi Pawulo asorihiliye va yolebela ela, sowihina nnohowela okala “oobajha othithimihana mmodha ni mukwaye” Eyo enovolowelavo okala obajha wooniha “odhivela wavati vamurima mmodha ni mukwaye.” Obe neere, wonihana odhivela ni weddihana nuupama mmodha ni mukwaye. Iyo podi werana eyo mwamakalelo oohiyana-iyana wodhela okala muthu oolevelela, namakela aleddo ni okala muthu oovaha. (Efe. 4:32) Teto kanijhehege wihina addibila akale obajha onifiyedha, ohiya eyo, ononamo aavi “okala oobajha” olibiha wandana onniwena ni ddibila di ddibila. Ndala onere wonelamo wihina Yesu ahiwoga ebaribari, nuwoga eegi: “Ovaha winothabwa ohagalasa opitha ovahiwa.” — Dho. 20:35.

10. Nnande aavi wakavihera amodha mwamakalelo oviheya? (Osugwe fotu.)

¹⁰ Sotikiniha wonelamo wi murumiwi Pawulo nuwoga wodhela okala oobajha waariha athu amodha, oliye owogave eegi: “Mukale ooviheya.” Muthu ooviheya duule anaakwanihedha mutholo waaye. Mwaha oliye aakela mutholo bu mutholo, onowilibihedha wihina aakwanihedhe pamadhene mutholoya. Yolebela ya Provérbios 3:27 ni 28 enonikongomedha yeegi: ‘Kuhiye omwerela ethu yapama muthu anafwanelela omwerela opama, akala ohukanna oneeti womukavihera.’ Bumwahaya noonelamo wihina ohukalawo muthu anahowela nikavihero, nnomukavihera mowaguva. Kannahiye omukavihera muthu yoyo, nubuwelaga wihina nnere omukavihera mudhidhi mmodhaya obe muthu di muthu aneere omukavihera. — 1 Juwa. 3:17, 18.

11. Makalelo mamodha owaariha addibila baavi?

¹¹ Makalelo mamodha owariha addibilihu, fuudhela walevelela mowaguva yanithegela. Yolebela ya Efeziyu 4:26 enihina “kamuhiye nduwa omothelamo mugaali oonyanyuweene.” Mwahaya bwaddi walevelela addibilihu mowaguva ethu yathima? Mwaha ninga enawogela versu 27 eyo yeere onvaha “mburo Ddiyabo.” Teto iyo nihinona wihina mBibiliyani Yehova ononikongomedha walevelela athu amodha dila dhowinjhivadhene. Yolebela ya Kolosense 3:13 enawoga wihina nnohowela “odhowageve nivilelanaga mmodha ni mukwaye nilevelelanaga mmodha ni mukwaye mohihiyedhedha. Odduwala dhoviriganiha dha athu amodha, makalelo apama olibiha wandana ninnihuna ni aliwa. Neragana eyo, “nnokanna muzimu mmodhave ni wiwanana winadhana murenddele.” (Efe. 4:3) Mutomaya bowi, olevelela ethu yathima, teto ekalelo enahoweleya wihina nikanne wiwanana ni murenddele.

12. Yehova ananikavihera ni makalelo baani wihina nandege walevelela athu amodha?

¹² Ebaribari wihina kahi yokweya omulevelela muthu anitheegele. Mbwenye nnikavihero na muzimu wotxena, eyo enawandeya. Murumiwi Pawulo nowoga wihina nnohowela okanna “odhivela wavati vamurima mmodha ni mukwaye” ni “okala ooviheya,” oliye owogave eegi: “Mukanne muzimu woviheya.” Va versu ela madhu owi “oviheya” onodhana mubuwelo wowi odhaaleliwa, obe oviheya ni mabasa a muzimu wotxena. (Osugwe nota nohudherana na Romanu 12:11.) Eyo enatapulela wihina muzimu wa Mulugu podi onikavihera wawoniha addibilihu odhivela nuupama ni walevelela ni murima wehu waatene. Bumwahaya nnafuna nimpigiriyele Yehova nimulobaga wihina anikavihere woniha dhikalelo nda. — Luk. 11:13.

“KAMUGAWANYEYE MUKALELINYU”

13. Ethu baani yanthukulele ohiwanana naaddibila ammulogoni?

¹³ Munikuruni mwa Yehova munofwanyeyamo ‘athu [a mahimo] maatene,’ teto kadda muthu wa aliwa ahudhihiwe ni aleliwe mwamakalelo aayene. (1 Tim. 2:3, 4) Eyo enowoneleyamo mwaha malabo mamodha neragana dhothoma dha mwigumini mwehu dhinohiyana. Ninga motajhiha, neragana dhothoma dhehu wodhela makalelo ehu oowara ni owiwegeredha, nasakulaga dhithu dhowaredhana ni muselu woojha murombwe. Nahikala pasope ohiyana wula podi odhana ohiwanana mmulogoni. (Rom. 14:4; 1 Kor. 1:10) Mwaha Yehova ohunihudhiha wadhivela athu amodha. Bumwahaya nnohowela okala pasope wihina nahathukulele athu amodha wubuwela wi dhothoma dhehu sathima okwaranya dhaathu amodha. — Fil. 2:3.

14. Ddiniyani nnahowelihu wilibihedha werana, ki mwahaya bwaddi?

¹⁴ Iyo podi odhana wiwanana mmulogoni wodhela werana dhithu dhinahagalasa ni dhinaalibiha addibila. (1 Tes. 5:11) Sohagalasa onona wi addibila yaadduddumadhe ni yaakumihiwe mmulogoni, vano ehihogolowela otugumana. Teto iyo nnowawakela ni malada mamenli! (2 Kor. 2:8) Kasugwa ethu awogile murogola dhaala adduddumadhe muwari mwa yaka 10, mbwenye ahogolowele otugumana. Oliye anowoga eegi: “Addibila aatene vano enogilojhela ni enooteya ni miyo.” (Dho. 3:19) Dhikalelo ndha dhinakala ninga dhing’ono dhowalojhela ni oteya ni ale edduddumadhe epaddi yomuzimuni, dhimukavihere aavi murogola ola ohogolowela otugumana? Oliye anowogave eegi: “Enakala ninga Yehova digihogolosele dila yamurenddele.” Niilibihedha malabo amatene wi nalibihe amodha, Yesu podi onilabihedha wihina naatodole ale “epinyaminyeye ni mabasa ni enyemeliwe.” — Mat. 11:28, 29.

15. Ethu emodhaya enaanikavihere olibiha wiwanana ninnihuna naaddibilihu ddiniyani? (Osugwe fotu.)

¹⁵ Dhithu nnawogihu podi odhana wiwanana naaddibilihu mmulogoni. Yolebela ya Jó 12:11 enihina: ‘Mabaru kinalawiha ndhe enavuruwaniwa, ndala ninga nlumi nnalawihiwa yoojha?’ Namapiya apama onowabiha olawiha yojhaya wihina oone akala enodhiva ahinathi wavaha athu amodha, nimakalelo mamodhave nihinathi owoga ethu-sithu nnohowela wubuwela pamadhene. (Sal. 141:3) Teto nnafuna nikanne ebaribari wi ele nnafunihu owoga, enere wahagalasa ni walibiha “ale enaavuruwana.” — Efe. 4:29.

16. Baani enahowela okala pasope yawogaga?

¹⁶ Thabwathabwa ale etenle, ababi vamodha ni amaye, enohowela okala pasope ni ele enawogiwa. Mwaha aliwa enohowela owoga mwamakalelo enalibiha emudhi yewa. (Kol. 3:19, 21; Titu. 2:4) Teto anamaholela mulogo enna mutholo owasamalela mambila a Mulugu, enohowela owoga dhithu dhinahagalasa ni dhinaatodola mambilaya. (Isa. 32:1, 2; Gal. 6:1) Nnafuna nilibihedhe wi nahaduwale madhu enafwanyeya va Provérbios 15:23 enihina: ‘Sapama owoga mudhidhi wofwanelela!’

NIDHIVELANEGE “NI DHOWERA DHEHU NI EBARIBARI”

17. Wihina nadhivelege addibila ni arogola ni murima wehu wamutene nnahowela nere ddi?

¹⁷ Murumiwi Juwawu anonikongomedha wi “kanadhivelege athu amodha ni madhu obe ni nlumive baahi, mbwenye ni dhowera dhehu ni ebaribari.” (1 Juwa. 3:18) Nnafuna nadhivelege addibila ni arogola ni murima wehu wamutene. Nnande aavi werana eyo? Najhaga mudhidhi wowinjhivene naaddibilihu, nnerege othabwa wandana naliwa. Teto odhivela ninnihuna mmodha ni mukwaye onerege wenjhedhedheya. Bumwahaya nsayelege mudhidhi wihina nikalege vamodha ni addibila. Motajhiha, iyo podi werana eyo nakala mmutugumanoni obe mabasa olaleya. Teto nipathege mudhidhi wihina nawaredhelege addibilihu. Neragana ndo, nnowooniha pamadhene wihina ‘nnohudhihiwa ni mwinnyene Mulugu.’ (1 Tes. 4:9) Ohiya eyo nnere wonelamo pamadhene wihina ‘Sapama ni sohagalasa addibila okala vamodha owiwananeene!’ — Sal. 133:1.