Egumihu yaatene niihudhera ni Namahudhiha ehu Munlubale

YOTAJHIHA YA MAKOLO AAGA

Omakuthulo wa yaka ya 1950, makolo aaga otama wItaliya odhowa oKanada waali luwani dhaala yithaniwa Kindersleyi, provinsiya ya Saskatxewan. Voharela aliwa ohudhera ebaribari ni okala yotajhiha yapama mwigumi mwehu. Ginowubuwela wi ngaali mwaana, miyo gomalesa nlabo nantero nigaali mmabasani oolaleya ni emudhi yaaga. Malabo mamodha, ginowogesa wi gibanjhe olaba ninga “piyonero ookavihera” nganna yaka 8!

Makolo aaga yaali oohawa, naarive dhigaali ndo, aliwa yahimparela Yehova mabasa ohiyana-iyana ni yahigihiyedha yotajhiha yapama. Motajhiha yaka ya 1963, aliwa oguliha dhithu dhohiyana-iyana wihina ekanne korowa dhowinjhiva wi yoone musonkano wereya Kaliforniya provinsiya yoPasedoniya elabo ya Estadu Unidu. Vasogolova yaka ya 1972, iyo otamela sidadi ya Trayili provinsiya yoKolombiya Britanika oKanada. Luwani ela yalapele makilometuru 1000 ni mburo nakalihuwo. Efunelo yehu yaali wakavihera athu a luwani yeele yawoga etaliyano. Apapa yaaparesa mabasa oxela ni owomihedha merkadu dhaala. Dila dhowinjhivadhene aliwa yokoodda ovahiwa kargu, mwaha yafuna yapwasedhe mabasa oomuzimuni.

Ginotamalela vanlubale yotajhiha apapa egihiyedhiwa miyo vamodha ni addibilaga. Apapa yahigixagiha mmabasani a Yehova ni yahigihudhiha dhithu dhathima dhigikavihere egumi yaaga yaatene, eli opweha Omwene mburo wobajha ni ohiya wihina Yehova agisamalele. — Mat. 6:33.

WAVOLOWELA MABASA A MUDHIDHI WAAMUTENE

Yaka ya 1980, miyo omutela Debbi, murogola dhaala oriya athabwa wathuwathuwela mabasa a Yehova. Iyo nofuna wavolowela mabasa a mudhidhi waamutene. Bumwahaya nuuvira yaka tharu, Debbi wambela wapara mabasa a opiyonero. Teto nuuvira yaka modha, iyo otamela mulogo dhaala wahowela nikavihero. Nuwindo miyo wambela wapara mabasa opiyonero.

Nuuvira mudhidhi, iyo oyelela ohagalala nannihuna mmabasani naaparihu, mwaha wa yeyo, iyo wambela wubuwela ohogolowela vaade! Mbwenye nihinathi ohogolowela vaade, iyo othapanya ni anameeddela mulogo dhaala. Nuudhivela nameeddela mulogo ole onaddela ebaribariya eegi: “Muladduya oli ni nyu, mwaha munathabwa opwasedha osugwa makathamiho enufwanyani, mbwenye mwapwasedha osugwa dhithu dhapama dhinuhagalasani mmabasani mweenyu munere ofwanya.” Ele yaali yolaga nahowelihu wiwa mudhidhi yoole. (Sal. 141:5) Iyo osaddula monelo wehu mowaguva ni wonelamo wi dhahikalawo dhithu dhowinjhiva dhohagalasa. Mulogo nakaviherihu yahikalawo addibila owinjhiva yafuna wawenjhedhedha mabasa yampareliwa Yehova. Teto addibila ayo yovolowelavo ahima ni arogola yanna amamuniwa yahali Anamoona a Yehova. Iyo nahihudhera ethu yathima ni yopadduwa ela, nahihudhera osugwa dhithudha mwamakalelo apama ni ororomela wi Yehova eere owomihedha dhithu dhanikathamiha. (Miq. 7:7) Iyo ohogolowela okanna ohagalala mmabasani mwehu, teto dhithudha owomela.

Anamahudhiha a eskola yobajha nahudhenrihu ya apiyonero, yahikavihera dhilabo dhimodha. Aliwa onooniha fotu ni onaddela mareeliho ni makathamiho yaafwannye mmabasani mwewa. Eyo yahinikavihera okanna ethakwithakwi yolaba ninga amisiyonariyu, nuwindo iyo okanna yoluba ela.

Wihina nakwanihedhe yoluba ela yolaba ninga amisiyonariyu, yaka ya 1984, iyo otamela provinsiya yoKebeki, winawogiwa Efranseji. Provinsiya ela elapele makilometuru okwaranya 4000 ni oKolombiya Britaniku. Okebeki nohowela wisaddula wi nilemelele elemelelo ya elabo yeele ni ohudhera ewogelo exa. Makathamiho mamodha yanifwanya sowihina kananna korowa dhowinjhiva. Wahifiya mudhidhi, yojha najhihu dhaali kokombwa dha bambaya amuhiya namalima dhaala amala omutiba bambayaya. Mwaadhaga Debbi ahinona opiya pama, bumwahaya osasanya yojha yodhiva ni bambaya ole. Naarive nifwanyiwaga makathamiho owinjhiva nahididela ovilela nuuhagalala. Teto yathimaya, nowanda woona makalelo Yehova anisamaleliye. — Sal. 64:10.

Nlabo dhaala nahakela xamada nahajhehedhihu, neere withaniwa wihina nakavihere oBeteli yoKanada. Iyo nahihagalala vanlubale, mbwenye mudhidhi mmodhave kananonne yoweraya, mwaha nahimala oleba petisawu wihina nakursari eskola ya Jileyadi. Mbwenye iyo othoma omurumedha konviti ole. Nuufiya oBeteli iyo omukoha ddibila Kenneti Liro anakosa epaddi ya komisawu ya oFiliyale neegi: “Ki nithaniwa wihina nakursari eskola ya Jileyadi?” Oliyeya onaakula eegi: “Kamuthuwathuwe, eyo yapadduwa nnere osayela makalelo owerana ethu-sithu.”

Nuuvira sumana miyo ni mwaadhaga withaniwa wihina nakursari eskola ya Jileyadi. Mwaha wa yeyo nohowela osakula ethu emodha. Vano ddibila Kenneti wera: “Naarive osakule yothoma modha ebaribariya sowihina malabo mamodha onerege wubuwela yothoma emodhaya. Ebaribariya sowihina dhothoma dhaatedhene dhapama, teto Yehova podi oreeliha dhothoma dhaatedhene. Nuwindo, iyo omurumedha konviti odhowa okursari eskola ya Jileyadi. Mbwenye nuuvira mudhidhi iyo wonelamo wi ddibila Kenneti awoga ebaribari. Teto nahakavihera addibila amodha wodhela wavaha yolaga emodhave, mwaha okanna dhothoma biili.

NILABAGA NINGA AMISIYONARIYU

Nahikanna ofuru wokala vaari va anamahudhera 24 ya turma 83 ya Jileyadi. Eskola ela yeriwena mweri wa Abril yaka ya 1987 oBrokili elabo yoNova Yorki. Ddibila Ulysses Glass ni Jack Redford yaali anamahudhiha yathabwa onihudhiha. Bumwahaya mweri ndhe mitanu dhaavinre mowaguva. Vano iyo omariha ohudhera nlabo na 6 mweri wa Setembro a yaka 1987. Vano iyo othomeliwa o Ayiti ni ddibila Jhon ni mwadhiye Mariya Goode.

Okuma yaka ya 1962 yaali yahinathi othomeliwawo amisiyonariya elabo yeele. Mwaha ddibila dhaala aathomeliwe elabo yeele ninga misiyonariyu eere othamagihiwawo. Nufiya elabo yeele, iyo wambela wapara mabasa oomisiyonariyu. Mulogo nakaviherihu yanna anamalaleya owakwana 35, teto mulogoya wakala murudda wakala mwango dhowinjhiva. Iyo naali azombwe ni naali nihinathi walemelela mabasa ale oomisiyonariyu. Ohiya eyo nakala yekihu vaade vakalesa amisiyonariyu. Athu a murudda yoole yaali ohawa teto kiyanonne wileri. Mudhidhi nigaali o Ayiti nahifwanyiwa makathamiho ninga koddo, ngovi ni manifestasawu.

Naarive nifwanyiwaga makathamiho ala, nahihudhera vanlubale ni ovilela ni ohagalala wa addibila. Owinjhiva wa aliwa yofwanyiwa makathamiho, mbwenye yomudhivela Yehova ni mabasa oolaleya. Ginomubuwela murogola dhaala owunnuwelavo ahannonne wileri, mbwenye oliye owubuwela dholebela dhowakwana 150. Teto makathamiho a elabo yeele, yahinithukulela odidela olaleya muthenga wOmwene ninga ethu yamarihe makathamiho maatene. Iyo nahihagalala vanlubale mwaha onona wihina anamahudhera ehu yahithoma okala apiyonero a mudhidhi wamutene apiyonero a vayeka ni anamaholela mulogo.

Ohayiti gahimunona muzombwe dhaala ithaniwa Trevor aali misiyonariyu a gereja dhaala. Iyo nothapanyesa nuliye wodhela muselu dha mBibiliyani, ethu yagitikinihe sowihina nuuvira yaka, miyo wakela karta naaye nawoga neegi: “Miyo ginere obaddiziwa musonkano onaharela. Ginafuna gihogolowele o Ayiti ni gilabege ninga piyonero a vayeka murudda mmodhave galabimi ninga misiyonariyu a egereja ya Mormon.” Teto siyeyo oliye eriliye muwari mwa yaka dhowinjhiva ni mwariye.

EWUROPA NUWINDO AFIRIKA

Dhilabo dhimodha dho Ewuropa, vano mabasa ehu oolaleya kayathabwa okoddihiwawo, bumwahaya iyo othomeliwa dhilabo dhendho. Yaka ya 1992, iyo ofiya o Liwubliyana, o Esloveniya, murudda dhaala wakala waddamela mburo wunnuwile makolo aaga yahinathi otamela ohItaliya. Yugoslaviya wanna owaniwa koddo. Beteli yo Awustriya, oViyena, Krowasiya, oZagrebi ni yoServiya, oBelgrado, yowakavihera mabasa oolaleya a elabo yele. Mbwenye vano kadda elabo yere okanna Beteli yeweene.

Okala o Esloveniya yatapulela ohudhera ewogelo exa ni dhilemelelo dhixa. Athu amurudda yole yawoga yegi, “Ježik je težik,” enatapulela: “Ewogelo ela soorusa vanlubale.” Eyo ebaribari! Nahitikina vanlubale nuwawona addibila erumedhaga mowaguva masadduwo yeriwana munikuruni mwa Yehova, teto nahawona mareeliho a Yehova. Nahoona dila yanabili wi Yehova anowomihedha dhithudha nuudhivela ni mudhidhi wofwanelela. Dhithu dhowinjhiva nahudherihu nimulabelaga Yehova dhahinikavihera ovilela mudhidhi nigaali o Esloveniya. Teto nahihudhera dhithu dhimodha dhixa. Masadduwo ala kiyagomele vevala.

Yaka ya 2000, iyo othomiwa wihina ndhowe oKosta yo Marfim, enafwanyeya elabo yo Afirika Osidentale. Teto mweri wa novembro yaka ya 2002, mwaha wa koddo yafwanyeya elabo yele iyo othawela elabo yo Sera Leyowa. Elabo yele nathawenlihu wahikala murenddele mwaha koddo ya yaka 11 yahimala. Kiyaali yokweya okuma oKosta yo Marfim mowaguva. Mbwenye dhithu nahudherihu dhihinikavihera okanna ohagalala.

Athu yakala oSera Leyowa, yofuna ohudhera ebaribari. Addibila a elabo yele yaali oodhivela, mwaha yahivilela muwari mwa yaka dhowinjhivadhene. Bumwahaya, iyo othoma watajhiha. Naarive addibila a elabo yele egaali oohawa, aliwa yofuna ogaana dhithu yanniwana. Murogola dhaala onvaha mwadhaga dhowara. Mwadhaga Debbi kafuna orumedha, mbwenye murogola ole omuwaddihedha eegi: “Mudhidhi wa koddo addibila a dhilabo dhimodha yahinikavihera, mbwenye ola mudhidhi wowerana emodhave.” Miyo ni Debbi othoma watajhiha addibila ale ooSera Leyowa.

Nuuvira mudhidhi iyo ohogolowela oKosta yo Marfim, mbwenye dhithudha ohogolowela orusa. Vano mweri wa novembro yaka ya 2004, iyo othawa dila ya nabiili. Iyo omugwela elikopetero anihiyile mburo winakala anyakoddo, teto nathukunle mala ya nyemela kilu 10 ni naagonne vati. Nlabo noharela iyo omugwela aviyawu adhowa o Suwisa. Nafiyile oBeteli vaari va mahiyu. Mbwenye addibila enalaba Komisawu yo Filiyale ni anamahudhiha a Escola de Treinamento Ministerial vamodha naamwariwa, yahinakela nuudhivela. Aliwa onabarasari, onivaha yojha ni axokolati oSuwisa. Iyo nahihagalala vanlubale.

Iyo nahididelave okavihera oGana muwari mwamudhidhi vang’ono. Nuwindo iyo ohogolowela oKosta yo Marfim, dhithudha nuwomela vango’no. Opama wa addibila wahinikavihera owanana mudhidhi ole worusa ni masadduwo yanifwannye. Wonihana odhivela ethu enapadduwa munikuruni mwa Yehova. Mbwenye eyo kiyanihihile ovaha thima dhithu yanerele addibila. Nuuvira mudhidhi iyo wonelamo wi mudhidhi ole worusa yaali ethu yanixagihile vanlubale.

ORIYENTI MEDIYU

Yaka ya 2006, iyo wakela karta nadhela o sede mundiyale nawoga wihina nnere wakela mutholo muxa. Mbwenye olenddo ola, naadhowe Oriyenti Mediyu. Dila yanabiili nahifwanyiwa makathamiho teto nohowela ohudhera ewogelo exa ni dhilemelelo dhixa. Nahinona wi neere ohudhera dhithu dhowinjhiva naarive wigaali makathamiho ni muselu dha pulitika ni dha gereja. Yaali yootikiniha wawoona addibila ewogaga dhiwogelo dhohiyana-iyana. Teto nowanda woona wi naarive addibila eganna dhilemelelo dhohiyana ni dha addibila amodha, aliwa yaali owiwanana mwaha yohara dhoholela dha nikuru na Yehova. Iyo nowatikina vanlubale addibila mwaha aliwa yaali ooliba murima ni yowanda owanana oharahariwa wa emudhi yewa, amwanddamani, akwiwa ooskola ni oomabasani wewa.

Yaka ya 2012, iyo odhowa woona musonkano wavayeka oTel-Aviv, Wizarayeli. Ola waali musonkano woobajha weriwena murudda yole okuma Pentekoste a 33. Iyo kannadha nidduwalaga musonkano ole!

Mudhidhi naaparihu mabasa oolaleya, naharedhela elabo dhaala wakoddihiwa mabasa ehu oolaleya. Nidhowaga murudda yole nahathukula malivuru ehu, nahakavihera mabasa oolaleya ni nahoona musonkano wa nlabo nimodha. Mburo dhaatedhene nowawoona anyakoddo yathukunle futhi dhewa. Mbwenye woona wihina naali vamodha naaddibila a murudda yole, naali oobareleyene.

NIHOGOLOWELAGA WAFIRIKA

Yaka ya 2013, iyo wakela mutholo wohiyana. Iyo othomiwa wihina nlabege ofiliyale yoKinxasa, oKongo, elabo dhaala yoriya vanlubale. Mbwenye muwari mwa yakadhene elabo ele yahifwanyiwa ohawa ni koddo. Omambelelowene iyo nubuwela neegi: “Iyo nihinona WAfrika, bumwahaya winere onikweyela.” Mbwenye ebaribariya sowihina nahihudhera dhithu dhohiyana-iyana nuufiya elabo yele, thabwa-thabwa mudhidhi needdaga olenddo, mwaha arampaya ni pontidha kadhaali pama. Teto nahoona dhithu dhowinjhiva dhapama. Motajhiha, addibila yahivilela nuuhagalala naarive efwanyiwaga makathamiho, teto yowadhivela mabasa oolaleya ni yowilibihedha wihina yoone mutugumano ni musonkano. Nahawoona mabasa yenjhedhedheyaga mwaha wa nikavihero ni mareeliho a Yehova. Mabasa naaparilihu oKongo yahinikavihera vanlubale ni nahandana ni addibila owinjhiva ofiyedha okala ninga amudhihu.

Omakuthulo wa yaka ya 2017, iyo wakela mutholo muxa Wafirika du Sul, ela yaali filiyale enlubale naalabilihu. Teto mutholo naakenlihu dhaali dhixa. Bumwahaya dhahikalawo dhithu dhimodha nahowelihu ohudhera. Mbwenye dhithu naahudherihu yaka dha mundduli dhahinikavihera vanlubale. Okuma mudhidhi nifiyilihu Wafirika du Sul, nnodhiveliwa vanlubale wanona addibila enilibihedha omparela mabasa Yehova nuuvilela. Sotikiniha woona emudhi yoBeteli elabaga nuwiwanana naarive edhelaga mburo dhohiyana-iyana ni eganna dhilemelelo dhohiyana. Adhaari a Yehova enowilibihedha wihina ekanne emuthu exa ni eparihedhe mabasa malagano a mBibiliyani. Mareeliho enakumelelavo, sowihina Yehova onoonivaha murenddele.

Muwari mwa yaka ndha, miyo ni Debbi nihaakela mutholo dhotikiniha, teto nowilibihedha wihina nihudhere dhiwogelo ni dhilemelelo dhixa. Kayaali ethu yookweya. Mbwenye nowoona odhivela ohunamala wa Yehova mwaha wa nikuru naaye ni addibila. (Sal. 144:2) Teto nihikanna ebaribari wi waapara mabasa a mudhidhi waamutene, wihinikavihera okala adhaari apama vamentoni va Yehova.

Ginowatamalela vanlubale makolo aaga mwaha wa dhithu dhaatedhene egihudhihiliwa. Teto ginomutamalela mwaadhaga Debbi, mwaha ogikavihera. Ginowatamalela addibila a elabo yaatene mwaha gihudhera dhithu dhowinjhiva ni dhotajhiha dhewa dhapama. Vano nihithoma wihina ndhowegeve nihudhihiwaga ni Yehova ali Namahudhiha Munlubale.