We podi ohudhera ni dhohudhiha dhokweya dha mBibiliyani?

1. Nimakalelo baani dhohudhiha dha mBibiliyani dhisaddunliwa egumi yawo?

DHOHUDHIHA dhokweya dha mBibiliyani, dhihisaddula egumawo. Motajhiha, nuuhudhera wi ndina na Mulugu di Yehova, we othoma wandana nuliye. (Isa. 42:8) Teto nuuhudhera ethu enapadduwa muthu akwa, we ohiya wikoha akala amudhawo ekwile enowoona goyi. (Ecl. 9:10) Ohiya eyo, nuuhudhera wihina elabo enere okala Parayizu, vano uhiya othuwathuwa wodhela dhithu dhinaapadduwe osogolo ni ohukanna ebaribari wi nlabo nimodha onerege okalawo mwilaboni yeela ohiya yaka 70 obe 80, mbwenye ni mukalakala. — Sal. 37:29; 90:10.

2. Mwahaya bwaddi nigawogaga wihina makiristawu owithwelavo epaddi yomuzimuni podi opurelamo dhohudhiha dhokweya dha mBibiliyani? (2 Peduru 1:12, 13)

² Nivanove iyo nnopurelamo vanlubale dhohudhiha dhokweya dha mBibiliyani. Madhu enafwanyeya va 2 Peduru 1:12, 13, murumiwi Pawulo aalebenle makiristawu ‘yaali oolibeene mwibaribarini,’ obe neere yaali owithwelavo epaddi yomuzimuni. (Mmwileri.) Mbwenye mudhidhi yole, anamahudhiha owoota ni athu abure yanna waleketha makiristawu eebaribari. (2 Ped. 2:1-3) Efunelo ya murumiwi Peduru yaali olibiha nroromelo na makiristawu ale wihina yande ogonjhiha dhohudhiha dhowoota. Bumwahaya oliye wawubusedha dhithu yahudheriwa. Dhohudhiha ndhe, dhere wakavihera makiristawu aale okalave oororomeleya wa Yehova ofiyedha omakuthulo.

3. Yoladdaniha baani enanikavihera wonelamo wi dhohudhiha dhokweya dha mBibiliyani podi wakavihera makiristawu owithwelavo?

³ Naarive nigaali mwibaribarini muwari mwa yaka dhowinjhivadhene, iyo podi ohudhera dhithu dhixa ni dhohudhiha dhokweya dhinafwanyeya mBibiliyani. Kubuwela yotajhiha ela, namapiya apama ni muthu anahudhera opiya podi olabihedha ingrediyenti dhimodhave wihina epiye yoojha. Mbwenye namapiya ole apama podi olabihedha dhingrediyenti dhokweya wihina apiye yoojha yothabwa odhiva yohiyana ni ole anahudhera opiya. Nimakalelo mamodhave, addibila enamulabela Yehova muwari mwa yakadhene ni ale yambele omulabela muwari mwa yaka vang’ono, ehudhere dhohudhiha dhimodhave dhokweya dhinafwanyeya mBibiliyani. Mbwenye aliwa podi olabihedhaga dhohudhiha ndha, mwamakalelo oohiyana. Mwaha okuma mudhidhi nibaddiziwihu ofiyedha peeno, podi wera nahifwanyiwa makathamiho oohiyana-iyana, teto nihakela mutholo dhohiyana-iyana. Mbwenye opendda dhohudhiha nihudherihu kale, podi onikavihera woona makalelo ooparihedha mabasa mwigumini mwehu malabo yala a peeno. Bumwahaya nnere ohudhera dhohudhiha tharu dhokweya dhinafwanyeya mBibiliyani ni dhithu makiristawu owithwelavo epaddi yomuzimuni enahudheriwa ni dhithu ndha.

YEHOVA MPADDUSI

4. Onona wi Yehova mpaddusi yukavihere aavi mwigumini mwawo?

⁴ Iyo nihinona wihina elabo ni dhithu dhilimo dhipaddusiwe ni muthu akopolo ni a thotho. Bibiliya anihina: “Dhithu dhaatedhene, dhipaddusiwe ni Mulugu.” (Ebe. 3:4) Mbwenye iyo podi ohudhera dhithu dhowinjhiva ni ebaribari ela yookweya. Mwaha Yehova okala mpaddusi, oliye ohunona dhithu dhaatedhene wodhela iyo. Ohiya eyo, oliye ononithuwathuwela ni ohunona ele eli yapama wahiyo. Bumwahaya, onona wi Yehova Mpaddusi wihisaddula egumi yehu ni wihinivaha osogolo wapama.

5. Ebaribari baani yamBibiliyani enikavihere okala athu owiyeviha? (Isaías 45:9-12)

⁵ Onona wi Yehova Mpaddusi winonikavihera okala athu owiyeviha. Motajhiha, wahifiya mudhidhi Jo athabwiye wiwubuwela ni wawubuwela athu amodha. Wihina Yehova amukavihere ohubuwela dhithu dhowinjhiva, oliye omubusedha wihina di Mpaddusi a kopolo dhaatedhene. (Jó 38:1-4) Mwaha Yehova omubusedha, Jo wonelamo wihina dhithu dhaatedhene anerana Yehova sapamave. Awogaga wodhela ohiyana olivo wa athu ni Mulugu, Izayiya oleba vasogolova eegi: “Nerege ologo podi omukoha muliba osasanya muno eegi: ‘Elaya oneriwe ddi?’” — Mmwileri Isaías 45:9-12.

6. Mudhidhi baani oliwa wofwanelela opendda kopolo ni thotho dha mpaddusi ehu? (Osugwe fotu.)

⁶ Mudhidhi nnahudherigihu dhithu dhowinjhiva, iyo podi wambela wiroromela ofiyedha ohusayelaga dhoholela dha Yehova dhili mBibiliyani. (Jó 37:23, 24) Eyo yapadduwa, sapama kadda mukiristawu opendda makalelo thotho ni kopolo dha Yehova dhiliwa dhotikiniha. (Isa. 40:22; 55:8, 9) Nimakalelo yala, ebaribari yookweya enere wukavihera okala owiyeviha ni wonelamo wi makalelo owubuwela a Yehova bili athima okwaranya makalelo awo owubuwela wodhela muselu bu muselu.

7. Ethu baani Rayela eriliyena wihina aarumedhe masadduwo?

⁷ Wubuwela wi Yehova Mpaddusi, wimukavihera murogola Rayela, anakala o Esloveniya, orumedha dhoholela dhixa anaakeliye munikuruni mwa Yehova. Oliye onowoga eegi: “Malabo mamodha enogirusa orumedha dhothoma nnakelihu ni addibila enaniholela. Motajhiha, nuwoona Muselu dhixa n.º 8 dha yaka ya 2023, gahithuwathuwa numoona ddibila dhaala a mmulogoni mwaaga eeragana mwaha aganna ddevu. Gahifiyedha olobela gilobaga wihina Yehova agikavihere orumedha masadduwo ala.” Rayela wonelamo wi mwaha Yehova okala Mpaddusi a odhulu ni elabo yavati, oliye doologomana ni onowanda weddiha nikuru naaye mwamakalelo apama. Nerege ni weya enowurusa orumedha monelo muxa obe dhoholela dhixa nnakelihu munikuruni mwa Yehova? Akala siyeyo, ethu yapama onahoweliwe werana, fuukala muthu owiyeviha ni osayele mudhidhi wihina opendde thotho ni kopolo dha Mpaddusi awo. — Rom. 11:33-36.

MULUGU KANANITOTELA GOYI

8. Mwahaya bwadddi edhe ekalege yapama, we ohudhera wi Yehova kananitotela goyi?

⁸ Mwahaya bwaddi Mulugu agenya okalawo goyi? Mwaha athu owinjhiva ohunona yowakula ya nikoho nna, enomunyanyuwela Mulugu obe enohiya orumedha wi Mulugu ohukalawo! (Pro. 19:3) Mbwenye we ohuhudhera wihina yothega ni ohulogomana fwinantotela goyi, ohiya Yehova. Teto we ohuhudhera wi ovilela wa Yehova winowavaha ofuru athu owinjhiva omunona ni onona makalelo oliye anafuniye wamariha makathamiho aamateene. (2 Ped. 3:9, 15) Dhithu ndha ohudheriwe dhihutodola ni dhihukavihera wandana ni Yehova.

9. Mudhidhi baani oliwa wofwanelela wubuwela, mwahaya bwaddi Yehova agenya okalawo goyi?

⁹ Iyo nihinona wihina nnohowela okala oovilela, njhehaga mudhidhi Yehova anafuniye wamariha makathamiho aamateene. Mbwenye muthu nnamudhivelihu aafwanyiwaga makathamiho, eeddihiwaga mwamakalelo abure obe yapadduwa ethu-siithu yabure, iyo podi wubuwelaga wi Yehova anna olegela wamariha makathamihoya. (Hab. 1:2, 3) Akala eyo enonipadduwela, yere okala yapama wubuwela ethu enamuthukulela Yehova wenya athu apama woona goyi.a (Sal. 34:19) Teto iyo podi opendda efunelo ya Yehova yowamariha makathamiho.

10. Ddiniyani yamukavihere Anne wawanana makathamiho nuwayelela amaye muukwani?

¹⁰ Onona wi nlabo nimodha goyi enere omala, podi onikavihera ovilela. Murogola dhaala anithaniwa Anne, anakala eliga yo Mayote, ya oseyano indiku onowoga eegi: “Yaka dha mundduli miyo wayelela amamaga muukwani, eyo yahigukuula vanlubale. Mbwenye miyo gowilibihedha wubuwela wihina Yehova kananitotela makathamiho. Ohiya eyo, Yehova anna ojheha nuuthabwa mudhidhi anafuniye wamariha makathamiho aamateene ni wavenyiha anookwa. Opendda dhithu ndha dhihigikavihera okanna murenddele gihinandimi owoga.”

11. Onona ethu enamuthukulela Yehova wenya okalawo goyi, winanikavihera ni makalelo baani?

¹¹ Onona wi Mulugu onowenya okalawo goyi ni doovilela, podi onithukulela wapara mabasa oolaleya. Murumiwi Peduru ohuwoga wi ovilela wa Yehova winowathukulela athu owinjhiva othwaruwa wi evulusiwe. Vasogolova, oliye oleba eegi: ‘Mubuwele emuthu munafuninyu okala. Munohowela okala athu a dhikalelo dhapama ni enerana dhaatedhene wihina emwebedhe Mulugu.’ (2 Ped. 3:11) Ethu emodha enanithukulela olaleya si ekalelo yofuna ‘emwebedhe Mulugu.’ Ndala ninga Yehova, iyo nnowadhivela athu ni nnofuna wihina yakele egumi yohimala mwilaboni exa. Yehova onodidela wavaha ofuru athu a murudda wawo wi emwebedhe. Teto we ohukanna oneti wolaba ni Mulugu ni wakavihera athu owinjhiva ohudhera ebaribari omakuthulo wahinati ofiya! — 1 Kor. 3:9.

NNAKALAWO ‘MALABO OOKUTHULA’

12. Wonelamo wi nnakalawo malabo ookuthula, winanivaha ebaribari baani?

¹² Bibiliya onowoga pamadhene ekalelo yaakanne athu ‘malabo ookuthula.’ (2 Tim. 3:1-5) Peeno naasugwaga dhikalelo enna athu, nnowanda wonelamo wi yovuhulela ela enna wakwanela. Wonelamo ebaribari ela, winonikavihera omuroromela Bibiliya. — 2 Tim. 3:13-15.

13. Nubuwelaga yoladdaniha ya Yesu enafwanyeya va Lukaji 12:15-21, makoho baani nnahowelihu wikoha?

¹³ Onona wi nnakala malabo ookuthula, winonthukulela okala mento. Va Lukaji 12:15-21, Yesu ohuwoga yoladdaniha enanihudhiha wi nnohowela werana dhothoma dhapama. (Mmwileri.) Mwahaya bwaddi mulobwana ole ooreela adhe iithaniwage “taduwa?” Kahi wihina oliye ahikanna dhoreela dhowinjhiva, mbwenye mwaha oliye athabwa ovaha thima dhithu dhabure. Naarive oliye ‘ugelaga dhoreela dhaye, vamentoni va Mulugu oliye kaali muthu ooreela.’ Mwahaya bwaddi wugela dhoreela ethu yabure? Mwaha wa ele Mulugu awogiliye ni mulobwana ole eegi: “Mahiyu apeeno onere oyelela egumawo.” Yoladdaniha ela enanihudhiha ddi? Omakuthulo ohuthabwa waddamela, bumwahaya nnohowela wikoha: ‘Gerege dholuba dhaaga dhinowooniha wi gili mento? Dholuba baani ginamukongomedhimi mwanaga okanna? Ginolabihedha mudhidhi waaga, kopolo ni dhokanna dhaaga wihina gugele dhoreela odhulu?’

14. Mwahaya bwaddi sapama wubuwela dhithu dhinoniha wi nnakalawo malabo ookuthula, Ki yopadduwa ya murogola Miki enoniha aavi?

¹⁴ Naapenddaga dhithu dhinoniha wihina nnakalawo malabo ookuthula, eyo podi osaddula makalelo oolabihedha egumihu. Siyeyo epadduwe ni murogola dhaala anithaniwa Miki. Oliye onowoga eegi: “Miyo numariha eskola, gubuwela okala namasanyiha a dhigumi dhaanenyama. Teto gahikanna yoluba yokala piyonera a mudhidhi wamutene ni okavihera mburo winahoweleya anamalaleya. Mbwenye akwaga ogivaha yolaga wi gipendde akala gere wanda wakwanihedha yoluba yokala piyonero ni mabasa ale gawubuwelimi. Aliwa ogubusedha wi omakuthulo wihaddamela teto mwilaboni exa ginerege okalawo nimukalakala ni ginerege wasanyiha anenyama ginaafunimi. Mwaha wa yeyo, miyo werana kursu yojajala yagivahege mudhidhi wowinjhiva. Nimakalelo yaala, gere wanda wakwaneliha yoluba yaga yokala piyonero a mudhidhi waamutene, wihina vasogolova gitamele mburo winahoweleya anamalaleya o Ekwadori.” Peeno, murogola Miki ni mamune enalaba sirikwitu ya elabo yele.

15. Yopadduwa ya Tiyagu enanikavihera aavi ohaselela athu yahinafuna onivuruwana? (Osugwe fotu.)

¹⁵ Ohidduwala wi nnakala malabo ookuthula, winonikavihera okala mento ni odidela wapara mabasa oolaleya naarive athuya omabajhowene ekooddaga ovuruwana muthenga nnalaleyihu. Ebaribariya sowihina amodha podi osaddula egumi yewa. Kasugwa yopadduwa ya Tiyagu ddibile Yesu. Oliye ahimoona Yesu unnuwaga ofiyedha okala Mesiya ni namahudhiha munlubale. Naarive dhigaali ndo, dhahivira yaka dhowinjhivadhene Tiyago ahithomile okala namahara a Yesu. Oliye aathomme okala namahara, Yesu nuvenyihiwa muukwani. Teto oliye aali namahara ooviheya ni mabasa oolaleya!b (Juwa. 7:5; Gal. 2:9) Bumwahaya, kuwaselele amudhawo ni ale eli vamuruddani vawo ehinafuna ovuruwana muthenga dhapama. Podi wera dhithu onawaddeliwe peeno enande wonelamo osogolo obe mahoso manlubale yambela.c

ODIDELE OVAHA THIMA DHITHU NIHUDHENRIHU KALE

16. Ni makalelo baani dhithu nihudherihu kale dhinanikaviheriwa ofiyedha peeno? (Osugwe kwaduru enna musolo “Olabihedhe ebaribari yokweya wihina wakaviherena amodha.”)

¹⁶ Dhithu dhowinjhiva nnakelihu munikuruni mwa Yehova, dhinegeredhiwa wihina dhakavihere athu ehinonne dhithu dhowinjhiva wodhela Bibiliya. Motajhiha, mwaha dhineriwana omutugumanoni omagomihedho wa sumana, anamasugwera nnalabihedhihu mmalaleyelo ni vidiyu dhimodha dhinafwanyeya musayitini jw.org, dhinegeredhiwa wihina dhakavihere athu ehili Anamoona a Yehova. Naarive dhigaali ndo, dhithu ndha podi onikavihera nihiyoya mwaha dhinowenjhedhedha odhivela ninnihuna ni Mulugu. Teto dhinonikavihera omuroromela Bibiliya ni okala anamahudhiha apama. — Sal. 19:7.

17. Mudhidhi baani wofwanelela nnahowelihu wubuwela dhohudhiha dhokweya dha mBibiliyani?

¹⁷ Mwaha okala Anamoona a Yehova, nnohagalala vanlubale naakelaga monelo muxa wodhela Bibiliya. Teto nnothabwa ovaha thima dhohudhiha dhokweya dhinafwanyeya mBibiliyani dhinithukulele odhivela ebaribari. Nakanna elemelelo yodidela ohara mubuwelo wehu ohiya ohara dhoholela nnakelihu munikuruni mwa Yehova, nnohowela wilibihedha wi nikale athu owiyeviha ni ohidduwala wi Mpaddusi ehu da thotho ni akopolo dhaatedhene, teto dinaholela nikuru naye. Bumwahaya iyo obe muthu nnamudhivelihu aafwanyiwaga makathamiho, ohiya othuwathuwa, yere okala yapama okala oojheha ni wubuwela ethu enamuthukulela Yehova wenya okalawo goyi. Teto nasakulaga makalelo oononga korowa ni mudhidhi wehu, nnohowela okala mento ni ohuddiwala wi nnakalawo malabo ookuthula. Neragana dhithudha ni makalelo yala, dhohudhiha dhokweya dha mBibiliyani dhinerege onilibiha, dhinerege onivaha efunelo yowerana ethu-sithu ni onivaha thotho.