Yehova ananikavihera aavi ovilela?

1. Mwahaya bwaddi nigahowela ovilela, ki ddiniyani enaanikavihere werena eyo? (1 Peduru 5:10)

WOONA wi nnakalawo malabo ookuthula, iyo aatene nnohowela okala athu oovilela. Motajhiha, amodha enofwanyiwa oredda wowopiha. Amodha enowanana wukuuwa mwaha omuyelela muthu enamudhiveliwa muukwani, teto amodha enoharahariwa ni amudhiwa obe ni anamathonga. (Mat. 10:18, 36, 37) Mbwenye iyo podi okanna ebaribari wi naarive nifwanyiwaga makathamiho bi makathamiho, Yehova anere onikavihera ovilela. — Mmwileri 1 Peduru 5:10.

2. Ddiniyani enanikavihera ovilela?

² Ovilela winatapulela odidela okala txithi ni ohuyelela ejhehedhelo ninnihuna, naarive nifwanyiwaga makathamiho ninga oharahariwa ni wehiwa. Mbwenye eyo kinatapulela wi nnanda ovilela mwaha wa kopolo dhehu, mbwenye nnanda mwaha wa nikavihero na Yehova. Oliye dinanivaha “kopolo dhohikala dha masika” wihina nande ovilela. (2 Kor. 4:7) Ohudhera wula, nnere opendda dhithu nayi Yehova ananivahiye wihina nande ovilela. Teto nnere woona makalelo oopurelamo kadda ethu oliye ananivahiye wi nande ovilela.

MALOBELO

3. Mwahaya bwaddi nigawogaga wi malobelo makalelo ootikiniha oothapanya ni Yehova ?

³ Yehova anowerana ethu yootikiniha wihina nande ovilela. Oliye ohuneenya wi nandege othapanya nuliye, naarive nigaali athu oothega. (Ebe. 4:16) Kabiha wubuwela: Iyo podi olobela wa Yehova mudhidhi bu mudhidhi ni owoga muselu nnafunihu. Iyo podi olobela wa Yehova nlabihedhaga ewogelo nnafunihu ni mburo nnafunihu, naarive nigaali yekihu obe nigaali mukambura. (Jon. 2:1, 2; Dho. 16:25, 26) Teto nathabwa othuwathuwa ofiyedha ohukanna ethu yowoga, Yehova anowanda wonelamo ele nnafunihu owoga. (Rom. 8:26, 27) Mohanganyedha, malobelo ethu yootikiniha enanikavihera othapanya ni Babihu Yehova!

4. Nnonne aavi wi olobela wa Yehova nimulobaga wihina anikavihere ovilela enowiwanana ni efunelo ya Yehova?

⁴ Mbibiliyani, Yehova ononipaganya wi “ethu-sithu nnamulobihu akala enowiwanana ni efunelo yaye, oliye onooniwa.” (1 Juwa. 5:14) Nerege iyo podi olobela wa Yehova nimulobaga wi anikavihere ovilela? Hee! Werana eyo enowiwanana ni efunelo ya Mulugu. Nnonne aavi? Nnonne eyo, mwaha navilelaga nnomukavihera Yehova onvaha yowakula mwiddani aye ali Saddana. (Pro. 27:11) Ohiya eyo, Bibiliya anowoga wihina Yehova anofuna vanlubale “omukavihera ole anna murima wapama.” (2 Cró. 16:9) Bumwahaya iyo podi okanna ebaribari wi Yehova ohukanna kopolo wi ande onikavihera ovilela ni ohukanna efunelo yowerana eyo. — Isa. 30:18; 41:10; Luk. 11:13.

5. Nimakalelo baani malobelo enanikaviheriwa okanna murenddele? (Isaías 26:3)

⁵ Bibiliya anowoga wihina nanfugulela murima wehu Yehova, oliye anere onivaha ‘murenddele [waaye] onapitha enonelo yaathu ni anere okurumusa murima ni mubuwelo wehu.’ (Fil. 4:7) Ola oneeti munlubale! Mwaha athu ehinamulabela Yehova enofwanyiwa makathamiho oohiyana-iyana, teto enosayela okanna murenddele mwamakalelo oohiyana-iyana. Motajhiha, amodha enojha murombwe dhinaathukulela othimihamo mmubuweloni mwewa dhithu dhinathuwathuwiha. Mbwenye osayela murenddele ni makalelo yala, winononga wandana ninnihuna ni Yehova. (Omusugwe Matewuji 12:43-45.) Ohiya eyo, murenddele Yehova ananivahiye naalobelaga, munlubale opitha murombwe enajha athu ayo. Naalobelaga, nnowoniha wi nnomuroromela Yehova. Vano yokumelelavoya sowihina Yehova onodidelave onivaha “murenddele” waaye. (Mmwileri Isaías 26:3.) Yehova anerana eyo nimakalelo baani? Yehova onowerana eyo wodhela onikavihera wubuwela dholebela dhinanubusedha wi oliye anonidhivela ni anofuna opama wehu. Wubuwela dholebela ndho, winonikavihera opwaseyiha mubuwelo ni murima wehu. — Sal. 62:1, 2.

6. Onande aavi opurelamo ofuru ninnihuna wolobela? (Osugwe fotu.)

⁶ Ethu onahoweliwe werana. Wafwanyiwaga yoweha, “onvokedhe Yehova mutholo wawo” ni omulobe murenddele waaye. (Sal. 55:22) Teto omulobe thotho onahoweliwe wihina owanena makathamiho enuufwanya. (Pro. 2:10, 11) Ohiya eyo, walobelaga, kudduwale omutamalela Yehova. (Fil. 4:6) Osugwerege dhithu Yehova aneriyena kadda labo wihina ukavihere ni otamalelege wodhela dhithu dhendho oliye anuwereliye. Kuhiye wi makathamiho yuhihe woona makalelo Yehova anuurelihiye. — Sal. 16:5, 6.

BIBILIYA

7. Mwahaya bwaddi omuhudhera Bibiliya winonikavihera ovilela?

⁷ Yehova ohunivaha Bibiliya wihina anikavihere ovilela. Namwilerigi Bibiliya nnofwanyamo dholebela dhohiyana-iyana dhinoniha wi Yehova anonikavihera. Motajhiha, yolebela ya Matewuji 6:8 enihina: “Babinyu oodhulu ohunona dhithu munahowelinyu naarive muhunathi omuloba.” Aasorihile madhu ala, di Yesu, teto kaavo muthu amunonne Yehova omukwaranya Yesu. Bumwahaya iyo podi owoga wihina naafwanyiwaga makathamiho, Yehova ohunona ele nnahowelihu ni anere onikavihera. Mbibiliyani dhihikalamo dholebela dhowinjhiva ninga ela nimanlihu wileri, dhinanikavihera okanna kopolo wihina nande ovilela. — Salmo 94:19.

8. Owoge yotajhiha na nlagano na mBibiliyani nnanikavihera ovilela? Ononamo aavi, nlagano nna podi wukavihera ovilela? b) Ddiniyani enaanikavihere wawubuwela malagano a mBibiliyani nnahowelihu nafunaga werana dhothoma dhapama?

⁸ Malagano a mBibiliyani podi onikavihera ovilela. Mwaha malagano ala enonivaha thotho wihina nande werana dhothoma dhapama. (Pro. 2:6, 7) Motajhiha, Bibiliya ononikongomedha okalawo kadda labo ni ohithuwathuwela dhithu dhinafuna opadduwa mangwaana. (Mat. 6:34) Nakanna elemelelo yomwileri Bibiliya ni opendda, enere okala yokweya wawubuwela malagano a mBibiliyani, nnahowelihu nafunaga werana dhothoma dhapama.

9. Dhopadduwa dhinafwanyeya mBibiliyani dhinakavihera ni makalelo baani ovilela?

⁹ Mbibiliyani, nnofwanyamo dhopadduwa dhaathu ninga iyo yamuroromela Yehova ni yakenle nikavihero naye. (Ebe. 11:32-34; Tiya. 5:17) Opendda dhopadduwa ndha dhinolibiha nroromelo nehu nowi Yehova ‘nikungu nehu ni kopolo dhehu, teto nikavihero nnafwanyeya mowaguva mudhidhi worusa.’ (Sal. 46:1) Wubuwela dhopadduwa dha adhaari ala oororomeleya, winonithukulela otajhiha nroromelo newa ni ovilela wewa. — Tiya. 5:10, 11.

10. Onande aavi ompurelamo Bibiliya?

¹⁰ Ethu onahoweliwe werana. Omwilerigi Bibiliya malabo aamateene ni okanne lista na dholebela dhinuukavihera. Athu owinjhiva enowoonelamo wi sapama wileri Yolebela ya kadda labo, mwaha enowakavihera wubuwela ethu enaakavihere nlabo nenne. Siyeyo yampadduwele murogola iithaniwa Mariea makolo aye nuwaddeliwa wihina ehikanna oredda wa kanser. Ddiniyani yamukavihera murogola Marie wasamalela makolo aye? Oliye onowoga eegi: “Malabo aamateene gowileri Yolebela ya kadda labo ni gopendda. Werana eyo wogikavihera wubuwela muselo wa mBibiliyani ohiya wapwasedha makathamiho yagifwanya mudhidhi yole.” — Sal. 61:2.

ADDIBILIHU

11. Nnakala aavi nubuwelaga makalelo addibilihu enandiwa ovilela?

¹¹ Yehova onowalabihedha addibilihu ni arogolihu wihina enikavihere ovilela. Onona wi “addibilihu aatene enofwanyiwa makathamiho mamodhave” winonivaha ebaribari wi kanili yekihu. (1 Ped. 5:9) Wapela elabo yaatene ehikalawo addibila enafwanyiwa makathamiho mamodhave enanifwanya, mbwenye enilibihedha wi yande ovilela. Eyo enowoniha wihina naarive nifwanyiwaga makathamiho bi makathamiho, nihiyoya nnere wanda ovilela. — Dho. 14:22.

12. Addibilihu enanikavihera aavi? Ki iyo nnakavihera aavi? (2 Korintiyu 1:3, 4)

¹² Addibilihu podi onikavihera okala oovilela wodhela dhithu enawogiwa ni eneriwana. Murumiwi Pawulo ahoona eyo. Dila dhowinjhivadhene mmakartani a murumiwi Pawulo, oliye owatamalela addibila mwaha omukavihera naarive agaali mukambura, teto oliye osayela makalelo ooleba ndina na kadda muthu. Ohiya eyo, addibila yomutodola, yoomulibiha ni yomukavihera. (Fil. 2:25, 29, 30; Kol. 4:10, 11) Peeno nnowawoona addibila yeragana ethu emodhave. Motajhiha, iyo nahowelaga ovilela, addibilihu enakala epaddi yehu, vano aliwa yahowelaga nikavihero di iyo nnakala epaddi yewa. — Mmwileri 2 Korintiyu 1:3, 4.

13. Ddiniyani emukavihere murogola Maya ovilela?

¹³ Yaka ya 2020, anyakoddo ooRusiya yahivolowa mba mwa murogola Maya. Nuwindo anyakoddo ale omuthukulela otiribunale murogola Maya mwaha olaleya muthenga dhapama. Mudhidhi yole, addibila yahimulibiha vanlubale murogola Maya. Oliye onowoga eegi: “Wahifiya mudhidhi gaagommimi epaddi yomubuweloni, mudhidhi yole addibila yogiligarela ni yoginviyarela mensaje ewogaga wi yogidhivela vanlubale. Miyo gahinona wihina gahikanna emudhi enlubale ni yodhivela. Mbwenye yaka ya 2020, miyo wambela woona odhivela wula mwamakalelo avayeka.”

14. Nnande aavi opurelamo nikavihero na addibilihu? (Osugwe fotu.)

¹⁴ Ethu onahoweliwe werana. Wafwanyiwaga makathamiho, wawaddamelege addibila. Ohiya eyo, kukanne manyazo oloba nikavihero na anamaholela mulogo. Aliwa podi okala ninga ‘mburo wothawelawo mudhidhi wa nipevo.’ (Isa. 32:2, nota) Ohiya eyo, kuddiwale wi addibila aatene enowanana makathamiho. Wamukaviheraga ddibila anahowela nikavihero, onowanda woona dhithudha mwamakalelo owoneleyamo ni apama, teto eyo enowukavihera ovilela. — Dho. 20:35.

EJHEHEDHELO YEHU

15. Nimakalelo baani ejhehedhelo emukaviheriwa Yesu, ki enanikavihera ni makalelo baani? (Eberewu 12:2)

¹⁵ Ejhehedhelo Yehova ananivahiye, enonikavihera ovilela. (Rom. 15:13) Siyeyo yampadduwele Yesu. Oliye ahinona wihina ahere adidela okala oororomeleya, eere okavihera otxeniha ndina na Yehova. Teto Yesu oojheha nuuthaba mudhidhi afuniye ohogolowela odhulu wi akalege vamodha ni Ababe ni mudhidhi afuniye wambela othonga ni addibile oothikitheliwa. Ejhehedhelo ela yahimukavihera Yesu wavilelana makathamiho manlubale yanfwanya mudhidhi agaali velaboni yavati. (Mmwileri Eberewu 12:2.) Nimakalelo mamodhave, ejhehedhelo ninnihuna yokala mwilaboni exa, enonikavihera wavilelana makathamiho enanifwanya mwilaboni ela yabure enathongiwa ni Saddana.

16. Nimakalelo baani ejhehedho emukaviheriwa murogola dhaala ovilela, ki ohudhere ddi ni ele awogiliye?

¹⁶ Kasugwa makalelo ejhehedhelo yokalawo mwilaboni exa, emukaviheriwa murogola Alla anakala ooRusiya. Mamune ovokedhiwa mukambura munakaliwamo mudhidhi vang’ono, ajhehaga otorihiwa. Mwaha wa eyo yampadduwele murogola Alla, oliye anowoga eegi: “Olobela wodhela ejhehedhelo yosogolo ni opendda wihigikavihera ohithabwa okwerebeya. Gihinona wihina dhoweha ndha dhinere omala. Mohulegela Yehova anere ogonjhiha, teto iyo nnere ohagalala vanlubale.”

17. Onere ddi wihina opurelemo ejhehedhelo anivahile Yehova? (Osugwe fotu.)

¹⁷ Ethu onahoweliwe werana. Osayelege mudhidhi wihina opendde ejhehedhelo yoriya Yehova ananipaganyiye. Wubuwelege ogaali mwilaboni exa ni wubuwelege dhithu dhinuukavihere okanna ohagalala. Weragana ndo, naarive ofwanyiwaga makathamiho bi makathamiho, enakalege ninga “oojajala.” (2 Kor. 4:17) Ohiya eyo, werena ele onandiwe wihina wawaddele athu amodha ejhehedhelo ela yoriya. Kabiha wubuwela makalelo eliwa yorusa athu wawanana makathamiho a elabo ela ya Saddana, mwaha ohunona ejhehedhelo Yehova ananipaganyiye wodhela osogolo. Othapanya vang’ono wodhela dhithu Yehova ananipaganyiye, podi okala ethu enahoweleya wihina omukavihere muthu wonelamo ejhehedhelo ela.

18. Mwahaya bwaddi nigahowela ororomela ejhehedhelo anivahile Yehova?

¹⁸ Nuwavilelana makathamiho oohiyana-iyana, Jo owoga eegi: ‘Vano gihinona wi munoowedha werana dhaatedhene ni kavo ethu munubuwelinyu enuurusani.’ (Jó 42:2) Jo ahihudhera wi kaavo ethu enamuhiha Yehova wakwaneliha mpaganyo waye. Onona eyo podi onikavihera okala athu oovilela. Kubuwela yotajhiha ela, muhiyana dhaala ali muredda anowukuwa mwaha ovira mmadani mwa amediku oohiyana-iyana yahanda onvulumusa. Vano mediku dhaala anonne dhiredda dhohiyana-iyana, onona oredda wa muhiyana ole ni omwaddela makalelo oojha murombweya. Mbwenye naarive muhiyana ole aganonne wihina onere ovira mudhidhi wowinjhiva wihina avulumuwe, oliye kanathabwege wukuuwa. Ddiniyani emuthukulele muhiyana ola ovilela? Si ejhehedhelo yohagalasa oliye anniyena yowihina anere ovulumuwa. Nimakalelo mamodha, okanna ebaribari wi ejhehedhelo ninnihuna enere wakwanela, enonikavihera ovilela.

19. Ddiniyani nnahowelihu werena wihina nande ovilela?

¹⁹ Ninga nonilihu muwari mwa ohudhera wula, malobelo, Bibiliya, addibilihu ni ejhehedhelo, dhithu Yehova analabihedhiye wihina anikavihere ovilela. Napurelamo kadda ethu Yehova ananivahiye wihina anikavihere ovilela, nnere wonelamo wi Yehova anonisamalela naafwanyiwaga makathamiho bi makathamiho. Teto nnere wanda ovilela ofiyedha nlabo makathamiho ananitotela Saddana ehinadhiwa ekalawo. — Fil. 4:13.