Nnande aavi ogonjhiha munigwa dhabure?

1. Dhithu baani iyo aatene nnawanihuna?

ONOKANNAGA ethakwithakwi yowerana ethu yabure? Akala enowupadduwelaga, kuwuukuwe. Bibiliya anihina: “Dhoweha dhaatedhene dhinufwanyani dhinowafwanya athu aatene.” (1 Kor. 10:13)a Eyo enatapulela wi akala onna owanana ethakwithakwi yowerana ethu yabure, okanne ebaribari wi kuli weeka, addibila amodha enna owanana ethakwithakwi emodhave. Teto onere wanda ogonjhiha nnikavihero na Yehova.

2. Dhoweha baani makiristawu aatene vamodha ni anamahudhera a Bibiliya enawaniwana? (Osugwe fotu.)

² Bibiliya anihina: “Kadda muthu aneehiwa ni munigwa wa mmurima mwaaye.” (Tiya. 1:14) Obe nere, ethu onooniwe ninga yoweha podi ohukala yoweha wa muthu mmodha. Motajhiha, makiristawu mamodha podi okanna ethakwithakwi yowawerana mararuwo ni muhiyana obe ni mulobwana, mbwenye amodha podi okanna ethakwithakwi yorarusana alobwanave obe ahiyanave. Makiristawu mamodha yanna elemelelo yoomoona pornografiya, podi okanna efunelo yohogolowela omoona. Teto amodha yanna elemelelo yofumari obe yong’wa bure, podi okanna ethakwithakwi yohogolowela werana emodhave. Ndha dhoweha dhimodha enawanana makiristawu aatene ni anamahudheraya a Bibiliya. Podi wera iyo aatene malabo mamodha, nnokala ninga murumiwi Pawulo aalebile eegi: “Gafunaga werana ethu yapama, enagidhela ethu yabure.” — Rom. 7:21.

3. Ddibila anawanana yoweha muwari mwa mudhidheene, podi wiwoonaga aavi?

³ Akala onowanana ethakwithakwi yowerana dhithu dhabure muwari mwa mudhidhene, podi wera onowukuwa ofiyedha wubuwela wi kunadha wanda ogonjhiha. Teto podi wiwoonaga ninga muthu ohufwanelela ni wubuwelaga wi Mulugu kanarumedha webedha wawo, mwaha wa ethakwithakwi onawaniwena. Mbwenye eyo kahi ebaribari! Wihina nonelemo mwahaya bwaddi kannahowela wubuwela ndo, ohudhera wula onere wawaakula makoho menli: (1) Baani anafuna wihina okanna mubuwelo ola wohivaha thima? (2) Onande aavi owanana ethakwithakwi yowerana dhithu dhabure?

DDINIYANI “MBURE” ANAFUNIYE WI NUBUWELEGE?

4. a) Ethu baani Saddana anafuniye wihina nubuwelege nehiwaga? b) Ddiniyana enanivaha ebaribari wi iyo podi ogonjhiha yoweha?

⁴ Nehiwaga, Saddana anafuna wi nubuwelege wihina kaninna kopolo yogonjhiha ethakwithakwi yowerana ethu yabure. Yesu uhooniha wi Saddana anere oneeha, mudhidhi aahudhihaga anamahara aye nlobelo nna: “Kamunihiye omorela muwehiwani, mbwenye munobole mmadani mwa Mbure.” (Mat. 6:13) Mbure ola anubuwela wi kannande odidele omwiwelela Yehova, naafwanyiwaga yoweha si yoweha. (Jó 2:4, 5) Kasugwa makalelo oliye aliye muthu abure. Mwinnyene Saddana di gonjhihiwe ni ethakwithakwi yaye yowerana ethu yabure, ni kaandile odidela okala oororomeleya wa Yehova. Enakala ninga Saddana anubuwela wi nili ninga oliye, wi nafwanyiwa yoweha, nnere omusukuma Yehova. Saddana ahifiyedha omweha Yesu ubuwelaga wihina eere omuthukulela werana ethu yabure. (Mat. 4:8, 9) Kabiha wubuwela: Nerege kaninna kopolo yowanana ethakwithakwi yehu yowerana dhithu dhabure? Eyo kahi ebaribari, iyo nihikanna kopolo! Teto nnowarumedha madhu a murumiwi Pawulo alebiliye eegi: “Mwadhatedhene gihikanna kopolo mwaha wa ole onagivaha kopolo.”— Fil. 4:13.

5. Ddiniyani enoniha wihina Yehova ononiroromela wi nnere wanda ogonjhiha ethakwithakwi yowerana ele eli yabure?

⁵ Yehova uhiyana vanlubale ni Saddana. Yehova onororomela wihina nnere wanda owanana ethakwithakwi yehu yowerana dhithu dhabure. Nnonne addi eyo? Oliye ohuvuhulela wihina muthithi waathu oororomeleya onere ovuluwa mudhidhi wa mahoso manlubale. Kubuwela eyo enatapuleliwa. Yehova ali Mulugu ahinoota, ohuwoga wihina muthithi waathu, ohiya athu vang’ono baahi, onere ‘ofula dhowara dhewa dholapa ni otxeniha munikameni mwa Nimbila’. Obe neere, athu owinjhiva enere okanna ekalelo yapama vamentoni va Yehova ni enere ovolowa mwilaboni exa. (Ovuhu. 7:9, 13, 14) Eyo enowooniha pamadhene wi Yehova kanubuwela wihina iyo kaninna kopolo dhowanana ethakwithakwi yehu yabure.

6-7. Ddiniyani Saddana anafuniye wihina nubuwele?

⁶ Saddana kanafuna baahi wi iyo niwoonege ninga athu ehinna kopolo. Oliye anafuna iyo niwoonege ninga athu ohukanna mabasa ni nubuwelege wi Mulugu kanarumedha webedha wehu mwaha wa ethakwithakwi yehu yabure. Kubuwela dila yanabiili makalelo Saddana aliye muthu abure. Saddana muthu ahinna mabasa. Oliye ohukooddiwa ni Yehova ni kanaakele egumi yohimala osogolo. (Gén. 3:15; Ovuhu. 20:10) Mohanganyedha, Saddana anafuna niwoonege ninga kaninna mabasa, thabwathabwa oonaga wi nikanna ejhehedhelo oliye ahinniyena eli okalawo ni mukalakala mwilaboni exa. Mbwenye iyo nihikanna thima vamentoni va Yehova. Mwaha Bibiliya anowoga wi Yehova onofuna onikavihera, ohiya onitoriha. Teto oliye “kanafuna wi muthu di muthu agujhuliwe, mbwenye anafuna wi aatene ethwaruwe.” — 2 Ped. 3:9

⁷ Bumwahaya nakanna ethakwithakwi yowerana ethu yabure, obe naadidelaga wubuwela wi nili athu ehinna kopolo ni ehinna mabasa, ninna wubuwela ndala ninga Saddana munafuniye. Eyo podi onikwerebeyiha ni ohanda owanana murako dhaye. — 1 Ped. 5:8, 9.

OHULOGOMANA PODI ONITHUKULELA WUBUWELA DDI?

8. Madhu owi “yothega” ohiya owogave wodhela dhithu dhabure, podi otapulelaga ddi? (Salmo 51:5) (Osugwe “wonelamo pama.”)

⁸ Ohiya murako ananitotela Saddana, ethu emodha enanikwerebeyihe ni enanithukulela wubuwela wi kaninna mabasa, ddi? Yothega nivanlihu ni makolo ehu.b — Jó 14:4; mmwileri Salmo 51:5.

9-10. a) Ddiniyani epadduwile ni Adawu ni Eva nuuthega? (Osugwe fotu.) b) Nimakalelo baani yothega enanipathiwa?

⁹ Kubuwela ethu yapadduwile Adawu ni Eva nuuthega. Nuuhiya omwiwelela Yehova, Adawu ni Eva wipita ni osayela ethu wihina ethithena maningo ewa. Awogaga wodhela dhithu yeriliwana wihina ethithena maningo ewa, Perspicaz, anawoga eegi: “Yothega yahaathukulela wivaha nibili, ofiyedha aliwa wambela othuwathuwa, wiwoona ninga eli yekiwa ni okanna manyazo.” Enakala ninga Adawu ni Eva yifugenle nyumba eg’ono yandiwa woona dhithu nayi baahi, yaali: wivaha nibili, othuwathuwa, wiwoona ninga eli yekiwa ni okanna manyazo. Naarive Adawu ni Eva edhowaga epaddi si epaddi ya nyumba ele, kiyanda okuma. Aliwa kiyanna makalelo oothawa yothega yewa.

¹⁰ Ebaribari wihina ekalelo yehu sohiyana ni Adawu ni Eva. Wodhela yowobola ehinampatha Adawu ni Eva, iyo podi oleveleliwa dhothega dhehu ni okanna mubuwelo wapama. (1 Kor. 6:11) Naarive dhigaali ndo, iyo nihivala yothega. Bumwahaya nigivaha nibili, nigakala oothuwathuwene, nigiwoona ninga nili yekihu ni nigakanna manyazo nerena yothega. Teto Bibiliya anihina yothega enoodidela waagonjhiha athu “naaleya [eherilena] yothega ninga ya Adawu.” (Rom. 5:14) Ebaribari wi otheega ni ohulogomana dhithu dhinarusa ogonjhiha. Mbwenye kannahowela okwerebeya ni wiwoona ninga kaninna mabasa. Ebaribariya sowihina iyo podi osukuma mubuwelo ndho dhabure. Nimakalelo baani?

11. Nubuwelaga wi kaninna kopolo obe kannande ogonjhiha ethakwithakwi yowera ethu yabure, ddiniyani nnahowelihu werana, ki mwahaya bwaddi? (Romanu 6:12)

¹¹ Nubuwelaga wihina miyo kaginna kopolo obe kaginande ogonjhiha ethakwithakwi ela yabure, enakala ninga nnahiya ohilogomana wehu oniholela. Mbwenye kanihiye ohilogomana onigonjhiha. Mwaha waddi? Mwaha Bibiliya anahudhiha wihina kanihiye ‘ohilogomana onigonjhiha.’ (Mmwileri Romanu 6:12.) Eyo enatapulela wihina iyo kannahowela ohanyedha dhithakwithakwi dhehu dhowerana ethu yabure. (Gal. 5:16) Yehova anororomela wihina iyo podi ogonjhiha dhoweha. Aheere ahiniroromelaga, oliye kanihudhihe ogonjhiha ohilogomana. (Deut. 30:11-14; Rom. 6:6; 1 Tes. 4:3) Bumwahaya nikanne ebaribari wi nnere wanda owanana ethakwithakwi yowerana dhithu dhabure!

12. Nubuwelaga miyo kagili ethu obe Yehova kanarumedha webedha waaga mwaha wa ethakwithakwi yaaga yabure, ddiniyani nahinahowelihu ohiya, ki mwahaya bwaddi?

¹² Mwamakalelo mamodhave nakanna ethakwithakwi yowerana dhithu dhabure ni nubuwelaga ‘miyo kagili ethu’ obe ‘Yehova kanarumedha webedha waaga,’ enakala ninga nnahiya ohilogomana wehu oniholela. Mbwenye kanihiye ohilogomana wehu oniholela. Mwahaya bwaddi? Mwaha Bibiliya onohudhiha wihina Yehova ohunona wi nili athu ohulogomana. (Sal. 103:13, 14) Oliye ‘ohunona dhithu dhaatedhene’ wodhela iyo, ni dhithu dhohiyana-iyana dhinanithukulela werana dhithu dhabure, mwaha wa ohulogomana nivanlihu. (1 Juwa. 3:19, 20) Nawanana dhithakwithakwi yowerana dhithu dhabure, iyo podi okala oweela vamentoni va Yehova. Ddiniyani enanivaha ebaribari ela?

13-14. Owoge mwahaya bwaddi Yehova ahinanitirihiye mwaha wa dhithakwithakwi dhehu dhabure?

¹³ Bibiliya onowoniha wihina wihikala ohiyana winlubale ni werana ethu yabure enavolowelavo (ethu nnandihu osugwera) ni okanna efunelo yowerana ethu yabure enavolowelavo (ethu nahinandihu osugwera.) Ninga motajhiha, makiristawu oKorintiyu yogonihana ahiyanave ni alobwanave. Bumwahaya Pawulo adhe alebelege eegi: “Amodha wa nyu mwaali ndo.” Nerege eyo enatapulela wihina aliwa nuuthoma okala makiristawu, kiyanna ethakwithakwi yogonihana alobwanave obe ahiyanave? Kayakale yapama orumedha eyo, mwaha ethakwithakwi ela yaali mmurimani mwewa. Mbwenye makiristawu yivanya ni yakodda werana dhithu mowiwanana ni ethakwithakwi yewa yabure, kayatorihiwe ni Yehova. Wa Yehova makiristawu ale “yahisuwiwa.” (1 Kor. 6:9-11) Ni weya podi wupadduwela emodhave.

¹⁴ Naarive oganna ethakwithakwi yowerana ethu yabure, we onere wanda ogonjhiha! Naarive erusaga ohiya ethakwithakwi yowerana dhithu dhabure, we podi wanda wihiha ni okoodda ‘ohagalasa mwiili ni mubuwelo wehu.’ (Efe. 2:3) Kabeni noone makalelo owerana eyo.

ONAANDE AAVI OGONJHIHA?

15. Wihina wande ogonjhiha ethakwithakwi yowerana dhithu dhabure, mwahaya bwaddi nnohowela onona dhithakwithakwi dhehu?

¹⁵ Wihina wande ogonjhiha ethakwithakwi yowerana dhithu dhabure, onohowela onona dhithakwithakwi dhawo. Teto okale pasope wihina wahinyengethiwe ni ‘mubuwelo wabure.’ (Tiya. 1:22) Motajhiha, muthu anang’wa bure dhong’wa dholezeliha, podi wubuwelaga wi kahi muladdu othabwa ong’wa. Mwaha ehikalawo athu anathabwa ong’wa ompitha oliye. Muthu anathabwa omoona pornografiya, podi onvahaga nibili muthu mmodha. Oliye podi wambela wubuwela eegi: ‘Ahere mwadhaga ageddihaga nuudhivela, miyo kagakanne ethakwithakwi yoomoona pornografiya.’ Makalelo ala owubuwela podi omuthukulela muthu omothela murako dha Saddana. Bumwahaya kusayele wavaha nibili athu amodha wodhela dhowera dhawo. — Gal. 6:7.

16. Onande aavi olibiha ekalelo yawo yowerana ele eli yapama?

¹⁶ Ohiya ononave dhithakwithakwi dhawo dhabure, onohowela olibiha efunelo yawo yowerana ele eli yapama. (1 Kor. 9:26, 27; 1 Tes. 4:4; 1 Ped. 1:15, 16) Osayele onona ethu enutatamulela ethakwithakwi yabure ni mudhidhi eyo enapadduwiwa. Podi wera ohukalawo mudhidhi onathabwiwe okanna ethakwithakwi yowerana ele eli yabure, obe ehikalawo yoweha si yoweha enutatamulela ethakwithakwi yowerana ethu yabure. Motajhiha, nerege enowurusa owanana ethakwithakwi yowerana ele eli yabure wakala oogomene? Obe eyo enapadduwa vaari va mahiyu? Wiwegeredhe ni wubuwele ethu onafuniwe werana wakanna ethakwithakwi yowerana ethu yabure. Mudhidhi wowerana eyo bumudhidhi ehinathi okumelela yowehaya. — Pro. 22:3.

17. Nnahudhera ddi ni yopadduwa ya Juze? (Génesis 39:7-9) (Osugwe fotu.)

¹⁷ Kubuwela yopadduwa ya Juze. Mwadha Potifare numweha, Juze, oliye ahikoodda ahubuwele dila biili. (Mmwileri Génesis 39:7-9.) Nnahudhera ddi ni yopadduwa ela? Mwadha Potifare ahinathi omunyengetha Juze, oliye ahithoma wi kamugonihe muhiyana amwinya. Mwamakalelo mamodhave, we podi olibiha ekalelo yawo yowerana ele eli yapama wahinathi ofwanyiwa yoweha. werana ndo, enere okala yokweya werana yothoma yapama wafwanyiwa yoweha.

‘ODIDELE WIPENDDA’ WA MWINNYO

18. Onande aavi ogonjhiha ethakwithakwi yowera ethu yabure? (2 Korintiyu 13:5)

¹⁸ Wihina wande owanana ethakwithakwi yowerana ele eli yabure onohowela wipendda wa mwinnyo. Obe nere, onohowela odidela wipendda wa mwinnyo wihina woone akala onna werana ele eli yapama. (Mmwileri 2 Korintiyu 13:5.) Mudhidhi waviraga, wubuwelege makalelo oneriwena dhithudha ni waweregena masadduwo enahoweleya. Motajhiha naarive ogaddinle ogonjhiha yoweha, we podi wikoha: ‘Gahilegela okoodda?’ Wonelamo wihina wahilegela, kuwivahe nibili. Ohiya eyo wawerena masadduwo enahoweleya wihina wande wibarela wafwanyiwa yoweha emodha. Bumwahaya wikohe: ‘Ginere ddi wihina gafwanyiwa yoweha gahilegele okoodda ele eli yabure? Dhowaredhana dhaaga dhinogithukulela okanna ethakwithakwi yowerana ethu yabure? Gafwanya fotu enoniha dhithu dhabure, ginorabela mowaguva? Naarive erusaga, ginowonelamo wihina sapama omwiwelela Yehova?’ — Sal. 101:3.

19. Nimakalelo baani dhothoma dhabure dhinakala ninga dhing’ono dhinaanithukuleliwa onanda owanana ethakwithakwi yowerana ethu yabure?

¹⁹ Wipenddaga, kusayele wivaha razawu. Mwaha Bibiliya anihina: ‘Murima bonyengetha vanlubale ohiyana ni ethu-sithu eli yatene teto kunapwaseya.’ (Jer. 17:9) Teto Yesu ohuwoga wi “mmurimani munokuma mubuwelo wabure.” (Mat. 15:19) Motajhiha, muthu ahiyile omoona pornografiya kale, wavira mudhidhi, oliye podi wubuwelaga wi kahi muladdu woona fotu dhinawoniha athu egawanre dhowara dhinatota ethakwithakwi. Obe podi wubuwela eegi: “Kahi ethu yabure wiwubuwela geeragana dhithu dhabure. Mbwenye ethu gahinahowelimi orabela fuwerana ele ginuubuwelimi.” Muthu anubuwela ndo, anubuwela makalelo “owerana dhofuna dhomwilini.” (Rom. 13:14) Nnande aavi osukuma mubuwelo ola? Okale pasope wafunaga werana yothoma si yothoma! Dhothoma dhabure nnonihu ninga dhing’ono, podi onithukulela werana dhothoma dhinlubale dhabure, ninga motajhiha, omothela mmurakoni yowerana ethu yabure.c Bumwahaya osukume mubuwelo bu mubuwelo ‘wabure’, onuthukulele werana ethu Yehova aniddiye.

20. Ejhehedhelo baani ninnihuna wodhela osogolo, ki nikavihero baani ninnihuna?

²⁰ Ninga nonilihu muwari mwa ohudhera wula, Yehova onoonivaha kopolo wihina nande owanana dhoweha. Teto mwaha wa yowobola, iyo podi oleveleliwa dhothega dhehu ni okanna ejhehedhelo yokalawo ni mukalakala mwilaboni exa. Nnojheha nuuthaba mudhidhi nnamulabeligihu Yehova nahiwanagana mubuwelo wowerana ele eli yabure. Mbwenye nijheehaga mudhidhi oyo ofiya, nikanne ebaribari wi Yehova onoonivaha thima, teto kaniselele owanana dhithakwithakwi dhehu dhowerana ethu yabure. Ni mareeliho a Yehova vamodha ni wilibihedha wehu nnere wanda ogonjhiha ethakwithakwi si ethakwithakwi yowerana ethu yabure!