Makoho Aanamileri

Yesu afuna awoge ni madhu ala: ‘Kamubuwele wi gidhilena murenddele’?

Yesu ohunihudhiha okanna murenddele naathu aatene. Mbwenye labo dhaala oliye owoga naanamahara aye egi: ‘Kamubuwele wihina gidhilena murenddele velaboni yavati, gidhilena supadda ohiya murenddele. Gidhele wagawa athu: mwana naababe, mwanamwihiyana naamaye, mwihiyana oteliwa ni nzaliyaye.’ (Mat. 10:34, 35) Ki vano Yesu afuna awoge ddi ni madhu ala?

Yesu kaafuna ogawanya murala, Yesu ahinona wihina ndho dherege opadduwa mwaha ndhe ahudhihiye. Vano ale yaarumedhe okala anamahara aye yohowela onona makathamiho yafwanyege, podi wera yerege oharahariwa naamudhiwa mwaha yothoma yewa. Wihina yakwerebeyihe ale yaafunege ohara ‘dhohudhiha dha Yesu.’ (Rom. 12:18) Dhohudhiha dha Yesu podi okala ninga ‘supadda’ vaari va murala dhimodha. Ni makalelo baani? Eyo podi opadduwa akala muthu a vamuralani ohuthoma okala mukiristawu mbwenye amudhaaye ehirumedhaga ofiyedha omuharaharaga. Ni makalelo yala iyo podi ofiyedha owoga — wihina amudhaaye amwiddani a muthu yole anahudhera ebaribari — Mat. 10:36.

Namwali dhaala ahiyaga amaye orolomeleyene naarive emulobaga nlevelelo. Ni agaparele livuru “ofwanye egumi yohagalasa ya malabo amatene!”

Mukiristawu anakala vamuralani kadda muthu anna gerejaye ni yohiyana ni yamukwaye podi okala yoweha wa mukiristawu ole anamudhivela Yehova ni mwanaye Yesu Kiristu. Motajhiha, oliye podi otujiwaga namudhaye wihina avolowele mathanga a amwilaboni. Mwaha wa yeyo oliye ohukanna mutholo wosakula akala onofuna omuhagalasa Mulugu obe naari. Yesu ohuwoga egi: ‘Ole anathabwa omudhivela babe obe maye ogipitha miyo, kanafwanelela okala namahara aaga. Teto ole anathabwa omudhivela mwanaye kanafwanelela okala namahara aaga.’ (Mat. 10:37) Ebaribari wihina Yesu kaafuna owoga wihina makiristawu ehadhivelege amudhiwa, mbwenye Yesu afuna ahudhihe ethu enahoweleya okala mburo wobajha mwigumini mwehu. Amudhihu yanixixa wihina nihiye omulabela Yehova, nnere odidela omudhivela Yehova ni aliwaya, mbwenye odhivela ninnihuna ni Yehova funakale mburo wobajha.

Mwebaribarene oharahariwa namudhawo ethu yorusa. Naarive dhigari ndo anamahara a Yesu enohowela wubuwelaga ele Yesu asorihiliye egi: ‘Teto ole ahinathukula ntxikwa naaye nagoyi wihina agiharege, kanafwanelela okala namahara aaga’ (Mat. 10:38) Makiristawu enohowela wonelamo wihina oharahariwa naamudhiwa makathamiho enaafwanye ale aatene enafuna omuhara Yesu. Teto oliye anajhehedha wihina mweddele wehu wapama wathukulele amudhihu ohudhera ebaribari. — 1 Ped. 3:1, 2.