Makoho aanamileri

Yesu nuubaliwa mwahaya bwaddi Juze ni Mariya edhe ekalege Obele ohiya ohogolowela owaniwa oNazare?

Bibiliya kanawoga mwahaya. Mbwenye onowoniha dhithu dhaathukulele werana yothoma ela.

Mungero mmodha owoga ni Mariya wi eere okanna wari nuwindo ambale mwaana. Mudhidhi mungero awogiliye ni Mariya, oliye vamodha ni mamune Juze yakala oNazare oGalileya. (Luc. 1:26-31; 2:4) Nuuvira mudhidhi, aliwa nudhawo Wijipitu ohogolowela oNazare. Yesu unnuwile wowule nuwindo okala munazarenu. (Mat. 2:19-23) Bumwahaya niwaga wodhela luwani yoNazare nnowawubuwela athu ala araru — Yesu, Mariya ni Juze.

Mariya ahikanna mmudhaye ithaniwa Elizabeti akala oJuda. Elizabeti ali mwadha namakutha ithaniwa Zakariya ni aliwa ombala Juwawu namabaddiza. (Luc. 1:5, 9, 13, 36) Mariya ahidhowa omwaredhela Elizabeti ni okala oJuda muwari mwa mweri miraru. Nuwindo Mariya ohogolowela oNazare. (Luc. 1:39, 40, 56) Mariya ahikanna mmudhaye oJuda, bumwahaya adhe anonegewo.

Nuuvira mudhidhi Juze wiwelela nlamulo nawoga wodhela “olebeliwa.” Vasogolova Juze okuma oNazare odhowa Obele mwaha nlamulo na aromano nawoga wi kadda muthu adhowe alebeliwe “luwani yoowaniwa.” OBele waali luwani yele Mesiya aabaliwiyewo mowiwanana ni dhovuhulela. (Luc. 2:3, 4; 1 Sam. 17:15; 20:6; Miq. 5:2) Mariya numbala Yesu, aliwa kiyahogolowele oNazare. Aliwa yakala oBele walapele makilometuru owakwana tanu nennayi odhowa oJeruzale. Yere okala yokweya aliwa omuthukulela mwaniwa otempulu wihina yapeleke mukutho ninga malamulo yawogesiwa. — Lev. 12:2, 6-8; Luc. 2:22-24.

Mungero a Mulugu ahimwaddela Mariya wihina mwanaye Yesu eere wakela “mpaddo wa Davidi” wihina “athongege ninga Mwene.” Podi wera Juze ni mariya yere wubuwela wihina dhere owomela Yesu obaliwa luwani ya Davidi. (Luc. 1:32, 33; 2:11, 17) Podi wera aliwa yahubuwela wihina yere okala yapama okala oBele ofiyedha Mulugu owoga ethu sithu yahoweliwa werana.

Kannonne mudhidhi mungasi yaliwa oBele nufiya anamahudhera a thendderi. Mudhidhi yole emudhi yaatene yakala vade dhaala teto Yesu kaali enyenye, mbwenye ahunnuwelavo vang’ono. (Mat. 2:11) Enakala ninga, ohiya ohogolowela oNazare aliwa yahikala oBele mudhidhi wowinjhivene ni yahikanna nyumbiwa wewule.

Erodi “okumiha nlamulo wihina ahima aatene ooBele aanalobwana . . . a yaka biili oyaga mundduli epiwe.” (Mat. 2:16) Nuwakela muthenga wa Mulugu, Juze ni Mariya omuthukula Yesu aliwa othawela Wijipitu okala wewene ofiyedha Erodi okwa. Nuuvira mudhidhi Juze ni emudhaye otamela oNazare. Mwahaya bwaddi edhe yahihogolowelege oBele? Mwaha omoova mwaana Erodi, Arkelawu athonga mudhidhi yole ni wihina yakwanele madhu aawogile Mulugu. Onazare Juze eere wanda omulela mwanaye Yesu ninga mudhaari oororomeleya a Mulugu. — Mat. 2:19-22; 13:55; Luc. 2:39, 52.

Podi weera Juze akwile Yesu ahinakwe ni ahinathi ofugula dila yodhowa odhulu obe anamaharaye yahinathi othikitheliwa. Bumwahaya Juze avenyihiwa anaakalege mwilaboni yavati. Athu owinjhiva enere omunona ni enere ohudhera mwahaya bwaddi oliye vamodha ni Mariya edhe ekalege oBele Yesu nuubaliwa.