Top Etel Wa Dʼios Talaʼan a Kichʼpan Pektzil?

1. Mak a etel talaʼan a Bʼibʼle?

Ich Bʼibʼle tzʼiibʼaʼan u kichʼpan pektzil ti kuxtalooʼ u kaʼa a kristiyaano yokʼolkabʼ ti bʼebʼeel. (Mateo 5:5) Ichil a Bʼibʼle 66 pʼeel a meen juʼum a yan ichil. A Dʼioso u usarta u mukʼ 40 tuul u moso kaʼ u tzʼiibʼtooʼ abʼeʼe. Aj Moises u tzʼiibʼtaj a yaax cinco pʼeel ti juʼum u mukʼ 3,500 jaabʼ aleebʼe. U yadʼaʼil a juʼum aj Juan u tzʼiibʼtaj manal 1,900 jaabʼ aleebʼe. Mak a tukul u tzʼiibʼtajooʼ? A Dʼioso u usarta u santo espiritu tiʼi kaʼ u manes u tukul tiʼijooʼ aj tzʼiibʼ Bʼibʼle. (2 Samuel 23:2) U tzʼiibʼtajooʼ u tukul a Dʼioso, maʼ u tukulooʼ tubʼajil. Ti bʼoobʼeʼ u tukul Dʼios a yan ichil a Bʼibʼle. Xoko 2 Timoteo 3:16; Hechos 3:21.

Cha’ante a vid’eo’ B’iki’ ti Weel ti Jaj a B’ib’le?

2. Bʼikiʼ ti weel ti jaj a Bʼibʼle?

Ti weel etel Dʼios talaʼan a Bʼibʼle u men u yadʼaj ti laj jaj u pektzil kʼuʼ a wataktoj. Maʼax juntuul ti winik jedʼeʼek u bʼetik abʼeʼe. (Joshua 23:14) Jadʼilik a Noochtzil Dʼios jedʼeʼek u paatal u yilaʼ ti toj kʼuʼ a wataktoj yokʼol a kristiyaano. Xoko Isaias 42:9, 46:10.

Maʼax junpʼeel u laakʼ a juʼum jabʼix a Bʼibʼle y jaj a abʼeʼe. Ti bʼilliones a Bʼibʼle tzʼajaʼan ich yaabʼ tʼan. Maʼ u men uchbʼen, a Bʼibʼle ket kʼuʼ a walak u yadʼik etel a walakooʼ u käxtik scientisto. Leʼek a 40 tuulooʼ aj tzʼiibʼi maʼ bʼinooʼ kontra tubʼajilooʼ. Leʼek kʼuʼ u yadʼaj a Bʼibʼle tupach yakunaj jadʼi etel a jajil Dʼios jedʼeʼek u talel, u Dʼiosil a yakunaj y yan u mukʼ u jele u kuxtal a mak ti kaʼ kiʼak. Etel adʼaʼa ti milliones a mak tanooʼ u tzʼoksik ti leʼek a Bʼibʼle u Tʼan Dʼios. Xoko 1 Tesalonicenses 2:13.

Cha’ante a vid’eo’ Mak a Etel Tala’an a B’ib’le?

3. Kʼuʼ a yan ich Bʼibʼle?

U masil kʼuʼ a tan u yadʼik a Bʼibʼle leʼek u kichʼpan pektzil kʼuʼ u kʼati a Dʼios tiʼijooʼ a kristiyaano. A Scriptura u yadʼaj bʼikiʼ ti saʼti u kuxtal a winik tuwich kichʼpan kuuchil yokʼolkabʼ y bʼikiʼ ti kaʼ watak a kichʼpan kuuchil. Xoko Apocalipsis 21:4, 5.

Ichil u Tʼan a Dʼioso yanooʼ a ley y tzeʼek ichil.—Ichil a Bʼibʼle yan u ejemplojil bʼikiʼ ti walak u tratartikooʼ a jente a Dʼios uchbʼen. Etel a ejemploj abʼeʼe jedʼeʼek ti känik u modʼo a Dʼios. A Bʼibʼle jedʼeʼek u yaantikech a naʼte a Dʼioso. Walak u yadʼik bʼikiʼ ti jedʼeʼek ti ʼamiigojtik a Dʼioso. Xoko Romanos 15:4; Santiago 2:23; 4:8.

4. Bʼikiʼ ti jedʼeʼek a chʼajtojtik a Bʼibʼle?

Leʼek bʼikiʼ ti uchi u kaʼansaj a Jesusu jedʼeʼek u yaantikech a chʼajtojte a Bʼibʼle. Leʼek ti walak u tzikbʼaltik a scriptura «u tzʼaj tiʼijooʼ caʼ u chʼaʼooʼ u tojil u tʼan a Dioso.» A brochure adʼaʼa walak u täkʼäntik bʼikiʼ ti walak u kaʼansaj a Jesusu. Xoko Lucas 24:27, 45.

Maʼax kʼuʼ jedʼeʼek u ketik a kichʼpan pektzil a talaʼan etel a Dʼioso. Pero yan mak maʼ kiʼooʼ tuwich, y yan mak motzooʼ tiʼi. Maʼ u yemel a wool. Leʼek kaʼ a kambʼalte u pektzil a Dʼioso jedʼeʼek a wooltik a käxtik a kuxtal ti bʼebʼeel. Xoko Juan 17:3.