Kʼuʼ u Kʼati a Dʼios Tiʼi a Yokʼolkabʼ?

1. Kʼuʼkaʼa u bʼetaj a yokʼolkabʼ a Dʼioso?

Jehovah u tzʼaj a yokʼolkabʼ tiʼi winik etel ixchʼup. Leʼek ti kuuchil. Ti bʼoobʼeʼ leʼek aj Adʼan etel ix Eva bʼetajbʼooʼ kaʼ yanakooʼ u chʼisaj waʼyeʼ yokʼolkabʼ maʼ ti kaʼan—A Dʼioso ak u bʼetajooʼ a ʼaanjel kaʼ kuxlakooʼ ti kaʼan. (Job 38:4, 7) U chʼaʼa a yaax winik y u tzʼaj ichil a kichʼpan kuuchil, u kʼabʼaʼ a kuuchil abʼeʼe Edʼen. (Genesis 2:15-17) Jehovah u tzʼaj tiʼi y etelooʼ u chʼisaj kaʼ kuchi u yilooʼ u kiʼil a kuxtal ti bʼebʼeel tuwich a yokʼolkabʼ. Xoko Salmo 37:29; Hechos 17:26.

Tukajeebʼ jadʼi kuuchil päkʼaal Edʼen a kichʼpan kuuchil. Aj Adʼan etel ix Eva tzʼajbʼooʼ tiʼi kaʼ u tudʼes a yokʼolkabʼ etelooʼ u chʼisaj. Kaʼ kuchi u känäntooʼ a yokʼolkabʼ y chunchunbʼeelil kaʼ u suʼtesooʼ ti kichʼpan kuuchil. (Genesis 1:28) A yokʼolkabʼ maʼax bʼikʼin bʼel u kaʼa ti jobʼol. Bʼoch leʼekak ti kuuchil. Xoko Mateo 5:5.

Cha’ante a vid’eo’ K’u’ka’a u B’etaj a Yok’olkab’ a D’ioso?

2. Kʼuʼkaʼa maʼ kichʼpan kuuchil a yokʼolkabʼ aleebʼe?

Aj Adʼan etel ix Eva maʼ u tzʼoksajooʼ a Dʼioso, u men abʼeʼe a Jehovah u jokʼsajooʼ ichil u kuuchil a päkʼaal. Saʼti a kichʼpan kuuchil, y maʼax juntuul winik patal u kaʼ utzkinte tupach. A Bʼibʼle u yadʼaj «A yokʼolkabʼa tzʼabʼi ichil u kʼäʼ a kʼasa» —Job 9:24. Xoko Genesis 3:23, 24.

U tubʼsaj wa Jehovah kʼuʼ u yaax kʼatiintaj tiʼijooʼ a jente? Maʼ! Leʼek a noochtzil. Bʼel u kaʼa u jajkunte kʼuʼ a walak u yadʼik. (Isaias 45:18) Bʼel u kaʼa u utzkinte u kuxtalooʼ a kristiyaano jabʼix bʼikiʼ kaʼ u kʼatiintaj tukajeebʼ. Xoko Romanos 8:21.

3. Bʼikiʼ ti bʼel u kaʼa ti utzkinbʼäl a Kichʼpan Kuuchil?

A kichʼpan kuuchil bʼel u kaʼa ti utztal tuwich yokʼolkabʼ leʼek ti tanak u Reyil a Jesus tiʼi Dʼioso. Ichil a pʼisbʼaj u kʼabʼaʼ Armagedon, a Jesus bʼel u kaʼa u chʼaʼ u bʼejnil u ʼaanjelooʼ a Dʼioso kaʼ u jobʼsooʼ bʼoon mak a motz tiʼi a Dʼioso. Tupach abʼeʼe leʼek a Jesus bʼel u kaʼa u kʼälä a Satanas 1,000 jaabʼ. Jesus bʼel u kaʼa u chʼaʼ u bʼejnil y u känäntooʼ u jente a Dʼioso mentäk a maʼ jobʼolooʼ u kaʼa. Bʼelooʼ u kaʼa u yilaʼ u kiʼil a kuxtal ich Kichʼpan Kuuchil tuwich yokʼolkabʼ ti bʼebʼeel. Xoko Apocalipsis 20:1-3; 21:3, 4.

4. Bʼikʼin u jobʼol a yajilal?

Bʼikʼin u jobʼsik a yajilal a Dʼios tuwich a yokʼolkabʼ? A Jesusu u yadʼaj kʼuʼ u «pʼis» ti watak a jobʼolo. Leʼek a yajilal a tan aleebʼe tuwich a yokʼalkabʼ tan u yeʼik toʼon «ti watak a jobʼol.» Xoko Mateo 24:3, 7-14, 21, 22.

Leʼek ti tanak u gobʼiernar a Jesus ti 1,000 jaabʼ ti kaʼan yokʼol a yokʼolkabʼ, bʼel u kaʼa u jobʼes tulakal a yajilal. (Isaias 9:6, 7; 11:9) U laakʼ u meyaj tutzeel a Reyili, a Jesusu aj Noochil Mansaj Tʼan tiʼi kaʼ saʼtesabʼäkooʼ u sipʼil mak yaj u yubʼooʼ a Dʼioso. A Dʼioso bʼel u kaʼa u usarte a Jesus kaʼ u jobʼes a kʼojaʼanil, uchbʼental y kimil. Xoko Hechos 24:15; Isaias 33:24.

5. Mak a bʼel u kaʼa ti kuxtal tuwich a Kichʼpan Kuuchil a wataka?

Leʼek mak kaʼ u tzʼokes a Dʼioso bʼel u kaʼa ti kuxtal ichil a Kichʼpan Kuuchil. (1 Juan 2:17) A Jesusu u täkaaʼtajooʼ u yaj täkʼän ti kaʼ u käxtooʼ a walakooʼ u yemsik u bʼajili y tiʼi kaʼ u kaʼansooʼ tiʼi u pektzil a Dʼioso. Aleebʼe, A Jehovah tan u listartikooʼ ti milliones a kristiyaano ti kaʼ kuxlakooʼ tuwich a Kichʼpan Kuuchil a watak tuwich a yokʼolkabʼa. (Sofonias 2:3) Ichil u Kuuchil Muchʼtal ti Testigojooʼ tiʼi Jehovah, a kristiyaano tanooʼ u känik bʼikiʼ kaʼ kiʼ ichamtzilakooʼ, tattzil y ätantzil y naʼtzil. Tzʼubʼ etel u naʼ y u tat tanooʼ u tzʼeek u yanil a Dʼioso ich komonil y tanooʼ u känik bʼikiʼ kaʼ u yilooʼ u kiʼil a kichʼpan pektzil. Xoko Apocalipsis 15:4.